[1592/4/27]*[print] [email] [cite] [preceding] [following]
†Oure soverane lord, considering the greit abuse quhilkis ar laitlie croppin in the kirk throw the misbehaviour of sic personis as ar providit to ecclesiasticall functionis, sic as personages and vicarages within any parrochin, and thairefter neglecting thair charge, ather levis thair cure or ellis committis sic crymes, faultis or enormities that thay ar fund worthie of the sentence of deprivatioun ather befoir thair awin presbitery or ellis befoir the sinodall and generall assemblies, quhilk sentence is the les regairdit be thame becaus albeit thay be deprivit of thair functioun and cure within the kirk, yit thay think thay may bruik lauchfullie the proffites and rentis of thair saidis benefices induring thair lyftymes, notwithstanding the said sentence of deprivatioun; thairfoir oure soverane lord, with avise of the estaittis of his present parliament, declairis that all and quhatsumevir sentence of deprivatioun ather pronuncit already or that happynnis to be pronunncit heirefter be ony presbitery, sinodall or generall assemblie aganis ony persone or vicare within thair jurisdictioun provydit sen his hienes coronatioun (all personis provydit to personages and vicarrages quha hes vote in parliament, secreit counsall and sessioun, or providit thairto of auld befoir the kingis coronatioun, and Maister George Young, archidene of Sanct Androis, being speciallie exceptit) is and salbe repute in all jugementis ane just caus to seclude the persone befoir providit and than deprivit frome all proffittes, commodities, rentis and deweties of the said personage and vicarage or benefice of cure, and that ather be way of actioun, exceptioun or reply; and that the said sentence of deprivatioun salbe ane sufficient caus to mak the said benefice to vaik thairby; and the said sentence being extractit and presentit to the patroun the said patroun salbe bund to present ane qualifiet persone of new to the kirk within the space of sex monethis thairefter, and gif he failye to do the same the said patroun sall tyne the richt of presentatioun for that tyme allanerlie, and the richt of presentatioun to be divolvit in the handis of the presbytery within the quhilk the benefice lyis, to the effect that thai may dispone the same and gif collatioun thairof to sic ane qualifiet persone as they sall think expedient, providing alwayes in cais the presbytery refuis to admit ane qualifiet minister presentit to theme be the patroun, it salbe lauchfull to the patroun to retene the haill fruitis of the same benefice in his awin handis. And forder, his hienes and estaittis foirsaidis declairis that the deprivatioun already pronuncit or to be pronuncit be ony presbytery, synodall or generall assemblies aganis ony of the personis or vicaris foirsaidis sall nawayes hurte or be prejudiciall to ony takis lauchfullie sett be that persone deprivit befoir his deprivatioun to quhatsumevir personis.