[1540/12/92]*[print] [email] [cite] [preceding] [following]
Item, it is statute and ordanit that, becaus mennys selis may of aventure be tint, quhairthrow grett hurt may be generit to thaime that aw the samin, and that mennis selis may be fenyeit or putt to writtingis eftir thair deceise, in hurt and prejudice of oure soverane lordis liegis, that therefor na faith be gevin in tyme cuming to ony obligatioune, band or uther writting under ane sele without subscriptioune of him that aw the samin and witnesses, or ellis, gif the party can nocht write, with the subscriptioune of ane notary tharto.
[1540/12/93]*[print] [email] [cite] [preceding] [following]
Item, it is statute and ordanit that the committaris of the crymes of fyre rasing and revesing of wemen be putt under souirtie to the law, like as the crymes of slauchter and mutilatioune, and in caise of nonfinding of souirtie, to denunce thai rebellis, lik as men slaaris. And als becaus the birnyng of cornis in barnyardis is sa grett offence aganis the commoune weill that, therfore, thair be never respitte nor remissioune gevin in tyme to cum to ony personis that byrnis cornis in stakkis or barnis, bot the committaris therof to be justifiit to the deid or banist the realme for evir.
[1540/12/94]*[print] [email] [cite] [preceding] [following]
Item, anent the artikule maid to provyde how the auld actis and statutis maid aganis thame that dois contrar the kingis privilege, grauntit to his predecessouris and successouris be the sege† of Rome, and specialie temporale men that ar, contrar the saidis actis, in lychtling of the kingis autorite, makis finance and furnessing to the personis brekand and hurtand oure soverane lordis privilege, and quhat ordoure salbe takin aganis Scottis clerkis remanand in Rome that standis contrar oure soverane lordis privilege, it is statute and ordanit in this present parliament that the statute and actis maid tharupoune of before aganis thame passand contrare oure said soverane lordis privilege be observit and kepit intyme tocum, and that dittay be takin upoune the brekaris of ony of the saidis actis to underlie the law for the samin the thrid day of the nixt justice air of the schire quhair the brekaris duellis, or upoune xv dais warnyng befor oure soverane lordis justice principale or his deputis, quhene and quhaire thai salbe summond thareto be oure soverane lordis lettres, swa that justice sall extremely be done upoune thame passand incontrare the privilege grantit to the kingis hienes and brekand the actis and statutis maid tharupoune eftir the forme and tennour thairof.
[1540/12/95]*[print] [email] [cite] [preceding] [following]
Item, anent the artikule proponit, forsamekle as oft tymes young personis deis that may nocht mak testamentis, the ordineris usis to gif thair executoriis dativis to thair gudis, quhilkis intromettis tharwith and withdrawis the gudis fra the kyn and freindis that suld have the samin be the law, it is statute and ordanit be the thre estatis of this present parliament that quhair ony sic persoune deis within aige that may nocht mak thair testamentis, the nerrest of thair kin to succeid to thaim sall have thair gudis without prejudice to the ordineris anent the coite of thaire testamentis.
[1540/12/96]*[print] [email] [cite] [preceding] [following]
Item, it is statute and ordanit be the thre estatis of this present parliament that na legat nor legatioune be ressavit in this realme bot be avise of oure soverane lord and understandin be thame for the commoune weill of the samin conforme to the auld actis of parliament maid thairupoune of before.
[1540/12/97]*[print] [email] [cite] [preceding] [following]
Item, becaus of the grete repairs in Edinburgh throw resorting of oure soverane lord, his liegis and utheris strangearis, and it is necessar that thai be providit of breid, gude and sufficient stuff, tharefore it is statute and ordanit that thair be wokly thre market dais for selling of breid within the said toune, that is to say Monunday, Wednisday and Friday owklie, upoun the quhilk dais it salbe lefull to all oure soverane lordis liegis, baith to burgh and to land, to cum upoune the said market dais to the said toune and sell thaire breid for reddy money without truble or injuris to be done to the personis cumand with thair breid to the effects forsaid.
[1540/12/98]*[print] [email] [cite] [preceding] [following]
Item, it is statute and ordanit that thare be thre merket dais owkly in the said toune for selling of flesche, that is to say Sonday, Monunday and Thurisday owkly. All maner of personis, baith to burgh and to land, salbe fre to cum and sell flesche for reddy money for the furnessing of oure soverane lord and his liegis and utheris reparand to the said toune.
