[1540/12/77]*[print] [email] [cite] [preceding] [following]
Item, for eschewing of inconvenientis that oft and diverse tymes happinis in this realme of the new inventit craft and falsett committit and done dalie be thame that sellis thare landis or disponis the samin ex titulo oneroso that puttis thair barnis or uther frennd and persoune in stait of the samin before the dait of the selling or geving therof to utheris as said is, herefore, it is statute and ordanit that quha sellis and disponis ony landis or annuell rentis to any maner of persoune for ony cause quhaire warrandice may fall and puttis utheris in private stait therof, nocht be resignatioune in the kingis graces handis, nor be confirmatioune with precept pass furth of the chancelarie, nor be plane resignatioune in the ouerlord handis or confirmatioune of the ouer lord, and the persoune that happynnis to gett thair landis and broukis the samin peceablie yeir and day be labouring, manuring and uptaking of the malis, proffittis and dewiteis and sa kennyt heretable possessour therof yeir and day, the persoune or personis havand privait stait and saising of the saidis landis sall never be hard to clame the samin aganis the secund heretable possessour for ony cause, bot to persew his interesse aganis the principale gevar and his airis, and the persoune, sellar or gevar, to be callit and declarit infayme at the kingis graces instance, and to be punist in his persoune and gudis at the kingis grace will and plesour; and gif the ouerlordis ressavis dowble resignationis wittandlie to the effecte abone writtin, thai to be punist siclik, and this acte to be extendit to thame that makis dowble assedationis and dowble assignationis.