[A1573/1/2]* [print] [email] [cite] [preceding] [following]
The quhilk day it is fundin, declarit and decernit be our soverane lord, with avise of the thre estatis and haill body of this present parliament, that the nominatioun, constitutioun, electioun and ordinatioun of the nobill and michtie lord James, erle of Mortoun, lord Dalkeith etc., in regent to our soverane lord, his realme and liegis thairof, during the tyme of his majesteis minoritie and les age, togidder with the consent and approbatioun of the erlis, lordis, prelattis, commissionaris of burrowis, barrounis and uther faithfull subjectis, convenit and assemblit to that effect, and the acceptatioun of the said office of regentrie be the said James, erle of Mortoune upon the xxiiij day of November last by past, was, is and in all tyme cumming, salbe haldin, repute and estemit lauchfull, sufficient and perfite; and all and quhatsumever thingis quhilkis he hes done be vertew of his said office of regentrie sen his acceptatioun thairof, or quhilkis he sall do heiretfer in our soverane lordis name and authoritie during the tyme of his hienes minoritie, to be als dewly, lauchfully, sufficiently and richteously done and to have als greit availl, strenth, force and effect in all respectis and conditiounis as ony thing done be quhatsumever regentis, governouris or protectouris of this realme in the minoriteis and les ages of ony utheris native princes of the samin. Quhilkis confirmatioun, nominatioun, electioun, constitutioun, acceptatioun, actis and procedingis our said soverane, with avise and consent of the saidis thre estatis and haill body of this present parliament, ratefyis, approvis and confirmes, for now and in all tyme cumming.
[A1573/1/3]*[print] [email] [cite] [preceding] [following]
Item, forsamekle as thair was ane act maid in the parliament haldin in the first yeir of our soverane lordis regne, that now is intitulat 'Anent the trew and haly kirk and of thame that ar declarit not to be of the same kirk', quhilk act, our soverane lord, with avise and consent of my lord regentis grace, the thre estatis and haill body of this present parliament, ratifyis, approvis and for his hienes and his successouris perpetually confirmis; and seing the educatioun of our soverane lord is in the trew religioun of Jesus Christ and that the samin religioun, be lawis and actis of parliament maid in his hienes regne, is establischit, and that it is baith godly and expedient that all his hienes subjectis worschip the only trew God in the uniformitie of religioun and his hienes obedience, thairfoir it is statute and ordanit be our said soverane, with avise of his said regent, the thre estatis and haill body of this present parliament, that the lauchfull archebischoppis, bischoppis, superintendentis and commissionaris of the dioceis and provinces of this realme, be thame selfis and the ministeris and reidaris serving at the kirkis within thair charges respective, with all diligence, efter the publicatioun of this present act, note the names of the persounis, asweill men as wemen, suspectit to be papistis or that hes not communicat with the sacramentis as thay ar now trewly ministrat in the reformit kirkis of this realme and, with the lyke diligence, lauchfully admonische thame according to the ordour of the kirk; and in case thay be furth of the realme, upon thre scoir dayis warning to recant thair papisticall errouris, gif the confessioun of thair faith according to the forme approvit in our soverane lordis parliament, be participant with the sacramentis and submit thame selfis to the discipline of the trew kirk within certane ressonable space, under the pane of excommunicatioun; and gif thay failye, to pronounce the sentence of excommunicatioun aganis thame. And in case of the contumacie and non comperance of ony persounis swa admonischeit or comperand, gif thay refuse to obey the admonitioun, and thay quha hes returnit to thair errouris efter thair confessioun anis gevin, that everie lauchfull archibischop, bischop, superintendent or commissionar present ane roll and cathalog of the names of the disobedientis, obstinat or relaps persounis to our soverane lord and his regent betuix and the first day of Junii nixt to cum, to the effect that the samin may be imprentit, divulgat and affixit on the tolbuith of Edinburgh and utheris tolbuithis and publict places of judgement