[1617/5/38]*[print] [email] [cite] [preceding] [following]
Oure soverane lord, continewing in that purpois and resolutioun brede in his royall heart in his young yearis for making of offices of judicatorye in this kingdome as they ar in all weill governed staittis, imploymentis for men furnischit with giftis suittable to the dignitie and gravitie of the places quhairby manye abuses may be takin away, quhilkis in heretable offices of that kynd cannot be avoyded, the rightis thairoff falling oft tymes to wemen, to childrene or to men quha nather can discharge the place nor mak chois of sufficient deputtis; and yit his majestie, remaning constant in that course of myildnes and moderatioun so familiar to him, and being unwilling to tak the saidis offices frome the present possessoures thairoff quha and thair predicessoures have bruikit the samen monye yearis as thair inheritance without guid and competent satisfactioun to be gevin to thame be thair awin consent, haithe thairfore, with advyise of the estaittis of this present parliament, gevin and grantit and, be vertew of this present act, gevis and grantis full power and commissioun to Jhonne, archibischope of Sanctandros, Andro, bischope of Breichin, Jhonne, earle of Montrois, Thomas, lord Bynning, David, lord Scone, David, lord Carnegye, Schir George Hay, clerk of register, Schir Williame Oliphant, his hienes advocat, Schir Gedeoun Murray, thesaurer depute, and Schir Williame Seytoun of Kyilismure, knight, or to ony of thame, to travell and deall with the haill heretable schirreffis, stewartis and bailyeis within this kingdome anent the surrender of the saidis offices in his majestyes handis, and anent ane competent satisfactioun in honoure and utherwayis to be gevin to thame for the samene, and to mak ane faithfull repoirte to his majestie of thair procedingis thairin.
[1617/5/39]*[print] [email] [cite] [preceding] [following]
Oure soverane lord and estaittis of parliament, considdering the gryit abuses and delayis susteaned be his hienes liegis in persute of criminall causes before the justice and his deputtis in tyme bygane, and being maist willing to redres and amend the samen swa that justice heirefter may be equallie ministrat with expeditioun conforme to reasone and lawes of this realme, thairfore oure soverane lord and estaittis foirsaidis hes gevin and grantit, lyik as be the tennoure heiroff gevis and grantis full power and commissioun to Alexander, earle Dumfermeling, lord chancelar, Jhonne, earle of Mar, thesaurer, Thomas, lord Bynning, secretar, Schir Williame Oliphant, advocate, Schir Jhonne Cokburne, justice clerk, Maister Thomas Hope and Maister Thomas Nicolsone, advocattis, (or to ony fyve of thame conjunctlie, the saidis chancelar and secretare being alwayis tua of the fyve) to consult, conclude and put in wreate all sick goode ordoure, solide lawes and constitutiounes for proceding and doing justice to all pairties in persute and defence before the criminall judge and his deputtis in all criminall causes, quhairby goode and summer justice may be done and observed to all his hienes liegis without long delayes and extraordiner expensses; and decernis and declairis quhatsumevir ordoures of procedure, lawes and constitutiounes the foirsaidis commissioneris, or onye fyve of thame as said is, sall prescryve and sett doun to be observed in that court, the samyne sall stand as ane perpetuall law and have the strenthe, force and effect of ane act of parliament in all tyme cuming, siclyik and in the samen maner as gif the samen ordoures, constitutiounes and lawes had bene expreslie adwysit, sett doun and concludit in this present parliament.