Ratificatioun of the office of thesaurarie to Thomas, maister of Glammis

Oure soverane lord, with avise and consent of the thrie estaitis of this present parliament, ratefeis, apprevis and confermis for him and his successouris the gift and dispositioun of the office of thesaurarie gevin and grantit to Thomas Lyoun of Baldewky, maistir of Glammis, be dimissioun thairof in our soverane lordis handis be Johnne, erll of Montrose, lord Grahme, lait thesaurer, to the effect the said Johnne may joyse the said office induring his lyftyme; and decernis and declairis the said gift to have full strenth, force and effect in all tyme cuming eftir the forme and tennour thairof, of the quhilk the tennour followis:

James, be the grace of God, king of Scottis, to all and sindrie our subdittis and liegis quhome it effeiris quhais knawlege thir our lettres sall cum, greting. Wit ye us to haif maid, constituit and ordanit Maistir Thomas Lyoun of Balduky, maistir of Glammis, our thesaurer, and gevis him the office thairof for all the dayis of his lyftyme, with all and sindrie honouris, privilegis, feis, dewateis and casualiteis belanging thairto, and in speciall the sowme of ane thowsand pundis in yeirlie pensioun for exercing of the said office, to be upliftit be him of the first and reddiest of our casualiteis foirsaidis at twa termes in yeir, Witsounday and Martimes in winter, be equall portionis, begynnand the first payment at this last Martimes in this present yeir of God jM vC fourscoir fyve yeiris and swa furth yeirlie and termelie induring his lyftyme, to be thankfullie allowit to him in his yeirlie comptis be the lordis thairaf, quhome we chairge to allow and diffais yeirlie to him the said sowme of ane thowsand pundis as pensioun foirsaid, this present being anis schawin upoun compt and registratt in the rollis as effeiris; with power to our said thesaurer to use and exerce the said office, bruik and injoy the saidis honouris, privilegis and pensioun siclyk and als frelie in all respectis as ony uther his hienes thesaurer did or mycht haif done at ony tyme be vertew of the said office, with all and sindrie commoditeis, fredomes etc., frelie, quietlie etc., provyding alwayis that this present prejuge not our trustie counsallour, Schir Robert Melvill of Murdocarnie, knycht, in his office of thesaurar depuit and clerk, gevin him and confermit in parliament, bot that this may nochtwithstanding heirof use and exerce his saidis offices, intromet with and uplift the dewateis thairof specifeit in his said gift siclyke and alsfrelie as he did of befoir; gevin under our privie seill at Lynlythgw, the secund day of December, the yeir of God foirsaid and of our regnne the nynetyne yeir, provyding alwayis that the said gift on nawayis hurt nor prejuge Schir Robert Melvill of Murdocarnie, knycht, anent his office of deputrie in the said office, bot declairis the samyn to stand in fuill strenth and effect, and the samyn on nawyis to hurte and prejuge him during his lyvetyme.

  1. NAS, PA2/13, ff.63r-v. Back
  2. 'P.O.' written in margin. Back