[1593/4/67]*[print] [email] [cite] [preceding] [following]
Oure soverane lord and estaitis of this present parliament, understanding that George, erll Merschell, lord Keith etc. hes laitlie foundit and erectit ane college within the burgh of New Abirdene and dotit the same with dyvers rentis and patrimony of his awin propre landis, for advanceing of the quhilk also the provest, ballies, consaill and communitie of the said burgh hes gevin to the said erll the place, kirk, clois and yard quhilkis appertenit sumtyme to the gray freiris of Abirdene to be annext to the said college, as at mair lenth in the lettrez of fundatioun and erectioun of the said college is contenit. Thairfoir his hienes and estaitis foirsaidis ratifies, apprevis and confermis the said fundatioun and erectioun quhilk is of the dait the [...] day of Aprile jM vC fourscoir threttene yeiris, with all the clauses, articles, heidis and conditionis thairin contenit, and forder gevis and disponis thairto all fredomes, franchises, liberties, frie privilegis and jurisdictioun that to ane frie college within this realme be law and practik is knawin to apertene, provyding alwayes that the masteris, memberis, studentis, bursaris and haill inhabitantis of the said college is and salbe in all tymes heirefter subject to the jurisdictioun of the provest, ballies and counsaill of the said burgh of Abirdene in all thingis to be done or committit be thame outwith the wallis of the said college and within the territores or fredome of the said burgh.
[1593/4/68]*[print] [email] [cite] [preceding] [following]
Oure soverane lord and estaitis of this present parliament, remembring that the toun and heavin of Piterheid wes erectit in ane burgh in baronie be oure said soverane lord, and understanding perfytlie that the samyn hes bene in all tymes bygane ane veray commodious recept for schippis and boittis of all the leigis of this realme and strangearis reparing thairto, upoun apparrelling of the quhilk heavin, George, erll Merchell, proprietar thairof, hes bestowit large expenses and yit the samyn will have neid of mekle mair befoir the said heavin may be brocht to perfectioun; thairfor oure said soverane lord and his saidis estaitis of parliament hes gevin and grantit to the said George, erll Merschell ane impost of tuentie pennies for everie last of guidis cumand in at the said port, and gangand furth of the samyn, comptand xx bollis of wictuall to the last, and sua furth in uther guidis according to the wait and quantitie thairof; and the said impost to indure for the space of fyve yeiris nixt efter the dait heirof, and with power to the said George, erll Merschell, his servandis and factoris in his name, to arreist, poynd and distrenyie thairfoir during the space forsaid.
[1593/4/69]*[print] [email] [cite] [preceding] [following]
Oure soverane lord and estaitis of this present parliament, considdering that Andro, commendater of Jedburgh, having rasit lettrez befoir the lordis of sessioun for annulling and simpliciter suspending of the lettres of horning rasit be sex sindre parties clameand richt to the monkis portionis, superplus and temporalitie of the said abbacie of the croppis and yeiris of God jM vC lxxxvij, lxxxviij, lxxxix, lxxxx, lxxxxj and lxxxxij yeiris, as the lettrez of suspensioun rasit thairupoun in the self at lenth beris; quhilk being callit, Roger Ashintoun, gentleman in his hienes chalmer, and his majesties thesaurair, comptrollar and advocat for his hienes entres, Robert Kirktoun and Robert Trottar comperit be thame selfis and thair procurators, and the said mater being ressonit viva voce in presens of the saidis lordis of sessioun and the parteis richtis producit finding the questionis to arryis throw the multitude of the actis of parliament maid anent the saidis monkis portionis, superplus of benefices and annexatioun of temporall landis to the croun, remittit the decisioun of the foirsaid actioun and caus to his hienes and his saidis estaitis for certane ordour to be taken and sett down concerning