[A1575/3/1]* [print] [email] [cite] [preceding] [following]
The quhilk day, in presence of the nobill and michtie lord James, erll of Mortoun, lord of Dalkeyth, regent to oure soverane lord, his realme and liegis, and of the nobilitie, estaittis and lordis of the secreit counsale underwrittin assemblit at this present convention: thay ar to say, Johnne, lord Glammis, chancellair of Scotland, Archibald, erll of Angus, lord Dowglas and Abirnethie, George, erll of Huntlie, lord Gordoun and Badyenoch, Johnne, erll of Atholl, lord of Balvany, Andro, erll of Errole, lord Hay, Johnne, erll of Montrois, lord Grahame, Gilbert, erll of Cassillis, lord Kennedy, Hew, erll of Eglintoun, lord Montgomery, William, erll of Glencarne, lord of Kilmawris, Andro, erll of Rothes, lord Leslie, Robert, erll of Buchane, lord of Glendowachy, Williame, erll of Menteith, Williame, Maister of Marschell, James, archebischop of Glasgow, Robert, bischop of Caithnes, George, bischop of Murray, Adam, bischop of Orknay, Alexander, bischop of Galloway, James, bischop of Dunkeld, Alexander, bischop of Brechin, Williame, lord Ruthvene, thesaurare of Scotland, and provest of Perth, Patrik, lord Lindesay of the Byris, provest of Edinburgh, Johnne, lord Maxwell, wardane of the west marche foranent England, Robert, lord Boyd, provest of Glasgow, Johnne, lord Hereis, George, lord Seytoun, Hew, lord Somervile, Williame, lord Levingstoun, Robert, lord Sympill, Laurence, lord Oliphant, Alexander, lord Saltoun, Hew, lord Fraser of Lovett, Henry, lord Sinclair, Andro, lord Stewart of Uchiltre, Allan, lord Cathcart, Williame, lord Borthuik, Patrik, Maister of Gray, Johnne, Maister of Forbes, Robert, commendatare of Dunfermling, secretare to oure soverane lord, Mark, commendatare of Newbottill, Robert, commendatare of Deir, James, commendatar of Pettinweme, Robert, commendatare of Sanct Marie Ile, Alexander, commendatare of Coldinghame, Leonard, abbott of Cowpar, Walter, abbot of Kinloss, Andro, commendatare of Jedburgh, James, commendatare of Sanct Colmis Inche, Alexander, commendatare of Culross, Johnne, Pryour of Portmook, Henry, commendatare of Balmerynocht, Allan, commendatare of Corsraguell, Johnne, commendatare of Sawlsett, Sir Williame Murray of Tulibardin, knycht, comptrollar to oure soverane lord, Maister Williame Baillie, lord Provand, president of the college of justice, Maister James Makgill of Rankelour Nethir, clerk of register, Schir Johnne Bellendene of Auchnowle, knycht, justice clerk, Maister David Borthuik of Lochill, advocat to oure soverane lord, Maister James Haliburtoun, provest of Dunde, Johnne Lokhart, provest of Air, and Johnne Patersoun, provest of Cowpar; comperit ane nobill and michtie lord Coline, erll of Ergyle, lord Campbell and Lorne, for him self and in name and behalf of Dame Annas Keith, countesse of Ergyle and Murray, his spous, and of Elizabeth and Margaret Stewartis, dochteris and airis of umquhile James, erll of Murray, lord Abirnethie, regent for the tyme, presentit, exhibitit and deliverit to the said lord regent, in name and behalf of oure said soverane lord, the jowellis respective underwrittin, that is to say, ane greit 'H' of dyamont, with ane ruby pendand thairat, sex uther jowellis thairof, thre dyamontis and the uther thre rubyis intromettit with and kepit be the said Dame Agnes and hir said spous sen the deceis of the said umquhile Erll of Murray, and that for obeying of the command of the lettres past conforme to ane act of secreit counsale, according to ane act of parliament, ordaning the said lord regent to serche, seik and inbring all oure soverane lordis jowellis to his hienes use quhairevir that mycht be apprehendit, be the quhilkis the said Dame Agnes and hir said spous wer chargeit to deliver the saidis jowellis to the said lord regent; and thairfoir his grace, in name of oure soverane lord, with avise of the said secreit counsale, grantis him to haif ressavit the saidis jowellis fra the said Coline, erll of Ergyle, Dame Agnes Keyth, his spous, the saidis Elizabeth and Margaret Stewartis, dischargeing thame, thair airis, successouris, executouris and assignayis of the same for evir; and for the mair securitie, sall caus this present discharge tobe ratefiit in the nixt parliament, in the best forme, for thair releif thairof.
[A1575/3/2]* [print] [email] [cite] [preceding] [following]
Forsamekill as in the first yeir of oure soverane lordis regnne thair wes ane act maid anent schwithing and bering of culveringis and daggis, contening pane of cutting of the rycht hand of the contravenaris, quhilk act, sen the making thairof, hes tane na executioun throw the troublis and civile weare quhairwith the haill realme hes bene, for the maist part sensyne, inquietit; bot now, althocht God hes restorit peace and quietnes frome all foreyn wearis or civile troublis, yit the wearing, bering and schwithing with culveringis, daggis and fyrewerkis is not left of and forborne, bot rather the unlauchfull use of thame is still hantit and frequentit be all maner of men, throw quhilk hes happynnit divers murthouris and slauchteris of vailyeant and gude men, upoun slendir and licht occasionis, quhilkis utherwayis wer abill anewch to defend thame selffis at sic tymes of tuilye and invasioun; and the regentis grace, nobilitie, estaittis and counsale now convenit, willing to further the executioun of the said act of parliament, and considering that the pane contenit in the same is hard tobe alyke extendit and execute aganis all maner of personis, alsweill for the wering and bering of daggis and culveringis as for schwithing at men thairwith and slaying or hurting of thame; thairfoir ordanis that na maner of persoun or personis, of quhatsumevir estate, degre or conditioun thay be of, beir, weir or use culveringis, daggis, pistolettis or ony sic ingyne of fyrewerk in ony part of this realme, nowithher to burgh nor to land, bot in maner and under the panis respective eftir following: that is to say, it sall not be lefull to beir, weir or use in schwithing or utherwayis the saidis culveringis, daggis, pistolettis or ony sic uther ingyne of fyre werk upoun thair personis or in cumpany with thame oppinlie outwith housis in tyme cuming, under the pane of impresonment of thair personis for yeir and day and farder induring the kingis majestie and his regentis will, togidder with the pane of escheting of the culveringis, daggis or sic uther ingynis of fyre werk to the use and behuif of the juge, executor of the jugement heirefter ordanit. And for executioun heirof, that the offendouris sall not eschape unpuneist, gevis and grantis full power and commissioun, be vertew of this present act, to all schireffis, stewartis, baillies and thair deputtis, lordis of regaliteis and thair baillies, provestis, aldermen and baillies of burrowis, makand thame oure soverane lordis justices in that part, to tak and apprehend the contravenaris heirof being found reidhand, berand or werand the saidis culveringis, daggis, pistolettis or utheris ingynis of fyre werk, and keip thame in ward quhill justice be execute upoun thame, providing the same be done within sic space as be the law and custum is appointit for personis takin reidhand in thift; and the personis delatit for the cryme foirsaid, to charge be precept to find sourtie within sex dayis under the pane of rebellioun and putting of thame to the horne, that thay sall compeir at a particular dyet on xv dayis warning and underly the law thairfoir; and at the day appointit, the personis apprehendit or comperand, be dittay to accuse and put to the knawlege of ane assyise; and gif thay be found culpabill of the cryme foirsaid, to pronunce the said dome of impresonment of yeir and day upoun thame, and according thairto to keip and hald thame impresonit in irnis during the said space. And gif it salhappin the personis chargeit for nonfinding of souirtie to underly the law or as fugitive