[1540/12/9]*[print] [email] [cite] [preceding] [following]
Item, the kingis grace, with avise and consent of the thre estatis of parliament, forsamekle as thare was diverse statutis, constitutionis and actis maid in the last parliament for the honour of God and Halikirk, wele of oure soverane lord, zele of justice and concerning the commoune wele of this realme and liegis therof, quhilk remanit at that tyme unpronuncit and auctorizate be his grace and thre estatis, tharefor hes divisit, statute and ordanit that the saidis actis be now pronuncit in his hienes presens and thre estatis, swa that the samin may be kepit in tyme tocum as law in this realme, with auctorite of the hale body of parliament, off the quhilkis statutis the tenouris are precedant.
[1540/12/10]*[print] [email] [cite] [preceding] [following]
We, James, be the grace of God, king of Scottis, understandand clerlie the privilege of the canoune law, actis and statutis of oure realme, providit and gevin to the succours† of all maner of personis to revoik, cassis and adnull all thingis done be thame in thare youthheid and lesse aige, quhare throw thai ar gretlie and hevilie dampnagit and scaithit in thare heretagis be imprudent alienationis, donationis and venditionis of the samyn, and that thai may at thar perfite aige revoik the samin of all thingis done be thame prejudiciale in thair menorite and lesse aige and, tharefor, oure predecessouris, kingis of Scotland, at thar perfit aige of xxv yeris past hes, in tymes bigane, maid revocatioune of all sic thingis that hes bene done be thame in hurt and detriment of thare crowne, landis, rentis and possessionis pertening to the samin, and uther thingis quhare intill thai, be circumventioune, war dampnagit and scaithit, maid thair revocatioune cassand and adnulland all sic giftis, alienationis and donationis; herefor, we, at oure perfite aige of xxv yeris byrunnyn, beand for the tyme furth of oure realme in the partis of France, maid oure generale revocatioune schortlie at Rowane, the thrid day of Aprile, the yeire of God jM vC xxxvij yeris, as at mare lenthe is contenit in one instrument maid tharupoune subscrivit with the hand of Maister George Cuk, notare publicte, off the quhilk the tenour followis:
We, for certane grett and resonable causes moving ws and haifand respecte to the welle of oure croune and commoune wele of oure realme, revokis all maner of giftis, infeftmentis and dispositionis quhatsumevir we haif maid, or hes bene maid, be our tutouris and governouris for the tyme during oure minorite and lesse aige, in quhatsumevire cause or caise that thai man cum under revocatioune be the commoune law or consuetude of oure realme, protesting solempnitlie that oure absence furth of the samin at this tyme and the solempniteis requirit on that behalf nocht being done be to ws na prejudice anentis the said revocatioune,† with the quhilkis we dispence and suppleis all faltis tharwith be oure kinglie power and auctorite riale, and will that this stand for oure generale revocatioune of all maner of thingis done be ws or oure saidis tutouris, and the samin to be extendit in the maist ample and large forme as ony utheris revocationis maid be oure maist nobill fader or oure progenitouris kingis of Scotland. The quhilkis oure said generale revocatioune we, in this present parlliament, with the avise and consent of oure thre estatis, ratifiis and apprevis, and yit as eftir followis revoikis, cassis and annullis in generale and als in speciale.
In the first, we revoik, cassis and adnullis all infeftmentis, donationis, alienatiounis and dispositionis maid be ws, oure tutouris or governouris or regentis in oure lesse aige in ony maner of way in fee, fewferme or franktenement of ony landis, lordschipis, custumes, annuellis, fischeingis, burrow malis and castell wardis annext to oure croune or ony part therof, als weill gevin be oure fader, quhem God assolye, as be ws to ony persoune or personis incontrar the actis maid tharupoune of befor, to be reducit agane to ws and to oure croune be vertu of the actis and statutis maid of annexationis and eftir the forme of the samin.
Item, we revoik all alienationis of ony rentis, landis and heretagis annext to the principalite and to the prince,† secund persoune of the realme, maid be ws in maner forsaid.
Item, in likwise we revoik, cassis and adnullis all donationis, alienationis, fewfermes and giftis quhatsumevir in lifrent or uther wayis in oure nonaige, of the landis, rentis, annuellis or ony uther revenois that oure fader had in his possessioune the tyme of his deceise, be gift or utherwayis, and of all offices sic as chalmerlawris, ballieriis and custumaris maid for ma yeris bot fra one chakker quhill the compte be maid in the nixt chakker therefter followand, and als all assedationis and takkis maid for longer termes nor five yeris.
Item, inlikwise we revoik and cassis all talyeis maid fra the airis generale to the airis male of ony landis within or realme aganis the law and gude conscience.
Item, we revoik all new infeftmentis of landis gevin in blanchferme that war haldin of ws of befor be service of ward and releif.
