[1587/7/70]*[print] [email] [cite] [preceding] [following]
†Oure soverane lord and his thrie estaitis convenit in this present parliament, considering the wicked inclinatioun of the disorderit subjectis, inhabitantis on sum pairtis of the bordouris foiranent England and in the hielandis and ilis, delyting in all mischeiffis and maist unnaturallie and cruellie waistand, slayand, heryand and distroyand thair awin nytbouris and native cuntrie people, takand occasioun of the leist truble that may occur in the inner pairtis of the realme quhen thai think that cair and thocht of the repressing of thair insolence is onywayes forgett, to renew thair maist barbarous cruelties and godles oppressionis; for remeid quhairof, attour and beside the lovable lawes and constitutionis alreddy maid in this behalf, quhilk oure soverane lord, with avise of his thrie estaittis, ratifies and apprevis be their presentis, it is statute and ordanit that the first day of everie moneth in the yeir, gif it be lauchfull, and failyeing thairof the nixt lauchfull day immediatlie following, salbe a speciale and preemptour† for his privie counsall to convene and sitt baith in the foirnone and efternone for ressaving, heiring, ansering and directing of all complaintes, causis and materis concerning the misrule of the disorderit and troublesum subjectis, inhabitatis† the hielandis and bordouris, and attemptattis committit be thame upoun the gude and peceable subjectis in the incuntre, without prejudice of uthir and ma diettis to be appointit for the same effect, gif the occasioun sua require; and specialie that upoun the saidis first day of everie moneth, or uther nixt lauchfull day, tryall and inquisitioun to be takin of the diligence done in the executioun of thingis directit the moneth preceiding and of the thingis necessar and expedient to be put in executioun during the nixt moneth to cum thairefter; and that a particuler register be kepit be the selff of all thingis that salhappin to be done and directed in materis concerning the quietnes and gude rule of the bordouris and hielandis.
That all landislordis and baillies of the landis on the bordouris and in the hielandis quhair brokin men hes duelt or presentlie duellis, contenit in a roll insert in the end of this present act, salbe chargeit to find sufficient cautioun and souirtie, landit men in the incuntrie to the contentment of oure soverane lord and his privie counsall betuix and the first day of October nixtocum or within xv dayes efter the charge upoun conditionis following under the pane of rebellioun, and gif thai failye, the said day being bipast, to put thame to the horne: that is to say, gif ony of thair men, tennentis, servandis and induellaris upoun thair landis, rowmes, steidingis and possessionis or within thair baillieries committis ony maisterfull reiff, thift or ressett of thift, depredationis opin and avowit, fyre raising upoun deidlie feidis protectit and mantenit be thair maistiris, that the landislordis and baillies upoun quhais landis and in quhais jurisdictioun thai duell sall bring and present the personis complenit upoun befoir oure soverane lordis justice or his deputis to abide tryall and underly the law for the same, upoun xv dayes warning to be maid to thame lauchfullie; and failyeing thairof, that the saidis landislordis and baillies be debtbound to satisfie the pairtie skaithit and to refound, content and pay to thame thair heirschippis and skaithis of thair awin proper guidis and landis according to the availl and quantitie tane fra the complenaris, quhilk salbe modifiit be ayth of the party hurte, othir befoir the lordis of counsall and sessioun or the justice or his deputis, quhairupoun executioun sall pas bayth aganis the principallis and souirties in forme as effeiris, providing alwayes that the landislordis quha hes thair landis liand in far hielandis or bordouris, they makand residence thame selffis in the inlandis, and thair tennentis and inhabitantis of thair landis being of clannis or dependaris on chiftanes and capitanes on the clannis, quhome the landislordis ar nawayes able to command bot onlie gettis thair mailes of thame and na uther service nor obedience, sall nawyes be subject to this act bot in maner following, viz., thay salbe haldin to direct thair preceptis of warning, obtene decreitis aganis thair tennentis and denunce thame to the horne and immediatlie efter thair denunciatioun that the saidis landislordis rais lettres be deliverance of the secreit counsall and charge the chiftanis and capitanes of the clannis on quhome thair tennentis dependis and obeyis to tak and apprehend the dissobedient tennentis and present thame to the justice under the pane of rebellioun; and incais the chiftanes dissobey, to caus denunce thame to the horne, register the same and report the lettres of horning, dewlie execute, indorsate and registrat, to the secreit counsall within the space of fourtie dayes thairefter; quhairin gif the saidis landislordis failyeis, thay salbe subject to the former conditioun of this act. As alsua, incais the saidis landislordis at ony tyme heirefter rentale or sett takkis to ony of the saidis dissobedient hielandmen or bordourmen in ony thair landis and omittis to tak sufficient cautioun for thame, that thai salbe anserable and obedient to oure soverane lordis lawis, and specialie that thai sall obey and obtemper the haill contentis and effect of this present act. And that the saidis landislordis and baillies concur, fortifie and assist utheris in removing of all personis dissobedient to the lawes or fugitive thairfra out of thair landis, rowmes and posesionis; and incais ony refuse to concur to the effect foirsaid, being deuly and lauchfullie requirit, in that cais it salbe lesum to persew the persone refuisand and his cautioner for redres of the skaith sustenit be the pairtie hurte and