[1585/12/79]*[print] [email] [cite] [preceding] [following]
†Anent the supplicatioun gevin in be Johnne, lord Hammyltoun and Johnne Hamyltoun of Drumry to the kingis majestie and lordis of articles, beirand that the said lord, with ane greit numer of his surname, kyne and freindis, hes bene, of lang tyme past, baneist and exilit of our soverane lordis presens and, be the injurie of tyme and occasioun of the civill trublis of sa lang continewance within this realme, hes sufferrit greit loss and damnage in the possessioun of thair guidis, landis and levingis, all frie repair and access to our said soverane lordis persoun, counsall and sessioun and utheris his majesteis offices being alluterlie refusit to thame for expeditioun of thair benefices; and speciallie the said Johnne Hammyltoun of Drumry, quha, being undoutit fewar of the landis of Craigfudeis and Myddlefudeis, quha, be rycht of his infeftment (albeit unconfirmit be malice of the tyme), wes in possessioun thairof fra the dait of the samyn, quhilk was the tent day of Julii, the yeir of God jM vC thriescoir sewin yeiris, he haifing maid instant sute be his freindis offering greit sowmes of mony at sindry and diverse tymes to our said soverane lordis thesaurar to haif the confirmatioun thairof exsped, unto the tyme that Patrik, now archiebischop of Sanctandrois, aganis the dewatie and professing of his calling, yea, eftir the said Johnne had obtenit the said signatour componit and exped, espying the tyme propir and commodious to mak his conques upoun the said Johnnes rowmes and possessionis of the saidis landis of Craigfudeis and Myddlefudeis, sett the samyn agane in few to his awin sone and spous and to certane utheris personis, the said Johnnis grittest inemeis for the tyme, procuring the laitest sett fewis to be first confirmit, that be the act of parliament procurit be him selff in prejudice of the said Johnnis few maid at Striviling, the xxv day of Julii the yeir of God jM vC lxxviij yeiris, anent double confirmatiounis of fewis, be the quhilk it is provydit that the first confirmatioun of the last few sall prevaill, the first few laitest confermit the said Johnnis infeftment cled with sa lang ane kyndes and possessioun mycht be maid unproffitable to him for evir; and thairfoir, to the end that sic fraud may be disapointit and the said Johnne reponit and reintegrat in the rycht of his infeftment, few and possessioun foirsaid, and for mony just and lauchtfull impedimentis quhilk he had to procure his confirmatioun at ony tyme befoir, our said soverane lord, with advise and consent of his thrie estaitis of this present parliament, hes statuit and ordanit and, be the tennour heirof, statutis, ordanis and declairis that it salbe lesum to the said Johnne Hammyltoun to purches confirmatioun of his said few, and that the samyn salbe als effectuall, valid and sufficient as gif the samyn had bene exped befoir ony uther few sett to† the said Patrik, archiebischop of Sanctandrois, to his spous, bairnis or quhatsumevir uther personis, nochtwithstanding the lait act of parliament maid anent double confirmationis of fewis or quhatsumevir uther law, statuit or constitutioun maid in the contrair, anent the quhilkis oure said soverane lord and estaitis foirsaidis dispensis thairanentis be thir presentis, reservand alwayis to sik as hes tane ony portion of the saidis landis in few of the said archiebischop, thair actionis of warrandice, as accordis of the law, for repetitioun of the sowmes of money ressavit be him for thair saidis fewis allanerlie; and thairfoir our said soverane lord, with advise foirsaid, ordanis his hienes thesaurer and his depuitis present and that salbe for the tyme to pas confirmatioun upoun the said Johnne Hammyltonis fewis without ony stop or impediment upoun his expensis, as accordis, for the ressonis and causis foirsaidis notourlie knawin to our said soverane lord and thrie estaitis, but prejudice of the said act of parliament in onywayis to utheris oure soverane lordis leigis, bot that thay may bruik the benefite thairof nochtwithstanding the premisis.†
[1585/12/80]*[print] [email] [cite] [preceding] [following]
†Oure soverane lord and his thrie estaitis of parliament speciallie declairis that under his majesteis generall revocatiounis maid in parliament and secreit counsall is, and salbe, speciallie comprehendit the pretendit infeftment or infeftmentis of fewferme or utheris maid be his hienes in his les aige to William Stewart of Fyntillach, hes airis and assignais heretablie, of all and sindrie the landis of Almerlandis, extending to ten pund land of auld extent, lyand within the stewartrie of Kirkcudbrycht, as being sett in hurt of his office, in prejudice and hurt of William Douglas of Drumlangrig and kyndlie tennent, taxman and possessour thairof, and thairfoir declairis, decernis and ordanis that all and sindrie the saidis infeftmentis, with the preceptis and instrumentis of sesing fallowing thairupoun, haif bene fra the begynnyng, ar, and salbe in tyme cumyng, of na strenth, force and effect.