[1540/12/99]*[print] [email] [cite] [preceding] [following]
Item, forsamekle as it was statute and ordanit of before that na talloune suld be had furth of the realme for the eschewing of derth of the samin, nottheles the talloune is caryit furth in grett quantite, quhilk has rasit excedand derth in the cuntre, puttand the stane of talloune to ane double price or abone, tharefore, it is statute and ordanit in this present parliament that na persoune nor personis tak upoune hand in tyme tocum to cary ony talloune furth of the realme under the pane of tinsale of all thair gudis movable cumand incontrar hereof, and that all custumaris at every port of the realme quhair schippis ar frauchtit mak sercheouris to serche and seke all schippis, and quhaire ony talloune beis schippit or brocht to the schippis to be caryit furth of the realm, to eschete the samin, that is to say, that ane haif to thair awine use that apprehendis the talloune and that uther haif to oure soverane lordis use; and that the custumaris mak compt hereupoune yeirlie in the chekker and als that thai adverteis oure soverane lordis thesaurar of the personis, awnaris of sic talloune eschetit, sua that he may inbring the remanent of thair gudis movable to oure soverane lordis use for thair contemptioune; and in likwise, that na maner of man, fleschar nor utheris to burgh nor to land tak upoune hand to rynd, melt nor barrell talch under the pane of tinsale of all thair gudis.
[1540/12/100]*[print] [email] [cite] [preceding] [following]
Item, forsamekle as diverse wikkit, evill avisit personis fenyeis and compterfutis oure soverane lordis money, quhilk may returne to the grett dampnage of this realm without remeid be providit tharerfor in tyme, tharefore it is statut and ordanit that all provestis, aldermen, ballies and officiaris of burrowis serche and seik upoune all markett dais and uther tymes necessar all personis that can be apprehendit havand false money or conterfutis the kingis irnis of cunye, and bring or send thame to oure soverane lordis justice to be justifyit for thare demerits efter the forme of the lawis of the realme maid aganis false cunyeouris.
[1540/12/101]*[print] [email] [cite] [preceding] [following]
In the first, for the honour of God and Halikirk, oure soverane lord, with avise of the thre estatis, ordanis that the fredomes, liberteis, privelegis and immuniteis of Halikirk and all spirituale personis be observit and kepit in honour, worschip and dignite for the tyme of oure soverane lord that now is, lik as has bene in the tyme of his maist noble progenitoris of gude mynd of before, with this additioune: that forsamekle as quhene prelaciis, sic as bischoprikis or abbacyis, happinnis to vaik, the nominatioune thereof pertenis to oure soverane lord and the provisioune of the samin to oure haly fader the paip, nevertheles, evill disposit personis in trublus tymes has putt handis and takin bischoppis castellis, palicis and fortalices at thair awne hand, be thair awine autorite and but oure soverane lordis command, consent or lettrez at tymes quhene bischoprikis vaikis and utheris, and inlikwise enteris in abbayis and takis thame and puttis the samin in keping in secular mennis handis but consent, command or lettrez of the kingis grace and als but command, avise or desire of the conventis of sic abbayis, in high displessour of God almychtie, oure haly fader the paip and in his contemptioune of oure soverane lordis autorite, quhairthrow the kirk and kirkmen ar hevelie hurt and dampnagit; tharfore, it is statute and ordanit in this present parliament that quhatsumever persoune or persounis in ony tyme tocum takkis ony bischoppis places, castellis or strenthis, or enteres be thare awine autorite in abbayis, to hald tha places but oure soverane lordis command, lettres or chargis or desire of the conventis therof at tymes quhene sic bischoprikis or abbacyis vaikis, or any uther tyme, tha nocht vaikand, but the kingis autorite, thai sall incure the cryme of tresoune and lese majestie and salbe callit tharefor at the kingis plessour upoune thair forfaltour, and to tyne thair lifis, landis, heretagis and gudis, movable and unmovable, honour and officis, becaus the kingis grace is haldin and bundin to defend Halikirk and kirkmen in thair just causis.
[1540/12/102]*[print] [email] [cite] [preceding] [following]
Item, oure soverane lord hes ordanit that the actis of parliament maid be his hienes be publist outhrowith all his realme and that all schireffis, stewartis, ballies, provestis and ballies of burrowis and utheris his liegis may have the copyis therof and pretend na ignorance throw misknawing of the samin, has ordanit his clerk of registri to mak ane auctenty extracte and copy of all the saidis actis safar as concernis the commoune wele under his subscriptioune manual, to be imprentit be quhat prentar it sall pleise the said clerk of registri to cheise, and it sall nocht be lesum to ony uther prentar nor writar to imprent nor write the samin within this realme or outwith the samin, or bring hame to be sauld, for the space of vj yeris nixt tocum, under the pane of confiscatioune of the samin, providing alwayis that the said prentar to be chosin be the said clerk of registri as said is have oure said soverane lordis speciale licence thairto.