[A1597/5/8]*[print] [email] [cite] [preceding] [following]
Forsamekle as it is undirstand to the kingis majestie, his nobilitie, counsale and esteatis presentlie convenit that the grite burnecoill ar commounlie transportit furth of this realme, not onlie be his hienes awne subjectis bot be strangearis quha at all tymes laidnis thair schippis and utheris veschellis thairwith, and transportis the same at thair plesure, usand the same as a commoun trade, altogidder without his majesteis licence or permissioun, to the grite hurte of the commounwele and expres aganis his hienes lawis, actis of parliament and sindrie proclamationis maid in the contrair. For remeid quhairof in tyme cuming, his majestie, with advise of his saidis nobilitie, counsaill and esteatis foirsaidis, ordanis lettrez to be direct chargeing officiaris of armes to pas, command and charge all and sindrie personis, alsweill strangearis as uthiris borne subjectis of this realme, be oppin proclamatioun at the mercat croceis of the heid burrowis of the same, that nane of thame tak upoun hand to transporte ony grite burnecoill furth of this realme at ony tyme heireftir, nor yit ladin thair schippis, crearis or utheris veschellis thairwith tobe transportit as said is, undir the pane of confiscatioun of the same coillis, crearis, schippis and uthiris veschellis to his majesteis use. Certifeing thame and thay do in the contrair, that the same coillis, schippis, crearis and veschellis salbe confiscat and intromettitwith all rigour and extremitie in example of uthiris; and, to this effect, to command and charge the provestis and baillies of the saidis burrowis, custumaris and sercheouris quhatsumevir to serche, seik, tak and apprehend all and sindrie personis, contravenaris heirof, keip and caus retene thair personis in warde within thair tolbuithis, fens and arreist thair schippis, crearis and veschellis, tak the saillis fra the rais and keip thame undir arreistment at his majesteis instance, quhairthrow thay departe not, notifeand thair names to his hienes that his majestie may giff forder directioun towardis thame as appertenis as the saidis provestis, baillies, custumaris and sercheouris will ansuer to his hienes upoun thair office and obedience.