the saidis monkis portionis, and to reduce all the actis of parliament maid ofbefoir thairanent to ane certane act and rule, quhairby the saidis lordis of sessioun may proceid summerlie to the decisioun of all sic causes, as the act maid thairupoun beris. And seing the lordis commissionaris of the augmenationis upoun the xij day of October the yeir of God jM vC lxxxvij yeiris, finding the temporalitie of the abbacie of Jedburgh and Restennet to extend to vjC iiij lib. xj s. omnibus deductis, off the quhilkis the saidis lordis, be vertew of the act of perliament maid anent the annexatioun of temporall landis of benefices to the croun, then assumed and appropriat thairto the soum of ijC lxxvj lib. xvj s. viij d. yeirlie to be chargit for and intromettitwith be his hienes thesaurair of augmentationis, and in recompense thairof adjugeit, assignit and allowit to the said commendater in satisfactioun of the samyn the superplus of the thriddis extending to xj b[oll]s quheit, estimat to fyve merkis the boll, and sa amounting to the sowme of xxxvj lib. xiij s. iiij d.; xiij b[oll]s beir, ij f[i]r[lot], ij p[eck]s, 2 pert p[eck]s, estimat to four markis everie boll, and sa extending to xxxvj lib.; and xxxvj b[oll]s meill, estimat to xl s. the boll, extending to lxxij lib., amounting in the haill to jC xliiij lib. xiij s. iiij d., togidder with four deid monkis portionis. And it is trew that the said Roger Ashetoun hes assignit and disponit to him in pensioun the foirsaid sowmme of ijC lxxvj lib. xvj s. viij d. furth of the temporalitie of the said abbacie of Jedburgh, and the said Robert Trotter and Robert Kirktoun hes the haill monkis portionis of the foirsaid abbacie disponit to thame, and the superplus is assignit to the ministrie, sua that the said commendater is altogidder defraudit baith of that pert of his temporalitie and als of the foirsaid superplus and monkis portionis quhilk wes assignit to him in recompense thairof; thairfoir, and seing the saidis monkis portionis ar disponit to Robert Trotter and Robert Kirktoun and the superplus of the said abbacie assignit to the said ministrie, oure soverane lord and estaitis foirsaidis reponis the said Andro, commendater of Jedburgh to his awin richt of the temporalitie of the said abbacie during his lyvetyme, as gif the samyn haid nevir bene takin fra him; and dischargis the said Roger Aschetoun and all utheris off all forder trubling of the said commendater thairanent, notwithstanding ony gift or dispositioun maid to thame of the samyn at ony tyme heirtofoir during the said commendataris lyvetyme as said is.
[1593/4/70]*[print] [email] [cite] [preceding] [following]
Oure soverane lord, with advise of the estaitis of this present parliament, ratifies and apprevis and for him and his successouris perpetuallie confermis the infeftment, gift and dispositioun maid, gevin and grantit to Andro, lord Uchiltrie of the landis of Erlistoun, liand within the schirefdome of Wigtoun, sumtyme pertening to Frances, sumtyme erll Bothuill, and fallin and becum in his majesties handis be the dome of foirfaltour ordourlie led and deducit aganis the said Frances, sumtyme erll Bothuill, and gevin, grantit and disponit to the said Andro, lord Uchiltrie with all richtis, privilegis and commodities belanging and pertening to the saidis landis, conforme to the said Androis giftes, infeftmentis and richtis thairof gevin and grantit to him of the samyn landis. As alsua ratifies and apprevis all and quhatsumevir giftes and rychtis, patronages and donatioun of benefices maid, gevin and grantit to the said Andro, lord Uchiltrie be oure said soverane lord, and decernis and declaris the samyn to be valient and sufficient in all tyme cuming, nochtwithstanding ony act and ordinance maid be oure said soverane lord and his estaitis foirsaidis at this present parliament or ony tyme preceding, and notwithstanding quhatsumevir his hienes revocationis maid in the contrair, with the quhilk his majestie and estaitis foirsaidis dispenses be thair presentis.