Item, we revoik all regalitiis and confirmationis of the regaliteis, and of all offices gevin be ws in heretage or be oure fader aganis the actis and statutis that na regalite suld be gevin in heretage without avise and deliberatioune of the hale parliament.
Item, we revoik all alienationis maid of ony heretages in oure nonage that become lauchtfullie in oure handis be resoune of forfaltoure, bastardrie or uther wayis, and lifrentis gevin therof in oure minorite.
Item, we revoik all new creationis of landis and baroneis and annexationis and unionis of diverse landis into fee in prejudice of oure dew service aucht to ws and oure progenitouris of befor. And siclik we revoik all dischargis of service of sutis of courtis aucht of auld to oure progenitouris.
Item, we revoik all new infeftmentis gevin of creatioune of baronis in the landis and lordschipis annext to oure crone.
Item, we revoik all giftis and confirmatiounis gevin be ws of quhatsumevir landis and heretages be evill and fals sucgestioune be the expreming of ane fals cause, quhare gif thai had bene expremitt ane trew cause and the verite, we had nocht gevin the samin and, therthrow, we ar gritumlie and enormlie hurt.
And generalie we revoikes, cassis and adnullis all and quhatsumevire thingis done be ws in oure lesse aige in detriment and harms of oure saule and conscience, hurting of the privilege of our crowne, prejudiciale to the samin and to ws in oure patrimonie therof, and quhat the commoune law and consuetude of oure realme levis ws to revoik. And this oure revocatioune to be of als grett effecte and als largelie extendit, in generale and in speciale, as ony revocationis maid be ony oure progenitouris, kingis of Scotland, of befor, and specialie be oure darrest fader of gude mynd, quhem God assolye, and King James the Secund. And protestis, suppois we, of oure favoris and benevolence, suffer ony persoune or personis to use or posside ony privilegis or possessionis of landis, rentis and offices that ar fallin under oure revocatioune, it sall mak na rycht to the usaris or halderis therof, bot it sall be lefull to ws to put our handis tharto quhene evir it sall pleise ws, but ony contradictioune be vertu of oure said revocatioune, actis and constitutionis of our realme maid of befor.
[1540/12/11]*[print] [email] [cite] [preceding] [following]
Item, it is statute and ordanit for augmenting, strenthning and helping of the acte maid upoun cursit folkis and geving of the kingis lettres thareupoun, and to meit frivole appellationis, that the kingis lettres sall haif place to poynd and distrenze etc., supposis it be dewlie appelit, yere and day being bipast, the appelland nocht bringand hame his commissioun within yeire and day cessante justo impedemento; and the party quhomefor the kingis lettres sall happin to be gevin, findand sufficient cautioune befor the lordis of counsale to refound the gudis and geir that sall happin to be poyndit be vertu of the saidis lettres, geif it sall happin the sentence quhare upoun the saidis lettrez salbe gevin to be retretit be the juge delegate, notwithstanding ony appellatioun therfra, the party appellatioune being warnit and callit to hear the souritie and cautioune tane and that the party appeland schawand befor the saidis lordis the sentence retractatoure, lettres be directed to poynd the saidis soureteis therfor.
[1540/12/12]*[print] [email] [cite] [preceding] [following]
Item, in the first, it is statute and ordanit that the auctorite of Halikirk be mantenit and defendit in all thar prevelege and liberteis as thai haif bene in oure sovirane lordis tyme that now is and his predecessouris, kingis of Scotland, of maist nobill mynd bipast.
[1540/12/13]*[print] [email] [cite] [preceding] [following]
Item, for the manteining of justice and putting of gude ordour tharto outhrouch all this realme, it is statute and ordanit that all stewartis, balyeis and schireffis hald all thare thre heid courtis be thame self in proper persoune, without thai haif just and lauchtfull excuise throw being in the kingis grace service and to testife the samin be his gracis writting, or throw seiknes that thai may nocht travell. And that the kingis grace auctorite be nocht lychtleit and his liegis want detfull administratioune of justice, it is siclik statute and ordanit that all baronis and fre halderis that aw sute and present in the saidis courtis be thare personalie and the absentis to be amerciate with all rigour; and quham that aw bot sute, that thai send thare sutouris, honest and qualifeit men hable to decide upoune ony cause conformand to the said law, and that the saidis schireffis, stewartis and balyeis admitt nane utheris, as he will ansuer to the kingis grace; and quha that cumis to the court, that he ansuer for himself and remane quhill the samin be done and endit, and to pass upoune inquestis and assise and assist to the kingis schireffis, stewartis and balyeis in the administratioune of justice and doing of thare offices and service conforme to thare infeftmentis as thai will ansuer to the kingis grace upoune thare utirmest charge.
