[1581/10/93]*[print] [email] [cite] [preceding] [following]
Oure soverane lord, with avise of the thrie estatis of this present parliament, ratefeis, apprevis and confermis the gift and dispositioun maid of befoir be our soverane lordis darrest moder to Maister James Halyburtoun, provest of Dundie, of all and haill the townis and landis of Clin, with the place, yairdis, orchyairdis, medois, cornis, croft, mylne and aikeris adjacent to the toun of Clin, with the wod and park thairof, and the sheip stedingis adjacent and apertening thairto, callit the Manis Hill and Pettelwie, and als the toun and landis of Over and Nedder Durdeis, with all thair pertinentis, lyand within the schirrefdome of Perth, quhilkis were sumtyme ane part of the patrimony of the abbacie of Scone and wer disponit to the said Maister James for all the dayis of his lyftyme, with all punctis, articles and clausis specifeit thairin. And forder, oure soverane lord, with avise foirsaid, now of new after his hienes general revocatioun, gevis, grantis and disponis the samyn pensioun abonewrittin to the said Maister James for all the dayis of his lyftyme, with power to him to bruik the landis and utheris specefeit afoir alsfrelie in all respectis as ony lyfrentar dois within this realme; and William, erll of Gowrie, lord Ruthven and Dirltoun, now erll of the landis foirsaidis, hes acceptit the said Maister James rycht and titill with the provisioun foirsaid, conforme to the said provestis auld gift and na utherwayis; and ordinis lettres of publicatioun to be direct heirupoun, gif neid be, in forme as effeiris.