The pacificatioun grantit to Johnne Cranstoun of Morestoun

Oure soverane lord, with avise and consent of the thrie estattis of parliament, for gude considerationis moving his hienes tending to the furthering and establisching of peax and quietnes and universall obedience of his hienes auctoritie, hes gevin and grantit and, be the tennour of this present act, with avise and consent foirsaid, gevis and grantis to Johnne Cranstoun, lauchtfull sone to Cudbert Cranstoun of Thirlestane Manis, the elyk grace, benefite, privelege, favour and conditionis as ar contenit in the pacificatioun maid and accordit upoun at Perth, the xxiij day of Februar, the yeir of God jM vC lxxij yeiris, betuix his hienes commissionaris one that ane pairt and umquhile George, erll of Huntlie and certane utheris, his collegis, on that uther pairte, ratefeit and apprevit in his hienes parliament haldin at Edinburgh, the [...] day of Apryle, the yeir of God jM vC lxxiij yeiris; and that the said pacificatioun and approbatioun thairof in parliament be als largelie extendit in favouris of the said Johnne and his airis for saiftie of thair lyffis, landis and guidis as gif the said Johnne wer speciallie comprehendit and contenit thairin, notwithstanding the pretendit proces of foirfaltour led and gevin aganis the said Johnne in the moneth of [...], the yeir of God jM vC lx[...] yeiris, for certane crymes of tressone and lesemajestie committit be him as at mair lenth is contenit in the samyn; quhilk proces and dome of foirfaltour, with all that followit thairupoun, oure said soverane lord and thrie estaitis of parliament rescindis, retreittis, cassis, annullis, restoris and reintegratis the said Johnne Cranstoun fullelie aganes the samyn and to his honouris, fame and dignetie siclyk and alsfrie in all respectis as he wes befoir the leding of the said proces; and als decernis and declaris this present act of pacificatioun to be als valitt and sufficient in the selff in all tymes heirefter for reponing of him to his full richt of the saidis landis and estait of his persone, as gif the said sentence of foirfaltour had bene reducit be an speciall summoundis, all parteis haiffand entres being speciallie callit thairto; and declaris alsua the said proces of foirfaltour of nane availl in all tyme cuming, insafar as the samin may be extendit in the contrair of the said Johnne; and that thir presentis be extendit in ample and dew forme as effeiris, providing that thir presentis contene na pardoun, favour nor grace for the murtheris of our soverane lordis umquhile fader and his twa regentis; and incaice thay be fund culpabill thairof, that than in that caice the benefite of this present act and restitutioun, now as than and than as now, to have bene and to be of nane availl, force nor effect.

  1. NAS, PA2/12, f.8v. Back