[A1569/7/2]*[print] [email] [cite] [preceding] [following]
The quhilk day, in presence of my lord regentis grace, the lordis of secreit counsall and utheris of the nobilitie and estaittis abonespecifiit, Maister Johnne Wod, ane of the senatouris of oure soverane lordis college of justice, reportit his proceedingis and negociatioun with the quenis majestie and counsall of England, and in speciall declarit hir hienes creditt committit to him according to the notes thairof writtin with the hand of hir majesteis secretary, quhairin ar contenit thre degreis that ar discoursit on be sum for ane accord to be maid of all contraversiis betuix the king our soverane, on the ane part, and the quene his moder on the uther, of the quhilkis degreis thir ar the wordis:
[A1569/7/3]*[print] [email] [cite] [preceding] [following]
First, how the quene of Scottis mycht be induced to affirme the estait of hir sone according to the parliament held quhylest sche wes in Lochlevin, and how hir estait for hir persoun, with hir suirtie and libertie, may be provided.
Secundlie, gif this can nocht be compassed, how sche may be induced to joyne in titill of the croun with hir sone, to regnne boith joyntlie, and the governament to remane during hir sonnis minoritie in the ordour of a regent and a counsall of the land; and heirin quhat ordour is to be takin with the quene for hir abode.
Thridlie, gif none of these can be compassed, than gif the quene sould be recognized quene and hir sone sould onelie remane prince, it wald be considerit how these thingis following may serve to ony gude purpose:
First, that the state of religioun may be universallie ressaved and obeyit of all personis of Scotland, according as it is now professed by the regent and the subjectis joyned with him; and gif the quene will not in hir awin persoun observe the same, that yit sche sall observe the maner of the religioun usit in England; and that the quene and croun of Scotland be deliverit frome the superioritie challenged by the Bischop of Rome.
Secundlie, that the governament may be establissed in the Erll of Murray untill the prince cum to xviij yeris of aige; and a counsall chosin of the nobilitie of Scotland, and the offices of the realme to be committit to speciall personis nocht to be changed by the quene without the assent of the regent and moir part of the counsallar.
Thridlie, that a full accord be maid betuix the quene and all hir subjects, and the lyke betuix the subjectis thame selffis, so as restitutioun be maid of all landis heretable to be in state as thai wer at the quenis committing to Lochlevin, sauffing suche as ar attaynted and convycted of the murthour of the quenis husband, and that ane abolitioun be maid of all actionis and sutes for all materis chanced in the menetyme.
Fourtlie, that na strangearis be interteneit nor sufferit to remane in the realme uther than knawin marchantis or necessary houshald servantis.
Fyftlie, that a perpetuall league may be maid betuix England and Scotland, and suche part of the treateis betuix France and Scotland revoked as manteneth offence betuix England and Scotland, and the amytie betuix France and Scotland to remane as it doith betuix England and France.
Lastly, to considder quhethir these thingis following may tend to mak gude assurance of the premissis:
First, that the articles of this treaty may be accorded tripartedlie: that is, the quene of England, the quene of Scottis and the prince of Scotland, and the subjectis a thrid.
Secundlie, that thai may be establissed by parliament in Scotland, with penalteis of heich tressonn aganis ony the subjectis of Scotland that sall brek the samyn, and the proffeit of the forfaltre to cum to the quene or hir sone as ather of thame sall be offended.
Thridlie, gif the quene of Scottis sall brek ony of thame and so salbe judged by the quene of England, with assent of the regent and moir part of the counsall, than sche sall forfalt hir state to hir sone quho salbe reputed king to all intentis without ony uther coronatioun.
Fourtly, that a convenient nowmer of hostages may be gevin on boith partis of the nobilitie of Scotland for observance of these articles, to remane in England at the ordour of the quene of England untill the prince salbe xviij yeris of aige.
The last is to be considderit in quhat place the quene of Scottis sall remane.
Quhilkis degreis wer severallie louked on, and everie ane of thame be the self weyit and weill considerit be the nobill men and states abone writtin convenit, quha, having heirtofoir had large experience of the quenis majestie of Englandis gudnes, hes takin hir hienes meaning in verie gude part; bot finding the twa degreis last in ordour of the thre sa prejudiciall to the king oure soverane lordis estait and consequentlie to the suirtie of all his obedient subjectis, as also sumquhat dangerous for the unquieting of the haill yle, thay can nocht find it expedient to condiscend to direct ony man towardes the quenis majestie of England to confer upoun the same, thinking the burding greittar than the schoulderis of ony ane may beare; and yit for the first - being in the self nocht altogidder sa dangerous, as alsua carying with it sum greittar apparence of ressoun - thay ar content to have the same conferrit upoun, and besydes to performe on thair part quhatsumevir may be to the contentatioun of the quenis majestie of England, nocht being in the self prejudiciall to the king oure soverane lordis estait, quhilk thai profess to be dearer unto thame than ather thair lyffis or landis. Notwithstanding, gif it sall seame to hir majestie that the conference of any twa, thre or four of the nobill men thame selffis, with sic utheris hir majesteis subjectis as it may pleis hir name, may find out ony thing tending to this end, the nobilitie and states abonewrittin ar glaidlie content that thai meit at ony place convenient upoun the bordour to satisfie hir majesties desire in that behalf; and aggreit and condiscendit that my lord regentis grace sould wryte and send answer to the quenis majestie of England in this forme with sum trusty servand of his awin.