[1585/12/68]*[print] [email] [cite] [preceding] [following]
†Anent the supplicatioun presentit be Alexander Wod, sone lauchfull to James Wod of Lambelethame, makand mentioun that quhair it hes pleisit our soverane lord to grant and dispone to the said Alexander the prebendarie of Lambelethame, sumtyme fundit within the college heuch besyde the citie of Sanctandrois, with the teindis and fruictis thairof during his lyftyme, and als be his hienes lettres and gift hes unit, annexit, incorporat and mortifeit the said prebendary, with the teindis and fruictis thairof, eftir his deceise, quhen it salhappin, to the college of Sanctleonardis foundit within the citie of Sanctandrois, to remane perpetuallie with the college for sustentatioun of ane bursar thairin in all tyme cuming, and modefeing the fruictis and rentis thairof to the sowme of xx lib. money yeirlie communibus annis, and makand, constituand and ordinand James Wod of Lambelethame and his airis maill gottin or to be gottin of his body, quhilkis failyeing, Andro Wod of Largo and his airis maill quhatsumevir, patronis and presentaris of the said bursary to the said college in all tyme cuming, quhilk bursarie is ordanit to be callit in all tyme cuming the bursarie of Lambelethame, as in the lettres of gift under his hienes privie seill maid thairupoun at mair lenth is contenit; and becaus it is ane mater of weicht and conscience and concernis the sustentatioun and provisioun for ane bursar and help of the† puir, it is necessar that the samyn gift be confermit in parliament; in consideratioun of the premisis, our said soverane lord and thrie estaitis of this present parliament ratifeis, apprevis and confermis the foirsaid gift and mortificatioun to the said college thairin contenit, with the presentatioun of the said bursarie in all tyme cuming, efter the forme and tenour of the said gift in all pointis.