[1540/12/14]*[print] [email] [cite] [preceding] [following]
Item, becaus oure sovirane lord hes bene and is of gude will and mynd to haif justice schortlie done to all his liegis, sua that throw lang proces his liegis be nocht lang tareit and vext in grett expense, tharefor, has statute and ordanit that all schireffis and temporale jugis sall in tymes cuming, in all personalle actionis, sett thare court peremptourlie upoune xv dais and directe thare preceptis tharupoune, and at the said day proceid summerly et de plano, the party being warnit upoune xv dais, and mak sic processes in all thingis as is usit befor the lordis of counsale and sessioune, notwithstanding ony said lawis or constitutionis maid tharupoune of befor; and all utheris materis and actionis to haf sic processes as thai haif haid in tymes bigane.
[1540/12/15]*[print] [email] [cite] [preceding] [following]
Item, that all schireffis and utheris officiaris of the kingis within this realme mak thar deputis, ane or may, gude and wise substancius men of best fame, knawlege and understanding and experience within the schirefdome and lest suspected, for quhem thai sall ansuer, for universale administratioune of justice to all personis indifferandlie, and that thai cause thare deputis to be maid, creatt and suorne in plane court and ane actis maid tharupoune; and geif thai continew thare deputis langer than for ane yeire, that thai cause thame yerlie to be sworne to thare offices for the administratoune of justice at the heid courtis eftir Michellmess.
[1540/12/16]*[print] [email] [cite] [preceding] [following]
Item, that all schireffis, stewartis and balyeis cause thare maris and officiaris quha sall execute the kingis lettres and chargis, or thare awin preceptis, to haif ane signet and in it gravit the first lettre of thare name or first of thare surname, or ellis sum uther thing that salbe universale knawin to be thare signet, with the quhilkis thai sall signett all lettrez and preceptis execute be thame and indorsaited in times tocum; and that na indorsatioune sall haif faith nor be admittit bot thai ar signet with the saidis signettis; and siclik that all officiaris of the kingis haif thare signettis in maner forsaid and signett all lettrez and chargis executed and indorsaited be thame under the pane of deprivatioune of thame fra thare offices that makis any sic executionis without thare signettis forsaid, and gif any of thare executionis wantis thare signet, the samin sall haif na faith.
[1540/12/17]*[print] [email] [cite] [preceding] [following]
Item, for eschewing of grett inconvenientis and fraude done to oure soverane lordis liegis be summoning of thame at thare duelling places, and oft tymes falslie, and gettis never knawlege therof, it is statute and ordanit that in tymes cuming, quhare any officiar or schireff in that part passis at the command of the kingis lettrez or the schireffis, stewartis, baronis or balyeis precepte to summond any party, geif thai can nocht apprehend thame personalie, thai sall pass to the yett or durr of the principale duelling place quhare the persoune to be summond duellis and has thair actuale residence for the tyme, and thare sall desire to haif enteres, quhilk, gif it be grantit, thai sall first schaw the cause of thare cuming, and gif thai can nocht gett the party personalie, thai sall schaw thare lettres or precepte befor the servandis of the house or uther famouse witness and sall execute thare offices and charge, and thereftir sall offir the copy of the saidis lettrez or precepte to any of the servandis, quhilk, gif thai refuse to do, that thai affix the samin upoune the yett or dure of the personis summondit; and siclik, gif thai gett na enteres, thai first knokand at the dure vj knokis, thai sall execute thare office befor famouse witnesses at the said house and duelling place and affixt the copy upoune the yett or dure therof as said is, quhilk salbe lauchtfull and sufficient summoning and delivering of copy, and the party nor officiar sall nocht be haldin to gif ony uther copy bot at thare awin plesoure; and every officiar in his indorsatioune sall mak metioune of his executioune in maner forsaid; and the party at quhais instance the lettre or precept is directed sall pay to the officiare executour the expense of the copy affixt as said is, and salbe taxt and gevin agane to him at the geving of the decrete or sentence gif he happinnis to optene; and gif the officiar beis fundin culpable in the executioune of his office, he salbe put in oure soverane lordis presoune and punist in his persoune and gudis at the kingis grace will.
[1540/12/18]*[print] [email] [cite] [preceding] [following]
Item, anentis scribis and notaris, baith to land and burgh, becaus it is understand to the kingis grace that the multitude of thame generis ane grett confusioune, mony falsettis ar committit, for the remeid hereof, it is statute and ordanit that every schireff, with sic personis as sall pleise the kingis grace to adjone to thame, sall call befor thame all notaris that ar lawit men within his schirefdome and boundis of his office and exame thame, and quha that ar haldin to be famous and abill men to execute the office, that thai be admittit be ane acte in jugement, and that the said schireff haif ane buk and gar thame that are admittit writt thare subscriptioune and signis manuale in the said buk, siclik as thai subscrive all instrumentis and as thai will use in tymes cuming, and to discharge all utheris excepte thame that ar writtaris, notaris and scribis in oure soverane lordis courtis of justice, baith civile and temporale, quha salbe admittit be the chanceler, president and lordis of counsale; and quha eftir the said discharge makis any instrument, the samin salbe of nane avale and haif na faith, it beand opponit be the party and nocht beand provin in the contrar that the said notar is admittit as said is; and that all ordineris cause siclik to be done upoune all notaris that ar spirituale men within thare diocy; and quha that happinis to be maid notaris in tymes tocum, that thai use nocht the said office of notary unto the tyme thai cum befor the schirref or ordiner and gett thare admissioune, subscrive and put thare signis in the saidis bukis as thai will use in times tocum, with certificatioune to thame and thai falye, thare instrumentis salbe of nane avale and mak na faith.
