[1594/4/89]*[print] [email] [cite] [preceding] [following]
Oure soverane lord and estaitis of this present perliament ratifies, apprevis and for his hienes and his successouris perpetuallie confirmes the erectioun of the burgh of Abirdene in ane frie burgh, with all infeftmentis, privileges, richtis and titles maid and grantit be his hienes and his predicessouris unto thame of befoir, and decernis and declares the same to stand in the full strenth, force and effect in tyme to cum.
[1594/4/90]*[print] [email] [cite] [preceding] [following]
Oure soverane lord and estaitis of this present parliament ratifies, apprevis and for his hienes and his successouris perpetuallie confermis the charter and infeftment grantit be umquhile James the ferd of guid memorie, under his hienes greit seill, anent the erectioun and creatioun of the toun and landis of Turreff, with the pertinentis, liand within the schirefdome of Abirdene in ane frie burgh of baronie, with all privilegeis, liberties and immunities of frie burgeses, frie craftis, frie fares, oulklie mercat, bying and selling within the samyn mentionat in the said charter, togidder with all and sindre pointis, articles and clauses specifiit in the said charter, as the samyn of the dait the tent day of Merche the yeir of God jM vC fourscoir ellevin yeris beris; saulffand alwayes to oure soverane lord and his successouris service of burgh of baronie aucht and wont to his hienes and his predicessouris ofbefoir this present confirmatioun allanerlie. Attour oure said soverane lord and estaitis foirsaidis, be the tennour heirof, will and grantis and for his hienes and his successouris decernis and ordanis that this present confirmatioun is now and salbe in all tymes cuming off als greit force, strenth and effect as gif the foirnamit charter and infeftment wer word be word ingrossit in this present act; anent the quhilk and all defaltis and defectionis quhilkis may follow thairupoun oure soverane lord for his hienes and his foirsaidis dispenses for evir, [and ordanis ane act to be maid heirupoun in forme as efferis].†
[1594/4/91]*[print] [email] [cite] [preceding] [following]
Oure soverane lord, in presence of the estaitis of this present parliament, ratifies, apprevis and for his hienes and his successouris perpetuallie confirmis the acquittance and discharge grantit be his hienes, with avise of the lordis of secreit counsaill and of his hienes comptroller, to the provest, baillies, counsaill and communitie of the burgh of Dundie and thair successouris off the sowme of tuentie thousand pundis as that pert of his hienes tocher quhilk wer deponit and put in thair handis be the said comptrollair in his majesties name, and of the haill byrunnis of the yeirlie proffite of the said sowme off all yeris and termes preceding the dait heirof; granting thairwith lykwayis the contract and appointment maid permanent betuix the said comptroller in his hienes name on the ane of pert, and certane commissionaris of the burrowis of this realme on the uther pert, of the dait the [...] day of Julii jM vC fourscoir ten yeiris, to be fulfillit and kepit in all pointis conforme to the tennour thairof be the saidis provest, baillies, counsaill and communitie of the said burgh for thair pertis, as the samyn acquittance and discharge of the dait the sextene day of Maii lastbypast at mair lenth proportis; togidder with all and sindre pointis, articles, circumstances and conditionis mentionat thairintill, willing, granting and declaring that this present ratificatioun salbe als valide and effectuall as gif the foirnamit acquittance and discharge wer word be word ingrossit in this present act; anent the quhilk, and all defaltis and defectis that may follow thairupoun, his majestie and estaitis foirsaidis be thir presentis dispenses for evir.
[1594/4/92]*[print] [email] [cite] [preceding] [following]
Forsamekle as oure soverane lord hes gevin and grantit to his hienes darrest cousing Ludovic, duke of Lennox, erll Darnelie, lord Torboltoun, Methven and Aubigne etc. during all the dayis of his lyftyme all and haill the temporalitie of the priorie of Pluscarden, extending yeirlie to the sowme of sevin hundxeth merkis money, as in the gift of pensioun grantit to him thairupoun under the privie seill upoun the aucht day of November jM vC fourscoir tuell yeiris at mair lenth is contenit; and his majestie willing that the said gift may be sure to the said Ludovic, duke of Lennox for bruiking and joysing of the same and sowme of money abonespecifiit during the tyme thairin contenit, thairfoir oure said soverane lord and estaitis of this present parliament ratifies, apprevis and confirmis for his hienes and his successouris the said lettre of gift and pensioun off all and haill the temporalitie of Pluscarden, extending yeirlie to the said sowme of sevin hundreth merkis, in all heidis, pointis, articles, clauses and conditionis specifiit thairintill with all that hes followit thairupoun; and willis that this present ratificatioun and confamatioun is and salbe als valide, effectuall and sufficient to the said Ludovick, duk of Lennox as gif the said lettre of pensioun and gift wer expreslie insert heirintill, nochwithstanding the act of annexatioun maid in the perliament haldin at Edinburgh the xxix day of Julii jM vC fourscoir sevin yeris, to the quhilk this present ratificatioun sall mak expres dirogatioun safar as may be extendit to the said temporalitie of Pluscarden.
[1594/4/93]*[print] [email] [cite] [preceding] [following]
Oure soverane lord and the estaitis of this present parliament ratifies and apprevis the gift of the office of the keping of the castell of Edinburgh grantit be his majestie to his richt traist cousing and counsellour Johnne, erll of Mar, lord Erskin and Alloway etc., with the assignatioun of the money and wictuall assignit thairin far keping of the said castell etc., in all and sindre pointis, heidis, clauses and conditionis thairin contenit efter the forme and tennour thairof, to the effect the said assignatioun of the wictuall and money abonespecifiit contenit in the said gift appointit for sustentatioun of the said castell and keping thairof may be the mair effectuall. Oure said soverane lord and estaitis revokis, rescindis, cassis and annullis all and quhatsumevir pensionis, giftis, assignationis or ony uther dispositionis quhatsumevir maid be his hienes to the hurt and prejudice of the said assignatioun contenit in the said gift and quhilk may impeid and stay the peceable bruiking, uplifting and intrometting with the said wictuall and money thairin contenit in onywayes, decerning and declaring the samyn pensionis, giftes, assignationis and dispositionis to be null and of nane availl in all tyme cuming.
