[1593/4/25]*[print] [email] [cite] [preceding] [following]
Oure soverane lord, with advise of the estaitis of this present parliament, ratifies and apprevis the actis maid anent the dischargeing of fairis and marcattis haldin on Sondayis; and becaus the samyn actis in mony respectis ar nawayis observit in landwart, thairfoir his majestie, with advise foirsaid, expreslie commandis and chargis all schireffis, stewartis, ballies, provestis and ballies of burrowis, and all utheris quhome it sall pleis everie particuler presbiterie to nominat within thair awin boundis to that effect, to discharge, remove and put away all fairis and marcattis haldin on Sondayis as thay will answer to his majestie; and incace thay be fund negligent, ordanis lettrez of horning upoun ane semple charge of ten dayes to be direct to charge thame thairto at the instance of the said presbiterie.
[1593/4/26]*[print] [email] [cite] [preceding] [following]
Forsamekle as the kingis majestie, with avise of his estaitis in parliament, hes confermit and establischit the jurisdictioun and judicatouris of the kirk in the generall and sinodoll assemblies, presbiteries and particular sessionis of everie kirk and paroche, willing and ordaning thair sentences and decreittis in materis pertening to thair judicatoure be put in executioun and tak full effect; and it is of veritie that a nowmer of obstinat and stubburne people in dyvers paroches of this land hath contempnit and dalie contempnis the sentencis and decreittis of the saidis assemblies and judicatouris of the kirk, namelie in landwart paroches quhair thair is little or na concurrence of magistratis to punische obstinat and disobedient personis; and the said kirk having na uther punischement in thair handes bot spirituall, the quhilk the said obstinat people (being altogidder fleschlie and beastlie) feillis not nor settis nocht by; thairfoir oure soverane lord, with advise of his saidis estaitis, for remeidie heirof, hes statute and ordanit that incace ony of his subjectis within this realme refuis to obey the ordinances and decreittis of the saidis assemblies and judicatories of the kirk in ony tyme to cum, the saidis assemblies and judicatories sall direct thair beddell to the persoun or personis dissobedient, chargeing and commanding thame in the name of God and the king to obey thair decreit and ordinance; the quhilk charge gif the said persoun or personis contempne and remane obstinat, the minister of the paroche quhair the said persoun or personis remanis still thre severall Sondayis frome pulpit, charge and command the said persone or personis in the name of God and the king to obey the same ordinance and decreit. And incace notwithstanding all the saidis charges the said persone or personis remanis still obstinat and rebellious, than sall the said assemblie or judicatour quhilk hes maid the said ordinance and decreit meane the mater be thair supplicatioun to the lordis of sessioun, contening the substance of the process, the sentence and decreit pronuncit aganis the said persoun or personis with a complaint of thair contempt and dissobedience, quhairupoun the pairty complenit on being first citat and hard to propone thair lauchtfull defenses incace thai compeir, and gif thay compeir not propter contumaciam, the saidis lordis of sessioun or secreit counsaill sall gif out lettrez to put the said persone or personis to the horne within ten dayes nixt efter the charge incais of disobedience and continewing in thair former contempt and rebellioun.
[1593/4/27]*[print] [email] [cite] [preceding] [following]
Item, quhair thair has bene na gleib of auld or quhair has bene sum of auld yit it be far within the quantitie of four aikar of land, that the designatioun to be maid of the persoun, vicar, abbot or priores landis, and falyeing thairof, out of the bischoipis landis, freiris landis or ony uther kirkland lyand within the boundis of the said paroche ay and quhill four aikaris of land be compleit. Item, that the saidis gleibis be designit with fredome of fogage, pasturage, fewall, faill, dowatt, loning, frie ische and entrie and all uther previlegis and richtis according to use and want of auld.
[1593/4/28]*[print] [email] [cite] [preceding] [following]
Forsamekle as sindrie ministeris quha has bene in lang possessioun of thair stipendis be virtew of thair assignationis ar trublit be pensionaris or takismen quha has tane in tak, gift or pensioun ather thair haill stipendis or one greit pairt thairof, and has obtenit ratificatioun in parliament thairupoun, thairfoir oure soverane lord, with avise of the estaitis of this present parliament, ordanis that all ministeris stipendis in tyme cuming be frie frome all takkis, pensionis, taxationis or impositonis quhatsumevir, notwithstanding of ony gift or dispositioun maid in the contrair, to the effect that the ministeris may bruik thair stipendis peceablie in all tyme cuming without ony truble according to thair assignationis.
[1593/4/29]*[print] [email] [cite] [preceding] [following]
Forsamekle as the ministeris serving the cure within this realme being lauchfullie providit to personages and vicarages annext and pertening ofbefoir to prelaciis hes bene this tyme bygone frustrat of the rentis and fruittis of the samyn, nochtwithstanding thair lauchtfull provisionis and assignationis thairto, for remeid quhairof, and to the effect that the haill personis serving the cure of ministrie within this realme may peceablie bruik and posses thair benefices of personages and vicarages of thair awin kirkis, fruittis, rentis and emolumentis thairof in all tyme cuming conforme to thair provisioun and assignatioun of the samyn, to remane with thame and thair successouris serving the cure as said is, it is statute and ordanit that all giftes, provisionis and assignationis disponit to the ministeris serving the cure of the personages, vicarages and kirkis thairof is and salbe now and in all tyme cuming valiable and sufficient richtis and titles to thame and everie one of thame for bruiking, joysing and possessing of the same and intrometting with the fruittis, rentis and dewties thairof in tyme cuming, ratifeand and apprevand the samyn notwithstanding quhatsumevir act or constitutioun maid in the contrair; but prejudice alwayes of quhatsumevir perticuler perties richtis and speciallie the quenis majesties kirkis of Dumfermling.
[1593/4/30]*[print] [email] [cite] [preceding] [following]
It is statute and ordanit that incace in tyme cuming ony persoun or personis say messe, or ressett and interteney willinglie be the space of thre nichtis togidder, or thre nichtis at severall tymes, excomunicat Jesuittis or trafficquing papistes aganis the kingis majestie and religioun presentlie professit and establisched within this realme, the samyn being deulie and lauchfullie tryit, sall verifie and infer the deid to have bene of the knawlege and guidwill of the persoun or personis accusit; thairfoir, quha being convict of the premises, or ony of thame, thair eschaet for the first falt sall fall and becum in his majesties handes and salbe intromettitwith to his hienes propre use; and being convict thairof the secund tyme, sall amit and tyne thair lyverent of quhatsumevir thair landis, possessionis, utheris guidis and geir; and being accusit and convict thairfoir the thrid tyme, sall incur the pane of tressone, and the proces and dome of foirfaltoure salbe ordourlie led, pronuncit and execute aganis thame with all rigour.