[1585/12/81]*[print] [email] [cite] [preceding] [following]
†The kingis majestie, with consent of the thrie estaitis convenit in parliament, understanding that thair was infeftment grantit of lang tyme past to William Ker of Cesfurde, warden of the myddle marchis of this realme, and his airis heretablie, off all and haill the landis and barony of Ormstoun, with annexis, connexis, pairtis, pendiclis and pertinentis, outsettis, tennentis, tennendreis and service of frie tennentis, togidder with the tour, fortalice, manis and fischeingis of the same and all thair pertinentis, lyand within the sherefdome of Roxburgh, and siclyke all and haill the tuentie mark land of Maxtoun, callit Gevanis Landis, lyand within the sherefdome foirsaid, quhilk infeftment, with all sesingis, rychtis and utheris titillis maid to the said William and his foirsaidis, was ratifiit, apprewit and confermit in the parliament haldin at Edinburgh, the xxviij day of November, the yeir of God jM vC fourscoir ane yeiris, lyk as his majesteis intentioun and fuill mynd is that the samyn sall stand in full strenth and force in all tyme heireftir, albeit laitlie thair was ane pretendit rycht and infeftment maid of the saidis landis to James Ormstoun and his airis contenit thairintill, proceding upoun the revocatioun of the uther infeftment maid be us to the said William of befoir; thairfoir our said soverane lord, willing that the said William salbe fullie reestablissit in his rycht of the saidis landis in plane parliament, hes revokit and annullit and, be the tennour heirof, revokis, rescindis, casis and annullis all and quhatsumevir infeftmentis, chartouris, preceptis, instrumentis of seising, rychtis, titillis and utheris securiteis maid or grantit to the said James, his bairnis posteritie or freindis in quhatsumevir maner or ordour or ony utheris personis quhatsumevir of the saidis landis or ony pairt thairof, with all and quhatsumevir fallowing or proceiding thairupoun at ony tyme sen the first rycht thairof acquirit be the said William, quhilk was grantit to him upoun guid and wechtie considerationis, and for the trew and thankfull service done be the said William to his majestie at all tymes and in recompance thairof; and to the effect the said William and his airis may remaine in the fuill integritie of thair rycht foirsaid, oure said soverane lord, with advise of his haill three estaitis in present parliament, ratifeis, apprevis and confermis all and sindrie the infeftmentis, rychtis, titillis and securiteis maid to the said William and his foirsaidis of the saidis landis, with thair pertinentis, ather proceiding upoun ane resignatioun of umquhill Capitane Robert Anstruther or utherwayis grantit in quhatsumevir maner or ordour, decernis and declairis the samyn to haif fuill force, strenth and effect as is contenit thairintill in all tymes cuming, nochwithstanding of ony revocatioun, generall or speciall, maid be his grace heirtofoir and of the said James Ormestoun infeftment proceiding thairupoun, grantit ather to the said James, his bairnis, freindis or ony utheris personis foirsaidis, quhilk his majestie declairis sall nevir effect in tyme cuming; bot the said William and his airis to be in siclyke estait and conditioun as gif the samyn had nevir bene maid, and as the said Williamis infeftment had bene maid in his majesteis perfyte aige and sall not be subject to ony revocatioun in tyme cuming.
[1585/12/82]*[print] [email] [cite] [preceding] [following]
†Oure soverane lord, understanding that James Murray of Pardowis hes ane yeirlie pensioun disponit to him furth of the third and superplus of the abbacie of Cowper, to be possedit and intromettit with be thame, and willing that he bruik and joyse the samyn in tym cuming, thairfoir our said soverane lord, with advise of the thrie esteatis of this present parliament, ratefeis, apprevis and confermis the foirsaid gift of pensioun maid and grantit to the said James, with decreit gevin be the lordis of counsall conforme thairto, swa that he may peceable bruik and joyse the samyn in all tyme cuming conforme to his gift of the same, nochwithstanding quhatsumevir revocatioun maid or to be maid be our said soverane, anentis the quhilkis his hienes, with advise of the thrie estaitis, dispensis be thir presentis, provyding alwayis that the said James wes in possessioun of his said pensioun the yeir imediatlie befoir his depairting furth of this realme.
[1585/12/83]*[print] [email] [cite] [preceding] [following]
†Oure soverane lord, with advise of the thrie estaitis of this present parliament, ratefeis, apprevis and, for his hienes and his successouris, perpetuallie confermis the benefite of pacificatioun gevin and grantit be his hienes of befoir, with advise of the saidis thrie estaitis, to umquhill Patrik, bischop of Murray, and decernis and declairis the samyn to stand in fuill force and effect eftir the forme and tennour of the same in all poyntis.
