The pacificatioun of Capitane Robert Lauder

Oure soverane lord, with avise and consent of the thrie estaitis of parliament, for gude considerationis moving his hienes tending to the quietnes of his realme and of his speciall grace and favour, hes gevin and grantit and, be the tennour of this present act, with avise and consent foirsaid, geves and grantis to capitane Robert Lawder the elyk grace, benefite and favour as is contenit in the pacificatioun maid at Perth, the xxiij day of Februar, the yeir of God jM vC lxxij yeiris, betuix his hienes commissionaris on that ane pairte, and umquhile George, erll of Huntlie, Johne, commendatar of Aberbrothok and Claud, commendatar of Paislay and certane utheris one that uther pairte, and ratefiit and apprevit in his hienes parliament haldin at Edinburgh, the [...] day of Aprile, the yeir of God jM vC lxxiij yeiris; and that the said pacificatioun and approbatioun thairof in parliament be als largelie extendit in favour of the said Robert Lawder, his airis and successouris for saiftie of lyffis, landis and guidis as gif the said Robert wer speciallie comprehendit and contenit thairin, notwithstanding the pretendit proces and dome of foirfaltour led and gevin aganis the said Robert in the moneth of [...] the yeir of God jM vC lx yeiris for certane crymes of tressone and lesemajestie committit be him, as at mair lenth is contenit in the samin; quhilk proces and dome of foirfaltour, with all followit thairupoun, oure said soverane lord and thrie estaitis of parliament rescindis, retreitis, cassis, annullis, restoris and redintegratis the said Robert fullelie aganis the sam and to his honour, fame, dignetie, leving, honestie, possessionis, takkis, stedingis, teyndis, rowmes and possessionis siclyk and als frelie as he wes in all respectis befoir the leding of the said proces; and that thir presentis be als sufficient for reductioun and retreating of the said proces and sentence of foirfaltour as gif the sam had procedit upoun ane speciall summoundis, all pairteis haiffand entres being callit thairto; and that thir presentis be extendit in ampill and dew forme as effeiris, providing that gif the said Robert be fund culpabill heirefter of the slawchteris and murthouris of our soverane lordis umquhile fader, umquhile Mathow, erll of Levenox, his hienes gudsir, and umquhile James, erll of Murray, lord Abernethy, his hienes regentis for the tyme, than and in that benefite, the benefite of this present act and restitutioun, now as than and than as now, to be and to haif bene of nane availl, force nor effect.

  1. NAS, PA2/12, ff.9r-v. Back
  2. Written as 'benefite' in the manuscript but clearly a clerical error. Back