[1594/4/94]*[print] [email] [cite] [preceding] [following]
Oure soverane lord, the estaitis and haill bodie of this present perliament ratifies and apprevis and for thame and thair successouris perpetuallie confirmis the infeftment, viz: chartour, new gift and dispositioun thairin contenit, precept of sasing, with the instrument of sasing following thairupoun, maid and grantit be oure said soverane lord in the yeir of God jM vC fourscoir tuell yeris efter his grace perfite aige, generall and speciall revocationis to his weilbelovit and familiare counsellour David Seytoun of Parbroth, his hienes comptroller, and to the aris maill lauchfullie gottin or to be gottin of his bodie, quhilkis falyeing, to his narrest and lauchtfull aris maill quhatsumevir berand the armes and surname of Seytoun, off all and haill the landis and baronie of Parbroth, annexis and connexis thairof, haill landis, mylnis, towris, fortalices, maner places and utheris quhatsumevir at mair lenth specifiit and contenit in the samyn infeftment, in all pointis, heidis, articles, clauses, conditionis, provisionis, circumstances, privilegeis and liberties quhatsumever thairin mentionat; and willis and declaris that this generall ratificatioun and approbatioun of the foirnamit infeftment, viz: chartour, precept and instrument of sasing following thairupoun is and salbe in all tymes cuming off als greit force, strenth and effect to the said David Seytoun of Parbroth and his aris maill abonewrittin as gif the foirsaid haill infeftment, viz: chartour, precept and instrument of sasing haid bene at lenth word be word ingrossit and insert heirin.
[1594/4/95]*[print] [email] [cite] [preceding] [following]
Oure soverane lord and estaitis of this present perliament ratifies, apprevis and for his hienes and his successoris perpetuallie confirmes the chartouris and infeftmentis efter specifiit maid, gevin and grantit be his hienes or be the uther personis undirwrittin, ather to his weilbelovit clerk and counsellor, Alexander Hay of Eister Kennet, clerk of register, or to Maister Johnne Hay, his eldest sone, ane of the clerkis of counsaill, and to the personis thairin and efter mentionat off the landis, annuelrentis, teyndschaves and utheris respective undirwrittin thairin specifiit, viz: ane of the saidis charteris maid and grantit be his hienes to the said Maister Johnne Hay, his aris maill and assignais quhatsumevir heretablie off all and haill the place and ground quhairupoun the chapell of the preceptorie of Sanct Anthonis stude and wes biggit, with the kirk yard, mansionis, houses, bigingis, chalmeris, yardis and orcheardis of the samyn and haill pertinentis thairof; as also of all and sindre the landis, tenementis, annualrentis, teyndschaves and utheris teyndis, fruittis, [...] particularlie thairin and under specifiit, firmes, tennentis, tennandrie and service of frie tennentis thairof, with the haill pertinentis of the same, and all uthairris commodities quhilkis justlie pertenis to the said preceptorie and patrimonie thairof, or quhilkis the preceptoris of the same in ony tyme bygane bruikit or possest, as the said charter of the dait at Dalkeith the xxviij day of Merche jM vC lxxxxj yeris at mair lenth beris. Ane uthair chartour of fewferme maid, gevin and grantit be Frances, sumtyme† in perliament, with consent of dyvers personis thairin specifiit at quhais instance he was interdytit, to the said Alexander Hay of Eister Kennet and Marioun Farquhar, his spous, the langest levair of thame tua, for all the dayis of thair lyftymes, and to the said Maister Johnne and his aris maill quhatsumevir, off all and haill the landis of Tillimad and Bullerisbuchane, with the craigis and fischingis of the same and haill pertinentis thairof, lyand in the lordschip of Slanis and schirefdome of Abirdene, off the dait at Striviling, the ferd day of November the yeir of God jM vC fourscoir fyve yeiris, with the charter of confirmatioun thairof of the dait at Edinburgh, the xxvij day of August the yeir of God jM vC fourscoir tuell yeiris; togidder with ane uther chartour maid be his hienes, with avise of his majesties thesaurair and comptroller, to the said Maister Johnne Hay and Maroun Drummond, his spous, and langest levair of thame tua, in conjunctfie and thair aris maill and of tailyie thairin specifiit, off all and haill the landis of Eister Kennet, with tennentis, tennandrie, service of frie tennentis, with the haill pertinentis thairof lyand contigue togidder within the schirefdome of Clakmannan; as also of all and sindre the akaris, croftis, landis, annuelrentis and superiorities respective undirwrittin, with the pertinentis and utheris thairin specifiit, as the samyn of the dait at Haliruidhous, the tuentie sevint day of December jM vC fourscoir threttene yeris beris, notwithstanding quhatsumevir oure said soverane lordis revocatioun, act or constitutioun maid heirtofoir or in this present perliament under the quhilkis the saidis charteris and infeftmentis sall nevir be comprehendit, bot the samyn to be guid, valide and sufficient to the said Maister Johnne and utheris thairin mentionat for bruiking of the landis and utheris thairin contenit. Lyk as his hienes renuncis all actioun and instance competent to his majestie for impugning and quarrelling of the same or ony of thame, cum pacto de non petendo, and with supplement of all faltis, alsueill not namit as namit, quhilk his hienes and estaitis foirsaidis wilhave as for expressit in the said act and to be als sufficient as the same wer insert and incorporat in this present act.