[1585/12/84]*[print] [email] [cite] [preceding] [following]
†Oure soverane lord, with advise of the thrie estaitis of this present parliament, ratefeis, confermis and, for him and his successouris, perpetuallie confermis the gift of pensioun gevin and grantit be umquhill Mathew, sumtyme erll of Lennox, his darrest guidschir and regent for the tyme, with the gift alswa grantit be Patrik, archiebischop of Sanctandrois, to George and Andro Halyburtonis, lauchfull brethir to Schir George Halyburtoun of Pitcur, knycht, of the sowme of fyve hundreth pund money and victuall assignit for the said sowme contenit in the said Patrik, archiebischop of Sanctandrois gift of pensioun, yeirlie to be upliftit be thame furth of the landis underwrittin contenit in the saidis giftis, swa that thay may peceable bruik, joise and posses the samyn in all tyme cuming, with fuill power to thame to transfer the samyn at thair plesure in ony uther persoun or personis thai pleise according to thair saidis giftis als frelie as gif the same had bene speciallie exceptit in thair saidis giftis furth of the former act of parliament maid in the moneth of Maii, the yeir of God jM vC lxxxiiij, for annulling of all pensionis gevin furth of the said archiebischoprik, quhilk sall nawayis be extendit to the saidis giftis now confermit, providing alwayis that this present confirmatioun unnawayis extend to the fruictis of the said pensioun off the croppis and yeiris of God jM vC lxxxiiij yeiris last bypast and fourscoir fyve yeiris instant, quhilkis giftis oure said soverane, with advise and consent foirsaid, ratefeis and apprevis as said is, nochwithstanding quhatsumevir act of parliament maid in the contrair thairof preceiding the dait heirof:
James, be the grace of God, king of Scottis, to the lordis of our counsall and sessioun and all utheris, our leigis and subdittis quhome it effeiris, quhais knowlege thir our lettres sall cum, greting. Forsamekle as we and our darrest guidschir, Mathow, erll of Lennox, lord Darnelie, our lauchfull tutour and regent to us, our realme and leigis, understanding the guid, trew and thankfull service of our weilbelovit Maistir James Halyburtoun, provest of Dundie, in defence and furthsetting the auctoritie alsweill of us as of the quene, our moder, in hir minoritie, not only to the hazard of himselff and his freindis, bot to the greit tinsell of thair guidis and substance, for the quhilk ane greit and honorable rewaird being oftymes promisit to him at last ane pley aganis our couising Patrik, lord Gray, wes put in his handis, the persute quhairof was na les skaithfull and sumptuous to him nor his former panes and service in publict service of our realme and yit nathing to his commoditie; quhair the mater being referrit amicable to the decisioun of our darrest cousing James, erll of Murray,† lord Abirnethie, umquhill regent to us, our realme and leigis, he nawayis willing to sie the overthrow or hurt of ony noble or auncient house, nor yit that sic as hes done guid service in the commoun weill suld be unrewairdit or that ony variance, discord or actioun suld ly over amangis ony parteis affectionat to our service, thairfoir, be his decreit arbitrall, reconsiliat the said Lord Gray and Maistir James for all actionis, causis and querrellis bygane and† our name. promittit to provid him of the sowme of ane thowsand pundis of yeirlie rent for all the dayis of his tyme in maner fallowing: that is to say, fyve hundreth pundis furth of the fruictis of our abbay of Scone, quhilk is alreddy assignit to him be our gift under our privie seall, and the uther fyve hundreth pundis furth of the first and reddiest fruictis of the bischoprik of Murray, howsone the samyn sall happin to vaik be deceise of the present possessour. And now we and our said darrest guidsir and now regent, considering the constant perseverance of the said Maistir James in his trew and diligent service toward the defence of our auctoritie, and that the prince is alwayis debtour to sie the service done in the commoun weill rewairdit, and in respect that the said Maistir James is presentlie to be imployit in our service to the hazarde of his lyffe, nawayis willing that he be destituit of his promissit rewaird, nor incertanelie depend quhill the deceise of the said bischop of Murray, nor yit that the said Maistir James rewairde sall end and perish with his persone incaise of his inlaik in our service, quhairfoir we, with advise of our darrest guidsir and regent, have gevin, grantit and disponit and, be thir our lettres, gevis, grantis and disponis to our lovittis George Halyburtoun and Andro Halyburtoun, cousingis to the said Maistir James, the said yeirlie pensioun of fyve hundreth pundis money of our realme, to be intromettit with and uptakin be thame respective of the fruictis, rentis and dewateis of the archiebischoprik of Sanctandrois, now vacand and being in our handis be ressoun of the proces and dome of forfaltour ordourlie led aganis Johnne, sumtyme archiebischop of Sanctandrois, for certane crymes of treasoun and lesemajestie commitit be him, of the quhilkis he was convictit in our parliament, and for sure payment of the said sowme of fyve hundreth pundis of yeirlie pensioun we haif assignit and, be thir our letteris, assignis to the saidis George and Andro respective during all the dayis of thair lyftymes, the fermis and teynd victuallis