[1581/10/117]*[print] [email] [cite] [preceding] [following]
Oure soverane lord, with advise and consent of the thrie estatis of this present parliament, for diverse considerationis moving thame tending to the quietnes of this realme and universall obedience of his hienes to be followit and obeyit, hes gevin and grantit and, be the tennour heirof, gevis and grantis the benefite and libertie of the pacificatioun to umquhile Maister James Kircaldy, brother germane to umquhill Sir William Kircaldy of Grange, knicht, maid and concludit at Perth, the xxiij day of Februar, the yeir of God jM vC lxxij yeiris, ratefeit and apprevit thaireftir in parliament in the moneth of Aprill nixt thairefter in the yeir of God jM vC lxxiij yeiris, and willis and grantis the same to be als largelie and favorablie extendit in favouris of the said umquhill Maister James in all respectis, conditionis, clausis and circumstanceis thairof as he had bene speciallie comprehendit thairin, and as gif he wer on lyf in this mortall lyf; and siclike, with advise foirsaid, willis and grantis that the said pacificatioun be maist amplie extendit and interprets to the said umquhile Maister James, his apparent aris and bairnis, quhatsumevir in all clausis thairof as said is, and speciallie that this present act of parliament, according to the said pacificatioun, be sufficient to rescind and retract; likas our said soverane lord, with advise foirsaid, be thir presentis, rescindis and retractis the proces and dome of foirfalture led and deduceit aganis the said um[...]† Maister James in the moneth of [...] the yeir of God jM vC [...] yeris, for certane crymis of treasoun and lesemajestie committit be him, as at mair lenthe is contenit in the said proces and dome of foirfalture led thairupoun, and restoris, reponis and reintegratis the bairnis, airis and posteritie of the said umquhill Maister James, sua that thay may succeid in all sortis to him siclike and als frelie in all respectis as gif the said proces of foirfalture had nevir bene led nor pronunceit aganis the said umquhile Maister James, efter the forme and tennour of the said pacificatioun, quhilk, and everie point, claus and article thairof, is heirin haldin as speciallie expressit; and farder ordinis this present act to be extendit largelie in competent and dew forme as effeiris, restoring fullie the memorie, honour and fame of the said umquhile Maister James in the personis of his saidis bairnis, apparent airis and posteritie to succeid to him be provisioun or utherwayis quhatsumevir, likas our said soverane lord and thrie estaitis foirsaidis rehabilitatis and restoris thame thairto, and findis and declaris thame hable to enter and succeid as air or airis to the said umquhill Maister James, be brevis of our soverane lordis chapell and utherwayis, to all landis, heretageis, rowmis, possessonis, takis, offices and utheris to the quhilkis the said umquhile Maister James had richt or ony utheris his predicessouris quhom to he mycht have lawfullie succedit, notwithstanding the said proces of foirfalture or ony uther thing following thairupoun; and for his better securitie, our said soverane lord, with avise of the saidis thrie estaitis of this present parliament, hes ratefeit, apprevit and confermit and, be the tennour heirof, ratefeis, apprevis and confermis the foirsaid benefite of pacificatioun gevin and grantit to the said umquhile Maister James Kircaldie now as gif he wer in this mortall lyf and to his saidis bairnis, apparent airis and posteritie to succeid to him in maner abonewrittin in all pointis, efter the forme and tennour thairof, and declaris the samyn pacificatioun to have full strenthe, force and effect in tyme cumming, and extendis the samyn to thame in all sorts as the samyn is extendit or may be extendit to ony persoune of befoir, obtenar of the like benefite, providing alwayis that the samyn on na wayis be extendit to the murthouris of umquhill our soveranis darrest fader and tua regentis the Erllis of Murray and Lennox, nor to the crimis of wichecraft and incest, bot be thir presentis speciailie and expreslie forbiddis the samyn, providing in like maner that the granting of the foirsaid benefite of pacificatioun and ratificatioun thairoff on nawayis hurt nor prejuge Robert Scott, writtar, anent the sowme of ane thowsand poundis money awand to him be umquhile Sir Williame Kircaldie of Grange, knycht, conforme to his obligatioun of the dait the [...] day of October, the yeir of God jM vC lxxj yeris, for the quhilk soume the said umquhill Sir Williame laid in plege to the said Robert ane garnessing, circuat about with perllis, rubeis and dyamontis, pertening to our soverane lordis darrest mother, quhilk plege the said Robert wes compellit to deliver to umquhile James, sumtyme erll of Mortoun, regent to our soverane lord for the