fra the law tobe denunceit rebellis and put to the horne, that the saidis schireffis, stewartis, baillies and thair deputtis, lordis of regaliteis and thair baillies, provestis, aldirmen and baillies of burrowis, serche, seik, intromet and uptak the saidis rebellis, escheit gudis and geir to oure soverane lordis use and mak compt and payment thairof yeirlie in the chekker; and inlykemaner, serche and seik the personis of the saidis rebellis quhairevir thay may be apprehendit within the boundis of thair jurisdictionis quhill thay be gottin and the effect and pane of this act execute upoun thame. And gif it salhappin ony of the personis convictit not tobe abill to sustene thair awin chargeis during the tyme of thair impresonment, in that caise the saidis schireffis, stewartis, baillies, lordis of regaliteis and thair baillies, provestis, aldermen and baillies of burrowis sall furneis and caus ansuer ilk convictit persoun, not having of his awin quhairon to sustene him self, breid and watter, allowand dalie a pund of ait breid to ilk man, the pryce quhairof salbe allowit to thame in thair comptis at the chekker. Providing that nochtwithstanding this present act or ony thing thairin contenit, it is and salbe lefull to oure soverane lord and his regentis domesticque servandis and gaird to beir, weir and use the saidis culveringis, daggis and pistolettis; as alsua to all his hienes liegis in tymes of oistis, raidis and wapinschawingis, being chargeit thairto be oure soverane lordis authoritie. And siclyke that it be lauchfull to the saidis schireffis, stewartis, baillies and thair deputtis, lordis of regaliteis, provestis, aldirmen and baillies of burrowis, thair deputtis and officeris, to beir, weir and use the saidis culveringis, daggis and pistolettis in sercheing, seking and apprehensioun of the personis of quhatsumevir rebellis, being chargeit thairto be oure soverane lordis lettres and authoritie; and inlykemaner that it be lauchfull to all oure soverane lordis liegis to beir, weir and schwithe with daggis, culveringis and uther fyre werk in the resisting and following of thevis and revaris, steland or awaytakand trew mennis gudis; and inlikemaner that it be lauchfull to all nobill men, gentilmen and utheris, oure soverane lordis liegis, to schute for thair pastyme within thair inver clois and yairdis adjacent thairto in landwart and outwith burrowis and citeis, and likewyis to marinaris and utheris hanting the seyis, being actualie upoun the samyn, for defence of thair bodiis and gudis. And in caise ony personis wering and bering the saidis culveringis, daggis, pistolettis and utheris ingynis of fyre werk willinglie schwithis thairwith at ony man or woman, quhidder the persoun sa schote at be hurt be the said schot or not, in that cais the schwithar, being apprehendit or callit and lauchfullie convictit befoir the justice generall and his deputtis, sall suffer the pane and punisement of befoir ordanit in the said act of parliament: that is to say, the cutting of his rycht hand; and gif the persoun schote at happynnis tobe slayne or mutilat, in that caise to suffer the pane of death thairfoir, as the lawis alreddy maid hes appointit and ordanit. And this act and ordour quhill the nixt parliament or conventioun generall and forder, ay and quhill expres dirogatioun be maid thairto, to induir.
[A1575/3/3]* [print] [email] [cite] [preceding] [following]
The quhilk day comperit Maister Thomas Craig, advocat, in name and behalf of Elizabeth and Margaret Stewartis, lauchfull dochteris and airis of umquhile the nobill and michtie lord James, erll of Murray, lord Abirnethie, uncle to oure soverane lord and regent to his hienes, his realme and liegis for the tyme, of gude memory, and of Dame Agnes Keith, countesse of Ergyle and Murray, his relict and now the spous of the nobill, alsua ane michtie lord Coline, erll of Ergyle, lord Campbell and Lorne (he him self being present for his interes), and exponit and declarit how the said umquhile Erll of Murray, regent, for the singular luif and affectioun quhilk he bure to oure said soverane lord and for the preservatioun of his persoun eftir the murthour of the king, his hienes dearest fader, acceptit the administratioun and regiment of this realme on him in ane maisst difficill and dangerous tyme, during the quhilk, in respect of the greit inobedience and civile weare within the realme quhairby the rentis of the croun wer not weill payit, and yit the charge greit and sumptuous, as alsua of the exhorbitant expensis maid in the realme of England, in defence of oure said soverane lordis authoritie and commoune weill of the realme, the said umquhile lord regent not onelie spendit his awin leving and gudis, sauld and wedset sindry portionis of his heretage, bot alsua contractit greit dett, alsweill within this realme as outwith the same in foreyn cuntreis, besyde the spending of his awin lyff, in the end to the havy losse and skayth of his posteritie and freindis, bot specialie of the said countesse, his relict, and of the saidis Elizabeth and Margaret, his dochteris and airis, quhilkis be occasioun of the said publict service baith wantis the said heretage sauld and wedset as said is, and ar subject to the payment of the saidis debtis and sowmes of money and thair remanent leving quhairunto thay aucht to succeid in dangeare tobe apprysit thairfoir. And seing be decreit of the regentis grace and secreit counsale, with lettres and charges of horning direct thairupoun, the said Dame Agnes Keith and the said Coline, erll of Ergyle, now hir spous, for his interes, ar presentlie compellit to exhibit and deliver to the regentis grace present, in name and behalf of oure said soverane lord, the jowellis underwrittin, thay ar to say: ane greit 'H' of dyamont, with ane rubie pendand thairat, sex uther jowellis thairof, thre dyamontis and the uther thre rubeis, quhilkis wer put in the handis and custody of the said dame Agnes for a releif of hir saidis dochteris of the saidis dettis, expensis and chargeis abonewrittin; thay, nochtwithstanding the present delivery thairof, standing still subject as yit to the payment of the saidis dettis contractit be the said umquhile regent, hir spous and thair fader, in the effairis and service of the croun as said is, of equitie, thay aucht tobe relevit of the same. Quhilk desir and petitioun being hard and understand to the regentis grace, nobilitie, counsale and estaittis present, his grace, be thair advise and consent, ordanis and commandis the said lord chancellair and sic utheris of the previe counsale as salbe present with him to tak consideratioun of the chargeis and expensis maid be the said umquhile Erll of Murray, regent, in the effairis of oure soverane lord during the tyme of his said regiment, and of the dettis contractit be him throw the occasioun of that charge and office, and to gif furth thair declaratioun as they find of the said haill chargeis and dettis agane the nixt parliament or conventioun generall; and as the said lord chancellair and counsall declaris or findis tobe spendit or det contractit be the said lord regent for advanceing of the kingis royall estate and commoune effairis of the realme induring his tyme, the said lord regentis grace, with avise of the haill nobilitie present, thinkis it verie ressonabill that sic gude ordour be tane heiranent as the wyff and bairnis of the said umquhile lord regent now, eftir his departure, sall not be prejugeit and wrakkit be occasioun of his trew service, quhilk wes sa acceptabill to the commoune weill, bot that provisioun be maid for outred, releif and payment of the same as convenientlie may be done and as equitie and gude conscience cravis. And the said lord chancellair hes acceptit the said charge upoun him, with assistance of the rest of the counsale, and sall proceid in the cognitioun and tryell taking of the saidis dettis with all convenient expeditioun.