within this realme, under the panis following: that is to say, everie archibischop or bischop that salbe fund remis or negligent thairin be the generall assemblie of the kirk, under the pane of tynsall of the frutes of his benefice for ane yeir to our soverane lordis use; and everie superintendent or commissionar, under the pane of tynsall of his stipend for ane yeir alswa to our soverane lordis use, and removing of him furth of his office and placing of ane uther mair diligent thairin. And that the disobedient, obstinat and relaps persounis to be contenit in the said catholog (efter the publicatioun thairof) salbe haldin, reputed and estemit infamous and unabill to sit or stand in jugement, persew, beir office, nor sall not be admittit as previs, witnessis or assysouris aganis ony professing the trew religioun ay and quhill thay have recounsallit thame selfis to the trew kirk, submittand thame selfis to the discipline thairof, and obtene testimoniall thairupon; quhilk inhabilitie being alledgeit aganis ony judges principall or deputis, members of court, officiaris, parteis or procuratouris, persounis of inquest or witnessis salbe relevant exceptioun of the law to declyne thame fra judgement, office, persute, procuratioun, inqueist or beiring witnes, without thay than presently produce sufficient testimoniall witnessing thame to be ressavit as members of the trew kirk. As alswa, the depute of the judge principall quha is the excommunicate, or the procuratour quha will compeir for the excommunicate, sall not be sufferit to proceid nor hard in judgement (the excommunicatioun being opponit and verifyit aganis the maker of the depute or constituant of the procuratour), except that the principall be quhome thay proceid or use thair procuratioun first be ressavit to the kirk and have sufficient testimoniall thairupon; and that the said exceptioun be not admittit aganis ony quhilk sall not be specially comprehendit in the said catholog. And in case the judge proceid, notwithstanding the said exceptioun, the samin being lauchfully proponit and ratifyit be the catholog foirsaid, sic contemptuous proceding testifyit be ane instrument and producit befoir the lordis of counsall salbe ane sufficient caus of suspensioun and discharge of the executioun of the decreit to be gevin in that mater.
[A1573/1/4]* [print] [email] [cite] [preceding] [following]
Item, forsamekle as the conservatioun and purgatioun of the religioun cheifly pertenis to the Christane and godly kingis, princes, rewlaris and magistratis, and that it is maist requisit that the kirk within this realme be servit be godly persounis of sound religioun, obedient to the authoritie of the kingis majestie, our soverane lord, it is thairfoir concludit, statute and ordanit be his majestie, with avise of his said regent, thre estatis and haill body of this present parliament, that every persoun quha sall pretend to be ane minister of Goddis word and sacramentis, or quha presently dois or sall pretend to have and bruke ony benefice, use of the frutes, stipend, pensioun or portioun furth of benefice, and ar not alreddy under the discipline of the trew kirk and participatis not with the sacramentis thairof, sall, in the presence of the archebischop, bischop, superintendent or commissionar of the diocie or province quhair he hes or sall have the ecclesiasticall leving, gif his assent and subscrive the articklis of religioun contenit in the actis of our soverane lordis parliament, and gif his aith for acknawledgeing and recognoscing of our soverane lord and his authoritie, and sall bring ane testimoniall in wrychting thairupon; and oppinly on sum Sonday, in tyme of sermone or publict prayeris, in the kirk quhair be ressoun of his ecclesiasticall leving he aucht to attend, or of the frutes quhairof he ressavis commoditie, reid baith the testimoniall and confessioun, and of new mak the said aith within the space of ane moneth efter the publicatioun of this present act†; and gif he be furth of the realme within thre scoir dayis efter the publicatioun heirof and in tyme cumming within ane moneth efter his admissioun, under the pane that everie persoun that sall not do as is abone appointit salbe ipso facto depryvit and all his ecclesiasticall promotiounis and leving salbe vacand as gif he war than naturally deid. And gif ony persoun ecclesiasticall or quhilk sall have