pertening to the said archiebischoprik eftir specifeit: that is to say, to the said George, the mailles and fermis of the landis of Kinkapil, with the pertinentis, extending yeirlie to tuelf pundis, aucht schilling money, aucht chalderis quheit, aucht chalderis beir, twa chalder aittis, with tuentie four caponis and four dusane pultrie; the teynd victuall of the landis of Month, lyand within the parochin of Monymaill, extending to twa bollis quheit, tuelf bollis beir, twa chalderis, four bollis aittis; and to the said Andro Halyburtoun, the teind victuallis of the townis and landis following in the parochin of Monymaill, viz., Lethame, ane chalder, four bollis quheit, twa chalderis, aucht bollis beir, four chalderis, aucht bollis aittis, four dosane caponis, aucht dosane pultrie; Comyochie, ten bollis quheit, ane chalder, aucht bollis beir, four chalderis, sex bollis aittis, four dosane caponis; Ladifforne, four boillis quheit, ten bollis beir, twa chalderis aittis; Lillok, twa bollis beir, ane chalder aittis; Petlug, fyve bollis quheit, fyve bollis beir and tuelff bollis aittis, to be intromettit with and uptakin be the saidis George and Andro respective, thair chalmerlanis and factouris in thair names, at termis and tyme of payment usit and wount, begynnand the first termis payment at Martimes nixtocum in this instant yeir of God jM vC thriescoir ten yeiris and of the crope presentlie upoun the grund; quhairfoir we charge straitlie and commandis yow, the saidis lordis of our counsall and sessioun, that ye grant and direct our utheris lettres in the four formis at the instance of the said George and Andro respective, for ansering and obeying to thame of the same yeirlie pensioun according to the assignatioun befoir specifeit yeirlie and termlie during thair lyftymes, siclyk and als lauchtfullie in all respectis as gif the same war provydit to thame in the court of Rome or gif the said bischoprik had bene provydit of ane pastor and the said pensioun and assignatioun gevin be his consent, with all and sindrie commoditeis fredomes, proffeittis and rychtuous pertinentis quhatsumevir pertening, or rychtuouslie may pertene thairto, frelie, quietlie, weill and†peice, but ony revocatioun or agane calling quhatsumevir; gevin under our privie seill at Edinburgh, the fyft day of September, the yeir of God jM vC thrie† ten yeiris and of our regnne the ferd yeir.
Be it kend till all men be thir present lettres, we, Patrik, archibischop of Sanctandrois, to haif sene, considderit and understand the lettres of gift, grant and dispositioun maid be our soverane lord, with advise and consent of his darrest gudsir Mathow, erll of Lennox, lord Darnelie, regent to our soverane lord, his realme and leigis for the tyme, to George and Andro Halyburtonis, cousignes to Maistir James Halyburtoun, commenadatour of the priorie of Pettinweyme, of ane yeirlie pensioun of fyve hundreth pundis money of this realme, to be intromettit with and uptakin be thame respective of the fruictis, rentis and dewateis of the archiebischoprik of Sanctandrois, than vaikand and beand in our soverane lordis handis be ressoun of the proces and dome of forfaltour ordourlie led aganis umquhill Johnne Hammyltoun, sumtyme archiebischop of Sanctandrois, for certane crymes of tressoun and lesemajestie commitit be him, off the quhilk he wes convict in parliament; quhilkis lettres of gift contenis assignatioun to the saidis George and Andro respective during all the dayis of thair lyftymis of the fermis and teind victuallis underwritting, pertening to the said archiebischoprik: that is to say, to the said George, the mailles and fermis of the landis of Kincapill, with the pertinentis, extending yeirlie to tuelf pund viij s. money, aucht chalderis quheit, aucht chalderis beir, twa chalderis aittis, with tuentie four caponis and four dosane pultrie; the teind victuallis of the landis of Month within the parochin of Monymaill, extending to twa bollis quheit, tuelf bollis beir, twa chalderis, four bollis aittis; and to the said Andro Halyburtoun the teind victuallis of the townis and landis following in the said parochin of Monymaill, viz., Lethame, ane chalder, four bollis quheit, twa chalderis, aucht bollis beir, four chalderis, aucht bollis aittis, four dosane caponis, aucht dosane pultrie; Cunyochie, ten bollis quheit, ane chalder, aucht bollis beir, four chalderis, sex bollis aittis, four dosane caponis; Ladifforne, four bollis quheit, ten bollis beir, twa chalder aittis; Lillok, tua bollis beir, ane chalder aittis; Petlug, fyve bollis quheit, fyve bollis beir and tuelf bollis aittis, to be intromettit with and uptaikin be the saidis George and Andro respective, thair chalmerlanis and factouris in thair names, at termis and tymes of payment usit and wount, begynnand the first termes payment at Martimes in the yeir of God jM vC thriescoir ten yeiris, and of the crope of the samyn yeir than presentlie on the grund, as the saidis lettres of gift under our soverane lordis privie seill of the dait at Edinburgh, the fyft day of September, the yeir of God jM vC thriescoir ten yeiris and of our soverane lordis regnne the ferd yeir in thame selff at mair lenth proportis; quhilk pensioun wes reservit in the provisioun maid to umquhill Johnne, archiebischop of Sanctandrois, our immediat predicessour, quhilkis lettres of gift and dispositionis foirsaidis maid