the landislordis and baillies of the dissobedient persoun to haif thair releif of the personis refuseand. And incais ony persoun, landislord or baillie, ressave or ressett ony persoun fugitive efter the committing of the cryme upoun thair landis, or stayis or arreistis thame not quhen ever thai pass throw thair boundis with ony trew mennis guidis reft or stollin, gif the same cumis onywyes to thair knawlege, or that it beis tryit that thai micht haif stayed or withstand the saidis reiffis and oppressionis (quhilk knawlege and power of the overlordis salbe tryit be ane assyise), the maistiris, landislordis or baillies, ressettaris of the offendouris, or not stayand and arreistand thame passand throw thair boundis as said is, salbe haldin to bring and present the personis, offendouris, to the lawes in maner foirsaid, or ellis to pay and redres the pairties skaithit in maner abonewrittin. And quhair the awneris of the reft or stollin guidis followis not, the stayaris and arreistaris of the personis and guidis passand throw thair landis salbe haldin to mak certificatioun be publicatioun at the mercate croce of the heid burgh of the schire, that the pairtie having interesse being thairby advertisit may challange thair awin guidis in sax dayes space, utherwayes the stayaris and arreistaris of the guidis sall not be anserable thairfoir.
Item, althocht sum of the lordis of the grund nevir usis† mak residence in the partis throw the quhilkis thevis resortis in thair passing to steall and reve and returne thairfra, yit sall thai be bundin be thair baillies and tennentis to mak the arreistmentis and stay and mak publicatioun of the same, gif it be in thair power or cumis to thair knawlege, or utherwayes to be haldin and oblist for redress as gif thai duelt upoun the landis thame selffis. And that the cheif of the clan in the boundis quhair brokin men duellis throw the quhilkis limmaris and brokin men repairis in thair passing to steill and reve or returning thairfra, salbe bound to mak the lyk stay arreistment and publicatioun as the landislordis or baillies and be subject to the lyk redress and actioun, criminall and civill, incais of thair failye or negligence. And becaus sindry immediat tennentis to oure soverane lord hes disponit thair landis to utheris haldin of thame selffis, in that cais it salbe sufficient for the overlord to enter and present his tennent and vassall for ansering for his subtennent and the landislord to have his releiff upoun his tennentis thairanent as accordis.
Attoure, and beside the foirsaid ordour devisit aganis the landislordis and baillies on quhais landis and in quhais jurisdictionis the thevis, soirnaris and brokin men duellis and remanis, it is alsua statute and ordanit that the capitanes, cheiffis and chiftanes of all clannis, alsweill on the hielandis as on the bordouris, and the principallis of the brancheis of the saidis clannis to be specialie noted at the end of this present act, quhilkis clannis duellis upoun the landis of divers landislordis and dependis upoun the directionis of the saidis capitanes, cheiffis and chiftanes (be pretens of blude or place of thair duelling), althocht aganis the will oftymes of the lord of the grund, be chargeit in maner and under the pane abonewrittin to entir sic personis pleges as salbe nominat be the kingis majesties lettres to be directit to thame, upoun xv dayis warning, befoir his hienes and his secreit counsall at the dayis to be appointit, to be placeit as his hienes sall think convenient for keping of gude rule in tyme cuming according to the conditionis abonewrittin, quhairunto the landislordis and baillies ar subject under the pane of executioun of the saidis plegeis to the death, incais of transgressioun and not redress maid be the personis, offendouris, for quhome the saidis plegeis lyis; and that the saidis pleges salbe relevit quarterlie with utheris of the same clan or branche to be specialie nameit alssone as may be efter the beginning of this ordour, and that the saidis plegeis salbe kepit in the kingis strait waird upoun thair awin expensis ay and quhill the principallis of the clan or brancheis find sufficient and responsall souirties, actit in the buikis of secrete counsell, that the plegeis enterit sall keip trew warde ay and quhill thai be fred and relevit ordourlie, and yit the personis with quhome thay salhappin to be placeit to remane sall onnawys gif thair licence or libertie to the saidis plegeis to depart or pas hame under the pane of tua thousand pundis to be payit be everie nobleman, barroun or gentilman that grant ony sic licence; quhilk cautioun being anis fundin, the saidis plegeis salbe placeit to remane with noblemen and baronis in fre warde, unchargeit with the burding of thair awin expensis; and all clannis, chiftanes and branches of clannis refuseand to enter thair pleges at the day and in maner contenit in the charge to be direct to that effect to be estemit publict enemyes to God, the king and all his trew and faithfull subjectis, and to be persewit with fire and sourd quhairever thai may be apprehendit, without cryme, pane or danger, to be incurrit be the doaris thairthrow. And that compt be tane anis in the yeir at the first day of November quhat personis plegeit for ar deid and quhat young men sprung up in thair race and clan able to offend; and quhair complaint is maid upoun ony persoun plegeit for, the principall of the clan or branch to be chargeit to present the offendour befoir the king or his counsall, or befoir the justice and his deputis, to underly the law for the same; and incais of failye of the presenting of the persoun or personis complenit upoun, the plege lyand for the said persoun to be execute be justice and the principall of the clan or branche to be pressit to enter ane new plege and to be still dettour to the pairtie grevit for his skaith sustenit.