[1594/4/96]*[print] [email] [cite] [preceding] [following]
Oure soverane lord and estaittis of perliament, acknaulegeing and remembering the ernist favour, guidwill and effectioun evirborne to his hienes service be his traist counsallour Maister Peter Young of Seytoun, his hienes maister elemosinar, ane of the lordis of his hienes privie counsall, quha nocht onlie at his hienes desyre tuik severall jornayis from this realme as his hienes ambassadour to the realme of Denmerk, speciallie in the moneth of Julii the yeir of God jM vC fourscoir sex yeiris and in the moneth of Maii the yeir of God jM vC fourscoir sevin yeiris, in treating and concluding upoun the heidis of his majesties maist honourable meriage with his hienes derrest and weilbelovit spous, Anna, now quene of Scottis, bot alsua upoun the suddante, at his hienes requeist, tuik vayage and accumpaneit his majestie to the realme of Norroway to the solempnizatioun of the said mariage in the moneth of October the yeir of God jM vC lxxxix yeiris, and remaning with his hienes quhill the moneth of December the yeir of God foirsaid that he wes directit with his majestie to returne within this realme for his majesties speciall adois within the samyn. Lyk as the said Maister Peter in the moneth of Aprile last is direct be his majestie with his hienes speciall commissioun as his hienes ambassadour to his hienes derrest bruthair the king of Denmerk and sindrie princes of Germane for treating and concluding of sindrie his hienes effairis, quhair the said Maister Peter is presentlie to his grit charges and expenses. And oure soverane lord, not willing that the said Maister Petir salbe in onywise hurt be ony deid to be done in his hienes present perliament, bot rathair to mak his spous and bairnis suir of all richtis and titill of quhatsumevir landis or pensionis acquirit be him ofbefoir, thairfoir oure said soverane lord, with avise of the saidis estaittis, hes allowit and be thair presentis allowis all thingis done be the said Maister Petir as ambassadour for his hienes in his said jornayis, his away passing, attending and accumpanying of his majestie and returning in maner foirsaid as maist acceptable, guid and thankfull service done to his majestie for the weill of his haill realme; and siclyk oure said soverane lord, with avise foirsaid, in pert of recompance of his said service and expenses maid in the saidis weyages, of his certane knawlege, hes ratefeit and approvin and be thair presentis ratefeis and apprevis and for his hienes and his successouris perpetuallie confermis the act maid in his hienes parliament the xxix day of Julii the yeir of God jM vC fourscoir sevin yeiris ratefeand and appreveand certane giftis of pensionis, offices and feis thairin mentionat grantit to the said Maister Petir Young, his spous and bairnis and assignais respective thairin contenit, togidder with the infeftmentis, charteris, preceptis and instrumentis of seasing grantit to the said Maister Peter, his spous and thair airis thairin contenit of the landis of Eister Seytoun and schadow half of Dykmontlaw, with the pertis, pendiclis and pertinentis thairof lyand within the schirefdome of Forfar and of all that hes followit or may follow thairupoun, togidder also with the gift of pensioun grantit be his hienes to the said Maister Peter of the males, fermes, proffittis and dewties of the landis of Wester Seytoun occupeit be Williame Auchterlonie and synnehalf of Dykmontlaw occupeit be Andro Annand, all lyand within the lordschip of Abirbrothok and schirefdome foirsaid, togidder with his hienes promeis maid to the said Mr Petir for warrandice of the saidis giftis, infeftmentis and uthairis foirsaidis and with all decreittis gevin conforme thairto; quhilkis infeftmentis, act of perliament, giftis of pensioun, offices, promises, decreittis and uthairis foirsaidis and all that hes followit thairupoun in all heidis, clauses and circumstances of the samyn, oure said soverane lord and his estaittis foirsaidis, of certane knawlege, ratefeis, apprevis and confirmis for his hienes and his successouris in tyme cuming, and findis and declairis that all and sindrie the saidis infeftmentis, giftis of pensioun, offices and feis contenit thairin, act of perliament ratefeand the samyn and uthairis respective foirsaidis maid and gevin in maner foirsaid ar maid for just and ressounable causes tending to the weill of oure soverane lord, his realme and legis, and thairfoir decernis and ordanis the samyn to stand in full force, strenth and effect in all tymes cuming, and declairis that the samyn, nor nane of thame, fallis nor sall fall under quhatsumevir his hienes revocationis maid in this present perliament or at ony tyme preceding the dait heirof. And als oure said soverane lord and his estaittis foirsaidis decernis, statutis and ordanis that the act maid in favouris of the ministrie the fourtene day of Februar the yeir of God jM vC fourscoir sevin yeiris sall nawise tueich nor be hurtfull to the said Maister Peter nor his foirsaidis nor be prejudiciall to thair rytis and titlis of thair pensionis above specifiit and deuties thairin contenit, bot the samyn to stand in the awin strenth, force and effect als largelie as gif the saidis richtis had bene maid and grantit be oure soverane lord efter his perfite aige of xxv yeiris compleit; and declairis the samyn nawise to cum under the said act, and ordanis the said Maister Peter and his foirsaidis to be answerit and obeyit thairof conforme to thair saidis giftis, notwithstanding the said act. And for his hienes saidis counsallouris, thair better securitie of† premises, oure said soverane lord, with avise foirsaid, hes of new grantit and disponit to his saidis counsallouris the foirsaidis haill richtis respective abonementionat and ordanis the samyn to be renewit in the maist ample forme. And forder declairis, statutis and ordanis that na act nor statute maid in this present parliament sall hurt or be prejudiciall to the said Maister Petir, his spous and bairnis in ony of thair richtis foirsaidis or ony uthair rycht that thai have to ony landis, pensionis or possessionis, bot thay sall bruik the samyn frelie conforme to thair richtis notwithstanding ony act maid heirtofoir in thair prejudice.
