[1567/8/1]*[print] [email] [cite] [preceding] [following]
[1567/8/2]*[print] [email] [cite] [preceding] [following]
The quhilk day, in presence of the lordis of secreit counsall, nobilitie, spiritualitie, commissaris of burrowis and baronis convenit within the tolbuyth of the burgh of Edinburgh, wes presentit ane commissioun, subscrivit be the quenis majestie, oure soverane lordis dearest moder, and under hir hienes previe seill, of the dait at Lochlevin, the xxiiij day of July last bipast, quhilk wes opinlie red, the tennour quhairof followis: Marie, be the grace of God, quene of Scottis, to all and sindrie oure jugeis and ministeris of oure lawis, liegis and subdittis quhome it efferis, to quhais knawlege thir our lettres sal cum, [greting]. Forsamekill as eftir lang, greit and intollerabill panis and laubouris takin be us sen oure arryvall, etc., as is expressit at lenth in the act abonewrittin, maid the xxv day of Julii last bipast.
Eftir the publict reding of the quhilk commissioun, and invocatioun of the name of God, the said nobill and mychty lord James, erll of Murray, etc., ressavit and acceptit upoun him the office of regentrie of oure soverane lord, his realme and liegis, and gaif his ayth for debtfull administratioun thairof, eftir the forme and tennour of the said commissioun in all points, of the quhilk ayth the tennour alswa followis:
I, James, erll of Murray, lord Abirnethie, etc., promeissis faythfullie, in the presens of the eternal, my God, that I, induring the haill cours of my lyff, sall serve the same eternall, my God, to the uttirmest of my power, according as he requirit in his maist halie word, revelit and contenit in the new and auld testament; and according to the same word sall manteine the trew religion of Jesus Chryst, the precheing of his holy word, and dew and rycht administratioun of his sacramentis, now ressavit and practizit within this realme; and sall abolische and ganestand all fals religioun contrair to the same; and sall rewle the people committit to my charge and regiment during the minoritie and les aige of the king my soverane, according to the will and command of God, revelit in his foirsaid word, and according to the lovabill lawis and constitutionis ressavit within this realme, na wayis repugnant to the said word of the eternal, my God; and sall procure to my uttirmest to the kirk of God and haill Cristiane people trew and perfyte peace in all tymes cuming; the richtis and rentis, with all just privilegis of the realme of Scotland, I sall preserve and keip unviolat, nather sall I transfer nor alienat the samyn; I sall forbid and repres in all estaittis, and all degreis, reiff, oppressioun and all kynd of wrang; in all jugementis, I sall command and procure that justice and equitie be kepit to all creaturis without exceptioun, as he be mercifull to me and you that is the Lord and fader of all merceis; and out of this realme of Scotland and impyre thairof I salbe cairfull to rute out all heretykis and ennemeis to the trew worschip of God, that salbe convict be the trew kirk of God of the foirsaidis crymes; and thir thingis abone writtin I faythfullie affirme be this my solempnit ayth.
[1567/8/3]*[print] [email] [cite] [preceding] [following]
Forsamekill as the quene, moder to oure soverane lord the king, the tyme of hir subscriptioun of the commissioun and lettres of procuratorie, by the quhilk scho dimittit and renunceit the governament of this realme in the favouris of oure said soverane lord, considderand that be ressoun of his tendir yowth he wes nocht of abilitie of his awin persoun to administrat in his kinglie rowme and governament as wes requisit, and knawing the peax, unitie and tendirnes of blude standing betuix him and hir dearest bruther James, erll of Murray, lord Abirnethie, of quhais affectioun and kyndlie lufe towartis his majestie and the commoun weill of this realme scho wes and is maist assurit; in respect quhairof, as of the certanty of hir said brotheris sufficiency and gude qualificatioun, hir grace, be hir lettres alsua subscrivit with hir hand and under hir previe seill of the dait abonewrittin, maid, namit, appointit, constitute and ordanit him regent to hir said dearest sone, this realme and liegis thairof, during his minoritie and les aige, and ay and quhill he be of the aige of sevintene yeris compleit, willand that he be callit during the said space regent to oure soverane lord, his realme and liegis, with power to hir said derrest bruther, in name, authoritie and behalf of oure said soverane lord, to use and exerce the said office of regentrie in all thingis, privilegis and commoditeis pertening thairto, siclike als frelie and with als greit libertie as ony regent or governour to the quene or hir predicessouris usit in ony tymes bigane, lyke as at mair lenth is contenit in the commissioun foirsaid past thairupoun, of the dait the xxiiij day of Julii last bipast; quhilk befoir, and in the tyme of oure soverane lordis coronatioun solempnizat upoun the xxix day of the said moneth, wes red, considderit, fund gude and expedient, and be the estaittis than convenit ratiftit, approvit and condiscendit unto. Sen the quhilk tyme, at the plesour of almychty God, the said nobill lord returning to this realme, his native cuntre, considdering the quenis deliberat will and mynd, nocht onelie be hir saidis commissionis bot alswa be hir awin mouth and voce, that he sould accept the said office and charge, for obedience thairof, and movit of the naturall and entiere affectioun quhilk he beris towart the weilfair and preservatioun of oure said soverane lord and commoun weill of this realme, hes acceptit and ressavit the charge and office of regentrie upoun his persoun, and hes gevin his ayth in presens of the lordis of secreit counsall for debtfull administratioun thairof to the plesour of God, oure soveranis honour and commoditie of all the gude subjectis of this realme. Thairfoir, ordanis lettres to be direct to mak publicatioun heirof be oppin proclamatioun at the marcat croce of Edinburgh, and all utheris marcat croces of the heid burrowis and schyris of this realme and utheris places neidfull, that nane pretend ignorance of the samyn; and to command and charge all and sindry the liegis and subdittis quhatsumevir to reddelie answer, intend and obey to the said lord regent in his said office and charge of regentrie during the said space of oure soverane lordis minoritie, and to nane utheris, siclike as ony princes or utheris governouris and regentis hes bene obeyit in tymes bigane, under the pane of tressoun; certifeing all and quhatsumevir personis that dois in the contrair, resistand oure soveranis authoritie and dissobeyand the said regent, thay salbe repute and haldin as plane ganestandaris of his majesteis authoritie, and salbe puneist thairfoir with all regour in exempill of utheris.