[A1597/3/8]*[print] [email] [cite] [preceding] [following]
The kingis majestie, with advise of his nobilitie, counsale and esteatis presentlie convenit, hes gevin and grantit and be thir presentis gevis and grantis his hienes full pouer and commissioun, expres bidding and charge to his trusty and weilbelovittis Walter, commendatar of Blantyre, his hienes thesaurair, Maister Johnne Lindsay of Balcarras, his majesties secretair, Schir Robert Melvill of Murdocairny, knicht, Schir Johnne Cokburne of Ormestoun, knicht, justice clark, Maister Thomas Hammiltoun of Drumcairne, advocat, Mark, lord of Newbottle, Maister Johnne Prestoun of Fentounbarnis, Maister Edward Bruce, commendatair of Kinloss, Maister James Elphingstoun of Barnetoun, Maister Johnne Skene, clark of register, Maister David Carnegy of Culluthie, Schir Archibald Naper of Edinbillie, knicht, Maister George Young, archideane of Sanctandrois, Thomas Achiesoun, Thomas Foullis, or ony sevin of thame conjunctlie, to convene and meit within the burgh of Edinburgh upoun the first day of Aprile nixttocum, with certane commissionaris of the principall burrowis of this realme, and thair to treate, confer, aggree and conclude anent the payment to his majestie of the custum of all guidis alsweill tobe transportit furth of this realme as quhilkis salbe inbrocht within the same heireftir; as alsua anent the hamebringing of bulyeoun far the furnissing of his hienes cunyiehouse for the saidis guidis and all uthiris wairis and maircheandice quhilkis sall alsua be transportit furth of this realme or inbrocht within the same unto the tyme of his hienes nixt parliament allanerlie. The same aggreement and conclusioun to sett doun and putt in forme and the same to reporte to his majestie and his esteatis in the said parliament to be sene and considderit be thame, that, gif it be foundin meit and convenient tobe observit and followit oute, thay may giff thair ratificatioun and approbatioun thairunto and ordane the same to have full force, effect and executioun as a law at all tyme thaireftir. For quhilk purpois, his majestie sall not onlie be himselff consent to the said ratificatioun, bot als sall deale and procuir sa far as in him lyis to have the lyke consent and approbatioun thairof be the saidis esteatis; and in the meantyme, quhill the said parliament, his majestie, with avise of his saidis esteatis, grantis licence to quhatsumevir maircheantis, awnaris of the saidis guidis, to transporte the same guidis furth of this realme, thay finding cautioun to the custumaris of the burrowis and portis quhairfra the same guidis salbe schippit to pay quhatsumevir sowmes of money in name of custum as salbe aggreit upoun for the saidis guidis immediatlie eftir the same aggreement sall tak effect. Be it alwayes undirstand that incais the saidis commissionaris of burrowis sall not convene at the tyme foirsaid, or being convenit, the tennour and effect of thir presentis in thair default salbe frustrat, delayit and not tak effect nor executioun afoir the first day of Maii nixttocum, that than and in that cais all former actis and ordinanceis maid anent the uplifting of the saidis custumes in that forme prescrivit thairin sall tak effect and be putt to full and perfyte executioun thaireftir without contradictioun etc.