[1594/4/97]*[print] [email] [cite] [preceding] [following]
Oure soverane lord and thrie estaitis of this perliament, understadand that his hienes efter his perfite aige of tuentie fyve yeris compleit and last and generall revocatioun in the moneth of Januar the yeir of God jM vC fourscoir ellevin yeiris, be his hienes chartour under the greit seill, hes gevin, grantit and disponit to Schir James Douglas of Drumlangrig, knicht, and his aris mail quhatsumevir berand the surname of Douglas and armes of the hous of Drumlangrig, all and sindre the landis, baronies and utheris undirwrittin, with castellis, towris, fortalices, maner placis, woddis, mylnis, multuris, fischingis, tennentis, tenandries and service of frie tennentis, advocatioun, donatioun and richt of patronages of kirkis and chaiplanries, outsettis, pertis, pendicles, annexis, connexis, dependances and pertinentis thairof and utheris efter specifiit, viz: all and haill the landis and baronie of Drumlangrig, with castellis, touris, fortalices, maner places, corne milnes and walk mylnis and suckin of the samyn, woddis, parkis, fischingis on the watter of Nyth and thair pertinentis, liand within the schirefdome of Drumfreis; all and haill the landis and baronie of Tibberis, with the castell and castelmoit thairof, with the corne mylnis and walk mylnis of the samyn, tennentis, tennandries and service of frie tennentis of the same and all thair pertinetis; all and haill the ten merk land of auld extent of the toun of Dalgarnok; all and haill the fiftie s. land of the same extent of Glencorse and Drumfoidyeane, with the pertinetis, liand within the said schirefdome of Drumfreis; all and haill the landis and baronie of Hawik, alsueill propirtie as tennandrie, viz: in propirtie the toun of Hawik, with the mylne thairof, the landis of Eist Manys, West Manys, Cruhauch and Kirtoun of Manys, Flekis, Maisterayneis, Ramsay Clewis, Braidley, Teyndsyde, Carling Pule and Almouslandis, and in tennandrie the landis of Howpaislott, Chisholme, Quhithop, Drydane, Commounsyd, Owir Harwoid, Emeschellis, Nethair Harwoid, Weyndislandis, Eister and Wester Hessilhoip, Langhauch, Lawis, Toftis, Kirkwod, Harwodhill, Quhitchester, Fynnik, Edyerstoun, Edyerstoun Scheillis and Quhawmes, with tennentis, tennandrie, service of frie tennentis, advocatioun, donatioun and richt of patronage of kirkis and chaiplanries of the samyn; and all and sindre thair pertinentis liand within the schirefdome of Roxburgh; all and haill the landis of Knok, Auchinskeoch, Mekilholme, Curew, Dulfibbill and tua Garwaldis, extending in the haill to fourtie aucht pund land of auld extent, with mylnes, multuris, tennentis, tennandries and service of frie tennentis of the samyn and the pertinentis, liand within the baronie of Kirkmichaell and schirefdome of Drumfreis foirsaid; all and haill the ten pund land of Carutheris, Downnabie and Kirktilclosch, with the pertinentis, liand within the stewartrie of Annerdaill; all and haill the xx lib. land of auld extent of Mouswald, Howquhat and Haitland Hill, with the tour, fortalice, mylnis, advocatioun and donatioun of the kirk of Mouswald; all and haill the tuentie pund land of Logane, tenement, with the mylnis and pertinentis; all and haill the ten pund land of auld extent of Dronnok, with the half of the fisching of the samyn; all and haill the xl s. land of Cummertries; all and haill the merk land of Stanereis; all and haill the tuentie pund land of Pendersax, with advocatioun and donatioun of the kirk of the samyn; all and haill the ten pund land of Mydilbie, with advocatioun and donatioun of the kirk of the samyn; all and haill the fyve merk land of West Skalis; all and haill the tua merk land of auld extent of Hoddum; all and haill the markland of the Holmes of Annand callit the Blewberrielandis; all and haill the merk land of Wastwod; all and haill the tuentie s. land of Reidhall, with castellis, towris, fortalicies, maner places, mylnis, multuris, tennetis, tennandries, service of frie tennentis off all and sindre the saidis landis liand within the said stewartrie of Annardaill; all and haill the ten pund land of auld extent of Almernes, with the maner place, houses, biggingis, fischingis, fische yairis and pertinentis; all and haill the fyve merk land of auld extent of Cragmowe, with maner place, houses, bigingis, pertis, pendicles and pertinentis liand within the stewartry of Kircubreich, togidder with the advocatioun, donatioun of the paroch kirkis and perrochynnis of Kirkbryd and Durisdeir, all unite, annext, creat and incorporat ofbefoir in ane haill and frie baronie of Drumlangrig; and als all and haill the fyve merk land of Ardis, with the pertinentis, liand within the baronie of Corsmichaell and stewartrie of Kircubreich, togidder with the advocatioun and donatioun of the paroche kirk and perrochin of Glencarne, baith personage and vicarage, liand within the said schirefdome of Dumfreis; and hes unite the said fyve merk land of Ardis with the advocatioun and donatioun of the said paroche kirk of Glencarne in and to the said baronie of Drumlanrig; and als hes disponit to the said Schir James and his aris maill foirsaidis the advocatioun and donatioun of the perroch kirkis of Penpount, Mortoun and Dalgarnok liand within the said schirefdome of Dumfreis, and hes unite the same with the said baronie of Drumlangrig, to remane with the said Schir James and his aris foirsaidis; and hes erectit the saidis haill landis and baronies and utheris respective foirsaidis in ane frie regalitie with frie chappell and chancellarie within the boundis thairof, with all privilegis, liberties and jurisdictionis of the said regalitie siclyk and als frelie in all respectis as ony regalitie hes within this realme, as the said charter of unioun and erectioun of the dait foirsaid at mair lenth proportis; thairfoir oure said soverane lord, with advise of the saidis estaitis of perliament, hes ratifiet, apprevit and confirmit and be the tennour heirof, for his hienes and his successouris, ratifies, apprevis and perpetuallie confirmis the said charter, donatioun, unioun and erectioun thairin contenit with all and sindre pointis, passages, clauses, articles and conditionis specifiit thairin, and with all uther infeftmentis, richtis and titillis quhatsumevir maid and grantit to the said Schir James and his foirsaidis of the foirnamit baronies and uthairis befoir rehersit; and decernis and declaris the samyn to be ane perpetuall richt to the said Schir James and his aris maill foirsaidis off the haill landis, baronies and utheris particularlie abone contenit, and to be als sufficient as gif the said charter wer at lenth insert heirintill. Provyding alwayes that the said Schir James sall resinge and renunce the advocatioun and donatioun of the said paroch kirk of Dalgarnok to Thomas Kirkpatrik of Cloisburne, his aris and assignais, utherwyis this present ratificatioun and the said charter sall not be extendit to the said advocatioun and donatioun of the said kirk bot the samyn salbe null in that point allanerlie.