tyme, quha, at his dimissioun of his guvernament to our said soverane lord, deliverit the said garnessing to his hienes commissionaris deput for receaving of his jowallis, munitioun and utheris guidis and geir being in the castell of Edinburgh for the tyme, with the said castell, quhair the samyn yit remanis with the rest of the saidis jowallis, bot that the airis quhatsumevir baith of lyne, taillie or provisioun or utheris personis quhatsumevir succedant to the said Sir Williames landis or heretage, be quhatsumevir rycht, titill, provisioun or ony part thairof, be detbound in the said soume, pay and deliver the samyn to the said Robert, his airis, executouris and assignais realie and with effect befoir they obtene ony commoditie or proffit of the said benefite of pacificatioun. And als our said soverane lord, with advise foirsaid, decernis, declaris and ordinis that the effect of the said pacificatioun sall ceis and be suspendit in the personis of the airis of provisioun, lyne, tailyie and uther successouris quhatsumevir that salhappin to succeid be servit, retourit or kent be quhatsumevir richt to the said umquhill Sir Williamis landis and heretage, for repossessing of thame thairto or to utheris quhatsumevir, his rowmis, possessionis, bailliereis and offices ay and quhill the said Robert be compleitlie pait of the said sowme; dischargeing alsua the lordis of counsell and sessioun expreslie be thir presentis of granting of ony lettres of the saidis airis or utheris to the effect in the meantyme. And becaus it wes cleirlie tryit be our soverane lord and lordis of secrete counsell that the said umquhill Sir Williame borrowit and receavit from Alexander Clark of Balbirnie, now proveist of Edinburgh, the soume of tua thowsand and sex hundreth merkis money of this realme, and for suir pament thairof deliverit unto the said Alexander certane plegeis quhilkis the said Alexander wes compellit to redeliver to oure said soverane lord and thesaurare, quhilkis thairefter wer imput in oure said soverane lordis cofferris, as at mair lenth is contenit in ane act of his hienes secrete counsell off the dait at Halyruidhous, the thrid day of Julii the yeir of God jM vC lxxxj yeris, be the quhilk our said soverane lord, be avise of the lordis of the secrete counsell, tuik upoun his hienes that the said Alexander suld be satisfiit of the said sowme with the reddiest of the said umquhill Sir Williamis landis and heretage throw his foirfaltoure becummin in our said soverane lordis handis, or be the airis of the said umquhill Sir Williame, incace they at ony tyme suld happin to be restorit; thairfoir our said soverane lord, with avise of his thrie estatis in parliament, now having takin full cognitioun in the said mater, ratefeis and apprevis the said act of secrete counsell of the dait foirsaid in all pointis, articles and claussis thairof, and als have be the tennour of thir presentis providit and providis the airis and successouris of the said umquhill Sir Williame, of lyne or taillie and utheris succedant to his landis and heretage be quhatsumevir titill and provisioun quhilkis ar now restorit in this present parliament as said is, salbe simpliciter oblist to the said Alexander, his airis, executouris and assignais for pament of the said sowme of tua thowsand sex hundreth merkis money foirsaid, without ony exceptioun to be proponit in the contrare. Alsua oure said soverane lord, with advise of his hienes thrie estatis, have declarit and declaris that the said benefite of pacificatioun now grantit to the airis and successouris of the said umquhile Sir Williame is, and salbe, annext to the conditioun of thankfull pament of the said sowme of twa thowsand sex hundreth merkis to the said Alexander Clark, his airis and assignais be the airis of lyne and taillie and successouris to the said umquhile Sir Williamis landis and heretages, be quhatsumevir rycht, titill or provisioun, and als decernis and ordinis that the effect of the said pacificatioun sall ceis and be suspendit in the persoun of the airis of lyne and of tailyie and utheris successouris to the said umquhill Sir Williame, and dischargeis the lordis of counsell and sessioun to grant ony lettres for repossessing of thame to thair landis heretageis, rowmis and possessionis ay and quhill the said Alexander be compleitlie pait of the said sowme as said is. And also because the said sowme wes lent money as said is, our said soverane lord, with advise foirsaid, ordinis letteris of horning or poynding at the pleasour of the said Alexander to be direct aganis the airis and successouris foirsaidis of the said umquhill Sir Williame, now restorit, for compelling of thame to mak pament tothe said Alexander thairof, gif neid be, and ordinis lettres to be direct heirupoun to the effectis respective abonewrittin, gif neid beis, in forme as effeiris.