[A1575/3/4]*[print] [email] [cite] [preceding] [following]
Forsamekill as the iniquitie of this present aige incressis the nowmer of contemptuus offendouris aganis the lawis and actis of parliament, and albeit be divers lovabill actis personis offending in sindry sortis of crymes ar appointit tobe kepit in presoun, or in the stokkis or irnis, be the ordinare jugeis of the realme; yit becaus thair is not commoune presonis, irnis nor stokkis in sindry of the heid burrowis of the schyris, regaliteis and utheris places of jurisdictioun for ressaving and punisement of the saidis offendouris, nor javelouris appointit for keping of the saidis presonis, stokkis and irnis, and ressaving and putting to libertie of the presonaris and offendouris at command and directioun of the ordinar jugeis, according to the effect and meaning of the saidis actis of parliament, quhairthrow the same ar liklie in divers places tobe frustrat of all executioun. For remeid quhairof, the regentis grace, with avise of the estaittis presentlie assemblit, ordanis and commandis all schireffis, stewartis, baillies, lordis of regaliteis and thair baillies, provestis, aldirmen and baillies of burrowis to repair, mend and mak sufficient presonis within the heid burrowis, or maist publict and convenient places within the boundis of thair jurisdictionis, with irnis and stokkis, and to appoint abill and qualifiit personis javelouris for keping and attending thairupoun, betuix and the first day of Julii nixtocum, under the pane of rebellioun and putting of thame to the horne. With certificatioun to thame and thay failye, the said day being bipast, lettres salbe direct simple in ane forme to present thame to the horne, in caise thay failye in fulfilling of the premisis, ten days eftir the charge being bipast.
[A1575/3/5]* [print] [email] [cite] [preceding] [following]
Forsamekill as thair is sindry lovabill actis of parliament maid be oure soverane lordis maist nobill progenitouris for the stanching of maisterfull ydill beggaris, awayputting of sornaris and provisioun for the puyr, bearing that nane salbe tholit to beg, nowther to burgh nor to land, betuix xiiij and lxx yeiris, that sic as makis thame selffis fwlis and ar bairdis or utheris siclyke rynnaris about, being apprehendit, salbe put in the kingis ward or irnis als lang as thay have ony gudis of thair awin to leif on; and fra thay have not quhairupoun to leif of thair awin, that thair earis be nalit to the trone or to ane uther tre and thair earis cuttit of and baneist the cuntre; and gif thairefter that they be fund agane, that thay be hangit. Item, that nane be sufferit to beg bot cruikit folk, seik folk, impotent folk and waik folk. Item, that nane be tholit to beg in ane parrochyin that ar borne in ane uther, that the heidismen of ilk prochyn mak takynnis and gif to the beggarris thairof, that thay be sustenit within the boundis of that parrochyn, and that nane utheris be servit with almous within that parrochyn bot thay that beris that takin allanerlie, as in the actis of parliament maid thairanent at mair lenth is contenit, quhilkis in tyme bigane hes not bene put to dew executioun throw the iniquitie and troublis of the tyme bipast. And be ressoun that thair wes not heirtofoir ane ordour of punisement sa specialie divisit as neid requirit, thairfoir now, for avoiding of the confusioun of sindry lawis and actis concerning the premisis standing in effect and that sum certane executioun and gude ordour may follow heiranent, to the greit pleasure of almichtie God and commoune weill of the realme, it is thocht expedient and ordanit, alsweill for the utter suppressing of the saidis strang and ydill beggaris, sa outragious ennemeis to the commoune weill, as for the cheritabill releving of the aigit and impotent puyr people, that the ordour and forme following be observit quhill the nixt parliament or conventioun generall of the estaittis: that is to say, that all personis being abone the aige of xiiij and within the aige of lxx yeris that heireftir ar declarit and set furth be this act and ordour tobe vagaboundis, strang and ydill beggaris, quhilkis salhappin at ony tyme heireftir, eftir the first day of Junii nixtocum, tobe takin wandering and misordering thame selffis contrary to the effect and meaning of thir presentis salbe apprehendit; upoun thair apprehensioun, be brocht befoir the schireffis, stewartis, baillies or lordis of regaliteis to landwart or thair deputtis, or befoir the provest and baillies within the burgh, and be thame tobe committit in ward in the commoune presoun, stokkis or irnis within thair jurisdictioun, thair tobe kepis unlettin to libertie or upoun band or souirtie quhill thay be put to the knawlege of ane assyise, quhilk salbe done within sex dayis thaireftir. And gif thay happin tobe convicted, tobe adjugeit tobe scurgeit and burnt throw the girssill of the rycht eare with ane het irne of the compasse of ane inche about, the proces quhairof salbe registrat in the court bukis, except sum honest and responsall persoun will, of his cheritie, be contentit than presentlie to act him self befoir the juge to tak and keip in his service the offendour for ane haill yeir nixt following, under the pane of xx lib. to oure soverane lordis use, and to bring the said offendour to the heid court at the yeiris end, or than gude prufe of his death, the clerk taking for the said act, xij d. onelie. And gif the offendour depart and leif the service within the yeir, aganis his will that ressavis him in service, than being apprehendit, he salbe of new presentit to the juge and scourgit and burnt throw the girssill of the eare as is befoir said; quhilk punisement anys ressavit he sall not suffer agane the lyke for the space of lx dayis thaireftir, bot gif at the end of the same lx dayis he be found to have fallin agane in his ydill and vagabound trade of lyff, than, being apprehendit of new, he salbe adjugeit and suffer the panis of death as a theif. And that it may be knawin quhat maner of personis ar meanit tobe ydill and strang beggaris and vagaboundis and worthy of the punisement befoir specifiit, it is declarit that all ydill personis gaying about in ony cuntre of this realme using subtile, crafty and unlauchfull playis, as juglerie fast and lowise, and sic utheris, the ydill people calling thame selffis Egiptianis, or ony uther that senyeis thame to have knawlege in physnomie, palmestre or utheris abused sciencis, quhairby thay perswade the people that thay can tell thair weardis deathis and fortunes and sic uther fantasticall ymaginationis; and all personis being haill and stark in body and abill to wirk, allegeing to have bene hereit in the sowithhland, brint in the lait troubles about Edinburgh and Leith, or allegeing thame tobe benneist for slauchter or utheris wickit deidis, and utheris nowther having land nor maister, nor using ony lauchfull marchandice, craft or occupatioun quhairby to win thair levingis, and can gif na rekning how thay lauchfullie get thair leving, and all menstrallis, sangstaris and taill tellaris not avowit in speciall service be sum of the lordis of parliament or greit barronis or be the heid burrowis and citeis for thair commoune menstrallis, all commoune laubouraris, being personis abill in bodyn, leving ydillie and fleing laubour, all countirfaittaris of licencis to beg, or using of the same knawing thame tobe countirfaitit, all vagaboundis scollaris of the universiteis of Sanctandrois, Glasgow and Abirdene not licencit be the rector and dene of facultie of the universitie to ask almous, all schipmen and marinaris allegeing thame selffis tobe schip brokin, without thay have testimoniallis as is heireftir declarit, salbe takin, adjugeit, demed and puneist as strang beggaris and vagaboundis. And gif ony persoun or personis eftir the said first day of Maii† nixtocum gevis money, herbry or ludgeing, settis housis or schawis ony uther releif to ony vagabound or strang beggar, markit or not markit, wanting a licence of the ordinar juge of that jurisdictioun, the same being dewlie provin at the heid court, thay sall pay sic unlaw to the kingis use as be the juge at the heid court salbe modefiit sa the same exceid not v lib. And alsua gif ony persoun or personis disturbis or lettis the executioun of this act ony maner of wayis, or makis impediment aganis the jugeis and ordinar officiaris or utheris personis travelling for the dew executioun heirof, sall incur the same pane quhilk the vagabound sould have sufferit in caise he had bene convict; providing alwayis that schipmen and suddartis landing in this realme, having licence of the schiref, stewart, baillie, lord of regalitie or provest or baillie or toun quhair thay wer schip brokin or first enterit in the realme, sall and may pas according to the effect of thair licencis to the rowmes quhair thay intend