ecclesiasticall leving, sall wilfully mantene ony doctrine directly contrair or repugnant to ony of the saidis articklis, and, being convenit and callit as followis, sall persist thairin and not revoke his errour, or efter his revocatioun sall of new affirme sic untrew doctrine, sic mantening, affirming and persisting salbe just caus to deprive him of his ecclesiasticall leving, and it salbe lauchfull to thame befoir quhome he is callit and convenit to deprive him, quhilk sentence of deprivatioun pronouncit he salbe deprivit in deid and his leving vacand as gif he war naturally deid. And that all archebischoppis, bischoppis, superintendentis, possessouris or titularis of prelattis be callit and convenit for this effect befoir the generall assemblie of the kirk, and all inferiour persounis befoir the archebischoppis, bischoppis, superintendentis or commissionaris of the dioceis or provinces within the quhilkis thay dwell.†
[A1573/1/5]*[print] [email] [cite] [preceding] [following]
Item, forsamekle as thair hes bene greit rebellioun and disobedience aganis our soverane lordis authoritie in tyme bypast, and seing the caus of Goddis trew religioun and his hienes authoritie foirsaid ar sa joynit as the hurt of the ane is commoun to baith, it is thairfoir declarit, statute and ordanit be our soverane lord, with avise and consent of my lord regentis grace, with the thre estatis and haill body of this present parliament, that nane salbe repute as loyall and faithful subiectis to our said soverane lord or his authoritie, bot be puneisabill as rebellaris and ganestandaris of the samin quhilk sall not gif thair confessioun and mak thair professioun of the said trew religioun; and that all sic as makis professioun thairof and yit hes maid defectioun fra thair dew obedience aucht to our soverane lord, salbe admonischit be the pastouris and ministeris of the kirk to acknawledge thair offence and returne to thair detfull obedience; and gif thay failye thairin, to be excommunicat and secludit from the societie of the kirk as rebellious and corrupt menbers betuix and the first day of Junii nixt tocum. And that alwayis befoir sic persounis as hes maid defectioun be ressavit to our soverane lordis mercy and favour, thay sall gif the confessioun of thair faith of new and promeis to continew in the confessioun of the trew religioun in tyme cumming mantene our soverane lordis authoritie; and that thay sall, at the uttermest of thair power, fortifie, assist and mantene the trew preicheouris and professouris of Christis religioun aganis quhatsumever enemeis and ganestandaris of the samin, and namely aganis all sic of quhatsumever natioun, estait or degre thay be of that hes joynit and bund thame selfis or hes assistit or assistis to set fordwart and execute the cruell decreittis of the Counsall of Trent (quhilk maist injuriously is callit be the adversareis of Goddis treuth, the Haly League) contrair the preichouris and trew professouris of the word of God.
[A1573/1/6]* [print] [email] [cite] [preceding] [following]
Forsamekle as be ane act of parliament haldin and begun at Edinburgh, the ferd day of Junii the yeir of God ane thousand fyve hundreth thre scoir thre yeiris, it wes statute and ordanit that na person, vicar, nor uther ecclesiasticall person suld set in few or lang takkis ony of thair mansis or gleibbis pertenyng to the kirkis, and alsua that thay that war appoyntit or tobe appointit to serve and minister at ony kirk within this realme sould have the principall mansis of the persoun or vicar or samekle thairof as sould be fund sufficient for staiking of thame, to the effect that thai may the better await upoun the charge appoyntit and tobe appoyntit to thame, quhether the saidis gleibbis wer set in few or tak of befoir or not, or that ane ressonable and sufficient hous wer beigit to† thame besyde the kirk be the persoun or vicar or utheris havand the saidis mansis in few or lang takkis; and forder, samekill land tobe annexit to the saidis duelling places of thame that servis and ministeris at the kirk as thairefter with gude advysement sould be appoyntit, lyke as the said act at mair lenth proportis; quhilk being in divers poyntis doubtfull and incertane, na gude executioun hes followit thairupoune in tyme bipast. And thairfor oure soverane lord, with avise of my lord regentis grace, the thre estatis and haill body of this present