[1540/12/19]*[print] [email] [cite] [preceding] [following]
Item, it is devisit, statute and ordanit, for eschewing of inconvenientis of the geving of sesingis be private notaris quhais names ar oft times unknawin and thare prothogollis can nocht be gottin in caise the principale instrument be tint, distroyit, subtractit and halding away, for eschewing hereof, that all sesingis be gevin in tymes cuming be the schireff clerk or his deputis, quhame for he sall ansuer, and be nane utheris, upoune all preceptis that passis be the chancelarie, and all utheris sesingis to be gevin be famous notaris admittit tharto and be nane utheris.
[1540/12/20]*[print] [email] [cite] [preceding] [following]
Item, becaus thare is in the acte precedand gritt cridence and faith to be gevin to the notaris and clerkis of court, it is statute and ordanit that all schireffis, stewertis, balyeis and utheris, baith to burgh and to land, present thare clerkis and notaris in presens of my lord chanceler, presedent and lordis of counsale, to be examinated, suorne and admittit, providing awayis that quha hes power to cheise clerkis or notaris that thai ma chanch or cheise as thai pleise, and quha that beis new chosin, to be presentit and admittit as said is.
[1540/12/21]*[print] [email] [cite] [preceding] [following]
Item, anentis the acte of parliament maid of auld quhare it is ordanit that all schireffis bring with thame at thare chekker comptis anis in the yeir ane buk contenand all sesingis gevin be thame, at the lest the day, the moneth of the gevin of the said sesing and the name of the landis contenit in the samin be ekit in this maner, that the clerk of court cum with the said schireff or his deputis in every chakker and bring the said buk with him, subscrivit with his awin hand and signe manuale, that the samin may remane in the register sua that the kingis grace may knaw his tenentis and all utheris haifand interes may haif recours tharto.
[1540/12/22]*[print] [email] [cite] [preceding] [following]
Item, for punisment of fals notaris and of thai that beris fals witnesse or that inducis ony man to bere false witnesse, and siclik of thame that makis fals instrumentis or cause mak ony false instrumentis or usis the samin wittandlie, that all sic personis in tymes cuming be punist in thare personis and gudis with all rigour, siclik as is providit be the dispositioune of the commoune law, baith canone, civile and statutis of the realme.
[1540/12/23]*[print] [email] [cite] [preceding] [following]
Item, for eschewing of the grett inconvenientis that dalie occurris in the reducing of the processes led befor schireffis, stewartis and balyeis of burrowis and regaliteis and baronis quhare thare is oft times producit and schewin instrumentis contrar to utheris, that is to say, the instrumentis and actis maid be the scribe of the court berand ane way, and instrumentis tane in uther notaris handis berand ane uther way, and oftimes allegiance that was nevir hard nor understand to the juge, his assisouris or utheris membris of court; tharefor, in tymes cuming, it is statute and ordanit that all instrumentis, notis and actis be maid and tane in the handis of the scribe and notar ordiner of the court or his deputtis, and gif ony party will haif ane notar with him for mair securite, at that notar pass and stand within bar, in quhais handis it salbe lefull to ony party to tak documentis, togidder with the notar of court, and that ilk ane of thame be insert witnesses to utheris, with ane parte of the maist famouse personis, assisouris or utheris membris of court being within bar, with sic uther honest men as ar present; with certificatioune gif this forme and fassioune be nocht kepit, that the instrument takin in ony utheris notaris handis nor the scribe of court sall haif na faith; and gif the notar and scribe of court refusis to giff instrumentis, actis or notis to ony personis desirand the samin, he sall tyne his office and salbe callit and punist in his persoune and gudis at the kingis grace will.
[1540/12/24]*[print] [email] [cite] [preceding] [following]
Item, anent the artikule gevin in be the schireffis that quhare thai haif thare offices in heretage and gritumlie hurt be geving of commissionis to utheris officiaris in caises pertenand to thare offices, and for remeid therfor, the kingis grace, with avise of his thre estatis, has ordanit that na commissioune be gevin in tymes cuming for serving of brevis, apprising of landis bot to the juge ordiner; and gif ony party sall happin to gif in ony complant for the getting of the commissionis for ony cause that is resonable, the said commissioune sall nocht be grantit unto the tyme the said schireff, stewart and balye be warnit to here the commissioune gevin, or ellis to allege ane resonable cause quhy the samin suld nocht be gevin.
