[1581/10/62]*[print] [email] [cite] [preceding] [following]
Forsamekle as at command and expres directioun of oure soverane lord, with advise of the lordis of his hines secreit counsale, Alexander Hume of Manderstoun intromettit with the place of Morhame for apprehensioun of Maister Archibald Douglas, persoun of Glasgw, suspectit and dilaitit in presens of his hines and his said counsale of crymes of tressoun and lesemajestie, and of his lettres and writtis; and thairefter his hines, willing that the said Alexander wer fred and deliverit of the said place, thairfoir his majestie, with advise of his said secreit counsale, ordanit and commandit the said Alexander Hwme to rander and deliver the said hous and place of Morhame, with all the guidis and geir, insycht and plenesing being thairin and intromettit with be him, at his hines directioun and command as said is, to Johnne Calder, Bute pursephant, upoun inventar thairof, to be intercheynable, maid, past and subscrivit betuix thame thairupoun to the effect that the saidis guidis, geir, insycht and plenesing may be furthcumand, as law will; thairfoir oure soverane lord, with advise of his thre estatis and haill body of this present parliament, decernis and declaris that the said Alexander, in his intromissioun with the said place and searcheing of the said Maister Archibald to be apprehendit, hes done his dewty and acceptable service to his hines, and that he, nor the personis assisting him in that deid, sall incur na cryme, pane, skayth or danger thairthrow in thair personis, landis or guidis, nor be callit nor accusit for the samyn criamlie nor civilie be onie maner of way in tyme cuming, exonerand and dischargeand thame simpliciter thairof and of all actioun and clame that may be intentit aganis thame thairfoir be this present act forevir.
[1581/10/63]*[print] [email] [cite] [preceding] [following]
Anent the supplicatiounis presentit to the kingis majestie and lordis of articles of this present parliament be George, erll of Huntlie, lord Gordoun and Badyenout, sone and air of umquhile George, erll of Huntlie, that last depairtit, for him self and the rest of his kin, freindis and servandis dependaris on his hous, requiring the haill actionis of spuilye depredationis and demolitionis contenit in the preceptis and clames of Williame, lord Forbes, Johnne, maister of Forbes, his sone, thair adherentis quhatsumever, as committit aganis the tenour of the abstinence concludit and aggreit upoun the secund day of July 1572, to be declarit to be extinguisit, expyrit and prescrivit in all tyme cuming according to the tennour of the pacificatioun, and the saidis Williame, lord Forbes, Johnne, maister of Forbes, thair adherentis and utheris foirsaidis, nevir to be hard to persew and walkin the samyn in tyme cuming; and likwys desyring that command may be gevin to the lordis of sessioun to proceid and minister justice in the caus persewit be the said Erll of Huntlie and his fader brother aganis the saidis lord and maister of Forbes and certane utheris, thair surname and dependaris on the hous of Forbes, for removing fra the landis and baroneis of Keig and Monymusk, according to the warnyngis maid befoir the feist of Witsounday 1576 yeiris, notwithstanding the act of parliament purchest be the saidis lord and maister and thair adherentis at the last parliament haldin at Edinburgh, the xj day of November 1579 yeris, dischargeing the lordis of sessioun of all proceiding in the same caus unto the tyme decreittis wer pronunceit in the saidis actionis persewit for the spuilyeis and depredatiounis allegeit done efter the tyme of the abstinence, quhilk act tendis only to the frustratioun of justice, the said Erll of Huntlie and his father brether, quhome it concernit in speciall, and quha mycht have answerit and informit his hines and his estaitis thairanent, nevir being callit thairto nor hard thairin, as at mair lenth is contenit in the saidis supplicatiounis; oure soverane lord, with advise of his thre estatis in this present parliament, decernis and declaris that the said pacificatioun sall stand firme and inviolable in favouris of the said erll of Huntlie, his kin, freindis, servandis and dependaris on his hous, and that the haill actionis of spuilyeis, depredatiounis and demolitionis contenit in the preceptis and clames of Williame, lord Forbes, Johnne, maister of Forbes, his sone, thair dependaris and uthers above writtin, aganis the said Erll of Huntly, his father brether, his kin, freindis, servandis and dependaris on his hous, as committit aganis the tenour of the said abstinence, ar and salbe extinguisit, expyrit and prescrivit in all tymes cuming heirefter, and the said lord and maister of Forbes, thair adherentis and utheris foirsaidis nevir to be hard to persew and walkin the same in ony tyme cuming; and siclike declaris and decernis the act of parliament purchest be the said lord and maister of Forbes, thair kin and adherentis, in the parliament haldin at Edinburgh, the xj