parliament, findis and declaris that the mansis other pertening to the persoun or vicar maist ewest to the kirk and maist commodious for duelling, pertenis and sall pertene to the minister or redar serving at the same kirk, together with foure akeris of land of the gleib at leist, liand contigue or maist ewest to the said manse gif thair be samekill; and failyeing thairof, samekill as thair is tobe merkit and speciallie designit be the archibischope, bischope, superintendent or commissionar of the diocie or province the tyme of thair nixt visitatioun, be the advise of ony tua of the maist honest and godlie of the parochinaris quhilkis thai sall require (not being possessouris of the saidis mansis or gleibbis thame selffis) to joyne with him in executioune heirof, quhether the saidis mansis and gleibbis be sett in few or takkis of befoir or not; and upoun the said marking and designatioun, the archibischope, bischeope, superintendent or† commissionar sall gif his testimoniall, bering how he, with avise of sic tua of the parochinaris, hes visited the mansis and gleib of sic a kirk and findis the same occupiit be sic personis, and that thay have appoyntit, markit and† designit the said manse, with foure akaris or sic quantitie of land adjacent thairto, to the use of the minister or redar that sall serve and mister at the said kirk in tyme cuming, and upoun the minister or redaris supplicatioune quhairwithall the said testimoniall salbe presentit to the lordis of counsall and sessioun, lettres salbe direct chargeing the occupiaris and possessouris of the saidis mansis and akeris of land, quhether the same be sett in few or takkis of befoir or not, to remove, desist and ceis thairfra, and enter the said minister or redar to the possessioun of the samyn within ten dayis under the pane of rebellioun; and gif thai failyie, to put thame to the horne; and in caise thai be denuncit, captioun and utheris executoriallis according to the lawis and consuetudes of this realme tobe† directit aganis thame. Quhilkis mansis and akeris of land sa markit and designit† as said is, it sall not be lauchfull to the ministeris or redaris present or† to cum to sell, annalie, sett in few or takkis, or to put ony in the possessioun of the same, in prejudice of thair successour, bot the same to remane alwayis fre to the use and eisment of sic as salbe admittit to serve and minister at the said kirk. And quhair ony personis upoune pretence of fewis or takkis obtenit of mansis or gleibbis hes maid sumptuous beiggingis thairon, fra† quhilkis thai will think hevy tobe dispossest and removit, that than the archibischope, bischope, superintendent or commissionar, in tyme of thair visitatioune, travell to aggre the fewar or takkisman, and the minister or redar be delivering to the same minister or redar of ane uther manse, quhilk salbe als gude and ewest as the uther be just estimatioun the tyme that it was sett in few or takkis, tobe biggit betuix and the first day of October† nixt tocum,† togidder alsua with† certane akeris of land adjacent thairto in maner foirsaid,† for eschewing of debait and contentioun; bot gif the fewar or takkisman refuis willinglie to condiscend to the same, than the executioun to proceid for removing fra the principall manse and sa mony akeris of land as is befoir specifyit,† notwithstanding ony beigingis maid or to be maid thairupoun, providing alwayis† that samekill of the few maill be deducit† to the fewar pro rata for the samin akeris gevin to the saidis ministeris or redaris, and to big the said manse betuix and the first day of September nixt tocum,† providing alswa that the fewaris haif actioune aganis the settaris of the saidis mansis or glebis for samekle of the entress silver payit be thame secundum ratam the tyme of the setting of the saidis fewis.†
[A1573/1/7]*[print] [email] [cite] [preceding] [following]