[1540/12/25]*[print] [email] [cite] [preceding] [following]
Item, tuiching the artikule of lesing makerris to the kingis grace of his baronis, grett men and liegis, and for punisment to be put to thame tharefor, the kingis grace, with avise of his thre estatis, ratifeis and apprevis the actis and statutis maid tharupoune of befor and ordanis the samin to be put to executioune in all poyntis; and als statutis and ordanis that gif ony maner of persoune makis ony ewill informatioune of his hienes to his baronis and liegis, that thai salbe punist in sic maner and be the samin panis as thai that makis lesingis to his grace of his lordis, baronis and liegis.
[1540/12/26]*[print] [email] [cite] [preceding] [following]
Item, becaus it is understand and wele avisitlie considerit be the kingis grace and the thre estatis of his realme, beand assemlit in this present parliament, that the patrimonie of his croune and revenois therof being augmentit is the grett weill and proffitt baith to the kingis grace and all his liegis, and therfor it is thocht expedient that oure said sovirane lord, followand the gude exemple of his predecessouris, suld annex to his crone for the honorabill support of his estate riale in all aventouris and caises, baith in weir and paice, sic landis and lordschipis as ar now presentlie in his handis that ar nocht annext of befor, and the saidis landis being annext to remane perpetualie with the crowne may nowithir be gevin away in fee nor franktenement to ony personis, quhatevir estate or degre thai be of, without avise, decrete and deliverance of the hale parliament, and for the grett resonable cause concerning the welefair of the realme first to be avisit and degestlie considerit be the hale estatis; and albeit it sall happin oure sovirane lord that now is, or ony his successouris, kingis of Scotland, to annalie and dispone the saidis lordschipis, landis, castellis, townis, donationis and advocationis of kirkis and hospitalis, with thare partinentis, to the crowne as said annext, that the alienatioune and dispositioune salbe of nane avale, bot it salbe lefull to the king for the tyme to ressaif tha landis to his awin use quhen evir it likis his grace but ony proces of law, and the takerris sall refound and pay all proffittis that thai haif tane up of tha landis agane to the king for all the tyme that thai haif had thame, with sic uther restrectionis as is contenit in the actis of parliament maid be his maist nobill predecessouris, kingis of Scotland, in the annexatioune to the crowne; and, tharefor, his hienes, with avise and counsale of his thre estatis, hes annext to his crone to remane tharwith in maner forsaid thir landis eftir following:
In the first, the landis and lordschipis of all his Ilis, south and north; the tua Kintyris, with the castellis partening tharto and thare pertinentis; the landis and lordschip of Orknay and Yetland and the ilis pertening thareto and thare pertinentis; the landis and lordschip of Dowglas, with the castell, toure and fortalice therof, donationis and advocationis of kirkis and benefecis and thare pertinentis; the landis and lordschipis of Craufurd Lindesay and Crawfurd Jhone; the landis and lordschipis of Bonkill, Prestoune and Tomtallowne, with touris, fortaliceis, landis, rentis, advocationis and donationis of kirkis; the landis of Dunsire; the landis and lordschip of Jedburgh Forest; the landis and lordschip of Kerimure, with all thare pertinentis; the superiorite of all and hale the erledome of Anguis and all utheris landis, rentis and possessionis quhilkis pertenit to Archibald, sumtyme erle of Anguise the tyme of his forfaltoure and now being in oure said sovirane lordis handis be resoune therof; the landis and lordschip of Glammis that ar nocht haldin of the kirk; the landis of Baky, Balmukatyis, Tannadis, Drumgleis and Langforgund and Balhelweis, with the touris, fortalices, advocationis and donationis of kirkis and thare partinentis; the landis of Raclewch, Quhitcampt, Ovir and Nethir Howcleth; the landis, lordschip and baronie of Annendale, with the toure and fortalices therof, advocationis and donationis of kirkis, thare annexis and connexis and all thare pertinentis, siclik as umquhile James Hammiltoune of Fynnart, knycht, had and brokit the samin befor the tyme of his forfaltoure; the landis and lordschip of Liddisdale, with the castale and Armychtage, advocatioune and donatioune of kirkis and thare pertinentis, the landis and lordschip of Bothuile, with the toure, fortalice and thare pertinentis.