[1593/4/71]*[print] [email] [cite] [preceding] [following]
Forsamekle as oure soverane lord, with expres advise and consent of his hienes trustie and weilbelovit counsellour, Johnne, lord Thirlestane, his hienes chancellair, Schir Thomas Lyoun of Auldbar, knicht, thesaurair, umquhile Schir Ludovic Bellenden of Auchnoule, knicht, justice clerk for the tyme, and Maister Robert Douglais, provest of Lincluden, collectour generall and thesaurair of his majesties new augmentationis, hes maid and grantit under his majesties greit seill ane charter and infeftment contenig ane new dispositioun for dyvers and sindre guid caussis contenit thairintill to his hienes trustie and weilbelovit counsellour Maister George Lauder of Bass, his aris maill berand the armes and surename of Lauder and assignais quhatsumevir heretablie off all and sindre the landis of the lordschip of Tynninghame undirwrittin, viz: the manis of Tynninghame, tuentie husband landis, tuentie coit landis, fyve brewlandis, the mylne of Tynninghame, wardlandis, Gillieischot, the suyth land with the fisching in the wattir of Tyne, alsweill fresche as salt within the sey flude, the lochis and cuningharis of the saidis landis of Tynnighame, all and haill ane annuellrent of ten markis money of this realme, to be upliftit at tua termes in the yeir, Witsonday and Mertimes in winter be equall portionis furth of all and haill the half of the toun of Auldhame liand in the said lordschip of Tynninghame, all and haill the principall mansioun, tour and fortalice, barnis, yardis and doucait of Tynninghame, the landis of Briggis eister and waster, Grenespott, baxter landis, als doucott aikair liand in the toun of Tynninghame, off all and haill the landis of Lochhous extending to tua husband landis and sex aikaris of land with all and haill the landis callit Harkarislandis, Spenslandis and Gilleislandis, with tennentis, tennandries and service of frie tennentis of the foirsaidis haill landis, partis, pendicles and pertinetis thairof lyand as said is. And alsua the office of balliarie of all and haill the foirsaid lordschip of Tynninghame, alsweill of the propirtie as tennandrie thairof; off all and haill the ile of Bass with the pertinetis, all liand within the lordschip of Tynninghame, regalitie of Sanctandrois, constabularie of Hadingtoun and schirefdome of Edinburgh; off all and haill the landis of Newgrange, Penscheillis, Preistlaw, Kingisyde, Frieris Dykes and Winter Scheillis, with tennentis, tennandries and service of frie tennentis, partis, pendicles and pertinetis thairof, togidder with the commoun pasture in the east and west mures of Lammermure, callit the commounties of Innerweik, Thornetoun and Dunbar respective, with privilege to cast and win peittis, turffis, fewall, faill and dovatt in and throw the partis and boundis of the saidis mures and commounties quhairevir the said Maister George and his foirsaid sall think maist expedient, liand within the said constabularie of Hadingtoun and schirefdome of Edinburgh; and of all and haill thre aikaris of arable land with the pertinetis, lyand beside the burgh of Hadingtoun in the sched callit Baxterflat besyde the nugait of Hadingtoun, togidder with the foirsaid office of balliarie of the landis of Knowis, Scowgall, Broxmouth, Auldhame, Halkerslandis, Spenslandis, Gillieislandis and of the haill lordschip of Tynninghame, alsweill of the propirtie as tenendrie of the foirsaidis haill landis and utheris abonewrittin, and hes maid, creat and erectit the toun of Tynnighame in ane frie burgh of baronie and regalitie, to be callit in all tymes cuming the burgh of Tynninghame, gevand, grantand and committand to the said burgh in all tymes cuming frie libertie and privilege to by and sell and to have