Forsamekle as sen the coronatioun of the kingis majestie, oure soverane lord, the charge of regiment of his hienes, his realme and leigis hes bene worthely occupyit and administrat be divers nobill men, being of the nowmer of thame quhilkis ar nominat and contenit in the commissioun of the quene, his hienes moder, maid and gevin the tyme of the dimissioun of hir crowne in his majesteis favouris, and electit, allowit and approvit be the estatis of parliament for the tyme; and now my lord regentis grace and thre estatis† of this present parliament, considdering in how schort space sa mony nobill men his hienes derrest freindis and approvit weilwillaris, ar departit this lyfe, for the maist part be violent meanis of thair enemeis becaus of thair constant professioun and mantenance of the authoritie of our soverane lord, sa as the nowmer of personis contenit in the said commissioun† now leving and remaning obedient to oure soverane lord (being few) may other be naturall or violent deathe at Goddis pleisure be takin away during his majesteis minoritie. Yit, to the effect that his hienes, his said realme and liegis sall nocht throw ony occasioun be destitute of regiment, it is thairfoir fundin,† declarit, statute and ordanit be our soverane lord, with avise and consent of his hienes regent, the thre estatis and haill body of this present parliament, that how sone and how oft it salhappin the regiment of this realme to vaik during his hienes minoritie foirsaid, it salbe lauchfull to the estatis convenand to elect ony ane persoun of the nobilitie professing the trew religioun, and that hes gevin prufe of his gude affectioun thairto and to the estait of our soverane lord, libertie, quyetnes and commoune weill of this realme, to the said office and charge of regentrie; quhilk electioun, with the acceptatioun, actis and procedingis of the persoun or persounis to be electit, salbe lauchfull, perfite and sufficient althocht thai sall nocht happin to be of the nowmer specifyit and contenit in the said commmissioun.†
[A1573/1/8]* [print] [email] [cite] [preceding] [following]
Forsamekle as be the lawis of this realme, specialie be ane act of parliament haldin in the reignne of umquhile King James the Fyft, oure soverane lordes guidsir of worthy memory, it is found that the use in tymes bigane hes bene that the males and deweties of the landes of thame that hes bene yeir and day at the horne haldin of utheris superioris then the king, yeir and day being bipast, returnit agane to the superiouris of the saidis landes for the lyftyme of thame that sustenit sic process of horne yeir and day as said is, except crymes of tressoun and lesmajestie, and that the law suld sa be interprete and usit, like as at mair lenth is contenit in the said act, quhilk hes gevin great feir and terrour to all heritouris of landes to incur† the said process of horning, quhilkis, for saulftie of their lyfrent, hes done diligence and usit all gude meanys to obtene thame spedelie relaxit, quhenevir thay happinit to incur the said pane; yit, becaus the law wes not equall, at leist had not ressavit the like executioun aganis the possessouris of benefices, pensionis, portionis or uther sic eccliasticall rentes, the gretair contempt of horning hes bene in sic personis quhilkis, thinking thair levingis in na dangear throw thair dissobedience, continewit in thair rebellioun and usit na diligence to get thame selffis relaxit, quhilk maid the said pane of horning contemptible in tyme bipast. For remeid of quhilk abuse heirefter, oure soverane lord, with avise of my lord regentis grace, the thre estates and haill body of this present parliament, declairis, statutis and ordanis that gif ony possessoure of benefices, pensionis, portionis or uther sic ecclesiasticall rentes, being ordourlie denuncit rebellis and put to the horne remanis thairat attoure the space of yeir and day, thay sall thairby tyne thair lyfrent of thair benefices, pensioun, portioun or ony uther eccliasticall rent, siclik and in the same maner† as the temporall men dois and† according to the act maid aganis thame thairanent† in our soverane lordis derrest gudschiris regne.†
[Deleted text]†
[A1573/1/9]*[print] [email] [cite] [preceding] [following]
Forsamekle as sen the coronatioun of the kingis majestie, oure soverane lord, divers rebellious insurrectionis, tressonable conspiraceis, oppin hostiliteis and disobediences hes bene raisit aganis his hienes, his auctoritie and regentis, tending to the subversioun of Christis† religioun, the deposing of his majestie from his royall crowne and the confusioun of the haill estate of the commoun weill of this realme; for resisting and repressing of the quhilkis tressonable, rebellious and dangerous interprysis and salftie and preservatioun of our soverane lordis innocent persoun, his regentis, nobilitie and estatis professing his obedience hes bene oftymes