to remane; and that the licencis onelie serve in the jurisdictioun of the gevar, sa that gif the persoun travelling haif further jornay, he procure the lyke licencis of the officiar of the nixt schyre or toun throw quhilk he mon pas, and sa fra schyre to schyre quhill he be at his resting place. And that thair be certane personis, ane or ma, nominat in every paroche be the schireffis, stewartis, baillies, lordis of regaliteis, thair baillies, provestis, aldirmen and baillies of burrowis and utheris ordinar jugeis for sercheing, ressaving and convoying of the vagaboundis to the common presoun and jugeis of the schyre, toun or place upoun the commoune charge of the parrochyn, quhilkis personis sa electit salbe haldin to do thair dewiteis diligentlie as the saidis jugeis ordinar will ansuer thairupoun. And sen cheritie wald that the puyr, aigit and impotent personis sould be als necessarlie providit for as the vagaboundis and strang beggaris ar repressit, and that the aigit, impotent and puyr people sould have ludgeing and abyding places throuchout the realme to settill thame selffis intill, that thay sould not neid heireftir to beg or wander about to the sklander of a Cristiane commoune welth that hes ressavit the evangell, it is thairfoir thocht expedient that the eldaris and deaconis in everie citie, burgh and gude toun, and the heidismen of ilk parrochyn to landwart, sall betuix and the said first day of Maii nixtocum tak inquisitioun of all aigit, puyr, impotent and decayed personis borne within that prochyn or quhilkis wer dwelling and had thair maist commoune resort in the said parroche the last sevin yeris bipast, quhilkis of necessitie mon leif be almous; and upoun the said inquisitioun, sall mak a register buke contening thair names and surenames to remane with the eldaris and deaconis or heidismen of the prochyn to landwart; and the nowmer of the puyr people of every parrochyn being this knawin, to provyde, with avise of the parrochynnaris quhair thay may best be ludgeit and abyde, and thairupoun, according to the nowmer, to considder quhat thair neidfull sustentatioun will extend to in the owlk; and than, be thair gude discretionis, taxt and stent the haill inhabitantis within the parrochyn according to the estimatioun of thair substance, without exceptioun of personis, to sic oulklie charge and contributioun as salbe thocht sufficient to sustene the saidis puyr people; and the names of the inhabitantis stentit togidder with thair taxatioun tobe likewyis registrat; and that at thair discretioun thay appoint the deaconis, ane or ma, or quhair they ar not collectouris for ane haill yeir, for collecting and ressaving of the said oulklie portioun, quhilk sall ressave the same and deliver samekill thairof to the saidis puyr people and in sic maner as the saidis eldaris or heidismen in the parrochynnis to landwart respective sall ordane and command; and the deaconis or sic uther owersearis of the saidis puyr people as salbe appointit to thair discretionis to continew also for a yeir, and at the end of the yeir that alsua the taxatioun and stent roll be alwayis maid of new for the alteratioun that may be, throw deith or the incres or diminitioun of mennis gudis and substance. And that the eldaris in citeis, burrowis and gude townis, and heidismen of the parrochynnis to landwart, sall gif a testimoniall to sic puyr folk as thay find not borne in thair awin parrochyn, sending or directing thame to the nixt parrochyn, and sa frome parrochyn to parrochyn quhill thay be at the place quhair thay wer borne or had thair maist commoune resort and residence during the last sevin yeris preceding, thair tobe put in certane abyding places and sustenit upoun the commoune almous and oulklie contribute as is befoir ordanit, except leprous people and bedfast people quhilkis may not be transportit, providing that it be lefull to the puyr people sa directit to thair awin abyding places to ask almous in thair passage sa as that thay pas the direct way, not resting twa nychtis togidder in ony ane place without occasioun of seiknes or storme impeid thame; and gif ony of the puyr people refuisis to pas and byde in the places appointit, or eftir the appointment be found begging, than tobe puneist be scurgeing, impresonment and birning throw the eare as vagaboundis and strang beggaris; and for the secund falt tobe puneist for thevis, as is befoir appointit. And gif the personis chosin collectouris refuisis the office, or, having acceptit the same, beis fund negligent thairin, or refuis to mak thair comptis every half yeir anys at leist to the eldaris and heidismen of the parrochynnis as is befoir specifiit, and to deliver the superplus of that quhilk restis in thair handis at the end of the yeir to sic as is chosin collectouris of new, than ilkane of the saidis collectouris sa offending sall incur the pane of xx lib., tobe recoverit on him befoir quhatsumevir jugeis to the use of the puyr of that parrochyn and impresonment of thair personis during the kingis will. And gif ony personis being abill to further this charitabill werk will obstinatlie refuis to contribute to the releif of the puyr or discourage utheris frome sa charitabill a deid, the said obstinat or wilfull persoun being callit befoir the ordinar juge of the schyre, toun or place and convict thairof be ane assyise or sufficient testimony of twa honest and famous men, his nychtbouris, he salbe committit to ward and thair remane quhill he be content with the ordour of his awin parroche and performe the same in deid. And gif the aigit and impotent personis not being sa diseased, lame or impotent, bot that thay may wirk in sum maner of werk, salbe be the deaconis and owersearis appointit to werk refuis the same, than first tobe scourgit and put in the stokkis; and for the secund falt, tobe puneist as vagaboundis as said is. And gif ony beggaris barne, being abone the aige of fyve yeris and within xiiij, maill or famell, salbe lykit of be ony subject of the realme of honest estate, the said persoun salhaif the barne be ordoure and directioun of the ordinar jugeis bund with him, gif he be a man chyld to the aige of xxiiij yeris and gif scho be a woman chyld to the aige of xviij yeris; and gif thay depart or be takin or entysed frome thair maister or maistres service, the maister or maistres to have the lyke actioun and remedy as for thair feit servand and prenteis, alsweill aganis the barne as aganis the takar or entyser thairof. And quhair collecting of money can not be had and that it is ower greit a burding to the collectouris to gadder victuallis, meit and drink or uther thingis for releif of the puyr in sum parrochynnis, that the eldaris or heidismen of the parrochyn gif licence, under thair hand writtis conjunctlie, to sic and samony of the said puyr people, or sic utheris for thame as thay sall think gude, to ask and gadder the cheritabill almous of the parrochynnaris at thair awin housis, sa as alwayis it be specialie aggreit and appointit how the puyr of that parrochyn salbe sustenit within the same and not tobe chargeabill to utheris nor found troubilsum to strangearis. And that na Irische and Hieland bairdis and beggaris be brocht and ressavit in the lawland be boittis or utherwayis, under the pane of xx lib. of the bringaris; and gif ony be alreddy brocht, thay salbe convoyit agane to the nixt port, neir quhair thay wer landit or neir the same, and frome that transportit at the commoune charge of the cuntre quhair thay wer set on land to the partis thay come fra. And seing be ressoun of this present act and ordour the commoune presonis, irnis and stokkis of every heid burgh of the schyre and utheris townis ar lyke tobe filled with a greittar nowmer of presonaris than of befoir hes bene accustumat, insafar as the saidis vagaboundis and utheris offendouris ar tobe committit to the commoune presoun of the schyre or toun quhair thay wer takin, the same presonis being in sic townis quhair thair is greit nowmer of puyr people, mair nor thay ar weill abill to sustene and releif, and swa the presonaris ar lyke to pereis in defalt of sustenance, thairfoir the expensis of the presonar salbe payit be a part of the commoune distributioun and oulklie almous of the prochyn quhair he was apprehendit, allowand to him dalie ane pund of ait breid and watter to drink; for payment quhairof, the presentar of him to presoun sall gif suirtie or mak present payment. And the present act and ordour quhill the nixt conventioun or parliament to indure, that than it may be considerit quhat is further requisite tobe providit for in this behalf or gif ony thing heir ordanit sall than appeir unproffittabill, superfluous or worthy tobe changeit, and further ay and quhill expres dirogatioun be maid thairto. And that lettres be direct for publicatioun and executioun heirof in forme as efferis.