day of November 1579 yeris, to expyre and be extinct in all tymes heirefter, quhilk act dischargeit the lordis of counsale and sessioun to proceid in the caus of removing of the said lord and maister and thare freindis fra the landis and barony of Keig and Monymusk ay and quhill decreittis wer pronunceit in the actionis of spuilye, depredatiounis and demolitionis persewit be the said lord, maister and thair freindis aganis the said Erll of Huntlie, his father brether and utheris foresaidis; and yit his majestie and thre estatis in this parliament, considering that the debetable caus, deadly feidis and contraverseis betuix the saidis pairteis ar not yit removit and takin away, to the said submissioun maid to that effect, the tyme thairof being expirit, his hines gude will and intentioun remanyng to have the samyn yit done, hes thairfoir thocht meit, be advise of his saidis estatis, that all the debetable causs, deidlie feidis and contraversis betuix the saidis pairtiis salbe submittit of new to certane freindis on ather syde, according to the quhilk his m[...]† plesour and gude meanyng in the self sa godlie and ressonable, the saidis pairtiis hes presentlie submittit thair saidis haill querrellis, deidlie feidis and caus debetable, alsweill criminall as civill, that hes fallin out and happynnit betuix thame sen the first day of November [...] to the day and dait of thir presentis, to certane thair freindis on ather syde, that sentence, decreit arbitrall and delyverance may be pronunceit thairupoun betuix the first day of Februar nixtocum; and in cais ony variance result upoun the premis, quhairthrow the said noble men sall not happin to appoint and aggre amangis thame selffis, then thei sall report in presens of his majestie and his counsale the maters and pointtis quhairin the varience standis, quhairthrow his hines, as odman and owrisman commonlie chosin be bayth the saidis partiis, with advise of sic of his privie counsale as he sall elect and call unto him, may gif finall decisioun toward the saidis deidly feidis and contraversiis, quhairupoun decreit pronuncit at the furthest betuix and the tent day of Marche nixtocum; quhilk day being bigane and the saidis caus into bayth civill and criminall not being determinat and decidit be the submissioun foirsaid, in that cais ather of the saidis partiis sall have place to persew uthers for quhatsumever caus, except sic as ar takin away be this present act and the pacificatioun foirsaid, quhilk oure soverane lord ordanis to haif full effect in all tyme cuming.
[1581/10/64]*[print] [email] [cite] [preceding] [following]
Oure soverane lord and his estatis convenit in this present parliament, considering that the deidlie feidis, querrellis and contraverseis betuix his hines subjectis and the surname of Gordoun and Forbes and thair partakers ar not yit removed and takin away be the formair submissioun maid to that effect, the tyme thairof being now expirit and his hines gude will and intentioun remanyng to have the same yit done, hes thairfoir thocht meit, be advise of his saidis estatis, that the saidis debetable caus, deidlie feidis and contraverseis salbe submittit of new to certane freindis on ather syde, according to the quhilk his majesteis plesour and gude will remanyng, being in the self sa godlie and ressonable, ane noble and michty lord George, erll of Huntlie, lord Gordoun and Baidyenout, with expres consent and assent of Johnne Gordoun of Lochinver and Patrik Gordoun of Auchindoun, curatouris to the said erll, for thair enteresse, for thame selffis and takand the burding on thame for the haill kin, freindis, servandis and partakers of the said Erll of Huntlie, on the ane pairt, and ane noble lord Williame, lord Forbes, and Johnne, maister of Forbes, his sone and apperand air, for thame selffis and takand the burding on thame for the haill kin, freindis, servandis and partakers of the said Lord Forbes, on the uther pairt, hes submittit and, be the tennour heirof, submittis all querrellis, deidlie feidis and caus debetable, alsweill criminall as civill, that hes fallin out and happynnit betuix thame sen the first day of September the yeir of God jM vC threscoir ellevin yeris, to the personis underwrittin: they ar to say, for the pairt of the said Erll of Huntlie, his name, freindis and pairtakers foirsaidis, Robert, commendatair of Dumfermling, secretair to oure soverane lord, Mark, commendatair of Newbottill, and Alexander Hay, clerk of register; and for the pairt of the said lord and maister of Forbes, thair name, freindis and partakers, George, erll of Marchell, Patrik, lord Lindsay of the Byris, and Maister James Halyburtoun, provest of Dundee; quhilkis personis chosin for bayth the saidis parteis sall convene heir and determinat the saidis debetable caus, deidlie feidis and contraverseis in the kingis majesteis presence quhair his hines salhappin to be for the tyme upoun sic day or dayes as his hines and the saidis lordis being with his majestie sall appoint, sa