[1594/4/98]*[print] [email] [cite] [preceding] [following]
Oure soverane lord and estaitis of this present perliament, for the guid, trew and thankfull service done to his hienes at dyvers tymes ofbefoir be his hienes weilbelovit Schir James Scrymgiour of Duddop, knicht, and hes ratifiet, approvin and confirmit and be the tennour of this present act ratifies, apprevis and confirmis the infeftment, donatioun and dispositioun thairin contenit maid and grantit be oure said soverane lord efter his hienes perfite age of tuentie ane yeris compleit and revocatioun generall to the said Schir James Scrymgeour and to his aris maill lauchtfullie gottin or to be gottin of his bodie, quhilkis falyeing, to James Scrymgeour, lauchtfull sone to Robert Scrymgeour, quha wes father bruther of the said Schir James, and the aris maill to be lauchtfullie gottin of his bodie, quhilkis also falyeing, to certane uther personis and thair aris maill and of taillie nominat in the said infeftment, off all and sindre landis, baronies, mylnis, multuris and utheris thairin contenit, unite and annexit be vertew of the said infeftment in ane haill and frie baronie to be callit in all tymes cuming the baronie of Dundie, and grantand the tower and fortalice of Dudop to be the principall messuage of the said baronie, and that the sesing tane be the said Schir James and to be tane be his aris in tyme cuming salbe sufficient at the said messuage of Duddop, notwithstanding that the saidis landis, baronies and utheris thairin contenit lyis not contigue and togidder bot in dyvers places and schirefdomes, quhilk infeftment contenis also ane new dispositioun grantit be his hienes to the said Schir James and his aris maill and of tallie foirsaidis off all and sindre the landis, baronies, mylnes, multuris, woddis, fischingis and utheris particularlie thairin expressit, with advocatioun, donatioun and richt of patronage of the personage of the kirk and perochin of Dundie, with all richt and titill, entres, actioun and clame of richt, baith petitor and possessour, that his hienes, his predicessouris and successouris had, hes or may pretend thairto be quhatsumevir maner of way ac cum supplemento omnium defectum etc., as the said infeftment of the dait at Halruidhous, the fyftene day of November the yeir of God jM vC fourscoir, past under his hienes greit seill, at mer lenth proportis. And farder his hienes and estaitis willis, grantis, statutis and ordanis that this present confirmatioun salbe als guid, valide and effectuall to the said Schir James, his aris maill and assignais as gif his said infeftment wer at lenth insert in this present act and registrat in the buikis of perliament; and also statutis and ordanis that the saidis infeftment and this present act salbe guid, valide and sufficient richtis to the said Schir James and his foirsaidis for bruiking and joysing heretablie in tyme cuming alsueill of all and sindrie the landis, baronies, mylnes, multuris, woddis, fischingis and utheris expressit and contenit in the said infeftment as of all and sindre bandis, fies, custumes, assises, rentis, proffittis, privilegeis, immunities and dewties quhatsumever grantit be his hienes or ony of his maist noble progenitouris to the said Schir James or ony of his predicessouris, ather as constable of Dundie for using of the office thairof, or for the bearing of his hienes baner in tyme of weir, or for quhatsumevir uther caus or occasioun bypast to be intromettitwith, upliftit, ressavit and disponit be him and his foirsaidis in tyme cuming siclyk and als frelie in all respectis as he or ony of his predicessouris did ofbefoir.
[1594/4/99]*[print] [email] [cite] [preceding] [following]
Oure soverane lord, with avise and consent of the estaitis of this present perliament, hes ratifiit, apprevit and confirmit and be the tennour heirof ratifies, apprevis and confirmes the infeftment of fewfirme, locatioun and dispositioun thairin contenit, maid and grantit be his hienes efter his perfite aige of tuentie fyve yeris compleit and revocatioun generall, with avise and consent of his hienes ordiner officiaris of estait, to his hienes lovit David Scrymgeour of Fordie and to his aris maill berand the surname and armes of Scrymgeour and assignais quhatsumever heretablie off all and haill the toun and landis off Fordie, with mylne, multuris, pertis and pendicles thairof and all thair pertinentis liand within the prochin of Carpett, lordschip of Dunkeld and schirefdome of Perth, togidder with the advocatioun, donatioun and gift of patronage of the chaiplanrie and alterage of Sanctroche liand beside the Cowgait port of the burgh of Dundie and schirefdome of Foirfair, with all lands, tenementis and annuelrentis pertenand to the said chaiplanrie quhairevir the samyn ly within this realme, unit and annexit in ane haill and frie tennendrie to be callit the tennandrie of Fordy, and contenand ane new dispositioun cum supplemento omnium defectum to be haldin of oure said soverane lord and his hienes successouris in fewfirme and heretage for payment of certane few maill specifiit and contenit in his hienes few charter and infeftment maid to the said David and his foirsaidis thairupoun, as the samyn past under his hienes greit seill off the dait at Edinburgh, the fyftene day of August the yeir of God jM vC fourscoir tuell yeiris at mair lenth proportis; quhilk few charter and infeftment, locatioun and dispositioun thairin contenit and sasing following thairupoun oure said soverane lord and the estaitis of perliament ratifies, apprevis and confirmes in all the heidis, articles and clauses thairof, and consentis and declaris that this present ratificatioun sall be als guid and sufficient to that effect as gif the said haill infeftment wer at lenth registrat and contenit heirunto, notwithstanding the non inserting thairof; quhairanent his hienes, for him and his successoris, dispenses in that pert be thair presentis for evir.