and hald within the same ane mercat day ilk oulk and frie fair yeirlie upoun the xxj day of September, to continew aucht dayis, with all and sindre uthair fredomes, privilegis, liberties, commodities and immunities quhatsumevir pertening or knawin justlie to pertene to ane frie burgh of baronie, with power to big ane port and heavin upoun ony pairt of the saidis landis of Tynninghame quhair the sey flowis and quhair the samyn may be maist convenientlie biggit, with all and sindre fredomes, anchorages and custumes pertening or knawin justlie to pertene to ane port and heavin at lenth specifiit and contenit in the said charter. And siclyk hes maid and constitute the said Maister George, his aris maill and assignais foirsaidis his majesties heretable justiciaries and lordis of the direct lordschip of all and sindre the landis and utheris abonewrittin contenit in the said charter, alsweill of the propirtie as tennandrie thairof within and throw all the boundis of the samyn, and hes gevin and disponit to him the heretable jurisdictioun and direct lordschip thairof, with frie chapell and chancellarie with escheittis, unlawes and utheris commodities contenit thairin; and hes unite, erectit, creat and incorporat the foirsaidis haill landis of burgh and baronie and utheris respective contenit thairin in ane frie baronie and regalitie, to be callit in all tymes cuming the baronie and regalitie of Tynninghame; ordaning the foirsaid castell to be the principall messuage of the said haill baronie, and ane sesing to be tane thairat to be ane sufficient seasing of the foirsaidis haill landis and utheris abonerehersit, to be haldin of his majestie in fie and heretage, frie baronie and regalitie heretablie for evir for ane certane yeirlie few dewty thairin contenit, as the said charter of the dait the sext day of August the yeir of God jM vC lxxxxj yeris in the self at mair lenth proportis. Thairfoir oure said soverane lord and estaitis of this present parliament, for the causes contenit in the said charter, and for the guid, trew and thankfull service done to his majestie and his hienes maist noble progenitouris of worthie memorie be his hienes said trustie and weilbelovit counsellour Maister George Lauder of Bass and utheris his predicessouris quhome of he hes lineallie discendit in all tymes bygane, as become trew and faithfull subjectis without defectioun frome thair loyall and dewtifull obedience, hes ratifiet, apprevit and confermit and, be the tennour of this present act, for him and his hienes successouris, ratifies, approvis and perpetuailie confermis the foirsaid charter and infeftment in all the heidis, pointis, clauses, articles, circumstances, immunities, privilegis and conditionis at lenth contenit thairin, efter the forme and tennour of the same in all pointis. And als his majestie and estaitis foirsaid, be the tennour heirof, decernis, declaris and ordanis the samyn to be als effectuall, valide and sufficient to the said Maister George and his foirsaidis for thair peceablie bruiking, joysing and possessing of the saidis haill landis, office of balliarie, port and heavin, burgh of baronie, privilegis, liberties and immunities and all utheris speciallie and particularlie contenit in the said charter perpetuallie in all tymes cuming siclyk as gif the said charter and infeftment wer at lenth insert and contenit word be word in this present act, notwithstanding that the samyn is not insert nor contenit heirin. Anent the quhilk, and with supplement of all faultis and defectionis that may be proponit and objectit aganis the said charter, validitie and effect thairof, oure said soverane lord, with advise of the saidis estaitis, hes dispensit and be the tennour heirof irrevocablie dispenses for evir.