Item, that all sic notorious thevis as wer borne in Liddisaill, Eskdaill, Ewisdaill, Annerdaill and the landis sumtymes callit debetable, or in the landis of the hielandis that hes lang continewit inobedient, salbe removit out of the inlandis quhair thei ar plantit and presentlie duellis or hantis to the pairtis quhair thai wer borne, except thair landislordis quhair they presentlie duell will becum souirties for thame to mak thame anserable to the law as the lawland and obedient men under the panes contenit in the actis of parliament.
Item, it is statute and ordanit for furthering of the quieting of the inobedient bordouris and hielandis that a buik be maid contening the names of plegeis enterit and to be enterit for gude rule, and of the haill personis for quhome they ly, and be quhome the plegeis suld be relevit, as alsua that a register be maid of the haill parrochynnis of the landis inhabite be thevis and dissobedient personis in the hielandis and bordouris, the names of the landislordis and townis in every parrochin and of the haill men, inhabitantis thairof, past the aige of xvj yeiris, quha ar landislordis or baillies of every land or toun or of quhat clan branche the saidis inhabitantis ar; and that the name of ony persoun that beis enterit on the brokin landis efter the removing of ony uther inobedient persoun thairfra be send to the kepar of the said register within tuelff dayes nixt efter his first entree.
Becaus eftir all diligence done, alsweill aganis the landislordis and baillies as aganis the chiftanis and principallis of clannis, thair wilbe a number of vagabundis unplegeit or anserit for be thair landislordis or baillies, it is statute and ordanit that lettres salbe direct chargeing all sic vagaboundis and unanserable men be oppin proclamatioun at the mercate croce of the heid burgh of the schire quhair they hant, or heid burrowis of the tua nixt schyres in the lawland (ubi non pates tutus accessus), to find souirtie to underly the law the thrid day of the nixt justice air or sounar, on xv dayes warning, under the panes contenit in the actis of parliament; and incais thai find not souirtie within sex dayes and enteris not thame selffis under plegeing, to be denuncit rebellis and fugitives, and thai and thair ressettaris to be persewit thairefter quhill thai be apprehendit and punissit for thair demerites; and that the pairties skaithit have competent actioun, civile or criminall, aganis the magistratis or utheris within quhais boundis, jurisdictioun or power sic vagabundis and fugitives ar wittinglie ressett with the guidis stollin or reft in thair passing, remaning or returning.
Item, it is declairit, statute and ordanit that all bandis, actis and obligationis maid, or to be maid, be quhatsumevir personis for quhatsumever brokin men, plegeis or utherwyse ressavit for the gude rule and quietnes of the bordouris and hielandis, or ony thing depending thairupoun, salbe extendit aganis the airis and successouris of thair souirties and cautioneris, althocht speciale mentioun be not maid in the actis that thai obleist thame selffis, thair airis and successouris.
Item, it is declarit, statute and ordanit that the suretie maid be the landislordis and ballies sall not be prejudiciall nor stop the suirtie maid be the chiftanes and principallis of clannis, nor be the contrair the suretie maid be thame to the landislordis and baillies.
Item, it is statute and ordanit that the justice clerk, assisted with the thesaurair and clerk of register, salbe speciall rememberair of the causis concerning the hielandis and bordouris, and salbe anserable for the dispatche and diligence of the directioun of thingis pertening thairto.