[1540/12/27]*[print] [email] [cite] [preceding] [following]
In presens of the kingis grace and hale thre estatis of parliament Maister James Foulis of Colintoune, clerk of register, prelocutour for oure sovirane lord, and at his gracis command, schew and declarit how thare is diverse domes of forfaltour gevin aganis diversis personis for crimes of lese majestie baith in parliament and justice courtis, and in speciale aganis Archibald, sumtime erle of Anguise, George Dowglas, his broder, and umquhile Archibald Dowglas of Kilspindy, thare eme, Jhone, sumtym lord Glamis, umquhile Schir James Hammiltoune of Fynnart, knycht, and umquhile Jhone Lyoune of Knokcany; and becaus the memour of tratouris suld remane to the schame and sclander of thame that ar cumin of thame and to be terrour to all utheris to commit siclik in tymes cuming, and becaus bukis may be tint and, throw oft handilling, be worne away, and utheris wayis the saidis domes of forfaltoure be distroyit, that therfor that all the saidis thre estatis wald think, geif it war expedient, that the saidis domes of forfaltoure war furth drawin of the bukis and auctentikly copeit and that the kingis grace suld append his grett sele tharto, and siclik all the thre estatis suld append thare selis to the samin for the fortificatioune, approbatioune and confirmatioune therof, the quhilk desire all the thre estatis thoycht verray resonable and be sensement of parliament thoycht the samin to be done and grantit to append thare selis to the auctentik extracte of all the saidis forfaltouris baith gevin in parliament and perticuler justice courtis. Than incontinent Maister Thomas Ballenden of Auchinnoschill, justice clerk to oure sovirane lord, producit the auctentik extractis of the domes of forfaltoure gevin aganis the said Jhone, sumtyme lord Glammis and Schir James Hamiltoun of Fynnart, knycht, and umquhile Jhone Lyoune of Knokcane, to the effecte that the samin may be put and registrate in the bukis of parliament to be extractit under oure said sovirane lordis sele and the selis of the thre estatis as said is. And attoure, our said soverane lord, with avise and consent of his said thre estatis, gaif command to the said Maistere James Foulis, clerk of his registri, to geif out the auctenty copy of the saidis domes of forfaltour to pass as said is under his grete sele and under the selis of his saidis thre estatis, off the quhilkis decretis of forfaltouris gevin in oure said soverane lordis justice courtis presentit as said is and subscrivit be the said Maister Thomas, clerk of justry, the tenour followis:
Curia justiciarie supremi domini nostri regis tenta et inchoata in pretorio burgi de Edinburgh, die Mercurii decimo octavo die mensis Julii, anno Domini millesimo vC trigesimo septimo coram nobile et potente domino Archibaldo, comite Ergadie, domino Campbell and Lorne, justiciario generali supremi domini nostri regis, sectis vocatis, curia affirmata, assisa Robertus, dominus Maxwell, Hugo, dominus Somervale, Willelmus, magister de Glencarne, Jacobus Gordoun' de Lochinver, Ninianus Crechtoun' de Ballibut', Johannes Malvile de Raith', miles, Johannes Hume de Coldounknowis, Gilbertus, comes de Cassillis, Hugo, magister de Eglintoun', Georgeus, dominus Seytoun', Johannes Striveling de Keir, miles, David Barclay de Matharis, Andreas, dominus Uchiltre, Jacobus Touris de Innerlet', miles, Alexander Fres[o]r de Phillort', Johannes, dominus Glammis, convectus de arte et parte proditorie concelationis, conspirationis et imaginationis, intoxicationis et distructionis nobilissime persone supremi domini nostri regis et de arte et parte cum Joneta Douglas, domina de Glammis, sua matre, in sua proditoria imaginatione, intoxicatione et distructione nobilissime persone supremo domino nostro regis, et propteria forisfecit suam vitam, terras et hereditates suas et omnia bona sua mobilia et immobilia tanquam eschaeta supremo domino nostro regi secum et suis successoribus pro perpetuo remansur'. Curia justiciarie supremi domini nostri regis tenta et inchoata in pretorio burgi de Edinburgh, die Lune xvjo die mensis Augusti, anno Domini jM vC quadragesimo, coram nobili et potente Domino Archibaldo, comite Ergadie, domino Campbell et Lorne, justiciario generali supremi domini nostri regis, sectis vocatis, curia affirmata, assisa Georgeus, comes de Huntlie, Jacobus, comes de Arrane, Willelmus, comes Mariscalli, Willelmus, comes de Montros, Gilbertus, comes de Cassillis, Johannes, comes Atholie, Hugo, comes de Eglintoun', Robertus, dominus Maxuell, Hugo, dominus Somervale, Henricus, dominus Methven, Malcomus dominus Fleming, Willelmus Cunynghame, miles, magister de Glencarne, Hugo, dominus Fresor de Lovat', Willelmus Lauder urade Haltoun', Willelmus Cunynghame de Glengarnok, David Ramsay de Culluthe, Jacobus Dowglas de Drumlanrig, Robertus Moubray de Barinbowgall, Johannes Malvile de Raith', miles, Johannes dominus Lindesay de Biris, Jacobus Lundy de Balgony, Jacobus Hammiltoun' de Fynnart, miles, convictus de arte et parte proditorie sagittationis et emissionis machinarum extra palatium de Linlethqw et campanili eiusdem ad personam propriam supremi domini nostri regis et personas in