that alwayes thair sentence, decreit arbitrall and delyverance salbe pronumcit betuix and the tent day of Februar nixtocum; and in cais ony variance result upoun the premis, quhairthrow the saidis arbitouis sall not happin to aggrie and appoint amangis thame selffis, then thei sall report in presens of his majestie and counsale the maters and pointis quhairin the variance standis, quhairthrow his hienes, as odman and owersman commonlie chosin be bayth the saidis pairteis, with advise of samony of his privie counsell as he sall elect and call unto him, may gif finall decisioun toward the saidis deidlie feidis and contraverseis, quhairupoun decreit salbe pronuncit betuix and the tent day of Marche nixtocum. Attoure bayth the saidis pairtiis sall deliver thir clames gif ony further thei have nor is already gevin to the clerk of secreit counsale betuix and the tent day of December nixtocum, quhilkis being intercheyngeable, deliverit agane to the pairtiis, they sall mak and deliver their answeris hinc inde to the said clerk within ten dayes thairefter, and quhatever the saidis jugeis, arbitouris and amicable compositouris, in ane voce or the maist pairt of thame in ane voce, being convenit in equall number in his majesteis presens as said is, or in cace of variance his majestie, with advise as said is, pronunces, decreittis and deliveris in the premises amicablie bayth the saidis partiis, for thame selffis and takand the burding on thame as said is, sall abyde, underly and fulfill the samyn to uthers but appellatioun, reclamatioun or contradictioun quhatsumever. Attour, bayth the saidis pairtiis, for thame selffis and takand the burding on thame as said is, ar content and consentis that the assurance already takin and aggreit upoun to stand betuix thame unto the first day of Apprile nixtocum sall remane and yit continew unto the first day of Junii nixtocum, quhilk thei promit to observe and keip unviolat in ony poynt, under the panis contenit thairin. Mairattour, bayth the saidis partiis ar content and consentis that this present compromit and submissioun, with the decreit arbitrale that salhappin to be pronuncit and gevin thairupoun be actit and registrat in the buikis of privie counsale and sessioun, to have the strenth of ane act and decreit of the lordis thairof, and that lettres and executorellis be direct thairupoun in forme as effeiris, and, for acting and registring of the same in the saidis buikis, hes maid, constitutit and ordanit conjunclie and severalie in uberiori forma, promitten de rato; in witnes of the quhilk thing bayth the saidis partiis and arbitouris in taikin of thair acceptatioun to this present compromit in and upoun thame, as alswa oure soverane lord hes subscrivit thir presentis with thair handis as followis, at [...] the xxviij day of November, the yeir of God jM vC fourescoir ane yeiris.
[1581/10/65]*[print] [email] [cite] [preceding] [following]
Forsamekill as anent the supplicatioun gewin in be Johnne, lord Hereis, Williame Baillie of Lammingtoun and Eduard Maxwell, sone to the said lord, makand mentioun that quhare for fulfilling of ane part of the contract of mariage maid betuix the said lord and his said sone one that ane pairt, and the said Laird of Lammingtoun and Margaret Baillie, his lauchfull dochter, one the uther pairt, for mariage contractit and schortlie thaireftir solempnizat betuix the said Eduard and the said Margaret, it being convenit that the said Edwarde sould ressave the surename of Baillie and armes of the hous of Lammingtoun in respect of the gude dedis and benefeitis he was to ressave of the said mariage, newirtheles, upoun considerationes mowing the saidis parteis, it is condiscendit and aggreit with advise of freindis one ather part that it salbe dispensit with the said Edwardis ressaving of the said surename of Baillie for ane certane space to cum, prowyding that Williame Maxwell, eldest lauchfull sone gottin betuix the said Eduarde and the said Margaret, sall instantlie ressave the said surename of Baillie and armes of the said hous of Lammingtoun, and ane act and statute to be maid in this present parliament thairupoun; thairfore oure said soverane lord, with advise and consent of the thrie estatis of this present parliament and of consent of the saidis Johnne, lord Hereis, Williame Baillie of Lammingtoun and the said Eduard Maxwell, hes statute and ordanit that the said Williame Baillie, eldest lauchfull sone and apperand air gottin betuix the saidis Eduarde and Margaret, hes willinglie past fra his surename of Maxwell, ressavit and acceptit in place thairof the said surename of Baillie and armes of the said hous of Lammingtoun and, thairfore, decernis and ordanis him now to be callit in all tymes cumming Williame Baillie, and all his posteritie thaireftir to be callit Baillies of thair surename, and newir to rewoke the samyn nor to ressave ony uther surename heireftir; and ordanes lettres of publicatioun to be directit heirupoun, gif neid beis, in forme as efferis.
