[A1578/3/8]*[print] [email] [cite] [preceding] [following]
Anent the supplicatioun presentit to oure soverane lord, nobilitie and estaittis be Johne, lord Maxwell, makand mentioun that quhair in his majesteis name James, erll of Mortoun, lait regent, causit detene the said Johnne, lord Maxwell in ward within the castell of Edinburgh and Blaknes and last of all in the citie of Sanctandrois sen the xxj day of Julii lastbipast, for quhat caus he knawis not; and befoir his cuming furth of the said castell of Blaknes and entre in Sanctandrois, he wes compellit to find James Maxwell of Calderwod, Johnne Blair of that Ilk and Roger Greirsoun of Lag, cautionaris and souirteis, conjunctlie and severalie, that he sould nowther eschew, eschape nor depart frome the said citie of Sanctandrois unto sic tyme as he wer fred be oure said soverane lord or his lait regent foirsaid under the pane of twenty thowsand merkis, as ane act maid thairupoun in the bukis of secreit counsall at mair lenth proportis. And seing now he hes reparit to the burgh of Striveling, reddy to do his majesteis service, conforme to his hienes lettre to that effect, humelie desyring thairfoir that he and his saidis cautionaris mycht be dischargeit of the said act and of all pane and dangeare that thay may incur thairthrow, and the same to be deleit and have na forder strenth nor effect in tyme cuming, lyke as at mair lenth is contenit in the said supplicatioun. Quhilkis being red, sene and considerate, the kingis majestie, with avise of his saidis nobilitie and estaittis, declaris that the said Johnne, lord Maxwell hes done gude and thankfull pleasour to his hienes in cuming and repaying to his majestie, conforme to his hienes lettre direct to that effect, and thairfoir dischargeis the said Johnne and the foirsaidis personis, his cautionaris, of the said act and of all pane and dangeare that thay may incur thairthrow. And ordanis the same act to be deleit furth of the saidis bukis of secreit counsale, quhairthrow the same have na forder strenth, force, effect nor executioun in tyme cuming.