be the said Archibischop of Sanctandrois to George and Andro Halyburtonis of the said yeirlie pensioun of fyve hundreth pundis to be upliftit be thame respective furth of the riddiest fruictis and dewateis of the said archibischoprik, and of the assignatioun of the fermis and teind victuallis pertening to the said archiebischoprik abonespecifeit grantit to the saidis George and Andro respective, to be tane furth of townis and landis respective abonespecifeit during all the dayis of thair lyftyme, we, with express consent and assent of the chaptor and metrapolitane kirk of Sanctandrois, for diverse guid causis and consideratiounis moving us, haif ratefeit, apprevit and confermit, lyk as we, be thir presentis, with consent foirsaid, ratife, appreve and confirme the samyn in all and sindrie pointis, articlis and clausis contenit thairintill, eftir the forme and tennour thairof, and thairfoir, with consent foirsaid, grant, gif and dispone to the said George Halyburtoun and Andro Halyburtoun in contentioun of thair said yeirlie pensioun of fyve hundreth pundis money foirsaid, the mailles, fermis, kanis, custumes and dewateis of the townis and landis respective undermentionat, evirie ane of thame for thair awin pairtis, as fallowis, during all the dayis of thair lyftymes: that is to say, the said George, the mailles and fermis of Kinkapill, with the pertinentis, extending yeirlie to tuelf pundis, aucht schilling money, aucht chalderis quheit, aucht chalderis beir, twa chalderis aittis, with tuentie four caponis and four dosane of pultrie; the teynd victuall of the saidis landis of Month, lyand as said is, extending to twa bollis quheit, tuelf bollis beir, twa chalderis, four boillis aittis; and to the said Andro Halyburtoun, the saidis victuallis of the townis and landis following lyand in the said parochin, viz., Lethame, ane chalder, four bollis quheit, tua chalderis, aucht bollis beir, four chalderis, aucht bollis aittis, four dosane caponis, aucht dosane poultrie; Cunyochie, ten bollis quheit, ane chalder, aucht bollis beir, four chalder, sex bollis aittis, four dosane caponis; Ladifforne, four bollis quheit, ten bollis beir, twa chalderis aittis; Lyllok, twa bollis beir, ane chalder aittis; Pitlug, fyve boillis beir, fyve boillis quheit and tuelf boillis aittis, to be helelie intrometit with and uptaikin be the said George and Andro respective, ilkane for thair awin pairtis as said is, thair chalmerlanis and factouris in thair names, at termes and tyme of payment usit and wount fra the fewaris, fermoraris, tennentis, taxmen, parochineris and possessouris of the townis and landis respective foirsaidis and utheris addettit in payment of the samyn, but ony respect to be had to the priceis of the said victuall and utheris dewateis foirsaidis, small or grit, ordaning and commanding the saidis fewaris, fermoraris, tennentis, taxman, parochineris, possessouris and utheris quhatsumevir foirsaid addettit in payment of the saidis mailles and fermis to riddilie anser, intend, obey and mak thankfull payment to the saidis George and Andro of the same, ilkane respective for thair awin pairtis thairof, at the termes of payment foirsaidis during the space abonementionat; with power alswa to the saidis George and Andro Halyburtonis respective as said is, to ask and crave the saidis mailles, fermis, custumes and utheris dewateis foirsaidis at thair awin handis and to dispone thairupoun at thair plesure, with power alswa to the said George and Andro, and ilkane of thame respective for thair awin pairtis, seik haill or, in tyme of thair deceise, to mak assignais to the saidis pensionis respective, quhilkis personis to be constituit assignais be thame and ilkane of thame we will and ordane that thay bruik and posseid thair saidis pensionis respective during all the dayis of the said assignais lyftyme, and now as than and than as now, be the tennour heirof, gevis, grantis and disponis to the said persone or personis, assignay or assignais to the saidis pensionis, in all or in pairt, the samyne pensionis in all or in pairt quhilkis salhappin to be grantit to thame be the saidis George and Andro, or ony of thame, during all the dayis of the said assignais lyftyme; and siclyke, incaise it sallhappin the saidis George or Andro or ony of thame be deceise before utheris, that the pensioun of money and wictuall foirsaid perteinand to ony of the saidis personis deceissand sall accres and appertene to the uther liveand during all the dayis of his lyftyme, sua that the said persoun deceissand haif maid na uther persoun assignay thairto befoir his deceise. Requiring alsua the lordis of our soverane lordis counsall and sessioun to grant and gif the saidis George and Andro, and ilkane of thame respective for thair awin pairtis, letteris in all the four formes or utheris summar proces for causing of thame be thankfullie anserit and obeyit of thair said pensioun of money, victuall, customis and utheris dewateis abonespecifeit during all the dayis of thair lyftymes, conforme to the said lettre of gift in all poyntis. In witnes heirof, to thir present letteris of ratificatioun, gift and dispositioun, subscrivit with our hand, our round seall, togidder with the seall of our said cheptour, in takin of thair consent and assent heirto, ar heirto appendit. At Sanctandrois, the xxij day of Aprill, the yeir of God jM vC fourscoir yeiris.