constranit to use the proces, judgement and executioun of his hienes lawis, as alswa force and hostilitie aganis his hienes declarit tratouris, rebellious and disobedient subjectis, thair assistaris and pertakeris. Thairfor, it is statute and ordanit be oure soverane lord, with avise of my lord regentis grace,† the thre estatis and haill body of this present parliament, that all processis, judgementis and executiounis of his hienes lawis led, gevin and maid in his majesteis name, criminallie or civilie, sen his hienes coronatioun foirsaid, outher in parliamentis, privie counsall, justice courtis, sessioun and college of justice, checker or befoir the schireffis, stewartis, bailleis, provestis, aldermen and bailleis of burrowis and utheris, judgeis and ministeris of lawis quhatsumever, and all deidis of hostilitie, in raising and conductioun of men of weir, battellis, conflictis and utherwayis, cuinyeing of money, taking and fortificatioun of townis, castellis, palices, places, housis and policeis, birning, distructioun and demolisching thairof, intelligences, treateis and contractis maid with quhatsumever foreyn princes or thair lieutennentis or ministeris, inbringing of strangeris in the townis and utheris partis of this realme, intromissioun with money, munitiounis and movabill guidis, uptaking of rentis, taking and detening of presoneris, ransounis, butingis, raising of taxtis, impositionis and utheris quhatsumever, done be our soverane lordis regentis, nobilitie and utheris subjectis professing his obedience aganis the saidis declarit tratouris, rebellis or dissobedient subjectis, thair assistaris and pertakeris quhatsumever, at ony tyme sen our said soverane lordis coronatioun, and befoir thay obtenit remissiounis thairfoir, as alswa all intromissioun with ony of thair levingis, gudis, geir, plenissingis or utheris being than within thair housis or upon thair landis or rowmes, notwithstanding quhatsumever assignatioun, tytle or entres that ony utheris personis may acclame or pertend thairto†; and declaris that all that fallowit or sall happin to follow thairupon hes bene, is and in all tyme cuming salbe repute, haldin and estemit as lauchfully done and as gude and profitable service for his majestie, tending to the preservatioun of the estait of Christiane religioun, the royall persoun and crowne of our soverane lord,† resisting and repressing of his saidis rebellious and inobedient subjectis and quyeting of the cuntrie; and that the saidis regentis and nobilitie and utheris subjectis, thair assistaris and pertakeris, sall incur na skaith or danger thairthrow in thair personis, landis or gudis, nor sall not be callit nor accusit for the samin criminallie nor civilie be ony maner of way in tyme cuming, dischargeing be this present act all and sindrie his majesteis judges and ministeris of his lawis present and to cum thairof, and of thair offices in that part for ever. And this act to be amplie extendit and interpreit in the favouris of all sic as professit or soverane lordis authoritie and obedience aganis thame quhilkis war disobedient thairto, their assistaris and partakeris.† And in lyke maner it is declarit and decernit be our said soverane lord, his derrest regent, the thre estatis, and haill body of this present parliament, that all pretendit process, judgementis and executiounis of lawis, criminall or civill, outher in pretendit parliamentis, counsall or befoir schireffis, stewartis, bailleis, provestis, aldermen, bailleis of burrowis or utheris judges or ministeris of lawis quhatsumever, in name or be cullour of ony uther auctoritie sen our soverane lordis coronatioun foirsaid, hes bene, is and in all tyme cuming salbe repute, haldin and estemit as unlauchfull, usurpit, vane and of na force, strenth nor effect, and to have na kinde of executioun for ony tyme bygane or to cum without ony proces of reductioun.††
[A1573/1/10]* [print] [email] [cite] [preceding] [following]