comitiva sua pro tempore existentas tam tempore quo idem dominus noster rex venit ad oppidum de Linlethqw quam quo recessit ab eodem et specialiter ad hospitium suum in dicto oppido sua serenitate ibidem dictarum machinarum tempore emissionis personaliter et actualiter existente, et pro arte et parte proditorie imaginationis, inventionis seu consultationis vulgariter devising occisionis eiusdem supremi domini nostri regis tempore quo locutus est cum Archibaldo Dowglas et Jacobo Dowglas de Parkheid apud Capellam Sancti Leonardi prope Edinburgh post forisfacturam Archibaldi, olim comitis Angusie, Georgii Douglas, eius fratris, et dicti Archibaldi Douglas, sui patrui, et obsidionem castri de Tamptalloun' in consultatione vulgariter devising dictis le Douglass' qualiter ipsi intrarent per fenestrum prope partem superiorem thori, le Bedheid, in palacio suo prope monasterium Sancte Crucis et ibidem crudiliter intersectionem supremi domini nostri regis committerent et perpetrarent ac pro communi proditore et conspiratore contra ipsius personam nobilissimam suum regnum et ligeos et propteria laudum et judicium redditum fuit quod ipse Jacobus suam vitam, terras, redditus, possessiones ac omnia bona sua mobilia et immobilia supremo domino nostro regi amissit et forisfecit tanquam sua eschaeta secum et suis successoribus pro perpetuo remansur'.
[1540/12/28]*[print] [email] [cite] [preceding] [following]
Item, tuiching the first artikule anentis the wapinschewin, it is thoycht necessare that wapinschawingis be maid tuise in the yeire outthrowith all the realme, that is to say in the monethis of Junii and Octobere at sic day or dayis and place as sall pleise the schireff, stewart, ballies, provestis, aldermen of burrowis till assigne eftir the quantite of the schire, gif the monstouris can nocht be all tane on ane day, and that thai mak warningis tharto upoune the prominitioune of xx dais; and at the saidis munstouris be tane be the schireff of the scire, provest and balyeis of burrowis and balyeis of regaliteis and utheris commissaris quheme the kingis grace plesis to assigne to thame. And becaus thai haif bene sa lang out of use of making of wapingschawing, it is thocht expedient that the samin be maid thrise for the first yeire, and the first tyme to be on the morne eftir Laif Sounday nixt tocum.
[1540/12/29]*[print] [email] [cite] [preceding] [following]
Item, anentis the maner of cuming of all oure sovirane lordis lieges to weir, horsit and unhorsit, the kingis grace understandis the gret hurt, scaith and dampnage done in cuming of multitude of horsemen throw distructioune of cornis, medowis and hanyng of pure folkis, and als the grett impediment maid be thame in the host quhare that all men man fecht upoune fute, therfor has statute and ordanit that na maner of men haif horse with him bot be reddy to gang on fute fra the place that sall pleise the kingis grace to assigne to be the first meting and asembling of his army, excepte cariage horse alanerlie; and gif ony man cumis on horse back or bringis horse with him excepte for his cariage as said is, that he incontinent send his horse hame agane with ane rynand boy and with na sensable man or able of persoune to beir wapnis under the pane of deid. Providing awayis that albeit this acte is maid generale, the effecte therof sall nocht be extendit till erlis, lordis, baronis and grett landit men, bot that thai and sic utheris as salbe thocht expedient be the kingis grace or his lieutenentis sall pass on horse bak quhare evir the kingis grace movis with his army.
[1540/12/30]*[print] [email] [cite] [preceding] [following]
Item, as to the maner of harnes and wapnys and how every man suld be armit and wapnit, it is statute and ordanit that all oure sovirane lordis liegis haif wapnis and harnes as eftir followis: in the first, that every nobill man, sic as erle, lord, knycht and baroune, and every grett landit man haifand ane hundreth pund of yerlie rent, be anarmit in quhite harnes, lyt or hevy as thai pleise, and wapnit afferand to his honoure, and that all utheris of lawer rent and degre in the lawland haif jak of plait, halkrek or brigitanis, gorgett or pisane, with splintis, pansis of malye, with gluvis of plait or malye, and that all utheris oure sovirane lordis liegis, gentill men unlandit and yemen, haif jakkis of plait, halkrekis, splintis, sellate or stele bonet with pysane or gorgett, and every man with swerd, and that na maner of wapnis be admittit in wapinschawingis bot speris, pikis stark and lang of vj ellis of lenthe, leicht axis, halbortis, handbowis and arrowis, corsbowis, culveringis, tua handit swordis, and every man to be anarmit as said is under the pane of v lib. to be tane of every landit man, l s. of every gentill man and xx s. of every yeman man als oft as thai be fundin faltouse in the premissis. And becaus it is understand that thir wapnis and harnes may nocht be completlie gottin at the first wapinschawing, that is to say on the morne efter Leif Sounday nixt tocum, therfor, it is dispensit be the kingis grace at thai mak thare schawingis and monstouris with sic harness and wapnis as thai haif, or may convenientlie gett, agane the said day.