[A1575/3/6]* [print] [email] [cite] [preceding] [following]
Forsamekill as the present estate of the kirk within this realme being considerit be my lord regentis grace and estaittis now convenit, and how sen the alteratioun of religioun albeit the libertie of the evangell hes bene enjoyit in unitie of doctrine, yit is thair not to this day ony perfyte policie be lawis and constitutionis set out how the kirk in all degreis salbe governit in decent and cumly ordour, quhairthrow sindry inconvenientis hes followit and ma ar lyke to occur heireftir, gif tymous remeid be not providit. The estaittis, finding it impossibill that thay can byde togidder quhill this mater can be exactlie avysit on and put in forme, hes thairfoir thocht meit and concludit that Johnne, lord Glammys, chancellair, James, archebischop of Glasgow, Adam, bischop of Orknay, Robert, commendatare of Dunfermling, Mark, commendatare of Newbottill, Robert, commendatare of Deir, James, commendatare of Pettinweme, Maister James Makgill of Rankelour Nethir, clerk of register, Schir Johnne Bellendene of Auchnoule, knycht, justice clerk, Maister David Borthuik of Lochill, advocat to oure soverane lord, Johnne Erskin of Dwn, superintendent of Angus, Maister Johnne Winrame, commendatare of Portmook, Maister Johnne Spottiswod, superintendent of Lowithhiane, Maister Alexander Arbuthnot, principall of the college of Abirdene, Maister James Lowsoun, minister of Edinburgh, and Maister David Lindesay, minister of Leyth, sall tak the panis to convene, confer, ressoun and put in forme the ecclesiasticall policie and ordour of the governing of the kirk as thay sall find maist aggreabill to the trewth of Goddis word and maist convenient for the estate and people of this realme. Quhilkis personis, being for the maist part present, for the gude will thay beir to the avancement of Goddis glory, the kingis obedience and commoune weill of the realme, wer content to bestow thair panis for this effect, and to begin thair werk on Mononday the xiiij day of Marche instant, in sic part of the palice of Haliruidhous as my lord regentis grace will appoint thame to convene in; and swa to continew and abyde togidder frome day to day quhill thay have anys drawin a forme of the said ecclesiasticall policie, quhilk being endit, it salbe reportit and schawin to the estaittis at the nixt conventioun, to the effect that than, be thair advise, a parliament may be appointit and in the same the forme quhilk salbe drawin or samekill thairof as salbe found meit tobe ratifiit and establissit as a law.
[A1575/3/7]* [print] [email] [cite] [preceding] [following]
My lord regentis grace and estaittis presentlie convenit, understanding the harme quhilk this commoune weill sustenis throw want of a perfyte writtin law, quhairupoun all jugeis may knaw how to proceid and decerne, thairfoir it is thocht convenient and concludit that thir personis following: thay ar to say, Johnne, lord Glammis, chancellair, Williame, lord Ruthvene, thesaurare, Robert, lord Boyd, Johnne, lord Hereis, James, commendatare of Pettinweme, Maister Williame Baillie, lord Provand, president of the college of justice, Maister James Haliburtoun, provest of Dunde, Maister Michaell Cheisholme, burges of Edinburgh, and Johnne Patersoun, provest of Cowper, sall convene togidder in Edinburgh upoun the tent day of Apryle nixtocum, and thair, calling unto thame sic utheris of the lordis of the sessioun or advocattis as thay sall think expedient, sall begin and visite the bukis of the law, actis of parliament and decisionis befoir the sessioun and draw the forme of the body of oure lawis, alsweill of that quhilk is alreddy statute as thay thingis that wer meit and convenient tobe statute, that the same, being reportit agane to the estaittis, it or samekill thairof as salbe found gude and allowabill may be ratifiit and establissit in parliament, quhairthrow thair may be ane certain writtin law to all oure soverane lordis jugeis and ministeris of law to juge and decyde be.
[A1575/3/8]* [print] [email] [cite] [preceding] [following]
Anent the propositioun twicheing the povertie of the croun and how unabill it is upoun the present rentis thairof to sustene evin now the estait of oure soverane lord and publict chargeis of the realme, mekill les to beir out his majesteis estait and expense at his mair mature and perfyte aige; and thairfoir, calling to remembeance quhat hes bene the forme observit be oure soverane lordis maist nobill progenitouris in tymes bigane quhen sic caisis occurrit, and considdering the effectis and meaning of sindry actis of parliament bearing that the landis, castellis and rentis annext to the croun may not be gevin in fe and heretage away in franktenement to ony persoun, of quhatsumevir estate or degre that evir he be, but avise, deliverance and decreit of the haill parliament; and for greit seand and ressonabill causis concerning the weilfair of the realme first tobe avysit and digestlie considerit be the haill estaittis, and gif it happynnis the king to annallie or dispone upoun the lordschippis and castellis annext to the croun, as is befoir said, that alienatioun or dispositioun tobe of nane avale, and that it is lefull for the king being for the tyme to ressave thay landis quhenevir him lykis, to his awin use, but ony proces of law, and the takaris to redound all proffeittis that thay have takin up of thay landis agane to the king for all the tyme that thay have thame. The regentis grace, nobilitie and estaittis convenit, eftir lang ressoning and mature deliberatioun, ordanis and commandis oure soverane lordis comptrollar and advocat to considder quhat partis of the landis annext to the croun, or that wer in the handis and possessit be umquhile King James the Ferd and King James the Fyft of worthy memory, the tyme of thair deceis, or ather of thame, ar annaliit, disponit in heretage few or franktenement, in dimunitioun of the rentall; and to libell and caus execute summondis aganis the possessouris of sic landis, to compeir befoir the estaittis of the nixt parliament to heir it be declarit be decreit and sensiament of parliament that oure soverane lord may put to his handis and ressave thay landis agane to his awin use quhen evir him lykis, but ony proces of law; and the takaris and possessouris to heir thame decernit to redound all proffeittis that thay have takin of the same landis agane to his hienes for all the tyme that thay have had thame according to the privilege of his hienes croun and actis of parliament abonespecifiit maid thairanent, as the saidis comptrollar and advocat will ansuer to oure soverane upoun the dewitie of thair offices and diligence.
[A1575/3/9]* [print] [email] [cite] [preceding] [following]
Forsamekle as amangis the overtures maid for releif and supple of the present povirtie of the croun, mention wes maid of the thridis of the benefices first grantit and takin up be ordour and directioun of ane act of the secreit counsall in the regnne of the quene, our soverane lordis moder, for support of the prince in interteneing and setting fordwart the commoune effairis of the cuntre and the ressonabill sustentatioun of the ministerie, quhilk continewit quhill the parliament haldin in the first yeir of oure soverane lordis regnne, that the thridis wer first ordanit tobe payit to the ministeris and the rest and superplus tobe applyit to oure soverane lordis use; according to the quhilk, albeit the ministeris had nevir sa large stipendis nor sa certane payment and gude assignationis of the first and reddiest of the saidis thridis, yit is not the superplus cuming to the kingis use and commoditie that thing quhilk men takis tobe, and is not had, without murmour, as thocht na part of the saidis thridis had bene gevin or grantit for support of the prince, for the intertenyment of the publict chargeis and effairis of the realme. Quhilk mater being ressonit and maturelie deliberat upoun, it is thocht expedient and concludit that the thridis of the haill benefices salbe chargeit for and takin up to the effect for quhilk thay wer grantit and in maner as thay ar presentlie, quhill further ordour and resolutioun be takin thairanent in the constitutioun and establissing of the ecclesiasticall policie be the haill estaittis in parliament.
