[1579/10/42]*[print] [email] [cite] [preceding] [following]
†Item, oure soverane lord and thrie estaitis of parliament, considering the hurt quhilk hes cummit to the commoun weill of this realme and liegis thairof be haveing and keiping of cruvis and yairis, slauchter of reid fische in forbiddin tyme and smoltis, and that divers actis and constitutiones hes bene maid be his hienes maist noble progenitouris in tyme bigane towart the distructioun and away putting of the saidis cruvis and yairis and eschewing of slaying of reid fische and smoltis, quhilkis actis hes not ressavit executioun in tyme bigane, bot hes bene neglectit and oversene, thairfoir ordanis the saidis actis to be extendit and have effect and executioun in tyme cuming aganis the transgressoris thairof efter the forme and tennour of the same, as alsua aganis all that slayis the saidis reid fische in forbiddin tyme be blaisse, casting of wandis or utherwise, or that distroyis the smoltis and fry of salmond in myln, dammis, or be polkis, creillis, trammelnettis and herry watteris, and that the landislordis and awnaris of the saidis cruvis and yairis, betuix this and the first day of Marche nixtocum, put doun and hald doun the saidis cruvis and yairis conforme to the saidis actis and undir the panes contenit thairin; and gif they failyie thairin, the said day being bipast, ordanis and commandis his hienes thesaurair to persew and uptak the saidis panes. And als ordanis the schirreffis, stewartis and baillies in the schyres, lordis of regalities quhair the saidis cruvis and yairis ar and the provestis and baillies of the nixt burrowis, conjunctlie or severaly, to pas with convocatioun of his majestes liegis and cast doun and distroy the saidis cruvis and yairis and hald thame doun as they will ansuer to oure soverane lord upoun thair obedience; and gif neid be, that lettres be direct aganis thame to that effect within ten dayis undir the pane of rebellioun; and gif they failyie, to put thame to the horne. And this act to serve for sufficient commissioun to the saidis schirreffis, stewartis, baillies, lordis of regalities, provestis, aldermen and baillies of burrowis to the effect foirsaid, and that they nawyse salbe callit or accusit thairfoir nor incur ony skaycht or danger thairthrow in tymmcuming. And commanding all oure soverane lordis liegis to ryse, concur and assist to the saidis shireffis, stewartis, baillies and their deputtis, provestis, aldermen and baillies of burrowis and thair officiaris in putting of the said act to executioun in all poyntis efter the tennour thairof. And for punisment of the slayers of reid fische in forbiddin tyme be bleiss, casting of wandis or utherwise, or distroyaris of the smoltis and fry of salmond in myln dammis or be polkis, creillis, trammelnettis and herry watteris, that the schireffis, stewartis, baillies and lordis of regalities within thair awin jurisdictionis proceid as ordiner justices and uptak and execut the panes and eschaettis, the tua pairt to the kingis majesties use, and the thrid to thame selffis for thair travellis; and quhair the offendouris hes not geir worth the panes, to put and hald thame in presoun, stokkis or yrnis for the space of ane moneth upoun thair awin expensis, or gif they have it not, on breid and watter.