[1581/10/66]*[print] [email] [cite] [preceding] [following]
Anent the supplicatioun gewin in be the provest, baillies, counsale and commwnitie of the burgh of Dundie, makand mentioun that quhare within thir few yeiris the commwnitie of the burgh of Perth, without ony ground or gude reassone, sterit upe ane questioun aganis the said burgh of Dundie for the first place in all parliamentis, conventiones and essembleis, the said burgh of Dundie being the mair antient burgh, mekill mair burdenit in the service of oure soverane lord baith in bodyes and gudes, the estait of the said burgh being also governit be the merchandis, excluding the craftismen, fra all office of governament within the samyn, and the said burgh of Dundie being evir in tymes bipast in possessioun of the first place; and becaus the saidis inhabitantis of the said burgh of Perth persistit sa wilfullie in thair said sute, the mater being proponit to oure soverane lord and thrie estatis in the parliament haldin at Edinburgh, the ellevint day of November, the yeir of God jM vC threscoir nynetene yeiris, the samyn was remittit, togidder with the renkning and placeing of the haill burrowis within this realme, to the commissionaris of the haill burrowis, to be finallie determinat be thame in the nixt conventioun, as the act of parliament maid thairupoun heir present to schaw at mair lenth proportis; according to the quhilk, the said debait was proponit to the saidis commissionaris, first in thair conventioun haldin at Glasgow in the moneth of Februar, the yeir of God jM vC threscoir nynetene yeiris, and secundlie in thair conventioun haldin at Aberdene in the moneth of Julii, the yeir of God jM vC lxxx yeiris, at baith the quhilkis tymes thair was nathing procedit of the raritie of the saidis commissionaris and that thair was na convenient tyme than to treate the said mater, and swa, last of all, the samyn was continewit to the conventioun of the commissionaris of burrowis to begin at Edinburgh, the sevintene day of Aprile the yeir of God jM vC lxxxj yeiris, and the mater of new being proponit in the said conventioun and the reassones of ather partie being producit in writt, viseit and considerit be the saidis commissionaris, thay upoun the twentie day of the moneth of Aprile, the yeir of God jM vC lxxxj yeiris foirsaidis, gaif to the said burgh of Dundie thair resolute answer that thay war not juges competent thairto, nor could nocht convenientlie decyde thairupoun for certane pretendit reassones specefeit in the act of the dait foirsaid; and newirtheles, upoun the morne thaireftir, being the xxj day of the said moneth of Aprile, the saidis commissionares being convenit, declarit that for feir of lettres of horning direct aganis thame thay wald pronunce in the said mater in maner following and upoun the samyn day, for feir of the saidis lettres, as they planelie professit, decernit that the commissionaris of Perth sould have the first place in all conventiones quhill the nixt parliament, to the quhilk tyme they remittit the principall mater but prejudice of the rycht of ather of the parteis, outher at that tyme or ony uther tyme thaireftir; and swa the saidis commissionaris war not onlie contrareous in thair first and last deliverence, bot als have gewin na direct answer to the principall matter according to the said act of parliament, quhilk was thair power and commissioun, bot hes remittit the samyn to the parliament, as the act heir present to schaw beris; and swa this contentioun and pley is yitt undecydit, ather in the pairt of Dundie, Striveling and Sanct Johnstoun, nor yitt in the renkning of the rest of the haill burrowis, eftir the forme and tennour of the said act of parliament, desyring thairfore the kingis majestie and thrie estatis to ressave the reassones, quhilkis the saidis provest baillies counsale and commwnitie of Dundie have presentlie to be producit and to decyde in the said mater, swa that thaireftir na questioun may arrys thairupoun, as at mair lenth is contenit in the said supplicatioun. Quhilk being sene and considerit first be the kingis majestie and lordis of articles, and thaireftir be the thrie estatis, oure said soverane lord, with advise of the saidis thrie estatis of this present parliament, have remittit and remittis the decisioun of the said mater simpliciter to the burrowis, and ordanis thame to proceid and decyde summerlie thairintill but fordar delay, and siclyke upoun the renkning and placeing of the rest of the burrowis, ewerye ane of thame in thair awin places, and as thay sall use the samyn in tyme cumming; and ordanis lettres to be directit heirupoun, gif neid beis, in forme as efferis.