Forsamekle as be act of parliament haldin and begun at Edinburgh, the xxiiij day of August, the yeir of God jM vC lx yeiris, ratifyit and apprevit be act of parliament haldin in the first yeir of the regne of our soverane lord that now is, it was statute and ordanit that the Bischope of Rome, callit the paipe, have na jurisdictioun nor auctoritie within this realme in ony tyme cuming, and that nane of the subjectis of this realme† in ony tyme thairefter suld sute or desyir tytle or richt of the said Bischope of Rome or his sait to ony thingis within this realme under the panis of barratrie: that is to say, proscriptioun, banisment and never to bruke office, honour nor dignitie within this realme, lyke as is contenit at mair lenth in the said act. Sen quhilk tyme, divers the subjectis of this realme hes wickitlie and contemnandlie purchest the saidis papis bullis, dispensatiounis, lettres and privilegeis at Rome, or hes causit contrafait the samin in Flanders or utheris partis with antedaittis; as alswa sum utheris hes purchest or contrafatit giftis and provisiounis of benefices with antedaittis or blankis, as maid be the quene moder to oure soverane lord, intending be sic fals and cullourit meanis to bruke the tytle and possessioun of benefices or pensiounis efter the deceis of the present possessouris thairof; and thairthrow, baith to defraude oure soverane lord of his rycht and patronage, and alswa the qualefyit persounis professing the trew religioun of thair levingis, quhairupon thai suld be sustenit, to the incres and continuance of abuse and errour gif remeid beis not provydit thairintill; it is thairfoir decernit and declarit be oure soverane lord, with avise and consent of my lord regentis grace, the thre estatis and haill body of this present parliament, that all persounis suspectit to have ony sic fals, contrafatit blankis and antedaittit bullis, provisiounis, confirmatiounis of fewis, takkis or giftis of benefices, pensiounis furth of benefices, commoune kirkis or landis, annuellis and freir landis, salbe callit quhen it sall pleis oure soverane lord and his said regent to compeir befoir sic of oure soverane lordis previe counsall, or utheris that salbe constitute commissionaris in ecclesiasticall causis be his hienes commissioun at sic day or dayis as thay sall appoint,† bringand with thame thair saidis bullis, provisiounis, confirmatiounis of fewis, takkis and giftis of benefices and utheris befoir specifyit, to be sene and considderit gif the samin be lauchfull titilles and ordourlie past and be worthie to serve and have faith in tyme cuming, or not; and in caise the peces producit be fund lauchfull and sufficient, the samin to be registrat, markit and to have full faith and validitie in tyme cuming; and gif the samin salbe fundin to have bene purchest in Rome sen the said xxiiij day of August, the yeir of God jM vC threscoir yeiris, or utherwyse to have bene contrafatit, antedaittit or purchest blank sensyne, to be decernit and declarit be the saidis commissionaris null, invalide and insufficient, and to mak na faith in tyme cumming, but ony farther proces of reductioun. And in case the persounis being chargeit to compeir for productioun of thair saidis bullis, provisiounis, takkis, confirmatiounis, giftis and utheris befoir specifyit† failye thairin, being lauchfully chargeit sa to do be oure soverane lordis lettres, with certificatioun, decreit salbe gevin and pronuncit aganis thame, declarand the samin bullis, provisiounis, takkis, giftis and utheris abone expremit to be null, invalide and insufficient in all tyme cuming; and it salbe lauchful to dispone the samin of new, notwithstanding ony allegeance of validitie quhilk thairefter may be proponit.†
[A1573/1/11]*[print] [email] [cite] [preceding] [following]
Item, becaus thair hes bene sum questioun, baith befoir the lordis of sessioun and commissaris of Edinburgh, anent the declaratioun of the act and ordinance maid be the quene, our soverane lordis mother, with avise of the lordis of secreit counsall for the tyme, and thairefter ratefyit in parliament, anent the dispositioun of all benefices not exceding thre hundreth merkis of yeirly rent or within to qualefyit ministeris, quhilk act our soverane lord, with avise and consent of my lord regentis grace, the thre estatis and haill body of this present parliament, ratefyis, approvis and confirmis, ordinand the samin to have full effect fra the day and dait thairof, notwithstanding ony exceptioun proponit or to be proponit of non publicatioun of the said act, seing the quene, our soverane lordis mother, was sworne thairin in verbo principis never to cum in the contrair thairof, and that the said act hes generally takin effect sen the making of the samin, provyding alwayis that this present act prejudge not the law of patronis.