[1585/12/85]*[print] [email] [cite] [preceding] [following]
†Oure soverane lord, understanding that Adame Hepburne of Bonhard, in the moneth of [...], the yeir of God jM vC thriescoir fyve yeiris, obtenit ane infeftment of fewferme of the commendatour and convent of Scone for the tyme, off all and haill the landis of Durdie Scot, alias Over Durdie, the land of Polkmylne, auchtanepairt of Clene Mylne and mylne land, with the pertinentis adjacent thairto, as at mair lenth is contenit in his infeftmentis maid to him thairupoun, off the quhilkis infeftmentis he obtenit laitlie our said soverane lordis confirmatioun; and nevirtheles, in the last parliament haldin at Edinburgh in the moneth of Maii, the yeir of God jM vC fourscoir four yeiris, thair was ane speciall act of parliament maid cassand and annulland the said confirmatioun purchest upoun sinister informatioun, contrair equitie and justice, quhilk act standis and can not be remeidit bot be ane uther act of the lyke strenth; thairfoir oure said soverane lord, with advise and consent of his thrie estaitis of this present parliament, and be the tennour heirof, ratefeis, confermis and apprives the said chartour of confirmatioun maid to the said Adame of his said few chartour of the landis abonewrittin and haill rychtis and articlis contenit thiairin, and decernis and declairis the samyn to haif fuill effect and strenth in all tyme cuming, according to the tennour thairof, nochwithstanding the said act of parliament maid anent the annulling of the said confirmatioun and all objectioun to be groundit thairupoun utherwayis in tyme cumyng, or that may be obiectit aganis the validitie of the said confirmatioun; and declairis the said former act anent annulling thairof to ceise thair anent in all tyme cumyng.
[1585/12/86]*[print] [email] [cite] [preceding] [following]
†Oure soverane lord, with advise of the thrie estaitis of this present parliament, ratefeis, apprevis and, for his hienes and his successouris, perpetuallie confermis the gift of the yeirlie pensioun of sex hundreth pundis yeirlie to be upliftit furth of the third of the archiebischoprik of Sanctandrois, gevin and grantit to Robert Stewart, brother germane to James, erll of Arrane, lait chancellair, with the dispositioun and translatioun thairof to the said Patrik, archiebischop thairof, swa that the said Patrik may peceablie bruik, joise and possess the said pensioun in all tyme cuming, but inpediment, nochtwithstanding quhatsumevir revocatioun maid, or to be maid, be our said soverane lord of the samyn in all tyme bipast, with the quhilkis his hienes and thrie estaitis dispensis be thir presentis inrespect of the greit sowmes of money payit and debursit be the said Patrik, bischop of Sanctandrois thairfoir.
[1585/12/87]*[print] [email] [cite] [preceding] [following]
†The quhilk day, it is statuit and ordanit be our soverane lord and thrie estaitis of this present parliament that Johnne Auchinlek bruik and posses his pensioun of ane hundreth pundis money of this realme, quhilk he hes yeirlie furth of the twa pairt of fruictis of the bischoprik of Abirdene during his lyftyme, conforme to his gift thairof, and our soverane lordis confirmatioun past thairupoun, nochwithstanding the uther act of parliament maid in favouris of David, bischop of Abirdene, dischairging and annulling all pensionis gevin furth of the said bischoprik; and willis and ordanis that the said former act sall nawayis be extendit aganis the said Johnne, nor prejuge him anent the brouking of his said pensioun, siclyke as gif he had bene speciallie exceptit and reservit thairintill, restoring him to the samyn with all proffeittis and dewateis thairof, bygane and to cum during his lyftyme; and ordanis lettres to be directit heirupoun, gif neid beis, in forme as effeiris.