[1593/4/31]*[print] [email] [cite] [preceding] [following]
Oure soverane lord, with advise of the estaitis of this present parliament, having consideratioun how that the ministeris provydit to ecclesiasticall functionis and leving of the kirk and serving the cure thairat hes bene and may be in tyme cuming havelie prejudgit in thair saidis ecclesiasticall levingis and rentis thairof be speciall actis and constitutionis maid in favouris of certane particuler personis, for remeid thairof in tyme cuming, hes statute and ordanit that quhatsumevir act or constitutioun of parliament in tyme cuming efter the dait heirof be maid in favoure of ony particuler persoun quhairby the provisioun of ony ministeris levingis may be tane away, or in onywayis prejudgeit, directlie or indirectlie in thair saidis provisionis, rentis and proffeittis thairof, or ony pairt of the samyn, that the same salbe in all tyme cuming null and of nane availl, force nor effect, except the saidis ministeris be callit upoun, thair provisioun and the samyn in haill or in pairt reducit befoir the juge ordiner.
[1593/4/32]*[print] [email] [cite] [preceding] [following]
Oure soverane lord and his estatis in this present parliament, considdering that be the alteratioun of the availl of current money in this and sindrie cuntries of late yeiris the ancient panis and unlawes of lawborrous, or for not agane bringing of lettrez, or for non comperance befoir the justice or his depuittis at particular dyettis to underly the law for slauchteris and utheris odious crymes, hes bene sa small as thay have not gevin ony terrour to wickit men to offend this lang tyme bygane; and quhair the smalnes of the saidis panis and unlawes hes moved his majestie oftymes to call the personis complenit upoun befoir his hienes and his secreit counsaill to answerit to the complaint, to the effect that souirtie micht be ressavit under greitar panis nor the commoun accustumat ofbefoir, that the personis complenit upoun suld be maid answerable to justice, quhilk forme hes not tane sa guid effecte as wes hoiped for, bot sumtym hes bene the occasioun of double convocatioun and tumultis within the burgh of Edinburgh, being the seate of justice, and hes moved the privie counsaill oftymes to be occupiet with that, quhilk propirlie pertenit to the jugement and jurisdictioun of the lordis of counsaill and sessioun and justice generall. For remeid quhairof, his hienes and the saidis estaitis statutis and ordanis that in tyme cuming the panis and unlawes of lawborrous, or for non again bringing of lettres to the justice clerk and his depuittis, or for non comperance befoir the justice efter souertie fund, salbe for every erll or lord tua thowsand pund, for every greit barroun ane thowsand pundis, for everie frehaldair ane thowsand mark, far everie fewar fyve hundreth merkis, for everie gentleman unlandit tua hundreth merkis, and for everie yeman man ane hundreth markis, off ilk persoun summond to pas upoun assyis befoir the justice ane hundreth markis; and that the justice clerk and his depuittis ressave souirtie according to the saidis panis in tyme cuming, and na utherwayes, as thay will answer upoun the dewtie and executioun of thair offices; and the saidis panis of lawborrous to be devidit equallie betuix the king and the pairtie offendit unto conforme to the act maid thairupoun ofbefoir, and that the unlaw of all personis arreistit and not comperand at the first justice air ower all the realme in tyme cuming salbe tuentie pund.
[1593/4/33]*[print] [email] [cite] [preceding] [following]
It is statute and ordanit be oure soverane lord and his estaitis in this present parliament that efter the deceise of the present possessouris of the prelaciis and uthair benefices within this realme, the annuelrentis payit thairunto out of the burrow males, custumes and utheris rentis of the propirtie to remane with his hienes and his successouris as a pairt of the patrimony of the croun; and nane that salhappin to be providit in title to the saidis prelaciis, or utheris inferioure benefices, salhave richt or actioun to crave or recover the same annuelrentis, nochtwithstanding thair provisionis generall or speciall quhatsumevir, without prejudice alwayes of the hospitallis and collegis within universities and scuilles within this realme.
[1593/4/34]*[print] [email] [cite] [preceding] [following]
Oure soverane lord, with advise of his estaitis in this present parliament, statutis and ordanis that all custumaris and sercheouris sall compeir yeirlie in the ordiner tyme of the chekker and mak faith that thay have done thair dewtie trewlie in thair offices the yeir preceding; and gif ony salbe tryit to have done in the contrair be suffering and owrluiking of forbodin guidis or unaccustumat guidis to be transportit, othir befoir the justice or his depuittis or auditouris of the chekker, that the offendar thairby incur the pane of deprivatioun frome thair offices and eschaeting of all thair movable guidis.
[1593/4/35]*[print] [email] [cite] [preceding] [following]
Oure soverane lord and estaitis of this present parliament ratifies and apprevis the actis of his hienes parliamentis maid ofbefoir aganis the granting of remissionis and respettis to the committaris of murthouris, slauchteris and utheris odious crymes mentionat thairin quhair thair is not sufficient lettre of slaynis schawin; and ordanis the saidis actis to have full effect and to be observit be his hienes and his depuittis during the haill space mentionat thairin, and that na respeitt or remissioun be admittit in jugement heireftir, except the same be componit be the thesaurair, subscryvit be him, and at leist past his register.
[1593/4/36]*[print] [email] [cite] [preceding] [following]
Forsamekle as in the act of the parliament haldin at Edinburgh, the fyft day of Junii the yeir of God jM vC fourscoir tuelf yeiris, in favoure of the wassellis of thame that ar foirfalt, being nawyis culpable of the crymes for quhilkis thair superiouris suld be foirfaltit, having landis, heretage, annuelrentis, lyfrentis, pensionis and portionis quhatsumevir haldin of ony personis callit and foirfaltit in the said parliament, or that suld happin in ony tyme thaireftir to be foirfaltit for quhatsumevir crymes of treasone and lesemajestie, suld bruik and joyse the saidis landis, heretage, annuelrentis, lyfrentis, pensionis or portionis quhatsumevir nochtwithstanding the foirfalting of thair superioris thairof; and sall hald the same of the nixt superioure immediat, utherwayis the same to be null. Quhilk act oure soverane lord, with advise of his estaitis in parliament, declaris sall not extend in the favoure of ony conjunct personis to the saidis personis foirfaltit or to be foirfaltit, that is to say to thair wyiffis, barnis, brether or sisteris.
[1593/4/37]*[print] [email] [cite] [preceding] [following]
Oure soverane lord, with advise of the estaitis of this present parliament, ratifies and apprevis the act maid in the parliament haldin at Edinburgh, the fyft day of Junii the yeir of God jM vC fourscoir tuelf yeiris anent the setting of infeftmentis of his majesties propirtie; and decernis and declaris quhatsumevir infeftmentis to be sett in tyme cuming of the samyn without the comptrollaris consent, his subscriptioun and passing of his register to be null and of na availl.
