[1569/2/3]*[print] [email] [cite] [preceding] [following]
Sederunt, domini ut in die predicto.
[1569/2/4]*[print] [email] [cite] [preceding] [following]
The quhilk day, my lord regentis grace and lordis of secreit counsale, persaving the greit defectioun and unnatural dissobedience that hes bene aganis our soverane lord and his authoritie sen his hienes coronatioun, bot principallie during the tyme of my lord regentis grace absence furth of this realme, quhilk now of neccessitie mon be repressit with force, gif dew submissioun and obedience be nocht schortlie maid; and to the effect that all neidfull thingis tending to the preparatioun of force may be providit and na thing that may induce the rebellious and dissobedient subjectis to acknawlegeing of thair dewitie be neglectit, the personis underwrittin wer nominat to travell for the effectis following: that is to say, nobill and michtie lordis Johnne, erll of Atholl, lord of Balvany; James, erll of Mortoun, lord of Dalkeyth, chancellar of Scotland; Johnne, erll of Mar, lord Erskin; Alexander, erll of Glencarne, lord of Kilmawris; Williame Kirkcaldy of Grange, knycht, capitane of the castell of Edinburgh; Maister James Halieburtoun, provest of Dunde; Thomas Kennedy of Bargany; Williame Leslie of Balquhane; Johnne Cragingilt of that Ilk; and Alexander Clerk, burges of Edinburgh; to consult and avise anent the preparatioun of force for persute and invasioun of the saidis rebellious and dissobedient subjectis; and als Adame, bischop of Orknay; Williame Maitland of Lethingtoun, younger, secretare; Sir James Balfour of Pettindreych, knycht, president of the college of justice; Maister James Makgill of Rankelour Nethir, clerk of register; Maister Henry Balnaves of Halhill; Sir Johnne Wischert of Pitarro, knycht; Johnne Colquhoun of Luss; Williame Cuninghame of Cunynghameheid; Sir David Lindesay of Rathulet, knycht, lyon king of armes and provest of Coupar; and James Baroun, ane of the commissionaris for Edinburgh; for travell and pacificatioun, and all thingis that may induce the saidis rebellious and dissobedient subjectis to the acknawlegeing of thair dewitie and obedience of oure soverane lordis authoritie. Quhilkis personis nominat for travelling of pacificatioun sall speik thair freindis being of the said rebellious factioun dwelling on the sowth syde of the Watter of Dee betuix and the first day of Marche nix to cum, and all personis dwelland be north the said Watter of Dee betuix and the tent day of the said moneth of Marche.
[1569/2/5]*[print] [email] [cite] [preceding] [following]
The quhilk day, my lord regentis grace, with avise of the lordis of secreit counsall, ordanis lettres to be direct chargeing all the inhabitantis of the sherefdomes of Perth be sowth and west Tay, the stewartries of Stratherne and Menteith, the sherefdomes of Striveling, Clakmannan, Kinross, Fyff, Linlythquow, Edinburgh principall and within the constabularie of Hadingtoun, Berwik, Roxburgh, Selkirk, Peblis, Lanark, Renfrew, Dunbartane, Air and baillieries of Kyle, Carrik and Cunynghame, that thai and ilk ane of thame, weill bodin in feir of weir, with xx dayis victuallis and provisioun, addres thame to convene the tent day of Marche nix to cum for persute and invasioun of the rebellious subjectis, dissobedientis to our soverane lordis authoritie, eftir the forme of ane act to be extendit heirupoun, under the pane of tinsall of lyff, landis and gudis.