[1593/4/72]*[print] [email] [cite] [preceding] [following]
Oure soverane lord and his estaitis of parliament hes ratifiet and apprevit and, be the tennour heirof, for his hienes and his successouris, ratifies and apprevis the infeftment of fewferme gevin and grantit be his hienes at the speciall request and desyre of his weilbelovit counsellour Schir Johnne Cokburne of Ormeistoun, his hienes justice clerk, to his weilbelovit Andro Edmeistoun, fear of that Ilk, his aris and assignais off all and haill the landis of Barningtoun, Barleis and Beryloche, with all thair pertinentis, as thai ar boundit, methit and merchit in the said infeftment, liand within the schirefdome of Roxburgh; quhilkis landis pertenit heretablie and in fewferme to Frances, sumtyme erll Bothuill, Johnne and Frances Stewartis, his sonnes, or ather of thame, haldin immediatlie of the commendater of the abbacie of Kelso and becum in his majesties handis and at his dispositioun be ressone of the process and dome of foirfaltour ordourlie led and gevin aganis the said Frances, sumtyme erll Bothuill for certane crymes of tressone and lesemajestie committit be him, and quhairof he was convict in ane justice court haldin in the tolbuith of Edinburgh, the xxiiij day of Maii the yeir of God jM vC lxxxix yeris; quhilk process and dome of foirfaltour wes ratifiet in the parliament haldin at Edinburgh in the moneth of Junii the yeir of God jM vC lxxx tuelf yeris, and als be declaratioun maid in parliament that the said Frances, sumtyme erll Bothuill nor his posteritie suld bruik na landis nor benefices within this realme, as in the said declaratioun is in lykwayis at mair lenth contenit. And siclyk oure said soverane lord and estaitis hes ratifiit and apprevit and, be the tennour heirof, ratifies and apprevis the dissolutioun of the annexatioun of the landis of the said abbey of Kelso to the croun, to the effect that the samyn micht be sett in fewferme, as the said act of dissolutioun alsua beris in all clauses, pointis, heidis and articles thairof, to the effect that the said Andro Edmeistoun, fear of that Ilk, his aris and assignais foirsaidis may bruik and joyse the saidis landis of Barningtoun, Barleyis and Baryloche, with thair pertinentis, as thay ar boundit, methit and merchit in the said infeftment perpetuallie in all tyme cuming.
[1593/4/73]*[print] [email] [cite] [preceding] [following]
Oure soverane lord, with avise of the estaitis of this present parliament, ratifies, apprevis and perpetuallie confermis to Colene McKenzie of Kintaill and the aris maill lauchtfullie gottin or to be gottin of his bodie, quhilkis falyeing, to the said Colenis aris maill quhatsumevir bruiking the surename and armes of the hous of Kintaill, the tua severall infeftmentis maid and granted be his hienes to the said Colene and his foirsaidis, the ane thairof of the dait at Haliruidhous, the xx day of Januar the yeir of God jM vC lxxxxj yeiris off all and haill that the barony and landis of Assint and utheris contenit thairin as becuming in his hienes handes be resignatioun of Torquill McCloyid of the Lewyis and his procurators, with the claus de novo damus thairin contenit; the uther of certane landis, richtis of patronages, advocatioun and donatioun of kirkis, chaiplanries and benefices and utheris thairin contenit as becum in his hienes handes be vertew of the act of annexatioun annexing all the temporall landis of benefices to his hienes croun, as the infeftment maid thairupoun of the dait at Edinburgh, the ferd day of Februar the yeir of God jM vC lxxxxj yeiris in the self at lenth beris in all the heidis, clauses and articles of the samyn. And haldis baith the saidis charteris and ather of thame as fully and word be word ingrossit and insert in this present act; and this confirmatioun to be als valide and effectuall as gif the saidis charteris and ather of thame wer particularlie expressit heirin, quhilkis be thir presentis ar hauldin as repetit de verbo in verbum; and willis and ordanis the samyn to stand effectuall to him and his foirsaidis in all tymes heireftir, renunceand for now and evir all actioun or executioun that in onywayis may be competent to his hienes aganis the foirsaidis infeftmentis, and dischargeing all utheris of quarrelling thairof at ony tyme heireftir.