[1593/4/38]*[print] [email] [cite] [preceding] [following]
Oure soverane lord and estaitis of this present parliament considdering how his hienes hes bene grytumlie circumvenit in granting of new infeftmentis to sindrie personis of thair landis, including thairwth be thair inoportune sute the advocatioun, donatioun and richt of patronage of dyvers kirkis and benefices quhilk nevir pertenit to thame ofbefoir bot to his majesties presentatioun, speciallie quhair the personis providit thairto is yit on lyff and the richt of the patronage of thair benefice purchest and takin during thair lyftyme without thair consent or knawlege, tending thairby to appropriat the fruittis of the said benefices quhen samyn sall vaik to thair particuler uses, not onlie to the greit hurt of his hienes and prejudice of the kirk, quhairby all convenient occasioun is abstractit frome his hienes to gratifie qualifiit personis quha hes travellit and ar able to serve the functioun of the ministrie and preaching of the evangell, bot als to the greit hasart and danger of the personis provydit to the saidis benefices yit on lyve. For remeid quhairof, oure soverane lord and estaitis foirsaidis hes statute and ordanit and be the tennoure heirof decernis and declaris all sic infeftmentis grantit in tymes bypast, or to be grantit in tymes cuming be his hienes contenand the gift and dispositioun of the richt of ony patronage, advocatioun and donatioun of benefice quhilk pertenit ofbefoir to his hienes gift and presentatioun quhairof the beneficit persoun wes for the tyme or salhappin to be on lyve the tyme of the granting of the said infeftment and thair consent not haid and obtenit thairto, hes bene fra the beginning and salbe in all tyme cuming null and of nane availl, force nor effect safar as concernis the dispositioun off the richt of the patronage of the saidis kirkis bot forder proces or declaratour of ony juge to be gevin thairupoun; and the said advocatioun, donatioun and richt of patronage of the saidis benefices to returne to his hienes and at his hienes dispostioun and presentatioun frelie as the same wes befoir the granting of this said infeftment and as gif the saidis infeftmentis haid nevir bene grantit, but prejudice alwayes of the saidis infeftmentis anent the remanent landis thairin contenit, quhilk sall remane in the awin strenth and effect, and this nullitie to be ressavit summarlie be way of exceptioun, reply or objectioun, dischargeing all jugeis within this realme to grant ony proces upoun the richt of the said patronage be vertew of the saidis infeftmentis, bot to hald the same as not expressit thairin, provyding that sasone as the beneficit manis awin consent may be haid and obtenit to the said infeftmentis, the same to be als sufficient and effectuall as gif thair consent haid bene obtenit thairto frome the beginning, reservand alwayes to the kingis majestie libertie to except sic out of this act as he sall deliver to the clerk of register within aucht dayis efter the dait heirof. According to the quhilk reservatioun, his majestie exceptit furth and from the said act the infeftmentis grantit be his hienes to the personis efter following contening advocatioun, donatioun and richt of patronage of the kirkis, benefices and chaiplanries efter specifiit, that is to say to Walter, prior of Blantyre, kepair of the privie seill in favoure and to the behuif of Ludovik, duke of Lennox, erll Darnelie, lord Torboltoun, Methven and Aubigny, the advocatioun, donatioun and richt of patronage off all and sindrie kirkis, personages and vicarages belanging and pertening to the archebischoiprik of Glasgow; as also the advocatioun, donatioun and richt of patronage of all and sindre kirkis, personages and vicarages belanging and pertening to the archebischoiprik and priorie of Sanctandrois gevin, grantit and disponit be his majestie to his darrest cousing Ludovik, duke of Lennox etc., his aris and assignais mentionat in the infeftment maid to him thairupoun; to Johnne, lord of Innermaith of the advocatioun and donatioun of the paroche kirk of Mukarsie; to Andro, lord Stewart of Uchiltrie of the infeftment of the landis of Uchiltrie and Erlistoun, with the advocatioun and donatioun of the personages and vicarages thairin contenit; to Johnne, lord of Thirlestane, chancellair of this realme, off the infeftmentis of the lordschip of Dunbar, the baronies of Eddilstoun and Stobo, with the advocatioun and donatioun of the benefices, chaiplanries and utheris contenit in the infeftmentis grantit be his hienes to the said lord chancellair thairupoun; to umquhile James, maister of Sincler and his aris of the advocatioun and donatioun of the personage and vicarage of Dysert; to Alexander, lord of Spynie of the landis, lordschip and baronie of Spynie, with the advocatioun, donatioun and richt of patronage of the kirkis, personages, vicarages and chaiplanries thairin contenit; to Schir Robert Melvill of Murdocarny, knicht, theasurer depute, of the advocatioun, donatioun and richt of patronage of the kirk of Monymail, personage and vicarage thairof; to Schir Johnne Cokburne of Ormeistoun, knicht, justice clerk, the richt of the patronage of the perroche kirk of Ormeistoun, now annext to the baronie of Ormeistoun; to Schir Williame Keith of Delnies, knicht, of the landis and baronie of Delny, with the advocatioun, donatioun and richt of patronage of the kirkis, personages, vicarages and chaiplanries thairin contenit; to Johnne Levingstoun, younger, of Donypace of the landis and baronie of Craigis, with the advocatioun and donatioun of the richt of patronage of the kirkis of Stracathro, Buttergill and Kilmoir; to Schir Patrik Waus of Barnebarrauche, knicht, of the landis and baronie of Barnebarrauche, lyand within the schirefdome of Wigtoun, with the advocatioun, donatioun and richt of patronage of the kirkis of Kirkynner, Kirkcowane, Cammanell and Wigtoun; to Maister David McGill of Cranstoun Riddell, advocat to oure soverane lord, in lyfrent, and to Maister David Makgill, younger, of the landis and baronie of Cranstounriddell, with annexis, connexis thairof, lyand within the schirefdome of Edinburgh and constabularie of Hadingtoun, with advocatioun, donatioun and richt of patronage of the personage and vicarage of the same; to Johnne Stewart, schireff of Bute, of the advocatioun, donatioun and richt of patronage of the personage and vicarage of Rothesay; to Schir Walter Ogilbie of Findleter, knicht, of the advocatioun, donatioun and richt of patronage of the paroche kirk of Fordyce and pendicles thairof; to Schir David Lindsay of Edzell, knicht, of the advocatioun, donatioun and richt of patronage of the paroche kirkis of Edzell, Ferne and Newdosk; to Johnne Hay of Urie of the advocatioun, donatioun and richt of patronage of the paroche kirk of Creichmond; to Alexander Fraser of Phillorth of the advocatioun and richt of patronage of the kirkis of Tyrie and Rathin; and to Patrik Mowett of Buquhollie the advocatioun, donatioun and richt of patronage of the kirkis of Cannesbie, personage and vicarage thairof, togidder with the advocatioun, donatioun and richt of patronage of the personage of Olrig to George Sincler of Maii; all quhilkis befoir exceptit his hienes declaris sall not be comprehendit under the said act.