Item, it is statute and ordanit that quhensoever ony heirschippis, oppressionis, reiffis, sorningis and thiftis salhappin to be committit within onie pairt of this realme, in the hielandis or bordouris thairof, be ony captaine of clan or be ony uther clannit man aganis ony of oure soverane lordis leill and trew subjectis in tyme cuming, and the guidis sua tane up transportit to ony uther clannit mannis boundis, ressavit and mantenit thairin, or disponit upoun, and the same cum to the knawlege of the pairtie harmeit and damnefeit, ordanis him first to require or caus require redress thairof, that the cheiff of the clan or chiftane of the cuntrie quhairin the saidis guidis salbe ressett or remane for the space of tuelff houris of his witting, to mak redres and restitutioun of the same guidis within xv dayes efter he be requirit thairto; quhairin gif he failyeis, it salbe lesum to the pairtie harmeit to call, convene and persew the cheiff, captaine, superiouris and principallis of that clan within quhais boundis the guidis and geir swa tane salbe ressett and sparpalit, and under thair protectioun mantenit befoir the judge ordiner, criminallie or civilie, and upoun sufficient pruiff to be led be the partie harmeit that the guidis wer sauld or disponit upoun within sic boundis be the witting and knawlege of the said cheiff, capitane or superiouris and principallis of the clan, they being of power to haif resisted the same, thay to be anserable for the same guidis and decreit to be gevin aganis thame, with the proffittis thairof, siclyk and in the same maner as mycht or sould have bene gevin aganis the personis, committaris of the deid thame selffis, and executoriallis to pas thairupoun in forme as effeiris. And als, gif it salhappin the pairtie harmeit be the personis, committaris of sic enormities, to follow and persew his awin guidis and geir tane as said is for the recovery of the same, and in the releiff of his awne guidis and geir to slay, hurte or mutilate ony of the takaris thairof, it is heirby expreslie declairit, statute and ordanit that the said partie harmeit or his assisteris and complices sall nevir be accusable of ony sic slauchter, mutilatioun or uther hurt bot alsfrelie remittit and dischargeit in that behalff as gif he had oure soverane lordis speciall commissioun to that effect; and als ordanis and declairis that quhatsumevir personis salhappin heirefter to beir feid for ony sic slachter, hurte or mutilatioun salbe subject to the panes and actioun abonewrittin, and it salbe lauchfull to the pairtie harmeit to call and convene thame, criminallie or civilie at his optioun, for the saidis reiffis and oppressionis in maner befoir specefiit.
Item, quha bringis ony Scottis or Inglis theiff in his cumpanie, oppinlie or privatlie, to the kingis majesties court or burgh of Edinburgh, or requeistis for him to hald him bak fra the dew punisement appoyntit be the law, without licence of the king, his lieutennent or wardane, salbe subject to the actioun, criminall or civile, of him quhomunto the said theiff hes offendit be thift or reiff or be compellit for the same to redress as principall theif or revair; and quhatsumever Ingliss thevis sall cum in ony part of Scotland without licence of the king, his lieutennent or wardane salbe takin and used as lauchfull prisoneris; and quhasoevir wald avow sic thevis to be thair prisoneris or brocht in be thame upoun licences sall not keip thame in cumpany in the kingis court or palice or in the Hie Streit, quhair his hienes or his justice sittis and remanis, beirand wappinis, bot hald thame in clois housis, fra thair cuming to thair departing, under the pane to be repute as favouraris, fosteraris and mantenaris of thevis and thift and to be punissit thairfoir, conforme to the lawes of the realme.
Item, it is statute and ordanit that the justice clerk and his deputis and the kingis commissioneris constitute to further justice, quietnes and gude rule in all schyres sall diligentlie inquire and tak up dittay of the takaris up and payaris of blak meill, and to mak rentale of the quantitie thairof, and to persew alsweill the takaris as payaris thairof at justice airis or particuler diettis and do justice upoun thame according to the lawes, and ressave souirtie under grite panes that they sall abstene in tyme cuming.
Item, it is statute and ordanit that the justice clerk sall twyise in the yeir, viz., at the first day of Merche and September, procure the kingis majesties clois valentynis to be send to the maisteris, landislordis, baillies and chiftanes of all notable lymmeris and thevis, chargeing to present thame other befoir his majesties selff or befoir the justice and his deputis at the day and place to be appointit, to underly the law, conforme to the lawes and generall band and under the panis contenit in the same; and to try quhat obedience beis schawne be the personis quhome unto the saidis valentynis salbe direct; and incais of thair contempt be undewtifull anser to put thame selffis to the knawlege of ane assyise and minister justice upoun thame, conforme to the lawes and generall band.
Item, sen experience declairis that the mariage of the kingis majesties subjectis upoun the dochteris of the brokin men and thevis of England is not onlie a hinderance to his majesties service and obedience bot alsua to the commoun peax and quietnes betuix bayth the realmes, it is thairfoir statute and ordanit be oure soverane lord and three estaittis of this present parliament that nane of his subjectis presume to tak upoun hand to mary with ony Englishe woman duelling in the opposite mercheis without his hienes express licence had and obtenit to that effect under the greit seill, undir the pane of deid and confiscatioun of all his guidis movable; and that this be a speciale point of dittay in tyme cuming.
Item, it is statute and ordanit that the wardanis of the mercheis foiranent England tak diligent inquisitioun quhat Inglismen occupiis ony Scottis grund in pasturage or tillage, and thai bill the personis, offendouris, in that behalff aganis the treateis and seik redress according thairto as thai will anser upoun thair allegeance, at thair heichast charge and perrell and under the pane of incurring his hienes indignatioun and displesir.
Item, it is thocht expedient, statute and ordanit that all plegeis ressavit for the guid rule and quietnes of the bordouris salbe placeit on the northside of the water of Forthe, without exceptioun or dispensatioun, and the plegeis for the gude rule of the hielandes and iles to be placeit on the south side of the same watter of Forth; and that the justice clerk and his deputtis, to quhome the cair of this ordour is committit, tak speciall regaird to the dew executioun heirof as thai and every ane of thame will anser upoun the executioun of thair offices.
