Procedure: commission
Commissioun anent the erectionis

Oure soverane lord and estaittis of parliament, considering that thair is sindrie benefices pertening of auld to abbottis, priouris and nunnes erectit to sindrie persones in this present parliament be his hienes, with advyse of the saidis estaittis, in lordschippis and baroneis, and alsua that the patronages of the kirkis pertening to the saidis abbaceis, prioureis and nunreis ar gewin and annexit to the samin lordschippis and baroneis to the foirsaidis persones, as alsua that thair ar sindrie utheris patronages of benefices gevin and disponit be his hienes, with advyse foirsaid, in this present parliament to sindrie particular persones, and oure said soverane lord and estaittis foirsaidis, being maist willing that thair be ane yeirlie duetie contenit in everie ane of the saidis erectionis quhilk sall be payit yeirlie to his hienes and his successouris, as alsua being willing that the ministeris serveing or that heireftir sall serve at the kirkis of everie parsonage or vicarage quhairof the patronage is now disponit in this present parliament to quhatsumevir persone ather in thair erectionis or utherwayes be provydit of sufficient stipendis, and that the haill kirkis be plantit with sufficient ministeris to serve the cure at ilk kirk, sua mony of thame as ar alreadie unplantit, thairfoir, and that the premises may be performit, oure soverane lord and estaittis foirsaidis hes gewin and grantit, and be this present act, geves and grantis full power and commissioun to Johne, erle of Montrose, great commissionar, Alexander, erle of Dunfermeling, chancellar of this realme, Alexander, erle of Linlythgw, George, erle of Dunbar, thesaurer, David, lord of Scone, comptroller, Mark, lord Newbuttill, Maister Johne Prestoun of Pennycuk, collectour generall, Schir Thomas Hammyltoun of Monkland, knycht, advocat, Schir Johne Cokburne of Ormestoun, knycht, justice clerk, Schir Richard Cokburne of Clerkingtoun, knycht, lord privie seall, and Schir Johne Skene of Curryhill, knycht, clerk of register, (or ony sex of thame, the said lord commissionar being alwayes ane of thame) to modefie, decerne and declair the yeirlie duetie to be contenit in everie ane of the saidis erectionis, to be payit yeirlie to oure said soverane lord and to his hienes successouris, and the samin duetie to be insert be the clerk of register and his deputtis in everie act of erectioun grantit in this present parliament. And the saidis estaitis declaris that the yeirlie dueteis to be modefeit, decernit and declarit be the saidis persones in maner foirsaid be vertue of this present commissioun sall be alsua valide, effectuall and sufficient in the self as gif the samin yeirlie dueteis had bene modefeit, decernit and declarit be the saidis haill estaittis and had presentlie bene insert and contenit in everie ane of thair erectionis. And siclyk oure said soverane lord and estaittis foirsaidis hes gevin and grantit, lykas be the tennour of this present act, geves and grantis full power and commissioun to the said Johne, erle of Montrose, great commissioner, the said Alexander, erle of Dunfermeling, chancellar, Johne, erle of Wigtoun, lord Fleming, George, archibischop of Sanctandrous, Johne, bischop of Glasgow, David, bischop of Ross, James, bischop of Orknay, Schir Robert Melvill of Murdocarny, knycht, eldar, Maister Johne Prestoun of Pennycuk, collectour generall, Schir Thomas Hammyltoun of Monkland, knycht, advocat, Schir Johne Cokburne of Ormestoun, knycht, justice clerk, Maister Patrik Galloway, Maister James Nicolsoun, Maister Andro Lamb (or ony aucht of thame, the said lord commissionar or the said lord chancellar being alwayes ane), to modefie, decerne and declair to everie minister serveing or that heireftir sall serve, at everie kirk, the cure, thair yeirlie stipendis in all tymes cumming, by thair manses and gleib of all thair kirkis quhairof the patronages ar disponit be oure said soverane lord in this present parliament in the erectionis of temporall lordschippis and baroneis, or utherwayes quhatsumevir, to the effect that the haill kirkis baith alreadie plantit and as yit unplantit may be provydit to sufficient stipendis in all tyme cumming, and that everie kirk may be provydit to ane minister to serve the cure at ilk kirk, and that they have sufficient and competent stipendis provydit to everie ane of thame to serve the cure in all tyme cumming as said is. And oure said soverane lord and estaittis foirsaidis discharges the clerk of register and his deputtis of all buiking and extracting of ony actis of the saidis erectionis or ony uther act of this present parliament quhairin patronages of benefices ar disponit, and alsua discharges the keiparis of the registeris and seallis to exped ony of thair said infeftmentis unto the tyme that oure said soverane lordis yeirlie duetie, and the ministeris sufficient and competent stipendis, be first modefeit, decernit and declarit be the persones foirsaidis conforme to the tennour of this present act of commissioun in all pointis.

  1. NAS, PA2/16, f.59v-60r. Back
  2. 'P 23' written in margin beside heading. Back