[1585/12/88]*[print] [email] [cite] [preceding] [following]
†The kingis majestie, with avise of the thrie estaitis of this present parliament, ratefeis, apprevis and confermis the giftis of the yeirlie pensionis and feis disponit to his daylie servitouris, Maistir George Young and Johnne Andro, and ordanis thame to possess the samyn and intromet thairwith yeirlie in tyme cuming during thair lyftymes, conforme to thair particular giftis maid thairupoun, nochtwithstanding ony his majesteis revocationis maid or to be maid in the contrair, quhairanent his majestie dispensis.
[1585/12/89]*[print] [email] [cite] [preceding] [following]
†Forsamekle as upoun greit and wechtie considerationis tending to the continewance of the weill and honour of the auncient house of Erroll, it was befoir fund necessar and expedient that Frances Hay, secund sone lauchtfull to umquhill Andro, lait erll of Erroll, lord Hay, constable of this realme, sould be infeft in all landis, lordschippis and barroneis and offices pertening to the said erldome, lyke as he is infeft thairin of lang tyme bypast, immiediatlie haldin of our soverane lord, as his infeftmentis in thame selffis at mair lenth proportis; and be ressoun that the said Frances wes, for necessair and urgent causis, speciallie in consideratioun of the manifest inhabilitie of Alexander Hay, his eldar brothir, promovit to the same erldome, as he bruikis the landis and leving pertening thairto, swa it is necessar that he suld be endewit and dotit with all the honouris and digniteis quhilkis pertenit to his antecessouris of the said noble house. And thairfoir, his hienes, for his guid, trew and thankfull service and utheris causis foirsaidis, maist willing that the said Frances sould be honorable advancit, hes maid and constituit and, be this present act of parliament, with advise of his thrie estaitis thairof, constituitis and makis the said Fraunces ane knycht and lord of his parliament and Erll of Erroll and constable of this realme, gevand unto him and his successouris specifiit in the saidis infeftmentis the honour, dignitie and preeminence of the said Erll of Erroll, lord constable of this realme, in all parliamentis, assembleis, counsellis and conventionis, siclyke in the same maner, honour, place and degrie as the said umquhill Andro, erll of Erroll, his fader, constable of this realme, and his predicessouris had the same of befoir.
[1585/12/90]*[print] [email] [cite] [preceding] [following]
†Anent the supplicatioun gevin in be† bailleis, counsall and communitie of the burgh of Anstruther be eist the burne, to our soverane lord and his thrie estaitis of parliament, makand mentioun that quhair it hes pleisit his hienes, with advise of the lordis of his secreit counsall, to mak, creat and erect the burgh of Anstruther, being ane burgh of baronie of befoir, in ane frie burgh regall and hes dotit the samyn with diverse and sindrie priveligis, liberteis and fredomes, as the chartour and infeftment of erectioun under the greit seill grantit thairupoun, presentlie schawin, at mair lenth beiris; and seing it is our soverane lordis guid will and mynd that the said erectioun remane and tak effect in all tyme cumyng, for the bettir securitie thairof, it is werry necessar that the samyn, and chartour grantit thairupoun, be ratefeit and apprevit in this present parliament, quhilk hes not bene refuisit to sic personis quhair the lyk commoditie is not lyke to result, to wit, to Johnne Betoun of Balfour, confirming the lait infeftment and erectioun maid to him and his airis of the toun of Kilrinne and porte of Skynfischetoun, and diverse utheris of the lyk conditioun. In consideratioun of the lyke premisis, our said soverane lord and thrie estaitis of this present parliament ratefeis, apprevis and confermis the said erectioun, chartour and infeftment grantit thairupoun, and haill priveleges, conditionis, clausis and provisionis contenit thairin, eftir the forme and tennour thairof in all poyntis, provyding alwayis that this present ratificatioun onnawayis sall be prejudiciall to the burgh of Craill, thair rychtis and actioun quhilk they have alriddie dependand, or to be intentit aganis the said toun of Aunstruther tuiching thair privilegis befoir the lordis of counsall and sessioun, as accordis of the law.
