[A1621/1/3]*[print] [email] [cite] [preceding] [following]
The quhilk day the lordis appointit for the conference, with sindrie otheris of the nobilitie, haveing convenit and at lenth reasouned upoun the most probable and liklie meanis how to gif unto his majestie contentment and satisfactioun in the mater demandit be his majestie, and sindrie overtouris being maid thairanent, it wes proponed that this conventioun myght appoint some of thair nomber to stent the nobilitie and counsaill, quhairunto it wes ansuerit that this conventioun had no pouer nor authoritie to mak ony suche impositioun nor to nominat stentouris to that effect, and that it wes aganis his majesties command and directioun to raise ony taxatioun bot onlie to urge a voluntair contributioun; and sindrie difficultyes being propouned anent the contributioun, that it wald [nowther be]† honnorable to the cuntrey nor gif unto his majestie satisfactioun, [they]† thairfoir thoght meete that choise sould be maid of some fitte [personis]† to go to his majestie and to present unto his majestie the full assuirance of the hairtie affectioun of the nobilitie present to gif unto his majestie a reall, lairge and tymous supplee by suche meanis as may stand with his majesteis contentment and credite of the cuntrey, quhilk can not be bot by a taxatioun to be impoised upoun the haill bodie of the estate, without respect to ony manis privilege.
The quhilk day the lordis send for the provest and baillies of Edinburgh and imparted unto thame the demand maid be his majestie in the mater foirsaid, and delyverit unto thame his majesties first and secund lettres writtin to his majesties counsaill in that earand, willing the saidis provest and baillies to communicat the same to thair townis counsell and to return thair ansuer with diligence.
The provest and baillies off Edinburgh compeir and befoir the lordis declairit that thay had communicat the mater foirsaid to the townis counsell, whose ansuer wes that the letterz wer not directit to thame, and that thay wer bot ane burgh and could not do in suche a mater be thame selffis allone; and quhen the mater salbe comitted to the consideratioun of the haill burrowis, the toun of Edinburgh according to thair wounted maner sall kyithe thair affectionis to his majestie als realie and effectuallie as ony of thair rankis within the kingdome.
The advocatis, clerkis of the sessioun and writtaris to the signett being convenit be the lordis directione and his majesties letterz foirsaidis being send unto thame and thai commandit to returne thair ansuer thairunto, thay be thair commissionaris, to witt, Schir Williame Scott, Maister Thomas Nicolsoun and Adam Lawtie, returnit this ansuer: that thay wer bot members of the sessioun and quhen the haill bodie of the sessioun salbe convenit upoun this mater thay will then advise and gif thair ansuer accordinglie