Item, for releiff of the landislord or baillie that salhappin to be chargeit for entree of his tennentis or personis duelland under his jurisdictioun to underly the law or to mak redress, that he use warning and seke the ordour of removing aganis his tennentis and occupiaris of the ground and mak thame the kingis rebellis within the space of xl dayes efter the nixt terme, unressaving mailles or dewties fra thame in the mentyme; quhairin his diligence being tryit and fundin gude and sufficient be the kingis majestie and his privie counsall, or be his justice and his deputis, and that he performed all thing that he could or that wes in his power to do efter the fact come to his knawlege, in that cais he salbe relevit of the pane and danger of the law contenit in this act.
Item, incais ony landislord, baillie or chiftane of clan salhappin to be burdynnit with the taking and presenting to the justice of ony malefactour, and that the same malefactour is fugitive fra the law and refuisis to releiff his landislord, baillie or chiftane, and that thairthrow, according to the lawis and generall band, they salbe constranit to birne the said dissobedient personis housis and to hald thame, thair wiffis and bairnis of the ground, it is statute and ordanit in that cais that the saidis dissobedient personis, thair airis, wiffis, bairnis nor na utheris pretending richt fra thame or be thair deid or occasioun salhave ony actioun, criminall of civile, for the said removing, birning or ejectioun, bot salbe simplicitir assoilyeit thairfra and all that may follow thairupoun, quhenevir or quhairever the same salbe persewit.
Item, that sic mediat personis as takis upoun thame to be sellaris of the guidis of thevis or inobedient personis and clannis that dar not cum to publique mercattis in lawland thame selffis, quhairby the executioun of the actis maid anent thevis and soirnairis of clannis is gritelie impedit and defraudit, sall, for that deid, being tryit culpable thairof, incur the pane of banisement and confiscatioun of all thair guidis movable, the ane half to oure soverane lordis use and the uther half to the pairtie, apprehendare and suittair.
† The roll of the names of the landislordis and baillies of landis duelland on the bordouris and in the hielandis quhair brokin men hes duelt and presentlie duellis
Landislordis and baillies
The roll of the clannis that hes capitanes, cheiffis and chiftanes quhome on thai depend, oftymes aganis the willis of thair landislordis, alsweill on the bordouris as hielandes, and of sum speciale personis of branches of the saidis clannis
[1587/7/71]*[print] [email] [cite] [preceding] [following]
†Oure soverane lord, of his naturall dispositioun, being at all tymes maist cairfull to unit the haill hairtis of his subjectis, that his nobilitie, estaitis and commoun people at all tymes micht be the mair bent in his service for the avancement of the realme, hes in guid effect declairit his intentioun nawyis to enriche his crown with the damnage of his subjectis, nor that ony of thame aganis utheris for ony variance fallin out in his hienes minoritie and les age suld have ony maner of stryff heirefter, quhairfoir his hienes and his thre estaittis in his parliament haldin at Linlythgw, in the great hall of the palice thairof, the tent day of December the yeir of God jM vC lxxxv yeiris, for great and wechtie considerationis tending to the generall peax and quietnes within this realme, retreitit, rescindit and reducit quhatsumever procesis and domes of foirfaltour, sentences criminall and penall, led and gevin aganis quhatsumevir personis for the allegit offensis contenit in the saidis procesis and sentences and for quhatsumever utheris causis and allegit crymes done or that micht be allegit to have bene committit sen his majesties coronatioun, or that ar contenit in the saidis sentences of foirfaltour led sen his majesties coronatioun, at quhat tyme soever the saidis crymes ar allegit to be committit befoir, with all that followit or may follow thairupoun; be the quhilk restitutioun, the saidis personis forfaltit, denuncit rebellis and put to the horne, or that wer ony utherwyis trublit, sa monie of thame that wer depairtit this lyff, wer, be oure said soverane and his saidis thre estaitis, fullelie reponit and restoirit in integrum to thair landis, heretages, rowmes, possesionis, benefices, pensionis, offices, and to thair honour, dignitie and fame, siclyk and in the samyn maner as gif the saidis sentences had never bene gevin. And forder, our said soverane lord, with avise of his saidis thre estaittis of parliament, be ane generall abolitione dischargeit all actionis, criminall and penall, quhilk micht be competent to his hienes selff for his awin properentres, as als that mycht result betuix his subjectis of quhatsumevir qualitie upoun ony commoun caus of miscontentment of the estait offerit in his hienes minoritie and les aige, as in the saidis generall actis of restitutioun, pacificatioun and abolitioun at mair lenth is contenit, quhilkis actis and constitutionis of parliament, and everie ane of thame, oure said soverane lord and his thrie estaittis of this present parliament have of new advisedlie sene and considerit its every point and circumstance thairof, and findis and declairis the samin to have bene and to be maid for the weill of oure soverane lord, the preservatioun of his estait and for maist just, necessar and proffitable causis to the haill realme and for the quietnes of all his