[1585/12/91]*[print] [email] [cite] [preceding] [following]
†Forsamekle as anent the supplicatioun gevin in to our soverane lord and lordis of this present parliament be James Murray, brothir germane to umquhill William Murray of Touchaddame, and Agnes Cunynghame, lady Polmais, that quhair it is not unknawin to our soverane lord and lordis foirsaidis thair was laitlie ane act maid for repossessing of sic personis as hes bene forfaltit to thair landis, rowmes and possessionis etc., quhilk act and benefite thairof, as we ar informit, is to be ratefeit in this present parliament and ordinance to be maid for anulling and rescinding of all decreittis gevin aganis the saidis forfaltit personis and sic utheris as wer justifeit in justice courtis for ony cryme of treasoun; quhilk act and ordinance not being ryplie considderit, and the boundis thairof not being limitat, sall be prejudiciall to mony our soverane lordis liegeis and speciallie to the saidis James Murray and Agnes Cunynghame, seing it is of treuth that thay, lang befoir the convictioun of umquhill Johnne Cunynghame of Drumquhassil for crymes for the quhilkis he was justifeit to the deith, they, eftir thrittie yeiris dependence, obtenit diverse decreittis aganis him befoir the lordis of counsall, ane pairt thairof for reductioun of certane his pretendit and forgeit titillis maid be him for thair awin landis of Polmais Cunynghame, alias Marschell Polmais, Sinclair and certane utheris landis and utheris for redemptioun of certane utheris comprisit landis, viz., ane pairt of the saidis landis of Polmais Cunynghame, Sinclair, Slamannan Mure, Bohaldeis and certane utheris, quhilkis decreittis the saidis James and Agnes obtenit befoir the saidis lordis of counsall aganis the said umquhill Johnne in foro contradictorio, quhair his haill defensis wer herd, Maistiris Johnne Scharp and Johnne Russell being his procuratouris and knawing of the pronunceing of the samyn; and swa the saidis decreittis wer obtenit be thame aganis the said umquhill Johnne Cunynghame, not eftir nor be ressoun or ony cause proceiding upoun his forfaltour, bot be the saidis James and Agnes awin rychtis and titillis, and thairfoir the samyn aucht nawayis be comprehendit under the said act and benefit thairof, and nathir yit aucht the samyn and confirmatioun thairof in parliament wirk ony thing in favour of the said umquhill Johnis airis and successouris, to the hurt and prejudice of the saidis James and Agnes, thair rychtis, titillis, decreittis or actionis that thai haif, hes or may haif aganis thame, as at mair lenth is contenit in the said supplicatioun; quhilk being first sene and considderit be our said soverane lord and lordis of articlis, and thaireftir be his hienes and thrie estaitis of this present parliament, oure said soverane lord, with advise and consent of his saidis thrie estaitis convenit to this parliament, decernis and declairis the foirsaidis rychtis and decreittis obtenit be the saidis James Murray and Agnes Cunynghame and ather of thame in maner foirsaid, and that the samyn nor nane of thame to be comprehendit under the said act, ordinance and ratificatioun, and that the samyn act and benefite thairof sall not be extendit thairupoun, nor in nawayis be prejudiciall to the saidis James and Agnes or ather of thame and thair decreitis; and declairis the samyn to haif fuill strenth, force and effect in all tyme cuming.
[1585/12/92]*[print] [email] [cite] [preceding] [following]
†Anent the supplicatioun gevin in befoir the kingis majestie and lordis of articlis be Jane Hamyltoun, lady Lamyngtoun, makand mentioun that quhair the said lady beleifis it is not unknawin to his hienes and counsell, present and being for the tyme, of the innumerall oppressionis committit aganis hir bairnis, familie, servandis, tennentis, guidis and geir thir mony yeiris bygane, not only be burning of thair housis slaying, hoching, stikking and shutting of thair cattell and guidis, mawing of thair grene cornis, leveing of thair bairnis, tennentis and servandis for deid, and utherwayis spuilyeing, reveing and oppressing of thame, bayth nycht and day, sa oft and mony tymes that it is impossible be writ or word to repeit the same without larger proces then evir hes bene red or presentit at anis in our said soverane and lordis of counsellis audience, and that be the Laird of Apilgirth and his complices, and nevirtheles hes bene commendit to this hour, bot rather intendis to persiveir in forther cruelteis and oppressionis as nowther the law of God nor his majestie suld resist the contrair. Maist humble, thairfoir, beseikand his majestie and lordis of articles, for the mercie of God in Jesus Crist, to haif consideratioun of the premisis and nocht only for respect heirof, bot for the simpillis caus, to tak sic summar ordour heirintill that scho may haif sum ressounabill assythment and satisfactioun of byganis, conforme to the money decreitis and lettres obtenit be hir aganis the said laird and his complices, and may be frie and quytte fra thair forder cruelteis and oppressionis in tyme cuming, as at mair lenth is contenit in the said supplicatioun. Quhilk supplicatioun, being first sene and considderit be the lordis of articlis, and thaireftir be the thrie estaitis of this present parliament, thay have remittit and remittis the foirsaid complaint to the will and gude consideratioun of our said soverane lord, to do, decerne and ordane thairin as his hienes sall think maist expedient and requisite; and als hes declairit and declairis that his hienes ordinance to be maid thairintill salbe of als greit strenth, force and effect as gif it war done, statute and ordanit be his majestie with advise of the thrie estaitis of this present parliament, nochtwithstanding quhatsumevir favour grantit to the said Laird of Apilgirth this present day.