[A1572/11/3]*[print] [email] [cite] [preceding] [following]
In the first, sen the eternal God of his greit mercy, efter the sounding of the trumpett of his blissit evangel throchtout the haill realme, for the glorie of his awin name, hes sa oft and evidentlie deliverit ws fra divers and mony dangeris, quhilkis in all apperence to man wer inevitable, it becummis that the honour of his godlie majestie be preferrit all erthlie and temporall thingis. Thairfoir, the said James, erll of Mortoun sall expreslie profes and avow the trew religioun of oure God as it is now publictlie precheit within this realme conforme to the haly word establissed be plane act of parliament; and sall gif ayth thairupoun. And to that effect, he and the saidis nobilitie, counsale and estaittis sall concur in the mantenance and promoting thairof, and in all sic thingis belangand thairunto, conforme to the lawis alreddy establissit for the same effect and all utheris thingis concerning the polecy and governamnent of this realme.
[A1572/11/4]*[print] [email] [cite] [preceding] [following]
Item, the saidis nobilitie, counsall and estaittis sall concur with the said lord regent to oure said soverane lord in the furthsetting of justice equalie and indifferentlie to the haill liegis and subjectis of the realme, according to the lawis thairof, alsweill in the civile and criminall effairis, without grudge of thame or solistatioun in the contrair.
[A1572/11/5]*[print] [email] [cite] [preceding] [following]
Item, seing it is maist notour that not onelie ar the puyr liegis of this realme oppressit and heriit be thevis, oppressouris and utheris, bot als the haill estaittis of the same ar out of frame and ordour that gudelie it can not lang continew and be ane realme without haistie remeid be put thairto; thairfoir the said counsall, nobilitie and estaittis sall accumpany and remane with the said lord regent, tutour to oure said soverane lord, in sic places as salbe thocht expedient, quhill the kingis majesteis authoritie salbe universallie establissed and recognoscit throw the haill realme; quhilk being brocht to pas, that thaireftir ane ressonabill nowmer of the saidis lordis sall accumpany him and await on the counsall, be quhais avyse the haill effairis of the commoune weill may be ordourit.
[A1572/11/6]*[print] [email] [cite] [preceding] [following]
Item, forsamekill as the publict offices of this realme ar the principall nerves and synnowis quhilk joynis the haill body and retenis and kepis the same in ordour, quhilk being confoundit and out of frame, the haill consequentlie mon dissolve and cum to nocht, it is fund, thairfoir, meit and convenient that sic men be placeit in the saidis offices as ar upricht, of gude jugement and ar apt and meit to brouke the samyn, the qualitie of the persoun, without respect, being onelie regairdit and all utheris presentlie placeit in the same, quhilkis the law will permitt, tobe removit thairfra, swa that all thingis may gang fordwart uniformly, quietnes may be kepit and the puyr subjectis easit thairby.
[A1572/11/7]*[print] [email] [cite] [preceding] [following]
Item, sen the kingis majesteis hous, with his estate and the hous tobe kepit for his regent and for the counsale, and the expensis tobe maid in the commoune effairis of the realme, mon be furneist and sustenit upoun the revenues of the croun, the counsale and nobilitie sall tak ordour for performing of all thingis requisite in that behalf during the tyme of my said lord regentis grace. And becaus thir thingis mon be done upoun the offices of the thesaurarie and comptrollarie quhilkis now ar altogidder in confusioun, thairfoir the saidis lordis sall tak sic ordour with the officiaris that the offices may be usit ordourlie and quietlie in tymes cuming, without grudge or trubill.
[A1572/11/8]*[print] [email] [cite] [preceding] [following]
Item, thay have consentit and condiscendit that na remissioun or respett be grantit to ony maner of personis for ony murtheris, vyle slauchteris or utheris crymes equiualent thairto, committit sen the kingis coronatioun, or tobe committit during the tyme that it sall pleis God to burding the said lord regent with the charge foirsaid, nor yit sall resset nor manteine privatlie nor oppinlie ony fugitives fra the law for the saidis crymes.
[A1572/11/9]*[print] [email] [cite] [preceding] [following]
Item, quhen my said lord regent, with avise of the said counsall and nobilitie, sall indevoir him self to the promoting of the glory of God, executing of justice and keping of the realme in quietnes, nane of thame sall grudge thairat ony maner of way, bot sall assist him in the just executioun of the lawis aganis quhatsumevir persoun or personis rebelland aganis oure soverane lord and contravenand the lawis, alsweill within the realme as outwith.
[A1572/11/10]*[print] [email] [cite] [preceding] [following]
Item, becaus the revenew of the croun is diminissit be the dispositioun thairof in tymes bipast, and that the charges quhilkis ar tobe sustenit thairon ar greit and mony, thairfoir my said lord regent, in dispositioun of the casualiteis, sall gif na part thairof gratis, without avise of the saidis nobilitie and counsale, or the maist part of thame that beis present, nor suffer na part of the propirtie of the croun unlauchfullie disponit and gevin furth to remane with the personis quhometo it is gevin and disponit aganis the law, bot sall caus the same be recoverit be ordour of law and justice.
[A1572/11/11]*[print] [email] [cite] [preceding] [following]
Item, my said lord regent faythfullie promittis that in na tyme cuming during the tyme of his charge and office he sall contract with ony forayne princes towart peace, weare, the estate of oure soverane lord, his hienes mariage, nor transporting of his persoun furth of the place quhair he is presentlie to ony part or places within this realme, or outwith the samyn; nather sute the libertie of the quene, his moder, nor yit sall speik hir, wrychte to hir or have ony intelligence with hir, without avise and consent of the nobilitie and secreit counsall present, or maist part of thame.
[A1572/11/12]*[print] [email] [cite] [preceding] [following]
Item, that all personis ellis forfaltit and utheris aganis quhome summondis of tressoun or proces of forfaltour is dependand sall on na wayis be restorit, nor the summondis of proces dependand; nayther ony of thair landis, heretages, offices or possessionis quhatsumevir disponit be the said lord regent; nather yit ony remissionis, respettis, pardonis or relaxationis quhatsumevir grantit be him to the saidis personis quhilkis ar, or salbe, suspectit or delaitit for the cruel and horribill slauchter and murthour of the king, oure soverane lordis fader, and his regentis, nor setting up ane uther authoritie incontrair the authoritie alreddy establissed during my said lord regentis charge and governament, without the advise and consent of the saidis lordis of secreit counsale, presentlie professing the king and his authoritie, or the maist part of thame. And in caise ony sic remissionis, respectis, pardonis, relaxationis or dispositionis quhatsumevir be gevin or grantit, that the same salbe null and of nane avale, and that na seillis be ansuerit thairto and na lettres nor executoriallis be grantit thairupoun.
[A1572/11/13]*[print] [email] [cite] [preceding] [following]
Item, that the said lord regent sall indevoir him self to observe and keip peace with the kingis and princes freindis and confiderattis of this realme, and specialie the godlie peace betuix the quenis majestie of England and this realme; and sall not pas furth of this realme during the tyme of his said office without speciall avise and consent foirsaid.