hienes lieges; and thairfoir, his hienes and thre estaittis of this present parliament hes ratifiet, apprevit and affermit, lyk as oure said soverane lord, with avise of his saidis thrie estaittis be thir presentis, for him selff and his successouris, ratifies, affermis and perpetuallie apprevis the same act of restitutioun, pacificatioun and abolitioun of the dait abonespecifiit in all pointis, headis, articles, claussis and circumstances thairof, without ony maner of exceptioun, ather of personis or crymes (except as salbe exceptit in this present act). And forder, be the auctoritie of this present parliament, our said soverane lord, with advise of his saidis thre estaitis, efter his perfite aige as said is, of new reducis, rescindis, casis and annullis all and sindrie the saidis domes of forfaltour, sentences criminall and penall, all infeftmentis and dispositionis of landis, heretages, rentis, offices and benefices proceiding thairupoun and that micht or may be comprehendit under the said generall restitutioun, pacificatioun and abolitioun maid at Lynlithgw the tyme foirsaid, or that may be comprehendit in the first pacificatioun concluidit at Perth, the xxiij day of Februar the yeir of God jM vC lxxij yeiris, ratifiit and apprevit in the parliament haldin thairefter at Halyruidhous, the last day of Aprile the yeir of God jM vC lxxiij yeiris; quhilkis, and every particle, oure said soverane lord and his thre estaitis haldis as expressit heirin and ordanis the same to haif full effect and force sen the returne of umquhile the quene, his majesties derrest moder, in this realme upoun the nyntene day of August, the yeir of God jM vC thriescoir ane yeiris, to be at lenth insert in this present act gif neid be.
And mairower, our said soverane lord, to put all his liegis in full assurance, with advise of his saidis thrie estaittis of parliament, have retreitit and rescindit and, be the tennour heirof, retreitis and rescindis all and sindrie procesis of foirfaltour led aganis quhatsumevir personis fra the day of the arryving of oure soverane lordis umquhile derrest moder within this realme, quhilk wes upoun the nyntene day of August, the yeir of God jM vC thriescoir ane yeiris, to the day of his hienes coronatioun, and declairis the same to be of nane availl, force nor effect with all that followit or may follow thairupoun, except the speciale procesis and sentences of foirfaltour efter specifiit, quhilk sall remane and abide in thair awin force, notwithstanding the premisis: thay ar to say, James, sumtyme erle Bothuill, James Ormestoun, sumtyme of that Ilk, and all utheris yit onlyve quha hes bene foirfaltit for airt and pairt of the murthour of his hienes umquhile derrest fader.
Exceptand alsua the crymes underwrittin committit be quhatsumever persoun or personis, to wit, wilfull murthouris or slauchteris, fyre rasing, birning of cornis and housis, hoching of oxin, breking of plewis, oppressionis, spuilyeis, ejectionis, intrusionis and all uther actionis and suitis, criminall and civile, quhatsumever proceding betuix persoun and personis upoun thair particuler motionis or interesse and not following, not depending upoun the commoun causis quhairupoun miscontentment fell out upoun the governament and estait.
Exceptand alsua the crymes underwrittin, to wit, thift, incest, witchecraft, revesing of wemen, striking, inbringing, and outputting of fals cunye, menslauchter in housis, in the hie way or passage or beside the same, not depending upoun the commoun caus, as said is. And als, reservand to oure soverane lord his thesaurair, comptrollair and collectour generall and utheris, his officiaris, thair suitis and actionis for his hienes propertie, casualities and thriddis of benefices restand to his hienes and for quhatsumever jowellis, abuilyementis, guidis, movable and unmovable pertening to his hienes derrest moder or to him selff.
And als exceptand all utheris crymes, actionis, materis, claussis and offensis betuix privat parties upoun thair awin privat causis, nawayes proceding and following upoun the saidis commoun causis, quhilkis ar nawayes meanit to be comprehendit in this act; and thairfoir it salbe lauchfull for the pairties that ar offendit to persew thair actionis thairanent alsfrelie as thai micht have done befoir quhatsumever act or constitutioun maid in the contrair notwithstanding.
And siclyk oure said soverane lord and thrie estaittis in parliament hes rescindit, reducit, callit, retreittit and annullit and, be the tennour heirof, rescindis, reducis, casis, retreittis and annullis all and sindrie renunciationis, translationis of richt, dispositionis of landis, rowmes, heretages and possesionis, offices, benefices or utheris guidis and geir quhatsumevir maid be quhatsumever personis foirfaltit sen oure soverane lordis coronatioun, the saidis procesis of foirfaltour standand aganis thame and befoir they wer fullelie restoirit, contrair the samin, or be quhatsumevir persoun or personis quhilkis wer summoned to be foirfaltit, and, for feir of the saidis summoundis and sentence to follow thairupoun, maid ony renunciatioun, translatioun, richt, title or dispositioun of ony thair landis, rowmes, possessionis, heretages, offices and benefices to quhatsumever persoun or personis with all obligationis maid be thame, thair cautioneris and souirties quhatsumevir, be the quhilkis thai war bund and oblist to warrand thair saidis renunciationis, translationis and dispositionis and nevir to cum in contrair thairof.
