[1592/4/119]*[print] [email] [cite] [preceding] [following]
†Oure soverane lord, with avise of his estaitis in this present parliament, now eftir his perfite aige of tuentie fyve yeiris compleit, ratifies and apprevis and, for his hienes and his successouris, perpetuallie confirmis the gift and donatioun maid be his majestie befoir to Johnne Ruthven, sone lauchtfull of his umquhile richt traist cousing and counsallour Williame, erll of Gowrie, lord Ruthven and Dirletoun, off the gift of the abbacie of Scone, haill fruittis, proffeittis and emolumentis thairof, for all the dayis of his lyftyme, quhilk is of the dait at the castell of Striviling, the sevint day of Maii, the yeir of God jM vC fourscoir yeiris. And forder, oure said soverane lord, now with avise foirsaid, gevis, grantis and disponis to the said Johnne, now erll of Gowrie, for all the dayis of his lyftyme the said abbacie with all fruittis, proffeittis and emolumentis thairof in the estait quhairin the samyn now standis, to be bruikit be him during the space foirsaid but ony revocatioun. And forder, oure said soverane lord ratifies, apprevis and, for his hienes and his successouris, peretuallie confermis the act of parliament maid at Edinburgh, the penult day of November, the yeir of God jM vC fourscoir ane yeiris, intitulat 'Anent the alteratioun of the assumptioun of the thrid of the abbacie of Scone', with the decreit and ordinance of the lordis auditouris of the chekker following thairupoun, quhilk decreit is of the dait the tuentie day of Aprile, the yeir of God jM vC fourscoir sex yeiris; quhilk act of parliament and act and decreit of the saidis lordis of chekker following thairupoun, oure said soverane lord and his saidis estaitis of parliament ratifies and apprevis. Mairattour, oure said soverane lord, with avise foirsaid be the auctoritie of this present parliament, statutis and ordanis that the said act of parliament and act and ordinance of the saidis lordis of chekker following thairupoun and the act of parliament maid at Edinburgh upoun the tuentie nynt day of Julii, the yeir of God jM vC fourscoir sevin yeiris, sall stand in full force, strenth and effect in all tyme cuming according to the tennour thairof in all pointis.