[1581/10/67]*[print] [email] [cite] [preceding] [following]
Forsamekill as anent the complaint gevin in be Johnne Carnagye of that Ilk, makand mentioun that quhare in the moneth of [...] the yeir of God jM vC lxx yeiris, he being be way of maist violent oppressioun ejectit furth of ane mansione and dwelling place of Seytone, his haill gudis, geir, gold, silver and evidentis being spuilyeit furth of the samyn be George Dowglas, now bischope of Murray, his complecis and ane greit companie of suldeartis conducit be him to that effect, aganis quhome he intentit summondis of spuilyie before the lordis of sessioun, quhilk continewallie as yit hes bene delayit, to his greit dampnage and skaith; and in the meanetyme thair is diversse of his adversar parteis deceissit at syndrie tymes, swa that eftir the deceis of everye particular persone, the said Johnne is burdenit with the translatioun of the haill proces, and eftir the translatioun aganis ane persone, he is compellit to transfer the samyn upoun the aires of the persones deceissand, swa that he, be the occasioun foirsaid, lyke to have ane endles pley without ony redres; and albeit syndrie of the persones quhilkis ar giltie of the said spuilyie wald for thair awin pairtis transact and aggrie with the said Johnne, bot lest the said translatioun sould hurt his awin matter, he feris to deale with thame in that behalf without he have the saidis lordis declaratioun in parliament declarand the samyn to be lauchfull, be the quhilk declaratioun na persone can be hurt, seing the said Johnne is content that quhatsumevir he sall ressave fra ony particular persone in name of translatioun and aggreance salbe allowit of the radiest of his sowmes licht (the lyke was done and concludit in parliament in favour of the cardinallis executouris aganis certane persones quha spuilyeit the castell of Sanctandros in the moneth of Maii 1546), as at mair lenth is contenit in the said supplicatioun; thairfore oure said soverane lord, with advise and consent of the thrie estatis of this present parliament, be the tennour heirof, decernis and declaris that it salbe lesum to the said Johnne Carnagye of that Ilk to aggrie with ony of the saidis persones contenit in the said summondis, thair airis and executouris, he defalkand and allowand the samyn sowmes of the first end of the rest of the sowmes contenit in his said summondis.
[1581/10/68]*[print] [email] [cite] [preceding] [following]
Oure soverane lord, with advise of thrie estatis of this present parliament, understanding the report of honest and credible persones that Archbald Dowglas, sone naturall to umquhile James, sumtyme erle of Mortoun etc., is restand awand to Maistir Johnne Dowglas, sumtyme petagog to the said Archbald, the sowme of foure hundreth markis money for certane furnesing maid be the said Maister Johnne to him in the pairtis of France of ane lang tyme past; for payment quhairof, oure said soverane lord, with advise of the saidis thrie estatis, assignis of the first and radiest fructes and rentis and emolimentis of the landis of Pettindreyth and utheris quhatsumevir quhilk pertenit to the said Archbald, or of ony part thairof, the sowme of foure hundreth markis, togidder with the sowme of ane hundreth markis to be payit as said is, for the support and releif of the said Maister Johnne in the lang awayting and sute of payment of his dett foirsaid, and that notwithstanding ony gift, dispositioun or infeftment gewin or to be gewin of the said Archbaldis landis, rowmes or possessiones quhatsumevir, be ressoun of foirfaltour or utherwayes, to Patrik, maister of Gray, Patrik, commendatair of Lyndoris, or ony utheris quhais giftis oure said soverane lord and estatis foirsaidis declaris to have na effect unto the tyme of the compleit payment of the said sowme be maid to the said Maister Johnne; and ordanes lettres of publicatioun to be direct heirupoun, gif neid beis, in forme as efferis.
[1581/10/69]*[print] [email] [cite] [preceding] [following]
Oure soverane lord, understanding that his hienes darrest mother in hir perfyte aige, with advise of the thrie estatis of hir parliament, gaif, grantit and in fewferme heretablie lent to his rycht traist cousing and counsalour Schir James Stewart of Downe, knycht, his aires and successoures specefeit in the chartour and infeftment of fewferme maid thairupoun, all and syndrie the landis underwrittin, with mylnis, multures, fischingis, pairtis, pendicles, tennentis, tenandreis and service of frie tennentis of the samyn: thay ar to say, all and haill the manis [of] Doun callit Drumcampsie and Bailekeroch, the Kerse of Cambis, the Bray and Miltoun of Cambis, the Parktoun, Ballmoreist, Calyeballquhalye, Caldhame, Westir Ardatie, with the mylne and cruifis of Downe, the Eistir Frew, the Myddle Frew, the Warde of Guddie, Murdochis toun, Ballindronoch, Blairgairie, Cultintegill, the xx s. land of Cambisbeg, the Westir Brigend, Dowart, Auchinhard, Grodich, the park of Doun, the keping of the castell of Doun and forrest of Glenfinglas, and all utheris parkis and walteris