[A1575/3/10]* [print] [email] [cite] [preceding] [following]
Forsamekle as the regentis grace, nobilitie and estaittis convenit hes considerit that the nunreis ar not meit tobe conferrit and gevin to wemen according to the first fundationis in tyme of ignorance; as alsua that the conventis fundat in abbayis decayis and ar not necessar tobe haldin up and restorit as a necessar vocatioun in a Christiane commoune welth; quhairfoir, and in consideratioun of the present intentioun to constitute and estableis a godly and decent ecclesiasticall polecy for ordering and governing of the kirk within this realme, and that na thing quhilk mycht hinder the same wald be done in the menetyme, it is thocht convenient and concludit that the saidis nunreis and utheris abbayis or pryoreis now vacand, or that heireftir happynnis to vaik, sall not be disponit or gevin in titill to ony maner of persoun or personis, bot remane still vacand quhill the constitutioun and establissing of the said ecclesiasticall polecie, providing that the same be performit and done betuix and the feist of Pasche in the yeir of God jM vC lxxvj yeris.
[A1575/3/11]* [print] [email] [cite] [preceding] [following]
The quhilk day, it wes exponit and declarit be the regentis grace to the nobilitie and estaittis convenit, how, nochtwithstanding the proclamatioun maid for keping of gude ordour and that nane sould invaid utheris, owther for auld feid or now, yit wer Johnne Craufurd of the Schaw and his sone, his grace domesticque servandis, invadit under silence of nycht as thay past furth of the palice of Halyruidhous to thair beddis be the Maister of Uchiltre and his complices, in heich contemptioun of the lawis and proclamatioun maid thairanent, requiring the advise of the nobilitie and estaittis twicheing the punisement thairof; quhilkis, be thair publict votes, declarit the offence maist worthy of punisement and willit oure soverane lordis advocat, being present, to call the said Maister of Uchiltre and his complices to underly the law thairfoir and to insist to the persute, that the said offence may be puneist as the same justlie deservis.
[A1575/3/12]*[print] [email] [cite] [preceding] [following]
Forsamekle as it as maist requisite that in tyme of peace provisioun be maid and cair takin for the weare quhen at Goddis pleasure it may happin, and considdering that thair is diverse gude and lovabill actis of parliament maid and set out be oure soverane lordis maist nobill progenitouris, and specialie be King James the Fyft, his hienes guidschir of worthy memory, anent wapinschawingis tobe twyise in the yeir, the maner of harnes, wappynnis and armour, of armour conforme to every mannis rent and substance, that all personis present in wapinschawingis be writtin with the maner of thair armour, and towart the premonitioun of wapinschawingis and sindry utheris ordouris tending to the preparatioun for weir and defence of the realme, quhilkis of a lang tyme bigane hes not bene dewlie observit and put to executioun to the greit hurt and prejudice of the commoune weill. Thairfoir the regentis grace and estaittis assemblit at this present conventioun, understanding it tobe neidfull that the saidis wapinschawingis be kepit according to the intent and meaning of the saidis actis of parliament, ordanis and commandis that wapinschawingis be kepit throw all the realme at twa tymes in the yeir, that is to say, the xx day of Julii and the tent day of October, and tobe all attanys on ane day, to the effect that nane salbe furneist with the armour or wappynnis of thair nychtbouris, bot to have of thair awin; and that the schireffis, stewartis, baillies, lordis of regaliteis or thair baillies, provestis, aldirmen and baillies of burrowis proclame the saidis wapinschawingis tobe haldin and convenit within the places of thair jurisdictionis respective usit and wount, upoun xl dayis warning, commanding all oure soverane lordis liegis to compeir at the places appointit, first the said xx day of Julii nixtocum and thaireftir the said tent day of October and swa furth yeirlie in tyme cuming. And because it is understand that the wappynnis and harnes specifiit in the said actis of parliament, and aggreabill to this present aige and tyme as is heireftir declarit, can not universallie be had at the said first wapinschawing, thairfoir it is dispensit that thay may mak thair schawingis and musteris the said first day with sic armour, wappynnis and harnes as thay haif, or may convenientlie get, provyding alwayis that at the nixt wapinschawing thaireftir thay be furneist and bodin with armour and wapynnis as is heireftir expremit, viz: every nobill man, sic as erll, lord, knycht and barroun, and every landit man havand thre hundrith mark of yeirlie rent or abone, be enarmit in harnes, licht or havy as thay pleis, and horsit according to thair honour and estait; and that all utheris of lawer rent and degre have brigantinis, jakkis, steilbonettis, slevis of plait or mailye, swerdis, pikkis, or speris of sex elnis lang, culveringis, halbertis or twa handit swerdis; and in the hielandis, habirschonis, steilbonettis, hektonis, swerdis, bowis and dorlochis, culveringis, under the pane every landit man not enarmit as said is of v lib., every gentilman unlandit or substantious yeman xl s., and every commoune yeman xx s.; and that every erll, lord, barroun, landit men and utheris maisteris of ony men cumand to the saidis wapinschawingis, gif in bill reddelie writtin afoir hand to the schiref, stewart, baillie, lord or baillie of regalitie, the nowmer and names of the personis that cumis with thame thairto and how thay ar enarmit, and haif the men reddy tobe schawin, comptrollit according thairto, and that the provestis and baillies within burrowis note the names thame selffis, and that the haill names and maner of amour and wapynnis be rollit in bukis and send seillit and subscrivit to the regentis grace, tobe kepit and considerit be quhome his grace sall pleis gif the cure thairof unto, within the space of xl dayis eftir the wapinschawingis, under the pane of ane hundrith markis of every schiref, stewart, baillie, lord or baillie of regalitie, or provestis and baillies within burgh that failyeis heirin. And in respect that all the saidis wapinschawingis ower the haill realme ar thocht meit for the first to be upoun ane day, quhairthrow particular commissionaris can not be directit to every severall rowme to concur and assist with the ordinar jugeis and officiaris in ressaving of the musteris of the men cuming to the saidis wapinschawingis, thairfoir oure soverane lord, with avise of the nobilitie and estaittis present, hes ordanit and appointit the personis eftirspecifiit tobe commissionaris with the schireffis, stewartis, baillies and utheris ordinar jugeis to burgh and to land in the ressaving of the saidis musteris: that is to say, Williame Hendirssoun, Dingwall pursevant, within the boundis of Orknay and Zeitland, with the schireff thairof or his deputtis; the musteris of the cuntreis of Caithnes and Strathnaverne tobe takin within the boundis thairof be commissioun of the schiref principall of Invernes, and siclyk within the boundis of Sutherland, the haill remanent mayn land of the said schirefdome of Invernes at the heid burgh of the schyre, and Hew, lord Fraser of Lovett tobe commissionar with the schiref principall or his deputtis; every ile to keip wapinschaw and mak musteris within the self the said day; within the schirefdome of Narne, Hucheoun Ross of Kilrawak, with the schiref principall or his deputtis; within the schirefdome of Elgin and Fores, the bischop of Murrayis baillie of his regalitie of Spynie, with the schiref principall or his deputtis; within the schirefdome of Banff, George Ogilvy of Dunlugus, with the schiref principall or his deputtis; within the schirefdome of Abirdene, [...], with the schiref