And siclyk oure said soverane lord, with avise of the saidis thre estaittis of parliament, retreitis, rescindis, casis and annullis all bandis and obligationis maid be quhatsumever personis quhilkis war trublit for the said commoun cause or ony occasioun following or fallin out thairupoun to quhatsumever personis quhilkis inditit or dilaitit thame of crymes and offensis, socht and procuirit thair foirfaltouris or deprivatioun fra thair offices or benefices, or the escheit of thair movable guidis, and for eschewing of that inconvenient wer movit to gif the personis quhilkis trublit thame obligationis of sowmes of money or to do ony uther gude deid for saulftie of thame fra the saidis grittare inconvenientis at that tyme; and decernis and declairis that the pincipall pairtie, thair cautioneris and souirties foirsaidis, thair airis, executouris, successouris and assignais ar and salbe in tyme cuming acquite and frie of the foirsaidis contractis, bandis, obligationis and all actioun and penaltie that may follow thairupoun; and thir tua claussis to extend to all thingis done sen his majestie acceptit the governament of the realme in his awin persoun allanerlie, providing alwayes that sic as ar exceptit fra the benefite of this present act quhais names ar befoir declairit salhave na benefite of this provisioun, bot the renunciationis, translationis, rychtis and dispositionis maid be thame to stand in thair awin strenth, force and effect.
Be it alwayes understand that notwithstanding the restitutioun of Johne, bischope of Ross, conforme to the generall act, oure soverane lord, with avise of his thre estaittes, will and grantis that James, erl of Gowrie, and Dame Dorathe Stewart, his moder and tutrix, brouk and possess the teindis of the parrochin of Tarbert, conforme to thair tak, ay and quhill thai be satisfeit thairfoir at his majesties sicht and his chancellairis; and siclyk that Williame Keyth sall brouke his pensioun to the tyme he be satisfeit, as is befoir said, or that his majesties will be declairit heiranent.
Be it alwayes understand that albeit Williame, bischope of Dunblane be comprehendit under the act of generall restitutioun, that notwithstanding the same sall nawayes be extendit in his favour quhill he have satisfeit Johnne, erle of Montrois, Alexander, maister of Levingstoun, and utheris, the saidis erllis freindis, be the sicht of his majestie, his chancellair, justice clerk and Schir Robert Mailvile, thesaurair depute.
Item, our soverane lord, with advise of the thrie estaitis in this present parliament, hes declairit and, be the tennour heirof, declairis that the benefite of pacificatioun, restitutioun and abolitioun maid and grantit in favouris of Johnne Mosman, goldsmyth and burges of Edinburgh, at ony tyme heirtofoir, or that salhappin to be maid and grantit in his favouris at ony tyme heirefter, sall nawayes be extendit to the landis of Langhermiestoun, Curry and milne thairof, nor to na annuelrentis furth of the samyn quhilkis pertenit to the said umquhile James Mosman, lyand within the schirefdome of Edinburgh principall, bot that the saidis landis, annuelrentis and utheris abonewrittin, with thair pertinentis, sall appertene to oure said soverane lord and his hienes successouris as fallin and becum in his hienes handes throw the proces and dome of foirfaltour led and deducit aganis the said umquhile James Mosman, goldsmyth, to be usit and disponit be his hienes and his successouris in all tym cuming at his plesir, notwithstanding quhatsumeur pacificatioun, restitutioun, abolitioun or uther act of parliament grantit or to be grantit that may be extendit or interpreit in the contrair, quhilkis oure said soverane lord in that part expreslie revokis, casis and declairis to be null and of nane avaiil. Lyk as his hienes, with avise foirsaid, revoikis, casis and annullis all infeftmentis, giftis, dispositionis maid be his hienes of the saidis landis and annuelrentis, with thair pertinentis, to quhatsumevir persoun or personis at ony tyme heirtofoir preceidand be ressoun of the said foirfaltour or be quhatsumever uther maner of way, with all that hes followit or may follow thairupoun.