[1594/4/100]*[print] [email] [cite] [preceding] [following]
Oure soverane lord, with avise and consent of the estaitis of this present perliament, ratifies, apprevis and perpetuallie confirmis the infeftment and dispositioun maid be his hienes efter his majesties perfite aige of xxj yeiris and generall revocatioun maid in perliament to Johnne Hay of Lochloy, his aris maill and of tallie and assignais quhatsumevir off toun and landis of Lochloy, with the mylnis of the same, off the landis of Perk, with the outsettis and pendicles thairof callit Knokowdie, Newtoun and Hunterbrig, the landis of Inscheoche, with the mansioun, ture and fortalice, orcheardis, yardis, houses and biggingis, with the outsettis and pendicles of the same callit the Heid Paddok Furd, Milnehill, Mortoun, Kilhill and Loneheid, the landis of Knoknagilyie, Urchnie and Lurmoir, with the fischingis of the saidis landis of Lochloy and Inschoik, alsweill of salmond as of uther fische in fresche watterris and salt, with the forrest of Lochloy, togidder with all uther woddis, perkis, pairtis and pendicles, off all and sindre the foirsaidis landis and pertinentis of the same usit and wont; all and sindre the toun and landis of Kinnowdie, with the croft of the same callit the Ailhous croft, with the pertis and pendicles liand within the schirefdome of Narne; and als all and haill the landis of Grony and Fingask, with the croftis of the same and partis and pendicles thairof liand in the baronie of Aird, lordschip of Lovet and schirefdome of Invernes disponit in warrandice of the saidis landis of Kinnwdie and Ailhous croft, with the pertis and pendicles, as in the said infeftment under his hienes greit seill off the dait the tuentie day of Februar jM vC lxxxviij yeris at mer lenth is contenit; and decernis and declaris the same infeftment, precept and instrument of sasing following thairupoun to have full effect and strenth in all tyme cuming, and the samyn to be ane perpetuall richt to the said Johnne and his aris foirsaidis to bruik the saidis landis according to the tennour thairof.
[1594/4/101]*[print] [email] [cite] [preceding] [following]
Oure soverane lord, having consideratioun of the guid, trew and thankfull service done to his majestie be Johne Arnote, burges of Edinburgh, has, with avise of the estaitis of this present perliament, decernit, declarit and ordanit that the said Johnne and his aris sall peceablie bruik and joyse the toun and landis of Wester Creichtoun, the landis of Thornydikis and Nethair Haillis, with the haill landis and lordschip of Colbrandispeth, with annexis, connexis, pertis, pendicles and pertinentis thairof, and all uther landis quhatsumevir, alsueill kirklandis as utheris liand within the town and Manis of Colbrandspeth, conforme to the saidis Johnis richtis and titillis maid to him of the samyn, quhairof he has now presentlie the possessioun, lyk as he has had thir dyvers yeris bygane be uptaking of the males and dewties thairof; and this notwithstanding of the restitutioun of ony personis heirtofoir foirfaltit or yit be the foirfaltour led or to be led and deducit presentlie or at ony tyme heireftir aganis ony of the superioris of the saidis landis, or be ony uther lawis, constitutionis, revocationis, dissolutionis or actis of perliament quhatsumever quhairby the said Johnne or his authouris richtis may be quarrellit or callit in questioun, quhilkis oure soverane lord, with avise of his saidis thre estaitis, haldis heir as expressit, and that this generalitie thairof salbe als sufficient as gif everie act, constitutioun, dissolutioun, foirfaltour, restitutioun or revocatioun war heirin expressit, and ane speciall reservatioun and exceptioun of the said Johnis richt of the landis abone specifiit reservit and exceptit thairinto, dischargeing his majesties thesaurair, comptroller and advocat or ony uther having pouer or richt of his majestie to quarrell, truble or molest the said Johnne or his aris in the peceable bruiking and joysing of the landis abonewrittin and everie pert thairof for ony caus bygane, quhairof his hienes, with avise foirsaid, has declarit and declaris this present act to be ane supplement of all faultis alsueill as gif provisionis and remedies necesser wer speciallie mentionat and expressit heirin.
[1594/4/102]*[print] [email] [cite] [preceding] [following]
Oure soverane lord, having consideratioun of the guid, trew and thankfull serrvice done to his hienes be his hienes servitour Capitane Patrik Cranstoun, with advise and consent of the estatis of this present perliament, ratifies and apprevis his hienes giftes and dispositionis gevin and grantit to the said Capitane Patrik off theis monkis portionis out of the abbacie of Scone, quhilkis pertenit ofbefoir to umquhileis dene Robert Carver, dene Johnne Blaw, deane Johnne Purdaly and deane Williame Donaldsoun, and siclyk thai portionis out of the abbacie of Croceragwell quhilk sumtyme was bruikit and possest be umquhile dene Johnne Mure, elder, and dene Michaell Dewar, togidder with all privilegeis contenit in the samyn; and willis that his saidis hienes giftes stand in full force and effect to the said Capitane Patrik during all the dayis of his lyftyme.
[1594/4/103]*[print] [email] [cite] [preceding] [following]
Oure soverane lord, having consideratioun of the faithfull service done be Maister Henrie Keir of Greneland, his domestik serrvitour, nocht onlie to him selff bot also to the quene, his majesties umquhile darest mother, having continuit lang in hir service as ane of hir secretaris with small commoditie, as yit, albeit he had his majesties promeis of recompance, and speciallie quhen the said Maister Henry at his majesties desire renuncit and gaif owr the landis of Helderhaill, being ten or tuell chalderis wictuall be yeir in heretage upoun assurit promeis of ane just recompans; for acknawlegeing of ane pert thairof, his majestie, with avise of the estatis of this perliament, hes ratifiit, apprevit and confirmit ane yeirlie pensioun of tua chalderis wictuall, half malt and half meill, disponit to the said Maister Henrie and to George Keir, younger, his sone, during thair lyftymes be Maister Williame Erskin, now archebischop of Glasgw, with consent of his majestie, and of his traist cousing Ludovic, duke of Lennox, to be upliftit furth of the reddiest of the fruittis, proventis and emolumentis of the said bischoiprie, as at mer lenth is contenit in the said gift, in all pointis, articles and clauses of the same; and willis and declaris that the said gift and dispositioun sall stand for ane perpetuall securitie to the saidis Maister Henrie and his sone during thair lyvetyme and the langest levair of thame tua. And that but ony impediment of ony taxatioun, compositioun or contributionis to be pait be thame for the same, or yet subject to ony reductioun incace the pensionis of the said archebischoprie be onyway quarrellit for dilapidatioun of the fruittis of the same or dispositioun of mair nor the thrid thairof in pensioun; and notwithstanding of the act of annexatioun, ordaning na pert of the temporall landis to be disponit bot in augmentatioun of the rentall, and of all utheris actis of annexatioun and ratificatioun maid or to be maid repunging heirto, with the quhilkis haill his majestie dispenses thairanent; and declaris that the said gift and pensioun salbe nawyis subject thairunto na mair then that the said gift of pensioun had bene specially contenit and reservit thairin, renunceing all actioun and instance that his majestie has or may have for impunging and quarrelling of ony pert of the said pensioun or validitie thairof; and dischargis his majesties thesaurair, collectour, comptroller and advocat of all persewing, molesting or trubling of the saidis Maister Henrie and his sone in the peceable bruiking of the same pensioun during thair lyftymes.
