[A1591/8/2]*[print] [email] [cite] [preceding] [following]
The kingis majestie, his counsall and commissionaris appointit be his hienes, his nobilitie and estaittis to tak ordour with the cunye, considering the greit skayth and inconvenient quhilk his majestie and the commoun weill of this realme presentlie sustenis, not onlie throw the diversitie and chois of sindry space of money current within the same and be the aboundance of a greit quantitie of fals money havand cours amangis his hienes liegis, bot als be the hichting and rasing the pryces of all sortis of money, alsweill forreyne as cunyeit within this cuntre, preceding as weill appearis of a certane presumptioun and libertie ascryvit be sum particular personis in ressaving and geving furth at all tymes all spaces of gold and silver upoun sic heich pryces as may best tend to thair awin commoditie, without regaird or consideratioun had to the commoun weill of this realme, or to his majesties rycht or proffeit of his cunyie, being ane of the speciall partis of his hienes rent and casualitie belanging to his croun; quhilk proffeit his hienes at this tyme respectis not samekill as be the ordour and conclusioun now set doun to have the present disordour and confusioun in the cunyie in tyme cuming removed and a setled ordour and forme set doun thairanent, alsneir to imitat oure nychtbour cuntre as the present estate of this realme will permit; for this purpois, his majestie, with advise of his said counsall and commissionaris, hes thocht meit and concludit be thir presentis that the haill gold, silver and allayed money now current within this realme (the thryssil nobill with the penny and tua penny plakkis onlie exceptit) salbe reduceit and stricken as followis, to wit, the gold in ane space of gold of xxij carret fyne, with twa grams of remeid of fynes, alsueill abone as under, the unce thairof tobe set furth at twenty sevin pundis, quhairof fifty four pecis sall wey the merk wecht, with ane grayne of remeid of wecht upoun ilk pece, and to have cours for four pundis the pece, with halffis accordinglie upoun the saidis remeidis, havand on the ane syde his hienes portrat according to the painteris draucht, with this circumscriptioun, 'Jacobus 6 Dei Gratia Rex Scotorum' and on the uther syde, ane lyoun crownit, sitting in ane chyre, halding ane scepture, pointing to ane cloude, with 'Jehova' in Hebrew above the samyn, with this circumscriptioun, 'Te Solum Vereor', with the dait of the yeir. And siclyke that the haill silver and allayed money, except befoir exceptit, salbe reduceit and strickin in ane silver space of money of the fynes of ten deneiris and ane half, with twa granis of remeid of fynes, alsweill abone as under, the unce thairof tobe set furth at xliiij s., quhairof fifty twa and four fyft partis sall wey the merk wecht, with twa granis of remeid, alsweill havie as licht, upoun ilk pece, and to have cours for vj s. viij d., with halffis accordinglie upoun the saidis remeidis, ilk pece havand on the ane syde ane swerd, with ane pair of ballance lyand croce, with this circumscriptioun, 'His Dissert Rege tirannus', and upoun the uther syde his majesteis armes in ane scheild, with the croun abone and ane thryssill on ilk syde, with this circumscriptioun, 'Jacobus 6 Dei Gratia Rex Scotorum', with the dait of the yeir, with ane severall merk in the begynning of the circumscriptioun on bayth gold and silver. Quhairfoir, and to the effect this gude werk may the better and with greittar diligence tak effect and executioun, for the commoun weill and commoditie of all estaittis of personis within this realme, his majestie, with advise of the saidis lordis and commissionaris, ordanis lettres tobe direct chargeing all and sindry his hienes lieges, be oppin proclamatioun at the marcat croces of the heid burrowis of this realme, to inbring and deliver to his majesteis maister cunyeour in his hienes cunyehous, or to sic utheris as salbe authorizit be his commissioun to that effect, the haill allayit money current within this realme, except befoir exceptit, within the space of thre yeiris eftir the dait heirof; and siclyke the haill gold and silver betuix and the first day of November in the yeir of God jM vC four scoir threttene yeiris, except the thryssill nobill, quhilk his majestie with advise of the saidis lordis and commissionaris, ordanis tobe continewit in wirking conforme to the first ordinance in all pointis, for the quhilk thay sall ressave payment in the said new cunye or thryssill nobillis, quhilk his majestie, with