Item, our soverane lord, with avise of the thrie estaittis in this present parliament, hes declairit and, be the tennour heirof, declairis that the benefite of pacificatioun, restitutioun and abolitioun maid in favouris of the bairnis and airis of umquhile Patrik Quhitelaw of that Ilk at ony tyme heirtofoir, or that salhappin to be maid and grantit in thair favouris at ony tyme heirefter, sall nawayes be extendit to the landis of Eist Fentoun, commounlie callit Fentoun Toure of Oversydeserfe, with the toure, fortalice, maner places, housis, biggingis, yairdis and pertinentis of the samyn quhatsumevir, lyand within the constabularie of Hadingtoun and schirefdome of Edinburgh, bot that the saidis landis and utheris abonewrittin, with thair pertinentis, sall pertene to his hienes and his successouris as fallin and becumin in his handis throw the proces and dome of foirfaltour led and deducit aganis the said umquhile Patrik Quhitelaw of that Ilk, to be usit and disponit be his hienes and his successouris in all tyme cuming at his plesir, notwithstanding quhatsumever pacificatioun, restitutioun, abolitioun or uther act of parliament quhatsumever grantit or to be grantit that may be extendit or interpreit in the contrair, quhilkis his hienes in that pairt expreslie revoikis, casis and declairis to be null and of nane availl. And that oure soverane lord, with avise foirsaid, revoikis, casis and annullis all infeftmentis, giftis and dispositionis maid be his hienes of the saidis landis, toure, fortalice and utheris abone writtin, with thair pertinentis, to quhatsumevir persoun or personis heirtofoir preceidand be ressoun of the said foirfaltour or be quhatsumever uther maner of way, with all that hes followit or may follow thairupoun.
Providing alwayes that this generall restitutioun, reductioun and annulling of foirfaltouris and generall pacificatioun sall onnawyes be extendit to ony guidis, rowmes, takkis, stedingis or possesionis presentlie appertening to Schir Walter Ogilvy of Findletter, knicht, or that wes disponit to umquhile James Ogilve of Findletter, his guidschir, be the foirfaltour of umquhile Schir Johnne Gordoun of Deskfurde, knicht, ather haldin of his hienes and his successouris or of quhatsumever uther superiouris be his hienes or his predicessouris lettres of presentatioun direct to thame, bot that the saidis infeftmentis sall stand in full forme, force and effect to the said Schir Walter and his airis in all tyme cuming, conforme to the tennouris thairof and conforme to the decreit arbitrall gevin betuix George, erle of Huntlie, guidschir to George, now erle of Huntlie, and the said umquhile Schir Johnne Gordoun of Deskfurde, knicht, his sone, with consent of the said George, erle of Huntlie, his fader, as lauchfull administratour to him, on that ane pairt, and the said umquhile James Ogilvy of Findletter, guidschir to the said Schir Walter Ogilvy of Findletter, knicht, on that uther pairt, be umquhile Marie, quene dowriar and regent of this realme, and certane noble and honorable personis chosin be the saidis pairties, off the dait the xxj day of Maii, the yeir of God jM vC lvj yeiris; and alsua ane uther decreit arbitrall gevin betuix umquhile George, erle of Huntlie that last deceissit, Adame Gordoun of Auchindown, his bruther, and the said James Ogilvy of Findletter, be certane honorable jugeis chosin be the saidis pairties and umquhile the quene, oure soverane lordis derrest moder, as odwoman and overwomen, of the dait the xxiij day of Merche the yeir of God jM vC lxvj yeiris, and registrat in the buikis of counsall the xviij day of Aprile nixt thairefter, and conforme to the ratificatioun of the saidis decreitis maid be Maistir James Gordoun, fader bruther to George, now erle of Huntlie, of the dait at Elgin, the xxvij day of Julii, the yeir of God jM vC lxxxvj yeiris, and registrat in the buikis of counsall the tent day of Maii, the yeir of God jM vC lxxxvij yeiris; the quhilkis decreittis and ratificatioun thairof foirsaid, togidder with the saidis infeftmentis grantit to the said umquhile James Ogilvy of Findletter, oure soverane lord and thre estaitis in parliament ratifies, apprevis and perpetuallie confermis in all pointis, swa that the said Schir Walter Ogilvy, now of Findletter, and his airis may peceably bruik and joyse all landis, heretages, baronies, offices, takkis, stedingis, rowmes, possessionis, milnis, multuris, fischeingis, woddis, forrestis and utheris quhatsumevir contenit and specifiit in the saidis infeftmentis, or the saidis decreittis arbitrall, or that he presentlie possesis and broukis, or in the quhilkis he is onyways infeft, quhilk may be annullit or takin away be the annulling of the said fairfaltour, notwithstanding this present act and alsfrelie [and] peceablie in all respectis as the said act had not bene gevin and grantit.
Oure soverane lord and thrie estaittis of parliament ratifies and apprevis the act maid of befoir in the parliament haldin at Linlythgw, in the great hall of the palace thairof, the tent day of December the yeir of God jM vC lxxxv yeiris, tueching the decreit of redemptioun of the landis of Woddislie, with thair pertinentis, lyand within the schirefdome of Edinburgh, and utheris contenit in the said decreit be Schir Lues Ballenden of Auchnoull, knicht, justice clerk to oure soverane lord, as the said decreit in it selff at mair lenth proportis, in all claussis, heidis and circumstances of the samin, notwithstanding ony act or constitutioun, generall or particulair, maid in this present parliament in the contrair.