[1594/4/104]*[print] [email] [cite] [preceding] [following]
Oure soverane lord, estaitis and haill bodie of this present perliament ratifies and apprevis and for thame and thair successouris perpetuallie confermis all charteris, locationis and dispositionis thairin contenit maid and grantit be umquhile Patrik, archebischoip of Sanctandrois to George Haliburtoun of Ballridie, Mergaret Drumbrek, his spous, the langest levair of thame tua in conjunctfie, thair aris, assignais and successouris quhatsumevir off quhatsumevir pertis or portionis of the town and landis of Kincapill, fewfirmes thairof or of ony pairt of the same toun and landis, superioritie, office of balliarie and jurisdictioun of the saidis landis liand within the regalitie of Sanctandrois and schirefdome of Fiff, with the preceptis and instrumentis of sasing following thairupoun, togider with the charter of confirmatioun contening thairintill ane new gift of the foirnamit landis, fewfirmes and utheris befoir specifiit maid, gevin and grantit be oure said soverane lord to the saidis George Haliburtoun, Mergaret Drumbrek, his spous, and thair foirsaidis in the yeir of God jM vC fourscoir threttene yeiris, past under his hienes greit seill, ratifeand and confirmand the foirsaidis charteris grantit be the said umquhile Patrik, archebischoip of Sanctandrois with the precept and instrument of sasing following thairupoun in the haill pointis, heidis, articles, clauses, conditionis and provisionis, circumstances, liberties and privilegeis quhatsumevir mentionat in the foirnamit charteris, preceptis, instrumentis of sasing, charter of confirmatioun abonewrittin or ony ane of thame; and willis and declaris that this generall ratificatioun and approbatioun thairof is and salbe in all tymes cuming of als greit force, strenth and effect to the said George, Mergaret, his spous, and thair foirsaidis as gif the foirnamit haill infeftmentis, chartouris, preceptis, instrumentis of sasing, confirmatioun befoir rehersit, precept and instrument of sasing following thairupoun had bene at lenth word be word ingrossit and insert heirin.
[1594/4/105]*[print] [email] [cite] [preceding] [following]
Oure soverane lord and estaitis of this present parliament ratifies and apprevis and for his majestie and his successouris perpetuallie confirmis the gift and dispositioun maid be his hienes to Alexander Hay, than director of the chancellarie and now clerk of register, of the annuellis, firmes, fewdewties and utheris quhilkis sumtyme pertenit in commoun to the chaiplanis and vicaris of the cathedrall kirk of Abirdene, to be uptane out of certane landis, biggingis, watteris and possessionis within and about the burgh of Abirdene, as in the said charter contening the haill anuellis, sumes and dewties in perticuler of the dait the tent day of Februar jM vC lxxiiij yeiris at mair lenth is contenit; and decernis and declaris the samyn heretable gift and dispositioun of the samyn annuellis to be ane perpetuall richt to the said Alexander, his aris and assignais for bruiking of the same, and ordanis the said gift and dispositioun to stand in the awin full strenth, force and effect in all tyme cuming.
[1594/4/106]*[print] [email] [cite] [preceding] [following]
Oure soverane lord and estaitis of this present perliament, remembring the guid, trew and thankfull service done to his hienes be Williame, commendater of Pettinveme, alsweill within the realme as in dyvers utheris nationis without the same, not onlie tending to his majesties awin perticular bot also to the publict estait and weilfair of the realme, quhairin the said commendater hes sustenit greit chargis and expenses; in recompanse of ane pert quhairof, oure said soverane lord, with avise of the lordis of his hienes secreit counsaill, and als with consent of Schir Thomas Lyoun of Auldbar, knicht, his majesties thesaurer, Schir Robert Melvill of Murdocarny, knicht, thesaurer depute, and Maister Robert Douglas, provest of Lincluden, collectour generall and thesaurer of the new augmentationis, for thair entres, maid and constitute the said commendater, his depuittis and substitutis his hienes lauchtfull undoutit and irrevocable actoris, chalmerlanis and baillies of the haill temporall landis, lordschippis, baronies and utheris quhatsumevir quhilkis pertenit to the archebischoiprie of Sanctandrois, quhairevir the same ly within this realme, gevand and grantand to him and his foirsaidis full pouer to ask, crave, uplift and ressave all and sindre males, fermes, teyndis, fruittis, rentis, annuelrentis, canys, custumes, accidentis and casualities quhatsumevir pertening to the same off all yeiris and termes restand unpait the tyme of the granting of the said lettre of chalmerlanrie, quhilkis was upoun the first day of Maii the yeir of God jM vC fourscoir nyn yeiris, and siclyk yeirlie and termelie thaireftir during the space of fyftene yeiris, as the said lettre of gift grantit to the said commendater under the privie seill of the dait foirsaid in the self at mer lenth proportis. And to the effect that the said lettre and gift may be mair valide and effectuall to the said commendater and his foirsaidis, thairfoir, and for dyvers uther guid causes and considerationis, oure said soverane lord, with avise of his saidis estaitis, be the tennoure heirof, ratifies, apprevis and confermes the said lettre and gift in all and sindre heidis, pointis, articles, clauses and conditionis contenit thairintill, declaring the said gift and all utheris lettres of factorie and actis of secreit counsaill and richtis grantit to the said commendater thairupoun to have bene and to be sufficient and undoutit richt and titill to the said commendater and his foirsaidis for bruiking and joysing of all and haill the maillis, fermes, dewties, canys, custumes, casualities and utheris pertlie abonespecifiit belanging to the said archebischoiprie, and for using the haill liberties, privilegeis and commodities mentionat in the foirsaid gift during the space and yeris abonwrittin thairin contenit, nochtwithstanding of the act of annexatioun of the temporalitie of all benefices within this realme to the croun, maid in the parliament haldin at Edinburgh, the xxix day of Julii the yeir of God jM vC fourscoir sevin yeiris, or quhatsumevir utheris actis, lawis or constitutionis maid in the contrair heirof.