[1593/4/39]*[print] [email] [cite] [preceding] [following]
Oure soverane lord understanding dyvers infeftmentis of fewferme to have bene grantit of auld be the prelattis of this realme of thair temporall landis in favoris of his leigis lauchfullie maid for just causes and with all sollempnities requisit, and sindrie of the saidis infeftmentis nocht onlie grantit be the saidis prelattis and thair convent under thair commoun seallis and subscriptionis, bot als bethe speciall consent and authoritie of his hienes predicessouris of guid memorie, namelie his g[races] darrest guidschir King James the fyft under his subscriptioun and privie seill, quhilkis according to the estait of tyme wer lauchfull securitie to the ressaveris thairof and neidit na particular confirmatioun to be interponit thairto, aither be authoritie of the Pape or of oure soverane lordis predicessouris, thair being na law, statute nor constitutioun ressavit obleissing the subjectis thairto; and in incace ony confirmatioun haid bene requisit, the samyin culd import na forder in effect or substance than the consent of the prince under his seill and subscriptioun. According to the quhilkis infeftmentis, the fewaris and utheris having richt fra thame, thair successouris, alsweill particuler as universall, hes bene establisched in the full richt of the saidis temporall landis pertening to the saidis prelattis be virtew of the saidis fewis sua sett in maner foirsaid, and nevirtheless utheris affecting the same kirklandis; and takand occasioun of certain lait statutis maid anent the confirmatioun of the saidis kirklandis quhilkis tuik beginning and first fundament anent the fewis of kirklandis sett sen the moneth of Merche the yeir of God jM vC fiftie aucht yeris, albeit be posterioure statutis extentioun is maid baith to new and auld fewis, hes purchest on thair pretendit maner oure soverane lordis confirmatioun thairupoun, to the prejudice of the saidis first fewaris, tending to exclude and debar thame thairby fra thair richt and to acquire the propirtie of the saidis landis to thame selffis onlie upoun pretext of the said confirmatioun. His hienes, nocht willing that the lauchfull richtis and securities of parties acquirit be thame efter sa lang space salbe hurt or prejudgeit be quhatsumevir lawes or constitutionis subsequent, or that strangearis and thrid personis quha hes nevir bene kyndlie tennentis in the saidis landis sall upoun new fewis and confirmationis thairof purchest be thame prejuge the saidis first fewaris onlie upoun pretext of wanting of ane ordiner confirmatioun according to the saidis lait statutis, oure soverane lord, with advise and consent of the estaitis assembled in this present parliament, hes statute, concludit, decernit and ordanit and be thir presentis statutis, concludis, decernis and ordanis all and sindre the saidis infeftmentis of fewferme sett of auld be the prelattis of this realme to quhatsumevir his hienes leigis and subjectis of quhatsumevir temporall landis, offices, rentis, rowmes and possessionis, being auctorized be the subscriptioun of his said guidschir or any his predicessouris and thair privie seill in taking of thair consent interponit thairto, to have bene fra the beginning, to be presentlie and in all tyme cuming guid, valide, lauchtfull, perfite and effectuall infeftmentis to the awnaris thairof, thair aris and successouris alsweill particuler as universall, to the effect thay may peceablie bruik, joyis and posses the landis and utheris contenit thairintill; and, gif neid beis, to call and persew be vertew thairof quhatsumevir personis, purchessaris of ony posteriour infeftmentis of the samyn landis, with his hienes confirmationis interponit thairto, for retreiting and rescinding thairof and the saidis first infeftmentis sua maid and grantit as said is to mak full faith in jugement and outwith to produce full actioun and exceptioun and to be preferrit to quhatsumevir posteriour infeftmentis, notwithstanding the samyn wantis ane ordiner confirmatioun, having the consent, subscriptioun and privie seill as said is and sua oft as the samyn salbe producit in jugement, ather for fundament of ony actioun or for preving of ony exceptioun or reply in quhatsumevir jugement or instance quhairas the contraversie sall stand upoun want and inlaik of confirmatioun, and that ather the Papis confirmatioun or his hienes or his predicessouris confirmatioun is alleagit and offerit to be provin in forma specifica upoun mutuall conventioun of mentinence of tua dyvers fewis: the ane auld sett with the saidis sollempnities, and the uther lait and new auctorizit be confirmatioun, quhether the same be befoir litiscontestatioun, or thaireftir usit for probatioun of the libell, exceptioun or reply in quhatsumevir instance ather upoun persute of reductioun or utherwayes, the samyn salbe haldin and repute now and in all tyme heireftir als valide and sufficient in all respectis and to preive als sufficientlie the libell, exceptioun or reply admittit, allthocht the pairty be burdynnit with productioun of the Papis or his hienes confirmatioun, as gif ane lauchtfull confirmatioun maist sollempnitlie past in the court of Rome be proces of commissioun or utherwayis be his hienes or his predicessouris in maist ample forme, with all sollempnities requisit, wer producit, and the libell, exceptioun or reply foundit upoun the said infeftment, or upoun oure soverane lordis confirmatioun, or the Paipis confirmatioun alleagit requisit thairto, to be als sufficientlie provin in all respectis be productioun of the said infeftment, with this present act of parliament, as gif ane ordiner confirmatioun wes producit; and this present act of parliament to be ressavit in all jugementis heireftir, alsweill intentit and depending in quhatsumevir pert of the proces as to be intentit, and to be observit universallie as ane perpetuall law in all tymes heireftir. And willis and declaris that thir presentis sall mak expres dirogatioun to quhatsumevir actis, statutis, or constitutionis of parliament preceding anent the confirmatioun of the fewis of kirklandis or anent double confirmationis and prerogative thairof.
[1593/4/40]*[print] [email] [cite] [preceding] [following]
Oure soverane lord and estaitis of this present parliament, understanding how necesser and expedient it salbe, alsweill for the decoratioun of the policie within this realme as for the weill of his hienes leiges, to repair, beit and mend the calsay betuix his majesties palice yett of Haliruidhous and the Nether Bow of Edinburgh, with the entres and passages quhairby it is reparit to and fra the said palice, and speciallie betuix the Cloikmylne and the watter yett, and thairfra to Leith Wynd fute; and his majestie and estaitis foirsaidis, knawing na reddear meane and way to sustene the expenses of the said reparatioun and less hurtfull to the leigis nor to exact the custume and impost undirwrittin, as hes bene observit and usit be his graces maist [noble]† predicessoris quhen the like occasioun wes offerit, thairfoir oure said soverane lord and estaitis of this present parliament gevis, grantis and committis full power and comissioun to the ballies and counsaill of the Cannowgait present and being for the tyme, be thame selffis and thair deputtis, ane or ma, under thame, quhome his majestie and estaitis gevis thame full pouer to mak and creat, to collect, gadder, intromettwith and uptak tua pennies usuall money of this realme of everie full cart, with ane pennie of everie horse laid that sall cum within the said watter yett to be sauld in the marcat, and, gif neid beis, to poynd and distrenyie thairfoir, makand, constituand and ordinand the saidis ballies and counsaill present and being for the tyme and thair depuittis, ane or ma, undowtit and irrevocable collectouris of the same for the space of thre yeiris nixt efter thair entrie thairto, quhilk salbe and begin at the day and dait of thir presentis and forder to continew during his majesties will, provyding alwayes the saidis ballies and counsaill present and being for the tyme as said is befoir the expyring of the saidis yeiris beit, mend and repair the saidis passages within the bounds foirsaidis, with sufficient calsayis deulie as effeyris.