within the stewartrie of Menteith, sett to the said Schir James and his foirsaidis in few, with the fischeing in the river of Taith, Lochbannach, Luknach, annexis, connexis and pertinentis thairof foirsaidis all lyand within the stewartrie of Menteith, togidder with the office of the said stewartrie, as the said infeftment in the self at lenth proportis; quhilk chartour and infeftment foirsaid, haill pointis, articles and clausis thairin contenit, oure said soverane lord, with advise of the thrie estatis of this present parliament, ratefeis, apprewis and, for his hienes and his successoures, perpetuallie confermis, salffand to oure said soverane lord and his successoures the fewferme dewteis specefeit and contenit in the said Schir James infeftment of fewferme foirsaid aucht to oure said soverane lord and his predicessoures of before the said ratificatioun. Attour, oure said soverane lord for the gude, trew and thankfull service done be the said Sir James to his hienes self, his darrest mother and umquhile guddame, and to gif him the bettir occasioun to continew and perseweir thairin, and understanding it maist equitable that the advocatioun, donatioun and rycht of patronage of the cheplanrie of Sanct Phillane, situatit within the said castell of Doun, and [the chepell of] the cheplanrie of Sanct-Phillane, situatit without the samyn, be conferrit in the persone of the said Schir James and his foirsaidis heretable fewfermoraris of the foirsaidis landis, thairfore oure said soverane lord, with advise of the thrie estatis of this present parliament and be the tennour of this present act, gevis, grantis, disponis and confermis to the said Schir James, his aires and successoures foirsaidis, the advocatioun and donatioun of the said cheplanrie of Sanctphillane, situatit within the said castell, the chepell of the said cheplanrie of Sanctphillane, situatit without the samyn, and all and syndrie landis, hows, dewteis and annuelrentis pertening and belonging thairto, advocatioun, donatioun and rycht of patronage and all utheris kirkis, benefices and cheplanreis, tennentis, tenandreis and service of frie tennentis of the samyn, annexis, connexis, pairtis and pendicles thairof foirsaidis. Mairower, oure said soverane lord, hewand respect that the said Sir James is discendit of his awin blude, and being of gude will and mynd that he be promowit to sic honour and dignetie as he hes mereit, hes erectit, creat, uneit, annext and incorporat, lyke as his hienes, be this present act, with advise foirsaid, erectis, creatis, unetis, ann[...]tis† and incorporatis all and syndrie the foirsaidis landis, offices and utheris particularie abonewrittin, advocatioun, donatioun and rycht of patronage of the said cheplanrie and of all utheris kirkis, benefices and cheplanreis, annexis, connexis, pairtis, pendicles, pertinentis, tennentis, tenandreis, service of frie tennentis of the samyn foirsaidis, in ane lordschip to be callit in all tyme cumming heireftir the lordschip of Doun, decernand and ordenand the said Sir James, his aires and successoures specefeit in the said infeftment, in all tymes cumming to be callit and intitulat lordis of Doun, quha sall have the honour, dignetie, place and preheminence of ane lord of oure soverane lordis parliament, in all parliamentis, essembleis and utheris conventiones, with his airmes efferand thairto, and gevand unto him all honouris, digneteis, preeminencis, quhilkis pertenit, or of rycht and consuetude, aucht to pertene to ane lord of parliament, but prejudice alwayes of the dewteis contenit in the said Sir James infeftment awand to oure said soverane lord, and alswa but prejudice to the said Schir James, his aires and successoures of the assignatioun, of ane part of the saidis dewteis for keping of the said castell, quhilkis, notwithstanding the premis, sall stand in the awin force and strenth, ordinand and constituand the castell of Doun foirsaid the principall messuage and cheifschimmeis of the said lordschip. And for the caus foirsaid, oure said soverane lord will and grantis and, for his hienes and his successouris, siclyk decernis and ordanis that ane seasing to be gevin be the said lord of Doun at the said castell of Doun and be his aires thairat in tyme cumming sall stand, extend and be sufficient seasing for all and syndrie the foirsaidis landis, mylnis, woddis, fischeingis, advocatioun, donatioun and rycht of patronage of the said cheplanrie of Sanct Phillane, situatit within the said castell and without the samyn, and all and syndrie landis, howsis, dewteis and annuelrentis pertening and belonging thairto, advocatioun, donatioun and rycht of patronage of all uther kirkis, benefices, cheplanreis and utheris foirsaidis now uneit, erectit and incorporat in the said lordschip of Doun, notwithstanding that the samyn not contigue, anent the quhilkis oure said soverane lord, with advise foirsaid, be the tennour of this present act, dispens for evir be thir presentis, and ordanes lettres of publicatioun to be direct heirupoun, gif neid beis, in forme as efferis.