advise foirsaid, ordanis to serve tobe ressavit amang his hienes liegis in tyme cuming: that is to say, for ilk unce of ellevin denieris, fourty twa schillingis, for ilk unce of ten denieris and ane half, fourty schillingis, for ilk unce of half merk and fourty penny pecis, of aucht denieris, thretty shillingis vj d., and for ilk unce of aucht and four penny pecis, xj s. iij d. money foirsaid, and for all uther allayed money quhilk is subject to refyning, as babeis, thre penny grottis, twelf penny grottis and gray plakkis, sic pryces as thay wer cunyeit for or hes had cours in tyme bipast. Be it alwayis understand that his majesteis maister cunyeour salbe na forder astrictit bot to ressave with ilk fyve unce of elleven denieris, ane unce of half merk and fourty penny pecis, for the quhilk he sall deliver to the awnaris in prentit money the pryces foirsaidis, or ellis the samyn wecht that he salhappin to ressave at the optioun of the partie, retenyng onelie the twelft part thairof for his majesteis dewitie and satisfactioun of his officiaris and werkmennis lauboris and sall pay for all uther silver abone the said fynes accordinglie; and siclyke the said maistir cunyeour sall pay for every unce of gold of xxij carret fyne, twenty four pundis fyvetene schillingis, and for all uther gold accordinglie pro rata, swa that he sall deliver or pay the foirsaidis pryces or the just wecht ressavit be in the new cunyeit money foirsaid, retening the xij part thairof as is abone specifit. Certifeing all and quhatsumevir personis quhilk sall not inbring the said gold, silver and allayed money within the tyme abone mentionat, that the samyn salbe decernit to have na forder cours thaireftir. Attour, his majestie and the saidis commissionaris, considering the greit disordour and diversitie in the pryces, alsweill of his hienes awin as of forayne gold and silver, the same being gevin out oftymes be sum personis in exchange upoun heich pryces and refusit tobe ressavit be utheris upoun the same pryce, to the greit hurt of sindry his hienes liegis, thairfoir, his majestie, with advise of the same commissionaris, hes thocht meit and concludit that na forayne gold sall have cours amangis his hienes liegis heireftir except the spaces following upoun the pryces particularlie under mentionat: that is to say, the auld roise nobill of wecht, sex pundis xiij s. iiij d., the dowbill ducat of wecht, sex pundis; the angell nobill of wecht, four pund viij s., the croun of the sone of wecht, fifty sex schillingis; the pistolet of Spayne of wecht, fifty fyve schillingis; and in lykmaner that the pece of gold cunyeit within this realme for xliiij s. sall now gif four pund; the ald thre pund pece with the quenis face, sex pund; the abbay croun, liij s. iiij d.; the four pund pece with the kingis face, four pund ten schillingis; the lyoun nobill, four pund; dischargeing be thir presentis all uther spaces and sortis of gold to have cours within this realme at ony tyme heireftir, as alsua all and sindry his hienes liegis of ressaving or making exchange thairwith, under the pane of escheitting of the samyn to his majesteis use and punisement of thair personis at his hienes will. And siclyke his majestie ordanis the Inglis testane to have cours heireftir within this realme upoun the pryce of viij s., the fourty schilling pece fourty schillingis, the new thretty schilling pece thretty schilling, and swa the two and thrid partis thairof pro rata, certifeing alsua quhatsumevir personis quhilkis sall ayther ressave or gif furth in exchange ony of the saidis testanis, xl xxx s. pecis, two and thrid partis thairof, upoun a hiear pryce, that the samyn sall alsua be escheitit and intromettitwith to his hienes use and thay utherwayis puneist in thair personis as effeiris; and that nane of his hienes liegis refuis to ressave the saidis new spaces of gold, silver and thryssil nobillis in thankfull payment under the pane of tressoun, commanding the generall maister cunyeour and remanent officiaris of his hienes cunyehous, ilkane in thair awin offices, to do thair diligence in wirking of the same speces of gold, silver and thryssill nobillis according to the tennour of thir presentis as thay will anser upoun the executioun of thair offices. Attour, his majestie ordanis all actis and proclamationis maid inhibiting the transporting of gold and silver furth of this realme tobe put to dew executioun in all points and the personis, contravenaris thairof, tobe puneist conforme to the tennour of the samyn with all rigour and extremitie.