[1593/4/41]*[print] [email] [cite] [preceding] [following]
It is statute and ordanit be oure soverane lord and lordis of articles of this present parliament that quhasoevir salhappin at ony tyme heireftir stryk, hurt or slay ony persoun within his hienes parliament hous during the tyme of the halding of the parliament, within the kingis inner chalmer, calbinat or chalmer of presence, the kingis majestie for the tyme being within his palice, or within the inner tolbuith the tyme that the lordis of sessioun sittis for administratioun of justice, or within the kingis privie counsailhous the tyme of the counsaill sitting thair, or quhasoevir salhappin to stryk, hurt or slay ony persoun in presence of his majestie quhair evir his hienes salhappin to be for the tyme, sall incur the pane of tressone and salbe accusit thairfoir as commitaris of tressone and lesemajestie; and siclyk statutis and ordanis that quhasoevir sall stryk or hurt in ony tyme heireftir ony persoun befoir oure soverane lordis justice or his depuittis sitting in jugement, or within the inner yett of the kingis palice quhair his hienes sall mak his residence for the tyme, or within the utter tolbuith of Edinburgh the tyme that the lords of sessioun sittis for administratioun of justice, sall incur the pane of death and salbe accusit criminallie thairfoir. And als statutis and ordanis that quhasoevir at ony tyme heireftir sall stryk or hurt ony persoun befoir the ballies of burghis, commissionaris, schireffis, ballies of royalties and regalities and utheris inferioure jugeis within this realme, thai or ony of thame sitting in jugement sall pay ane hundreth pundis to be employit at the discretioun of the juge offendit, and imprisonement of thair personis during the juge will, but prejudice alwayis of the privilegis grantit be quhatsumevir statute or actis of parliament ofbefoir to the provest and ballies of burrowis or quhatsumever inferioure jugeis. And last it is statute and ordanit that quhasoevir sall stryk or hurt ony juge within this realme sittand in jugement sall incur the pane of death and be accusit criminallie thairfoir.
[1593/4/42]*[print] [email] [cite] [preceding] [following]
Oure soverane lord and estaitis of this present parliament, takand consideratioun of the rebellious contempt usit be ane greit nowmer of his hienes subjectis, alsweill upoun the bordour as in the hielandis and dyvers utheris partis of his hienes realme, quha, without regard of thair dewtifull obedience, pass dalie to the horne for not finding of law souirtie, not subscryving of assurances in materis of feid dingis and strykis his majesties messingeris and utheris his hienes officiaris in executioun of thair offices, and sum quha nichtlie and dalie reifis, forrayis and committis oppin thift, reif and oppressioun; for remeid quhairof, oure said soverane lord ordanis the actis and lawes maid ofbefoir anent thift, thiftebute, ressett of thift, interteneyaris in, intercommoynaris, ressettaris and supplearis of thevis to be put to executioun according to the tennoure thairof, and ratifies and apprevis the same in all pointis. And forder oure said soverane lord, with advise of the estaitis of this present parliament, statutis and oradanis that na respett nor remissioun be grantit at ony tyme heireftir to ony persoun or personis that pass to the horne for thift, reif, slauchter, birning or heirschip quhill the pertie skaithit be first satisfiet; and gif ony respeitt or remissioun salhappin to be grantit befoir the pairtie grevit be first satisfiit, the samyn salbe null and of nane availl be way of exceptioun of† reply without ony forder declaratour, except the saidis remissionis and respeittis be grantit for pacifeing of the brokin cuntries and bordouris.
[1593/4/43]*[print] [email] [cite] [preceding] [following]
Oure soverane lord and estaitis of this realme convenit at this present parliament ratifies and apprevis for thame and thair successouris all and quhatsumevir actis, statutis, constitutionis and ordinances maid be his majestie or his predicessouris in favouris of the senatouris of the college of justice and memberis thairof sen the first erectioun of the said college to this present day and dait, without ony maner of diminutioun or dirogatioun of the samyn in ony sort be quhatsumevir uther act or statute that may or can be extendit or interpreit in the contrair, ather speciall or generall.
[1593/4/44]*[print] [email] [cite] [preceding] [following]
Oure soverane lord and estaitis of this present parliament, understanding perfytlie that falsettis increscis dalie within this realme and speciallie be the wreitting of the bodies of the contractis, charteris, obligationis, reversionis, assignationis and all utheris wreittis and evidentis be the hand write of sic personis as ar not commonlie knawin and ar not commoun notaris, nor bruikis na commoun office as writtaris within this realme, and gif the wreittar wer knawin the samyn wald gif greit licht to the triall of the treuth of the falsett of the said wreit and evident, thairfoir his hienes, with advise of the saidis estaitis in parliament, decernis and declaris that all originall charterris, contractis, obligationis, reversionis, assignationis and all utheris wreittis and evidentis to be maid heireftir sall mak speciall mentioun in the hinder end thairof, befoir the inserting of the witneses thairin, off the name, surename and particuler remaning place, diocie and uther denominatioun of the wreittar of the bodie of the foirsaidis orignall wreittis and evidentis; utherwayis, the same to mak na faith in jugement nor outwith in tyme cuming; and to begin upoun the first day of November nixtocum.
[1593/4/45]*[print] [email] [cite] [preceding] [following]
Forsamekle as in the parliament haldin at Edinburgh, the xxij day of August the yeir of God jM vC fourscoir foure yeiris it was statute and ordanit that all giftis, provisionis and dispositionis of successoriis of prelacies, abbacies, prioriis and nunries maid and grantit be his hienes to quhatsumevir of his subjectis upoun the resignationis or demissionis of the possessouris of the saidis abbacies, prioriis and titularis of the same ar and salbe of nane availl, force nor effect with all that has followit or may follow thairupoun but ony forder process, as at mair lenth is contenit in the said act, the quhilk act and constitutioun being maid aganis the forme of utheris guid actis and constitutionis maid ofbefoir, quhilkis wer onlie extendit ad futurum, lykas of all equitie and ressone all lawes, actis and constitutionis of parliament aucht onlie to have effect in sic caices as happynnis to follow efter the making thairof, thairfoir oure soverane lord and estaitis of this present parliament decernis, declaris and ordanis that the said act and constitutioun salhave na effect, force nor strenth aganis sic giftes, provisionis and dispositionis of prelaciis and abbacies grantit be his hienes at ony tyme preceding the day and dait of the foirsaid act to quhatsumevir persoun or personis barnis or narrest kynnisfolk upoun the resignationis or dimissionis of the possessouris, commendataris or titularis at the tyme of thair dimissioun, with reservatioun of thair awin lyverentis; and decernis, statutis and ordanis the saidis giftis, provisionis and dispositionis to be and to have bene fra the date thairof sufficient richtis and titles to thame to bruik the saidis abbacies and benefices induring thair lyftyme, notwithstanding the reservatioun thairin contenit; and cassis and annullis the foirsaid act of parliament in safar as the samyn may be extendit to ony giftes and provisionis of ony abbacie or prelacie disponit befoir the said xxij day of August the yeir of God jM vC fourscoir foure yeiris, with reservatioun in forme abone exprimit; and decernis the foirsaid acte in that pairt to have na force of law, ather be way of actioun, exceptioun, reply or objectioun aganis the validitie thairof, and that the said act salbe extendit to sic provisionis and dimissionis of abbacies and prelaciis as hes past or gevin and grantit sen the dait thairof allanerlie.