[1593/4/74]*[print] [email] [cite] [preceding] [following]
Oure soverane lord and estaitis of this present parliament, understanding that the gritest nowmer of the wassellis, frie tennentis and heretable fewaris of the temporall landis belanging to the archebischoiprie and priorie of Sanctandrois and to the archibischoiprie of Glasgw ar of sa meane rent and qualitie that thai ar nawyis able to mak the expenses upoun the resignatioun of thair landis in oure said soverane lordis handes and entres thairto be his hienes chancellarie, quhilk gevis occasioun to mony of the saidis fewaris to ly out unenterit to thair saidis landis; in consideratioun also that his hienes darrest cousing, Ludovic, duk of Lennox, erll Dernelie, lord Torboltoun, Methven and Obigny etc., being providit to the said priorie of Sanctandrois, quhairof the rent and patrimonie, lyk as the rent and patrimony of the saidis archebischoipries, is hallelie exhaustit be takkis, pensionis and utheris dispositionis, sua that litle or na commoditie thairof remanis, except the superioritie of the same; thairfoir oure said soverane lord and estaitis foirsaidis gevis, grantis and disponis to his hienes said darrest cousinge during all the dayis of his lyvetyme the richt of the superioritie of the haill temporall landis, mylnis, multuris, woddis, forrestis and fischingis off all and sindre the saidis archebischoiprie and priorie of Sanctandrois and archebischoiprie of Glasgw, with power to him and his commissionaris and utheris in his name speciallie constitut to that effect during his lyvetyme as said is to resave all resignationis to be maid be quhatsumevir heretable tennentis, vassellis or fewaris of the saidis temporall landis and utheris abonespecifiit or ony pairt thairof belanging to the saidis archebischoipries and priorie, and to gif entres to thame, thair aris and successouris of the saidis landis and utheris abonerehersit; declaring all and sindre resignationis foirsaidis of the saidis frie tennentis, vassellis and fewaris of the saidis temporall landis and utheris abonespecifiit and entres thairof to be gevin to thame or thair foirsaidis be the said Ludovick, duk of Lennox or his saidis commissionaris, under his propre seill and subscriptioun, to be als guid, valide and sufficient to the ressaveris thairof for bruiking and joysing of thair saidis landis and utheris abonewrittin as gif the samyn haid bene gevin and grantit be his hienes or gif thai haid bene enterit be his hienes chancellarie, nochtwithstanding of the act of annexatioun of all ecclesiasticall landis to the croun maid in the parliament haldin at Edinburgh, the xxix day of Julii the yeir of God jM vC lxxxvij yeiris, to the quhilk this present act makis and sall mak expres dirogatioun in safar as the same may be extendit to the superioritie of the saidis temporall landis and utheris abonerehersit pertening to the saidis archebischoipries and priorie during the said Ludovik, duke of Lennox, his lyftyme.
[1593/4/75]*[print] [email] [cite] [preceding] [following]
The kingis majestie and estaitis of his present parliament ratifies and apprevis the gift and dispositioun maid be his majestie to his lovit domestick servitour Patrik Hume, younger, of Polwart of the landis of Redden, Fischwik and Eister Lawes of Quhitsum, and decernis and declaris the same to be ane sufficient richt to the said Patrik for bruiking and joysing of the saidis landis, and to be als guid as gif the same wer word be word ingrossit and insert heirin.
[1593/4/76]*[print] [email] [cite] [preceding] [following]
Oure soverane lord, with avise of the estaitis of this present parliament, gevis and grantis licence and libertie to the burgh of Abirdene to hald ane marcat and publict fair within the fredome of the said burgh to begin yeirlie heireftir upoun Monunday immediatlie befoir Witsonday, and thaireftir to continew for the space of aucht dayes, with the haill jurisdictionis, fredomes, toill and custumes off the same.
[1593/4/77]*[print] [email] [cite] [preceding] [following]
Oure soverane lord and estaitis of this present parliament ratifies, apprevis and confermis and of new gevis, grantis and disponis to the burgh of Abirdene all and sindrie the annuellis, few malis, chaiplanries and prebendariis quhilkis belangit ofbefoir to chaiplanis of thair paroche kirk of Abirdene contenit in the gift maid to the said burgh of befoir.
[1593/4/78]*[print] [email] [cite] [preceding] [following]
Oure soverane lord, understanding that be act and ordinance maid anent the observatioun of the Sabboth day within this realme the mercat day of the burgh of Foirfair, being the head burgh of the schire, quhilk was Sonday, is takin frome thame, and his hienes not willing that thai in onywayis suld be prejugeit heirby, thairfoir his hienes, with avise of the estaitis of this present perliament, alteris and changeis thair said mercat day frome Sonday to Fryday, and willis the samyn Fryday oulklie to be thair mercatt day to thame in all tymes heireftir, and the samyn to stand with the alyk privilegis and fredome as the Sonday did ofbefoir.†