[1540/12/31]*[print] [email] [cite] [preceding] [following]
Item, it is ordanit for wapinschawingis in burrowis that every man haifand ane hundreth pundis wourth of geir be anarmit in quhite harnes and wapnit as landit men forsaid, and every man within ane hundreth pundis wourth of gudis and that may dispend ten pund be anarmit as gentil men landit and yemen men in maner forsaid and under the panis abone writtin.
[1540/12/32]*[print] [email] [cite] [preceding] [following]
Item, that na fraude be maid in making of the saidis wapynschawingis and that the kingis grace may knaw the ordour of his peple, it is statute and ordanit that every erle, lord, baroune, lard or utheris cumand to the saidis wapinschawingis geif the names of the personis that sall cum with thame tharto in bill to the schireff, balye, stewart, lord or balye of regalite, provest, alderman and balyeis to burgh, or to ony utheris quhem it will pleise the kingis grace to geif commissioune to with thame, and that thai roll thare names in ane buke with the maner of thair harnes and wapnis yerlie in every wapinschawingis, selit with thare awin sele and subscrivit with thare handis, send and deliver the samin to the kingis grace to be kepit and considerit be quhome his grace sall pleise to geif the cure therof, and that all lordis and balyeis of regaliteis do siclike yerlie within the boundis of thare offices.
[1540/12/33]*[print] [email] [cite] [preceding] [following]
Item, that all oure sovirane lordis liegis be warnit to the saidis wapinschawingis upoune xl dais warning for the first tyme, and yerlie at every tyme thereftir upoune xx dayis.
[1540/12/34]*[print] [email] [cite] [preceding] [following]
Item, that exercitioune may be had throwith all the realme amangis all oure sovirane lordis liegis for exercing of thare personis in ordoure, swa that be lering of ordoure and bering of thare wapnis in tyme of paice thai may be the mair expert to put thame selfis in ordoure hastaly and keip the samin in tyme of neid. It is thocht that this artikule is warray necessar to be providit and, therfor, statutis and ordanis that every schirrreff, stewart, ballies, provest, aldermen and ballies of burrowis, lordis and balyeis of regaliteis at every wapinschawing concur and sitt doune with the kingis gracis commissaris that sall happin to be depute to thame, and thai togidder to consult with the maist abill personis of the scire, and eftir that thai haif rollit the namis of every man with thare harnes and wapnis, cheise ane abill man for every parrochin or ma as it is of gretness, or for smaller parrochinnis ane, quha sall be capitan or capitanis to the cumpaneis of the saidis parrochynis and sall leir thame to gang in ordoure and beir thare wappinis, and sall convine thare saidis cumpaneis tuise at the lest in every moneth of the monethis of Maii, Junii and Julii, at quhat dayis thai sall think maist expedient, upoune halidayis befor nune, and als in all utheris monethis geif thai may gudelie, and thare exerce thame in maner forsaid; and that na man dissobey the saidis personis, capitanis to be depute and chosin as said is, under the pane to be punist at the kingis grace will; and that the saidis capitanis be chosin as oft as beis sene expedient be the schireff of the schire, commissaris and counsale admittit to him to that effecte.
[1540/12/35]*[print] [email] [cite] [preceding] [following]
Item, oure sovirane lord, understanding the grett occasioune and evill exemple for the tyme gevin to his lordis, baronis and all his liegis to committ and do the tyme of his lese aige sic offencis and crimes of tresoune and utherwayis quhilk deservis grett and hie punisment, quhilkis, as his grace understandis, be the gude and trew service done be thame to him sen his cuming to perfite age, tha wald nocht haif done nor committit; and becaus his grace thinkis that he will nocht be unremembrand and ungrate for the gude and thankfull service done to him be his saidis erlis, lordis, baronis and liegis of all degreis, hes remittit and forgifin and, be the tenour of this acte, remittis and forgevis to all his saidis liegis all maner of crimes of tresoune done be thame in oure sovirane lordis tyme that last decest and his predecessouris, kingis of Scotland, and in his hienes awin tyme unto the day and dait of this present acte, the intellegence with Archibald, sumtyme erle of Anguis, George Dowglas, his broder, and umquhile Archibald Dowglas of Kilspindie, thare eme, sen the tyme of the geving of dome of forfaltoure aganis thame alanerlie exceptit, and therfor exhortis and prayis presentlie all his baronis and liegis to be trew and thankfull subjectis unto his hienes as he sall nocht faill to be gude, thankfull and loving king to thame; and that the copy of this acte sufficientlie extractit sall be sufficient remissioune without ony uther particular writing.