[A1573/1/12]* [print] [email] [cite] [preceding] [following]
The quhilk day, our soverane lord, with avise of my lord regentis grace, the thre estatis and haill body of this present parliament, statutis and ordanis that aganis all persounis excommunicate be ordour of the trew reformit kirk within this realme, letteris salbe direct be the lordis of counsall in all the four formes at the instance of the partie, our soverane lordis advocate, or the procuratouris of the kirk, chargeing the excommunicate persounis (thay being excommunicate fourtie dayis) to satisfie the sentence or decreit pronouncit aganis thame, and to recounsall thame selfis to the kirk and submit thame selfis to the discipline thairof, under the pane of rebellioun; and gif thai failye, to put thame to the horne with letters of captioun and utheris executoriallis to pas thairupon, siclyke and in the samin maner as was gevin in the regne of our soverane lordis umquhile gudschir aganis thame that sustenit the proces of cursing attour the space of xl dayis.
[A1573/1/13]* [print] [email] [cite] [preceding] [following]
Forsamekle as thair was ane act maid in the parliament haldin in the moneth of Junii, the yeir of God ane thousand fyve hundreth thre scoir thre yeiris, declarand that quhatsumever ordour suld be maid and set furth be the lordis of secreit counsall for uphalding and reparrelling of kirkis and kirkyairdis, and the executioun to be declarit be thame thairupon, to be sufficient and have als greit strenth and effect as and the samin had bene expresly contenit in the said act of parliament, as the samin at mair lenth proportis. According to the quhilk, ane act of secreit counsall was maid for the bigging, mending and reparatioun of paroche kirkis, of the dait at Striviling, the xiij day of September, the yeir of God foirsaid, quhilk act as yit hes not tane executioun in na place because of the sleuth and unwillingnes of the parochinneiris, quhilkis war slaw and refusit to cheis persounis to taxt thair nichtbouris, and that alswa thair was not kirkmaisteris or deaconis appointit in the parochinnis to ressave the taxatioun appointit. For remeid quhairof, our soverane lord, with avise of my lord regentis grace, the thre estatis and haill body of this present parliament, ratefyis and approvis the foirsaidis actis of parliament and of secreit counsall in all pointis, with this additioun: that quhair the parochinneris being requyrit to elect and cheis persounis for making of the taxatioun to the effect foirsaid, and gif thay refuse or delayis or quhair thair is na kirkmaisteris or deaconis appointit, that than the archebisehop, bischop, superintendent or commissionar of the kirkis, in tyme of thair visitatioun, quhilk salbe betuix and the first day of Junii nixt tocum, sall, at thair discretioun, nominate and appoint persounis in everie parochin for making and setting of the taxatioun; as alswa for ressaving of the samin. And decernis and declaris the said nominatioun and appointment to be sufficient and siclyke executioun sall pas for compelling of thame as mycht have bene gevin and grantit be vertew of the said act of secreit counsall, in case they had bene electit be the parochinneris. And becaus thair hes bene divers paroche kirkis within this realme demolischit, cassin doun and destroyit for the maist part, and that certane particular persounis hes applyit the stanis, tymber and uther graith pertening thairto to thair awin particular use and profite, thairfoir ordanis ony ane of the parochinneris of sic kirkis to gif thair complaint to the archebischop, bischop, superintendent or commissionar thairof upon sic persounis as thay pleis to complene upon; and thay being lauchfully callit and just tryall takin in the said mater, and according to sufficient probatioun to be led and deducit thairintill, that the said archebischop, bischop, superintendent or commissionar pronunce and gif furth thair decreit thairintill; quhilk decreit, our soverane lord, with avise of his said derrest regent and thre estatis foirsaidis, decernis and declaris to be als sufficient as and the samin war gevin befoir ony juge ordinar, and ordanis the lordis of counsall and sessioun to direct letteris of horning or poinding thairupon at the will and plesure of the partie quha sall happin to complene. And siclyke our said soverane lord, with avise of his said derrest regent, the thre estatis and haill body of this present parliament, ordanis the persounis of all paroche kirkis within this realme to furneis breid and wyne to the communioun how oft the samin salbe ministrat within the samin kirkis.