[1581/10/70]*[print] [email] [cite] [preceding] [following]
Forsamekill as anent the supplicatioun gewin in be the provest, baillies, counsale and communitie of the burgh of Aberdene to the kingis majestie and thrie estatis of parliament, makand mentioun that quhare upoun thair supplicatioun presentit to his hienes and lordis of secreit counsale at Dunnottir, the xxij day of Junii the yeir of God vC and fourescoir yeiris, declaring how his majesteis predecessoures hade dotit the said burgh with certane commodeteis, liberteis and immuneteis for the support of the continewance thairof, namelie, with ane pece of ground callit the Stokkat, adjacent to the said burgh, and with the salmond fischeingis of the samyn burgh upoun the walteris of Die and Done, for yeirlie payment of thrie hundreth and twentie markis money of this realme to be payit in name of fewferme to his hienes and his successouris; and how that thay hade bene trublit in bruiking of thair saidis fischeingis be ane pretendit infeftment purchest be George Auchinlek of Balmanno in the tyme of the regentrie of umquhile James, erle of Mortoun, mother brother to the said George, fra oure said soverane lord, with consent of the said umquhile erle of the landis of Polgonye and Murtour, lyand contigue to the said salmond fischeingis of Done, and including in the said pretendit infeftment salmond fischingis be ane claus (de novo damus) etc. insert thairin, cautelouslie to questioun the saidis complenaris auld infeftment and possessioun of thair saidis fischingis bruikit and possessit be thame of before, but impediment sen thair first obtening thairof, and thairbye tending nocht onlie to prejuge thame of thair saidis fischingis and former rycht thairof foirsaid, bot als to tak fra oure said soverane lord and his successoures the patremonie of the fewmaill foirsaid of the saidis fischeingis and to demineis and stay the samyn and yeirlie customes of salmond fisches takin and to be takin within the saidis fischingis, being the maist speciall dewtie of the said burgh, detbund to be payit yeirlie to oure said soverane lord and successoures, testefeit be the chaker comptis; quhairupoun, and for utheris gude ressones rehersit in the said supplicatioun, it than plesit oure said soverane lord, being at Dunnottir as said is, to revoik, cas, annull and discharge, with advise of the lordis of his hienes secreit counsale than present, the said pretendit new infeftment of (de novo damus) etc., safar as the samyn extendis or may extend to the saidis fischeingis allanerlie as gewin to the said George in his hienes minoritie, not onlie to thair skaith, bot als to the greit hurt of his majesteis awin yeirlie rent, declaring the samyn, with all that followit or may follow thairupoun tuiching the saidis fischeingis, to have bene fra the begynning, and to be in all tyme cumming, of nane awaill, force nor effect in jugement or outwith, quhare evir the samyn beis producit, as ane decreit and act of secreit counsale of the dait foirsaid heir present to schaw at mair lenth proportis. And als at Halyruidhous, the xxiiij day of Januar lastbipast, oure said soverane lord, with advise of the lordis of secreit counsall foirsaid that convenit, ratefeit and apprewit the said revocatioun and act of secreit counsale maid thairupoun in all effectis, respectis and conditiones expressit thairin, and als than of new revoikit, cassit, annullit and dischargit the said new pretendit infeftment (de novo damus) etc. safar as the samyn extendis or may extend to the saidis fischeingis, in maner at lenth abonewrittin; and attour, that ordanit the saidis revocationes and approbatioun to be ratefeit in his hienes nixt parliament, with new revocatioun, gif neid beis, than to be maid thairin in corroboratioun of the saidis complenaris rycht and securetie and his hienes commodetie of the fewmaill foirsaid, as ane act and decreit of secreit counsale maid thairanent, including the said former act of the dait at Halyruidhous, the said xxiiij day of Januar lastbipast, heir radye to schaw at mair lenth dois testefie. Desyring maist humblie, thairfore, oure said soverane lord and thrie estatis foirsaidis to sie and considder the saidis former actis of revocatioun and haill contentis thairof, and, in respect of the samyn and ressonable caus thairin expressit, that his hienes of new in this present parliament, with advise of the saidis estatis, wald revoik, cas, annull and discharge the said pretendit new infeftment gewin be dispositioun and claus (de novo damus) etc. to the said George Auchinlek and utheris thairin contenit, of quhatsumevir dait the samyn be, safar as the samyn extendis or may extend to the saidis fischeingis allanerlie as gewin to the said George and utheris thairin nominat in his hienes minoritie, not onlie to the skaith and detriment of the said burgh, commodeteis and privilegis thairof, bot als to the greit hurt of his majesteis yeirlie annuel rent; and to declare the samyn now as of before, with all that hes followit or may follow thairupoun tuiching the said fischeing, to have bene fra the begynning and to be in all tyme cumming null and of nane awaill, force, strenth nor effect in jugement, nor outwith quhairevir the samyn hes bene, or beis producit and schawin, as at mair lenth is contenit in the said supplicatioun. Quhilk being sene and considerit, first be the lordis of articles and thaireftir be the kingis grace and estatis, oure said soverane lord, with advise of the saidis thrie estatis of this present parliament, revoikis, cas, annullis and discharges the said pretendit new infeftment gewin be dispositioun and claus (de novo damus) etc. to the said George Auchinlek and utheris thairin contenit, of quhatsumevir dait the samyn be, safar as the samyn extendis or may extend to the saidis fischeingis allanerlie as gewin to the said George and utheris thairin nominat in oure said soverane lordis minoritie, not onlie to his hienes skaith and detrement of the said burgh, bot als to the greit hurt of his majesteis awin yeirlie rent; and thairfore decernis and declaris the samyn now as of before, with all that hes followit or may follow thairupoun tuiching the saidis fischingis, to have bene fra the begynning and to be in all tyme cumming, null and of nane availl, force, strenth nor effect, in jugement nor outwith, quhairevir the samyn hes bene or beis producit and schawin; and ordanes lettres of publicatioun to be directit heirupoun, gif neid beis, in forme as efferis.