[1593/4/46]*[print] [email] [cite] [preceding] [following]
Item, becaus it is understand that the povertie of the croun is the speciall caus of the povertie of the realme and inhabitantis thairof, and that the patrimonie of the croun, being augmentit, is the greit weill and proffite baith of the kingis grace and to his leigis, thairfoir oure soverane lord, with consent of his estaitis, unittis, annexis and incorporattis to the croun of this realme to remane thairwith as propre annext patrimonie and propirtie thairof in all tyme cuming and with oure soverane lord and his successouris for evir all and haill the landis, lordschippis, baronies, mylnes, multuris, woddis, schawis, parks, fischingis, townis, villages, burrowis, regalitie, baronies, annuelrentis, tenementis, reversionis, custumes greit and small, fewfermes, places, houses, biggingis, castellis, towris, maner places, yardis, orcheardis, kirkis, teyndis gryt and small, fruittis, rentis, emolumentis and all and sindrie utheris commodities and proffeittis quhatsumevir, tennentis, tennandries and serrvice of frie tennentis, alsweill to burgh as to land, quhilkis in ony maner of way pertenit or may pertene to the abbacie or monasterie of Dumfermling, liand upoun the north syd of the watter of Forth allanerlie, to be in all tymes heieftir repute and haldin the propirtie and patrimonie of the crown, to remane thairwith in all tyme cuming efter the forme, tennoure and ordoure of the actis of annexatioun maid in the tyme of oure soverane lordis predicessouris, King James the secund and King James the fyft, and conforme to all the clauses, conditionis and circumstances thairof, quhilkis in all pointis ar haldin and understand as expressit and specallie contenit in this present act in all tyme heireftir. It is likwayes declarit be oure said soverane lord and his saidis estaitis that in the said annexatioun of the temporall landis of the foirsaid abbacie of Dumfermling, lyand upoun the north syd of the watter of Forth, ar nawayis comprehendit the baronies of Brint Iland, als Wester Kinghorne, and Newbirne, with annexis and connexis thairof, quhilkis pertenit to the said abbacie of Dumfermling ofbefoir, and lyis upoun the north syd watter of Forth, and quhirin Schir Robert Melvill of Murdocarny, knicht, and Schir Robert Melvill, his eldest sone and apperand air, and Andro Wod of Largo wer infeft respective. And forder, oure said soverane lord and his saidis estaitis willis and declaris that the saidis baronies, with thair annexis and connexis, sall remane in all tyme cuming as seperat baronies and nawyis to be comprehendit in the said annexatioun, with speciall provisioun that all the teyndis of the saidis landis and lordschip of Dunfermling salbe understand be vertew of this act annext to the croun efter the forme and tennoure of the said generall act of annexatioun maid in the yeir of God jM vC lxxxvij yeris; and als all the teyndis of the remanent prelaciis and kirklandis of this realme ar annext to the croun. It is alwayes declarit be oure said soverane lord and his estaitis of parliament that the lordschip and baronie of Mussilburgh schire, with annexis and connexis, frie regalitie, partis and pendicles of the samyn, ar nocht comprehendit in the said annexatioun, nor sall nocht be comprehendit in ony annexatioun to follow heireftir, becaus the said lordschip and baronie, with annexis, connexis, fre regalitie, partis and pendicles of the samyn, being ane pairt of the patrimonie of the said abbacie of Dumfermling, wes exceptit furth of the first generall annexatioun of the kirklandis to the croun; and Johnne, lord of Thirlestane, chancellar to oure said soverane lord, and Dame Jeane Fleming, his spous, for thame and thair aris, wer heretablie infeft thairin, quhilk lordschip and baronie thay have laitlie resignit in oure said soverane lordis handis for infeftment of lyverent thairof gevin to the quenis majestie for all the dayis of hir hienes lyftyme, and for ane uther infeftment of the heretable fie thairof gevin to the said Johnne, lord Thirlestane, chancellair foirsaid, his said spous and thair aris maill and of tailyie heretablie. Quhilkis infeftmentis oure said soverane lord, with advise and consent of his foirsaidis estaitis, ratifies and confermis be thir presentis and for his hienes and his successouris willis and grantis that the samyn stand in full force, steid and effect in all tyme heireftir. And ordanis the said new infeftment gevin to the said Johnne, lord of Thirlestane, his spous and thair aris foirsaidis to be insert in the buikis of perliamet gif neid be.
[1593/4/47]*[print] [email] [cite] [preceding] [following]
Item, oure soverane lord, with consent of his saidis estaitis, havand consideratioun that his hienes beand in Upslo in Norroway the xxiiij day of November the yeir of God jM vC fourscoir nyne yeiris, for dyvers occasionis moving him, gaif and disponit to his darrest spous Anna, quene of Scottis all and haill the lordschip, baronies of Dumferling, with all landis, townis, maner place, mylnis, multuris thairof liand on the north syd of the watter of Forth, to be bruikit and possessit be hir for all the dayis of hir lyftyme, as at mair lenth is contenit in the said gift of the dait foirsaid, and now willing that his said darrest spous sall bruik and joyis the said gift for all the dayis of hir lyftyme according to the tennoure thairof, and to the promeis maid be him and be his saidis estaitis to his darrest brother Cristianus the ferd of that name, king of Denmark, thairfoir oure soverane lord, with consent foirsaid, confirmis, ratifies and apprevis the said gift, chartoure and seasing following thairupoun and all and sindrie heidis and articles contenit thairin, and promeises faithfullie to observe, keip and fulfill and caus the samyn be kepit, observit and fulfillit. Mairower, for the causes foirsaidis, oure soverane lord, with consent of the saidis estaitis, gevis and disponis of new to his said darrest spous all and haill the said lordschip of Dumfermling lyand as said is, with all landis, baronies, places, houses, biggingis, castellis, towris, fortalices, maner places, yardis, orcheardis, mylnis, woddis, fischingis, kirkis, teyndis greit and small, fruittis, rentis, emolumentis pertening thairto, with power and jurisdictioun of regalitie of the samyn, for all the yeiris and termes of hir lyftyme, and lykwayis with all monkis portionis pertening to the said abbey, to be bruikit be hir induring the said tyme, and to be peceablie intromettit with be hir factouris and chalmerlanis in hir name als frelie as oure soverane lord may bruik and posses the same be ressone of the annexatioun foirsaid, or as ony abbot or commendatar hes bruikit or possest the same in ony tyme bygane; and to that effect oure soverane lord, with consent foirsaid, cassis, retreittis, rescindis and annullis all and sindre giftes and dispositionis of monkis portionis pertening to the said abbacie maid and gevin be his hienes to quhatsumever persoun or personis for quhatsumevir caus or occasioun befoir the day and dait of this present act of constitutioun.