[1594/4/107]*[print] [email] [cite] [preceding] [following]
Oure soverane lord and estaitis in perliament, for beiting, uphalding and mending of the tua briggis of Dalkeith, the ane bigit upoun South Esk on the south syd of the said toun, and the uther biggit on North Ersk upoun the north syd of the said toun, quhilk briggis ar now almaist decayed, statutis and ordanis that all cariages and burdingis of milnestanes, wyne, tymer and utheris graith passand endlangis the saidis tua briggis with cairtis sall pay to the baillies and counsaill of the said toun of Dalkeith, or thair collectour to be appointit be thame, for repairing, mending and uphalding of thair saidis briggis the taxt and impost following, that is to say: of ilk mylnestane passand endlangis ony ane of the saidis tua briggis, fourtie penneis, and for ilk cartfull laidnit with wyne, tymer or uther geir, aucht penneis money of this realme. And this act to tak beginning the tuentie day of this instant moneth of Junii jM vC fourscoir fourtene yeiris, and to lest and continew for the space of thre yeiris nixt and immediatlie following the said tuentie day of Junii.
[1594/4/108]*[print] [email] [cite] [preceding] [following]
Oure soverane lord, myndfull of the trew and thankfull service done to his hienes be Patrik Moray and Patrik Hume, apperand of Polwart, his grace servitouris, with avise of the estaitis of this present parliament, ratifies and apprevis the gift of pensioun gevin to thame to be takin furth of the thriddis of the priorie of Sanctandrois in all the headis, clauses and articles thairof, and ordainis the samyn to be effectuall notwithstanding of quhatsumevir his hienes revocationis, ratificationnis, giftes or dispositionis maid to quhatsumevir uther persoun or personis ather in this present perliament or utherwayies.
[1594/4/109]*[print] [email] [cite] [preceding] [following]
Oure soverane lord and estaitis of this present perliament findis and declairis that albeit all erectionis maid or erectit sen the act of annexatioun (except samonie as ar speciallie exceptit in the said act) ar decernit and declairit in this present perliament to be null and of nane availl, yit the same salbe nawayes prejudiciall or hurtfull to sic burghes ar† ar erectit be his hienes in frie burghes sen the said act and hes bene in use to pay custume to his hienes and in making of thair comptes in checker, bot thay sall stand erectit with all privileges, immunities and liberties grantit be his hienes unto thame, providing alwayes that thair presentis prejuge not ony particular perties richtis anent the rycht or superioritie of thair few landis haldin be thame of befoir of the kirk, and in speciall Alexander Gaw in Maw and sic utheris as may be interest be the erectioun of the burgh of Culros in ane frie burgh, quhais richtis oure soverane lord and estaittis foirsaidis declairis to stand in thair full authoritie notwithstanding the saidis erectionis, quhill the same be discussit be the juge ordiner as accordis of the law.
[1594/4/110]*[print] [email] [cite] [preceding] [following]
Forsamekle as sic corruptioun and manyfold disorderis is enterit in collegis, scuilis, hospitallis and masondewis, thair buldingis rwynit and rentis and revenewis ar maist altogidder dilapidat, to the grit decay of learning and harm of the puir, the reformatioun and oversicht quhairof and ordour taking thairwith properlie appertenis to the chancellar of the realme, it is thairfoir statute [and] ordanit be the kingis majestie and estaitis of this perliament that Johne, lord of Thirlstane, chancellar of this realme, tak ordour with all convenient speid with all the saidis collegis, universities, scollis, hospitallis and masindowis, that the building thairof may be repairit, the rentis and revenewis recoverit and appropriat to the richt use according to thair severall fundationis and thay and everie ane of thame reducit to some better perfectioun and, gif it be possible, to thair former state and integritie.
[1594/4/111]*[print] [email] [cite] [preceding] [following]
†The kingis majestie and estaitis of this present parliament exceptis and reservis from the act tuiching the annulling of pensionis furth of the erectionis sen the annexatioun all pensionis and utheris dispositionis maid be his majestie to the personis following furth of the same, thay ar to say Ludovik, duk of Lennox, Williame, commendater of Tungland, Maister Peter Young of Seytoun, Thomas Erskin of Gogar and his brether, Michaell and Williame Elphinstouns, brether to the Lord Elphingstoun, Andro Melvill, maister houshald to his majestie, Patrik Muray and Patrik Home of Polwart, Alexander Young, ane of the ischearis of his majesties chalmer, Maister Andro Blakhall, minister at Mussilburgh, Maister Patrik Galloway and Johne Dunkiesoun, ministeries to his majestie; and ordanis thair saidis pensionis and utheris dispositionis foirsaidis to stand in thair full strenth notwithstanding the said act.
[1594/4/112]*[print] [email] [cite] [preceding] [following]
†The kingis majestie and estaitis of this present parliament ordanis the generall act of dissolutioun maid in this present parliament of the propirtie of the croun to be extendit, lyk as thay extend the same in favouris of the quenis majestie to the effect his hienes may haif sic richtis and infeftmentis of quhatsumevir landis pertening to hir as scho haid befoir; as also in favouris of the Lord Drummond anent the forrest of Glenarknay and of Schir Johne Murray of Tullibardin, knicht, conceirning the landis and lordschip of Balquhidder; and also in favouris of Andro Wod of Largo tuiching the landis of Schirmure, Largo, Bawicky, Kingis Mylne, with thair pertinentis, coillis and coilheuchis of the samen landis, to the effect the same may be sett in few to thame be his majestie, with avise of the personis specifiit in the said act of dissolutioun, in maner as the same wer bruikit be thame ofbefoir.