[1579/10/58]*[print] [email] [cite] [preceding] [following]
Oure soverane lord and his thrie estaitis of this present parliament, perfytlie remembering and undirstanding that in the moneth of August the yeir of God jM vC lxvij yeiris, oure said soveranis umquhile dearest uncle James, erle of Murray, lord Abirnethie, wes nominat, constitutit and electit regent to his majestie, his realme and liegis, and the said electioun, constitutioun and acceptatioun of the said office be the said umquhile James, erle of Murray, wes be his hienes, with approbatioun and consent of the estaitis convenit in parliament, decernit lauchfull and sufficient, and that quhatsumevir thingis the said James, erle of Murray, regent, had done be vertew of his said office, or quhilk he suld do thairefter in his majesties name and auctoritie, to be als dewly, lauchfullie and rychtuuslie done and to have als greit availl, strenth and effect in all respectis as ony thing done be quhatsumevir regentis or gouvernouris of this realme in the minorities of ony uther native princes of the same, and that the said umquhile Erle of Murray, for dew administratioun of the said office and defence of his majestie and his hienes auctoritie and bringing of his rebellis and disobedient subjectis to thair dew obedience, tuik greit cure, travell and diligence and not onlie spendit and debursit all and quhatsumevir revennues or utheris proffittis quhilkis may be brocht in pertening to his majestie, owthir in propirtie or casualitie, beside the thirlage of his awin leiving and the rentis of his proper dependance, for the advancement of oure soverane lordis service, bot alsua mony tymes, bayth day and nycht, exponit his awin body and lyff with utheris nobilmen and faythfull subjectis foirsaidis, evir continewing in the upricht and diligent administratioun of his office unto his lyvis end and quhill his death wes conspirit and perpetrat be certane maist tressounable conspiratouris in the moneth of Januar, the yeir of God jM vC lxix yeiris. Thairfoir, in respect of the manifest treuth and notorietie of the premise, oure soverane lord and estaitis foirsaidis, be this present act, decernis and declaris that the said umquhile James, erle of Murray, sumtyme regent to his majestie, his realme and liegis, dewly, valyeantly, justly and diligentlie usit and exercit the said office of regiment and all affairis, causis and chairges thairto appertening and concerning the samyne continewallie fra the tyme of the acceptatioun of the said office unto the tyme of his deceise, and in all his proceidingis and doingis the tyme of his governament and regiment keipit and observit ane trew, just, upricht and valiant part towart his majestie, his authoritie, realme and liegis in all affairis thairof without offence or fault; and thairfoir ratifeis and apprevis all and quhatsumevir thingis done be him in the samyne, and exoneris and dischairges Elezabeth and Margret Stewartis, dochteris and airis of the said umquhile Erle of Murray, Dame Annas Keyth, his relict and executrice, Colyne, erle of Argile, lord Campbell and Lorne, chancellair and justice generall of this realme, Robert, erle of Lennox, lord Dernlie, and Sir James Stewart of Downe, knycht, couratouris to the said Elezabith, for thair interesse, and the said Colyne, erle of Ergyle, tutour dative to the said Margret, for his entres, thair airis, successouris and assignaes, of all and quhatsumevir factis and thingis done be the said umquhile erle and utheris in his name quhatsumevir in the administratioun of the said office of regiment and during all the tyme and space of the samyne, and als of all sowmes of money, jowellis, movablis, mailis, fermes, proffittis, rentis, revennues and dewiteis, bayth of his majesties proper patrimony and casualitie of this realme, and proffite of his majesties cunyie, thriddis of benefices and quhatsumevir uther guidis or geir, alsweill unnamyt as namyt, pertening or that ony wise micht have pertenit to his hienes induring the tyme foirsaid, intromettit with be the said umquhile Erle of Murray, his servandis and factouris in his name and all actioun and instance that may be intentit and persewit aganis his saidis dochteris, airis, relictis and executouris foirsaid, thair airis, executouris, successouris, assignaes or ony utheris be his occasioun in onywise concerning the premises or ony part thairof; providing alwayis that this present discharge and ratificatioun on nawise prejuge oure said soverane lord anent his generall revocatioun of they thingis that cummis undir the samyne, and alsua that this present act on nawise be prejudiciall to oure soverane lord for repetitioun of all sic jowellis as wer not engaged nor sauld be the said umquhile James, erle of Murray, bot that his hienes may recover the samyne fra the personis havaris thairof as he thinkis expedient.