principall or his deputtis; within the schirefdome of Kincardin, Johnne Strathauchin of Thorntoun, with the schiref principall or his deputtis; within the schirefdome of Forfair, Johnne, lord Glammis, chancellair, or Robert, erll of Buchane, or ayther of thame, with the schiref principall or his deputtis; within the schirefdome of Perth, Johnne, erll of Atholl, and Johnne, erll of Montrois, or ather of thame, with the schiref principall or his deputtis; within the stewartrie of Stratherne, William Murray of Tulibardin, knycht, comptrollar to oure soverane lord, with the stewart principall or his deputtis; within the boundis of the cuntre of Menteith, alsweill the stewartrie as outwith the same, Williame, erll of Menteith, with the stewart or his deputtis; within the schirefdome of Striveling, Williame, lord Levingstoun, with the schiref principall or his deputtis; within the schirefdomes of Fyff, Kinross and Clakmannane, tobe musterit togidder as use and wount wes of auld, Andro, erll of Rothes, Patrik, lord Lindesay of the Byris, Williame Dowglas of Lochlevin and Johnne Menteith of Kerss; within the schirefdome of Linlythquow, George Dundas of that Ilk, with the schiref principall or his deputtis; within the schirefdome of Edinburgh principall, Williame, lord Borthuik and Williame Lawder of Haltoun, with the schiref principall or his deputtis; within the schirefdome of Edinburgh and constabularie of Hadingtoun, Williame, lord Hay of Yeistir and Johnne Cokburne of Ormistoun, with the schiref principall or his deputtis; within the schirefdome of Berwik, Schir James Hwme of Coldenknowis, knycht, and George Hwme of Wedderburne, with the schiref principall or his deputtis; within the schirefdome of Roxburgh, Williame Ker, youngar, of Cesfurde and Watt Scott of Goldelandis, with the schiref principall or his deputtis; within the schirefdome of Selkirk, James Hoppringill of Quhytebank, with the schiref principall or his deputtis; within the schirefdome of Peblis, Johnne Stewart of Tracquair and Johnne Twedy, tutour of Drummelyeart, with the schiref principall or his deputtis; within the schirefdome of Lanark, Hew, lord Somervile, Schir James Hamiltoun of Craufurd Johnne, knycht, Johnne Carmichaell, eldar, of that Ilk and Robert Lindesay of Dunrod, with the schiref principall or his deputtis; within the schirefdome of Dunbartane, Johnne Cunynghame of Drumquhassill and George Buchannane of that Ilk, with the schiref principall or his deputtis; within the schirefdome of Tarbert, James Campbell of Ardinglas and Dowgall Campbell of Auchinbrek, with the schiref principall or his deputtis; within the schirefdome of Renfrew, James, lord Ross of Hakket and Patrik Houstoun of that Ilk, with the schiref principall or his deputtis; within the baillierie of Cunynghame, Williame, erll of Glencarne and Robert, lord Boyd, with the baillie principall or his deputtis; within the schirefdome of Air and baillierie of Kylestewart, Mathow Campbell of Lowdoun, knycht, schiref of Air, Johnne Wallace of Cragy and George Craufurd of Lefnoreis; within the baillierie of Carrik, Thomas Kennedy of Bargany and Johnne Kennedy of Blairquhan, with the baillie principall or his deputtis; within the schirefdome of Wigtoun, Alexander Stewart of Garleis and [...] MacDowell of Garthland, with the schiref principall or his deputtis; within the stewartrie of Kirkcudbrycht, Johnne Gordoun of Lochinvar, with the stewart principall or his deputtis; within the schirefdome of Drumfreis, Johnne, lord Hereis and James Dowglas of Drumlangrig, knycht, with the schiref principall or his deputtis; within the boundis of the stewartrie of Annanderdaill, Alexander Jarden of Apilgirth and Charles Murray of Cokpule, with the stewart principall or his deputtis; and that lettres be direct for publicatioun heirof be oppin proclamatioun at the mercat croces of the heid burrowis of the schyris of this realme and utheris places neidfull, commanding and chargeing all and sindry oure soverane lordis liegis to prepair and mak thame selffis in reddines with armour and wappynnis aganis the saidis wappinschawingis, and that thay, and every ane of thame, be present thairat under the pane abonespecifiit tobe poindit and distrenyeit for be the jugeis and ordinar officiaris and inbrocht to oure soverane lordis use; commanding alsua all and sindry the nobill men, baronis and utheris abonewrittin, nominat and appointit commissionaris, that thay and every ane of thame await upoun the saidis wapinschawingis and ressaving of the saidis musteris the said day, as thay will ansuer to oure soverane lord upoun thair obedience at thair uttirmaist charge and perrell.
[A1575/3/13]* [print] [email] [cite] [preceding] [following]
The regentis grace and estaittis assemblit at this present conventioun, havand consideratioun of the greit inconvenientis that now procedis amangis oure soverane lordis liegis, in defalt of victuallis and all uther merchandice and gudis that is put to derth and rasit and put to exhorbitant pryces, and haldin and abstractit fra marcattis throw occasioun of greit quantitie of fals countirfaitit money, plakkis and lyonis, utherwayis callit hardheidis, strikkin in cunye in the tyme of the governament of the quene drowarier and regent, oure soverane lordis gudame of gude memory; as alsua of fals cunyeouris, not allanerlie within this realme bot outwith the samyn, sa subtillie and in sic forme of mettall that it is verie hard to the ignorantis to decerne and knaw the trew fra the fals. Thairfoir the regentis grace, with the mature advise and deliberatioun of the estaittis presentlie convenit for the weill of oure soverane lordis liegis, eschewing of derth and mony uther inconvenientis, hes ordanit and ordanis the saidis new plakkis last cunyeit to have cours and passage amangis all oure soverane lordis liegis in tyme cuming eftir this present proclamatioun, for twa penneis the pece, and all the saidis lyonis, utherwayis callit hardheidis, for ane penny the pece, and that nane of our soverane lordis liegis salbe haldin to ressave the saidis plakkis and hardheidis eftir this present proclamatioun of ony derare avale and pryce nor is abonespecifiit. Attour, becaus it is weill knawin that the greittast part of the saidis plakkis and hardheidis now passing in this realme ar, and hes bene, adulterat, fals and countirfait, alsweill within this realme as without, quhilkis being the cheif occasioun of derth ar, be act of parliament maid of befoir, ordanit tobe clippit, thairfoir ordanis and commandis all personis, havaris of the saidis new plakkis and hardheidis in thair handis, to bring or send the same to oure soverane lordis cunyehous to Johnne Carmichaell, wardane thairof, tobe sene and considerit be him, James Gray, sinkar, Johnne Hart and Nicholl Sym, appointit visitouris thairof, or ony ane of thame, with the said Johnne Carmichaell, betuix the dait heirof and the xx day of November nixtocum, to the effect that sic as thay find fals and countirfait may be instantlie clippit doun and put in a cloise lokkit coffer, upoun compt and inventure of the quantitie ressavit fra every persoun; and sic of the same money as beis fund of the lauchfull and trew cunye of this realme tobe thus markit [...]† be the said James Gray and deliverit agane to the awnar, quhilkis plakkis and hardheidis sa markit salhaif cours and passage thaireftir for the avale and pryces abonewrittin, but ony stop or contradictioun. With certificatioun that sic of the new plakkis and hardheidis as sall not be visite and in this sort markit betuix and the said day sall na wayis have cours or passage thaireftir amangis oure soverane lordis liegis, bot the personis quhatsumevir with quhome thay salbe found thaireftir unmarkit salbe persewit and punissit as wilfull outputtaris and changearis of fals and corrupt money, according to the lawis of this realme.
