[1594/4/35]*[print] [email] [cite] [preceding] [following]
Oure soverane lord and estaitis of this present parliament, understanding that sindrie of his hienes leigis ar heretablie infeft in divers landis and annuelrentis within this realme; lyk as thair predicessouris and authouris fra quhome thair richt thairof proceidis hes bene heretablie infeft in the same landis and annuelrentis, and be verteu of thair severall infeftmentis and lyfrentis thairin reservit, thay and thair predicessouris and authouris (fra quhome thair richt thairof proceidis) hes bruikit the foirsaidis landis and annuelrentis be the space of fourtie yeris togidder, nochtwithstanding quhairof the saidis infeftmentis maid and grantit to thame and thair predicessouris and authouris ar sindrie tymes drawin in questioun for laik and want of procuratories of resignatioun, instrumentis of resignatioun, preceptis of clare constat or utheris preceptis of sasing quhilkis ar not extant to be producit and usit in respect that the same ar tint and amittit, partlie be iniquitie of tyme, pertlie be perisching of prothogollis and scrollis of notaris, pertlie for not delivering of the samyn be the personis, sellaris and disponeris thairof, pairtlie becaus the evidentis of comprysit landis usis to be abstractit and withhaldin upoun malice of perties, and pertlie as evidentis not thot necessair to have bene kepit efter sa lang tyme, be ressone that the charteris makis mentioun of the procuratories and instrumentis of resignationis, and instrumentis of sasing makis mentioun of the preceptis of sasing quhairupoun the samyn proceidis. For remeid quhairof, oure said soverane lord, with avise of the saidis estaitis and haill body of this present perliament, findis, decernis and declaris that nane of his hienes leigis may be compellit efter the space of fourtie yeiris to produce procuratories or instrumentis of resignatioun, preceptis of clare constat or utheris preceptis of sasing of landis or annuelrentis quhairof the present heretable possessouris and thair predicessouris and authouris and utheris personis be verteu of lyfrentis reservit in the saidis infeftmentis ar and wes in possessioun be the space of fourtie yeiris togidder, and that the wanting and inlak thairof, nor nane of thame, salbe na caus of reductioun of the infeftmentis grantit to the proprietaris or thair predicessouris or authouris of the landis or annuelrentis quhairof the charter or charteris (makand mentioun of the resignatioun or resignationis to have bene maid, and the instrument of seasing makand mentioun of the preceptis of sasingis be verteu quhairof the sasingis wer gevin) ar extant. And willis, statutis and ordanis that this act salbe extendit to all procuratories and instrumentis of resignatioun, preceptis of clare constat or utheris preceptis of sasingis, the wanting and inlaik quhairof and nane of thame salbe na caus of reductioun nor other quarrell quhatsumevir efter the space of fourtie yeiris quhair infeftmentis hes tane effect be possessioun be the said space of fourtie yeiris in maner abone rehersit, and quhair the charteris and instrumentis of sasing ar extant as said is.