[1593/4/48]*[print] [email] [cite] [preceding] [following]
Forsamekle as immediatlie efter the mariage contractit and solempnizatt betuix the king and quenis majesties, oure soveranis lord and lady, his hienes, for the singular luif and affectioun borne toward hir, gaif, grantit and confermit to hir in forme of morrowing gift all and haill the lordschip of Dumfermling, with all baronies, landis, principall mansioun houses, yardis, pasturis, mylnis, multuris, mylnelandis, teyndis, alsweill greit as small, woidis, schawis, coillis, coilheuchis, fischingis and all utheris pertinentis thairof quhatsumevir, alsweill nocht namit as namit, alsweill under the eird as abone, lyand on the north pairt of the watter of Forth; quhilkis landis, baronies, with all abonespecifiit, his hienes ofbefoir haid unite, annext and incorporat in ane haill and frie lordschip for payment of ane silver pennie at the feist of Witsonday in name of blenche ferme, lyk as at mair lenth is contenit in the said gift daitit at Upslo in Norroway, the xxiiij day of November the yeir of God jM vC fourscoir nyne yeiris; and thaireftir his majestie wes infeft and gat possessioun and sesing of the said lordschip upoun the [...] day of Maii the yeir of God jM vC fourscoir ten yeiris, quhilk gift, infeftment and haill contract of mariage is ratifiet, apprevit and promessit to be accomplischit be his hienes and his estaitis, as his confirmatioun under his greit seill and under the seillis and subscripionis of his saidis estaitis daitit and deliverit to the ambassadouris of Denmerk upoun the xvij day of the said moneth of Maii the yeir of God foirsaid. As alsua in the parliament haldin at Edinburgh upoun the fyft day of Junii the yeir of God jM vC fourscoir tuelf yeiris, oure soverane lord, with avise and consent of his estaitis in parliament, ratifiit and apprevit the said contract of mariage, morowing gift and als the charter, precept and instrument of sesing gevin be his hienes to the quene, his darrest spous, according to the said contract off the palice of Linlithgw, with the lordschip and landis of the same, yardis, pasturis, lochis, fischingis, mylnis, multuris, coillis, coilheuchis, rentis, fermes, wictuallis, custumes, with advocatioun and donatioun of benefices, tennentis, tennandries, service of frie tennentis, annext and connext landis, partis, pendicles and pertinentis thairof quhatsumevir liand within the schirefdome of Linlithgw; and als the erledome of Fyff, with the palice and castell of Falkland, lordschip, landis, woddis, schawis, pasturis, rentis, fermes, dewties, custumes, mylnis, multuris, with advocatioun and donatioun of benefices, tennentis, tennandries and service of frie tennentis, annext and connext landis, partis, pendicles and pertinetis quhatsumevir, alsweill not namit as namit, lyand within the schirefdome of Fyff, and haill contentis thairof according to the said charter of the dait at Halyruidhous, the xj day of Maii jM vC lxxxx yeris. And further decernand and declairand that the said contract of mariage, haill claussis and contentis thairof, the said morowing gift, the said lordschip of Dumfermling renewit as said is abonespecifiit, the charteris, preceptis and instrumentis of seasing of the said erledome, lordschip and utheris abonespecifiit, to have bene maid and done to the honoure, weill and proffite of his majestie and his hienes croun and to the weill and commoditie of the haill realme, and thairfoir decernand and ordinand the same to stand effectuall and to be inviolablie and faithfullie observit, kepit and fulfillit in all pointis in all tyme cuming; and that the said decreit and sentence of parliament suld be extractit under the greit seill and seillis of the haill nobilitie, baronis, clergie and commissionaris of burrowis, lordis of articles of the said parliament gif neid wer, quhairthrow his hienes and his estaitis, representing the haill bodie of this realme, ar obleist to the accomplisching and fulfilling of the said contract, morowing gift, infeftmentis and titles maid to oure said soverane lady in maner befoir specifiit. Nevirtheless, becaus throw occasioun of sindrie unproffitable dispositionis maid of sindre partes of the fruittis and rentis of the said lordschip of Dumfermling, pairtlie befoir and pertlie after the said morowing gift, the full rentis of the said lordschip according as it is valued culd not be gottin and tymouslie brocht in to hir majesties propre use, oure said soverane lord hes bene dyvers tymes movet be his darrest brother, cousing and allia the king of Denmerk, and his ambassadouris in his name send in this realme, that the said morowing gift micht be maid gude to the quenis heichnes, and scho enterit in reall possessioun thairof to hir awin propre use. Quhairanent treaty being haid betuix his majestie and certane of his counsaill in his name and the ambassadouris of his said darrest bruther, cousing and allia the king of Denmerk, resolutioun is takin that hir majestie and hir chalmerlane in hir name salhave full and reall possessioun of the said lordschip of Dumfermling and sa mony of the rentis and fruittis thairof as ar presentlie frie and unviciat, and salhave alsua compensatioun out of the rentis and propirtie of the croun be infeftment of speciall landis and possessionis as will extend in certane and frie rent, all chargis deducit, to the sowme of sex thowsand pundis money of this realme yeirlie, to be uptakin and intromettit with be hir hienes awin chalmerlane in hir name and to hir behuif and propre use quhill sic partes of the rentis of Dumfermling as ar now possest be sum in lyverentis may accres be thair deceiss, and the pretendit titles now standand upoun the rentis and fruittis of the said lordschip of Dumfermling may be annullit and takin away be ordoure of law and justice, and the same rentis recoverit and maid peceable to be intromettitwith be hir hienes and hir chalmerlane to hir propre use and behuif, quhilk, God willing, is to be performed within the space of ane yeir and ane half, quhilk wilbe mair acceptable unto hir majestie; and ay as ony pairt of the rent of Dumfermling now viciat salbe recoverit, and hir hienes in peceable possessioun thairof, alsmekle of the said compensatioun out of the propirtie salbe relevit and returne to be ressavit and intromettit with be his hienes comptrollar to his majesties awin use. Mairattour, oure said soverane lord, considdering that the haill lordschip of Dumfermling, alsweill landis and teyndis, thrid as tua pairt, is conferrit to oure said soverane lady, his darrest spous, in hir morowing gift as said is, and that it is alreddie fund be his majestie be ane act maid with avise of the lordis and utheris of his hienes privie counsaill, sessioun and chekker, auctorized, allowed and approved sensyne be his estaitis in parliament that the thriddis of benefices and superplus thairof, being destinat for support of the publict effayres and sustentatioun of the ministrie, micht be disponit, gevin or employed na utherwayes bot to the said use and effect for quhilk thai wer appointit at the beginning; and siclyk that na pensionis, takis or lyfrentis of the said superplus micht or may be disponit in tyme cuming for ony langer space nor the space of ane yeir, and that efter the making of the yeirlie assignationis of the ministeris stipendis and sufficient provisioun for sustening of his majesties hous yeirlie, decernand and declarand all and quhatsumever pensionis, lyfrentis and takkis purchest or to be purchest quhairby the thriddis, superplus thairof or the first and best rentaillis thairof hes bene diminischit or