[A1575/3/14]* [print] [email] [cite] [preceding] [following]
Forsamekill as the small salt maid within this realme rysing to greit and exorbitant pryces, be act of the last parliament it wes statute and ordanit that na small salt sould be transportit furth of this realme at ony tyme thaireftir, at the leist for the space of thre yeris eftir the dait of the said act, under the pane of confiscatioun of the salt, as alsua of the schippis, veschellis and utheris movabill gudis of the personis, transportaris thairof, as the act of parliament maid thairupoun at mair lenth beris; quhilk thaireftir, upoun certane offeris, wes for a tyme dispensit with and licencis grantit to transport salt, on conditioun that the cuntre sould be sufficientlie servit and ansuerit upoun certane ressonabill pryces aggreit on; bot the dispensatioun being thaireftir found prejudiciall to the commoune weill of the realme, the conditionis for serving of the cuntre not being observit, the same dispensatioun wes thaireftir restrenit; and yit it being fund that the said restraint brocht sum hurt and inconvenient with it, the pan maisteris and laubouraris of the salt lamenting how, in hoip of libertie to transport and sell thair salt in foreyn cuntreis, thay had biggit mony ma salt pannis and set mony ma servandis to werk nor heirtofoir thay wer accustumat to do quhen thay onelie travellit to serve the realme it self, quhilke personis and chargeis thay ar not abill to interteny and sustene gif thay salbe constranit to sell the haill salt maid be thame upoun the saidis small pryces, the present derth of all thingis considerit; thairfoir, to the effect that bayth the cuntre mycht be servit of salt upoun ressonabill pryces and that the pan maisteris and laubouraris of the said salt sould not be hinderit of sic commoditie as God mycht send of thair lauchfull laubouris, upoun the humble offer and aggrement of certane of the saidis pan maisteris maid in the moneth of December lastbipast, the regentis grace, with avise of the lordis of secreit counsale present for the tyme, ordanit of every gangand pan thre bollis tobe deliverit oulklie to sic persoun as sould have commissioun to ressave the same to the furnissing of the cuntre, for x s. the boll, under the pane for every boll of salt that sould not be oulklie deliverit of ane laid tobe intromettit with and uptakin thairfoir; quhilk ordour wes appointit to continew quhill this present conventioun of the nobilitie and estaittis, that it mycht be considerit quhidder the ordour than aggreit unto wer expedient for the commoune weill langar to continew or not. And now the saidis pan maisteris and laubouraris meaning thame of new to the regentis grace, nobilitie, counsale and estaittis presentlie assemblit, how havy and skaythfull it is to thame to have the haill salt maid be thame restrenit within the realme, and how impossibill it is to furneis the realme it self on a law pryce gif thay sall not have libertie to transport the remanent furth of the realme, seing God hes now offerit the commoditie of ressonabill pryces tobe had thairfoir in foreyn cuntreis, quhairby the losse of the uther may be upset; and to perswade the same, schew thair oulklie comptis of expensis far greittar nor it had wount to be in servandis feis and wageis, derth of coillis, irne and horsmeit; quhairwith the regentis grace, nobilitie, counsale and estaittis foirsaidis, being ryplie avisit and willing to provyde how the realme within the self salbe sufficientlie servit of salt, and thairwithall that the laubouraris sall not be frustrat of the commoditie now offerit be transporting of the remanent, ordanis that of every gangand pan within this realme, sex bollis of salt salbe oulklie deliverit to the collectour tobe appointit be oure soverane lordis commissioun for furnissing of oure soverane lordis liegis within the realme, and that of the reddiest and first end of the haill salt maid in the pan, alsweill dew to the pan maisteris as saltaris, at x s. viij d. the boll, under the pane of thre bollis for every boll of salt that beis not oulklie deliverit in maner and to the effect foirsaid, tobe instantlie intromettit with and uptakin be the said collectour tobe appointit in every place, with power to him to poind and distrenye thairfoir without calling or proces of law preceding, and the same to inbring and mak compt of to oure soverane lordis use as a pane without ony money tobe deliverit thairfoir. Of the quhilk salt tobe ressavit in maner foirsaid, the inhabitantis of the realme, alsweill cadgearis and utheris for serving of the cuntreis to landwart on the sowithh partis as boittis for the north cuntreis, salbe reddelie ansuerit and servit be ordour and directioun of the said collectour tobe depute to ressave the same fra the pannis, for xj s. the boll, quhill the first day of Februare in the yeir of God jM vC lxxv yeris, that than it may be considerit quhiddir the ordour now appointit be expedient and for the commoune weill langar to continew in that state or not. And to the effect that the premisis may tak executioun universallie in all partis quhair salt is maid, ordanis lettres tobe direct chargeing all and sindry our soverane lordis liegis that nane of thame tak upoun hand to transport or cary ony maner of salt out of this realme without oure soverane lordis licence in writt first obtenit to that effect under the signet and subscriptioun of the regentis grace, nor having obtenit the saidis licencis tak upoun hand to by, ladin or transport ony salt out of ony places, bot onelie of sic rowmes as first hes acceptit the conditionis of the present ordour and found souirtie for observatioun and performance thairof, under the panis abonewrittin contenit in the said lait act of parliament maid aganis the careing of salt furth of the realme: that is to say, every severall toun, part or place quhair salt is maid sall send ane or twa personis authorizit be commissioun in writt of the haill pan maisteris of that rowme, and being actit in the bukis of secreit counsale for delivering of sex bollis of salt oulklie of every gangand pan at command and directioun of the collectour to the furnissing of the inhabitantis of the realme within the self, under the said pane of thre bollis for every boll that salbe refusit and not deliverit oulklie upoun requisitioun as said is, to oure soverane lordis use, and that thay ar content and consentis renunceand thair awin jurisdictioun and privilege quhatsumevir in the cais that the saidis collectouris sall instantlie, upoun ony sic refuis, intromet and uptak the said pane of thre bollis for every boll refusit as said is, without ony calling or proces of law; and in caise thay happin to deforce him thairin, to incur thairby the pane of escheting of all thair movabill gudis in the rialtie, the haill to oure soverane lordis use, and within regalitie the twa part to his hienes use and the thrid part to the use of the lord of regalitie, without preiudice of thair full rycht and privilege of escheit in uther caisis occurring within thair jurisdictionis; quhairanent the saidis lordis of regaliteis, being present in this cais, willinglie wer content to dispens quhill the said day, to the effect that the present ordour may the rather tak full effect and executioun without exceptioun or brek in respect of privilege, and that the saidis collectouris be solempnitlie sworne and find sufficient cautioun actit in the saidis bukis of secreit counsale that thay sall trewlie and diligentlie use and execute thair charge in the premisis and mak just compt every thre monethis, anis or oftar as thay salbe requirit, of the salt alsweill ressavit and gevin out to the furnissing of the realme within the self as schippit and past out of the same upoun the licencis tobe grantit as said is, quhairthrow the haill may cum to trew compt and calculatioun; and for the bettir and mair sure comptrolling of the salt passand furth of the realme, that na licencis be grantit upoun ony mair quantitie nor may be transportit in ane veschell attanys, quhairthrow the licencis and cokquettis may be conferrit.
[A1575/3/15]* [print] [email] [cite] [preceding] [following]
Forsamekill as the regentis grace, nobilitie and estattis assemblit at this present conventioun, understanding that it tendis to the honour of oure soverane lord and the commoune weill of his realme and subjectis that the gold of his hienes myndis and utherwayis salbe imprentit and gevin out amangis his liegis in his awin cunye, rather nor tobe, as it is dalie, maid marchandice of and transportit out of the realme, to the prevat gayne of particular personis, thairfoir it is thocht gude, statute and ordanit that thair be cunyeit ane penny of gold of the wecht [...]†