[1581/10/71]*[print] [email] [cite] [preceding] [following]
Forsamekill as it hes plesit the kingis majestie, oure soverane lord, with advise of his thrie estatis conit in parliament, upoun the resignatioun of the abbot and convent of Scone of the temporall landis of the said abbay, quhairof ane greit part partenit of auld to the erledome of Gowrye, to infeft heretablie his rycht traist cusing and counsallour Williame, now erle of Gowrye, lord Ruithven and Dirletoun, his hienes thesaurar, in the saidis temporall landis and few maillis thairof, erectand the samyn in ane erledome, to be callit the erledome of Gowrye in tyme cumming, quhairthrow the saidis abbot and convent ar not able to pay the feall thrid of the said abbay according to the first assumptioun, thay being now denudit of the saidis temporall landis, quhilkis for the maist pairt war assumit of before in payment of the said thrid; quhairfore his majestie, be advise of his thrie estatis in this present parliament, ordanis and commandis his collectour generall and lordis auditouris of his hienes chaker to alter the assumptioun of the thrid of the abbay of Scone and to tak the just thrid of the haill rentis of the said abbay restand attour the yeirlie few maillis and dewteis of the saidis temporall landis, assumand the said thrid of the radiest of the dewteis, othir money or victuallis payit for the kirkis and teindis of the said abbay, begynnand of the crope and yeir of God jM vC lxxxj yeiris present, and sa furth yeirlie in tyme cumming, quhill fardar ordour be takin anent the thrid of the said abbay be his hienes, with advise of his estatis in parliament; and that thair be na mair assignit to be payit furth of the thrid of the said abbay, owther in ministeris stipendis or in payment of quhatsumevir pensiones, giftis or uther assignationes accustomet to be payit out of the thrid of the said abbay of before, bot according to the said thrid now to be assumet thairof of this present yeir and crope and na utherways; and ordanes lettres of publicatioun to be directit heirupoun, gif neid beis, in forme as efferis.
[1581/10/72]*[print] [email] [cite] [preceding] [following]
Forsamekill as it hes pleasit the kingis majestie, our soverane lord, for the gude, trew and proffitable service done to him be his belovit Maistir Petir Young, his hienes preceptor and maister almousser, and that in the educatioun of his hienes vertewouslie in lettres during his minoritie, to have confermit certane infeftmentis quhilkis the said Maister Petir hes obtenit of certane few landis of the abbacie of Aberbrothok, payand thairfore ane dewtie of silver, of the quhilkis landis the dewteis was usit of before to the generall collectour as assumit in the thrid of the said abbacie; oure soverane lord, willing that the infeftmentis obtenit be the said Maistir Petir be one nawayes hurt nor prejugeit for ony caus preceidand the dait of thir presentis, bot that the samyn stand as ane perpetuall rycht to him in all tymes cumming, according to the tennour of the samyn, ordanis thairfore and commandis his collectour generall and lordis auditouris of his hienes chaker to alter the assumptioun of the thrid of the said abbay of that part now pertening to the said Maistir Petir, and to tak proportionablie ane thrid of the remanent rentis of the said abbay according to the dewtie contenit in the said Maister Petiris infeftment, assumand the thrid of the radiest of the rentis, money or victuallis of quhatsumevir kirkis, landis or teindis belongand to the said abbay, begynnand of the crope and yeir of God jM vC lxxxj yeiris present, and swa furth yeirlie in tyme cumming, to indure quhill oure said soverane lord of certane knawlege and deliberat mynd have declarit ane contrar will be his expres command and ordinance, and that with the advise of his hienes estatis in parliament; and ordanes lettres of publicatioun to be directit heirupoun, gif neid beis, in forme as efferis.