alterit sen the first assumptioun of the saidis thriddis grantit ather be oure soverane lordis darrest mother or be his hienes self to quhatsumevir persoun or personis uppoun wrang report or inoportune sute without cognitioun preceding of the sustenation of the ministerie and sufficient provisioun for sustening of his majesties hous, to have bene fra the beginning and to be in all tyme cuming of nane availl, force nor effect nochtwithstanding quhatsumevir ratificationis or confirmationis following thairupoun. And lyk as the generall collectoure be himself, his chalmerlanis and under ressaveris in his name ar ordanit to ask, crave, ressave, intromett and uptak all and haill the thriddis of benefices within this realme unassignit to the ministerie quhair the first and best rentallis of the same ar alterit or diminischit sen the first assumption of the saidis thriddis off the croip and yeir of God jM vC lxxxvij yeiris, and siclyk yeirlie in tyme cuming according to the rentallis maid compt of in the yeir jM vC fourscoir foure yeiris and last thairof; and gif the saidis thriddis be diminischit or hurt onywayis be the saidis last rentallis and assumptionis of the saidis thriddis maid in the yeir of God jM vC threscoir ane yeiris, the said collectoure to have recours to the first assumption for samekle of saidis thriddis as the samyn ar diminischit be the last assumption, and to charge for the same without respect of ony pensioun, tak, lyfrent or discharge of the saidis thriddis and superplus, or ony part thairof alterit or diminischit in the rentallis sen the first assumptioun of the thriddis as said is. Sa now oure soverane lord, be advise of his estaitis in this present parliaiment, ordanis and gevis full richt and power be the tennoure heirof to the quenes, his darrest spous, oure soverane lady, be hir self, or hir chalmerlane in hir awin name, and to hir propre use and behuif, to ask, crave, ressave, intromett and uptak the haill thrid of the said abbay and lordschip of Dumfermling, sustening the ministeris serving at the propre kirkis thairof in state as thai wer assignit at the tyme of the making of the said morowing gift, or further at hir guid plesour and that the Witsondayis terme last bypast, Mertimes nixtocum and of the croip and yeir of God jM vC lxxxxiij yeris, and siclyk yeirlie in tyme cuming during hir lyftyme, according to the first assumption of the thrid of Dumfermling and compt maid thairof in the croip and yeir of God jM vC threscoir ane yeiris. And siclyk ordanis that the lordis of counsaill and sessioun sall nawyis grant ony suspensioun or relaxatioun fra the horne to ony persoun or personis chargit or denuncit for payment of the said thrid of Dumfermling, alterit or diminischit fra the first and best rentall as said is, quhill the sowmes and wictuallis chargit for be first payit to her majestie and hir chalmerlane in hir name, notwithstanding quhatsumevir pensioun, tak, lyfrent or discharge purchest or to be purchest of the same thrid quhair the first and best rentall is alterit or diminischit as said is off this instant croip and yeir of God jM vC fourscoir threttene yeiris and yeirlie in tyme cuming during hir lyftyme as said is, bot that the saidis lordis sall repute and esteme the same as null in the self, and the said nullitie to be ressavit alsweill be way of exceptioun as actioun, but prejudice nevirtheless of quhatsumever heretable infeftmentis grantit be our soverane lord, quhairby the conditioun of the saidis thriddis ar alterit or diminischit. Attour, oure soverane lord, with avise of his estaitis of parliament, in respect of said morowing gift sa faithfullie and solempnitlie promesit to be upsett and maid guid, decernis and declaris all giftes and provisionis maid of the titles of the kirkis of the said abbay and lordschip sen the dait of the said morowing gift to quhatsumevir personis to be lykwis null fra the beginning and to be in all tymes cuming of nane availl, force nor effect, and the said nullitie to be ressavit be quhatsumevir juge alsweill be way of exceptioun as actioun notwithstanding ony dispensatioun or act of parliament maid or to be maid in the contrair. Mairattour, oure said soverane lord, with advise of his saidis estaitis of parliament, considdering that the quene, his darrest spous, is infeft and seasit in the said lordschip of Dumfermling grantit to hir in morowing gift as said is during hir lyftyme with tennentis, tennandries, service of frie tennentis, advocatioun, donatioun and richt of patronage of kirkis, benefices and chaiplanries pertening thairto, and that hir majestie is lykwyis infeft in lyfrent in the said erledome of Fyffe and lordschip of Linlithgw, and attoure and besyd the same in the thrid part of the propirtie of the realme of Scotland and all proventis, rentis and emolumentis of the same propirtie pertening to his hienes or propirtie of the realme, all ratifiet and apprevit be his hienes and his estatis ofbefoir in parliament; and to the effect that the same may be the better preservit frome unproffitable dispositionis in tyme cuming, and his hienes, his estaitis and realme the better relevit, hir hienes, with his majesties speciall advise and consent, hes nominat certane personis of his hienes privie counsaill, sessioun and chekker: thay ar to say Alexander, lord of Urquhart, president of the college of justice, Walter, commendater of Blantyre, kepair of the privie seill, Maister Johnne Lindsay of Balcarras, Maister James Elphingstoun of Invernochtie, Maister Thomas Hammiltoun of Drumcarne, Alexander Hay of Eister Kennet, clerk of register, and Maister Peter Young of Seytoun, elemosinar to his majestie, to be alsua of hir hienes counsaill in thingis tending to hir honoure and commodities, inbringing and spending of hir leving, and in the administratioun of the effayres concerning the same leving, namelie in hering of the comptis thairof and tuiching the passing of the presentatioun of kirkis and benefices, prebendaris, chaiplanries and alterages or masteris and memberis of hospitallis quhirof hir hienes hes gift and richt of patronage; and in ressaving and entering of frie tennentis upoun retouris or be clare constat, or upoun resignationis, or in granting of confirmationis, or setting of takis of landis, teyndis or utheris possessionis, or making of quhatsumevir dispositionis; quhilkis counsellouris hes maid faith to gif hir hienes thair trew advise and counsaill in thir premises. Lyk as hir hienes, with advise of oure said soverane lord, hir husband, for his entres, is weill contentit and hes promessit in the word of a princes to follow the guid awise of hir hienes counsellouris in the premises, and that scho sall not deteriorat hir said morrowing gift or uther hir lyfrent landis and leving be hir deid and occasioun, and that na wreit, evident or precept that salbe presentit thairanent salbe past thair majesties handes quhill the same be first sene, red and deliberatlie considderit be hir said counsaill and subscrivit be thame (at the leist four of thame convenit togidder, the said lord president always being ane), testefeand the mater to be lauchfull and for hir hienes honoure and commoditie; without the quhilk hir majesties seill sall not be appendit nor affixit thairto, nor the same wreit, evident or precept salbe of nane availl, force nor effect to the purchesser. To the quhilkis all and sindre premises oure soverane lord, with advise of his estaitis in this present parliament, interponis his consent and authoritie, ratifeand, allowand and apprevand the same for evir. Sic subscribitur, James R[ex], Anna R[egina].