[1535/8]*[print] [email] [cite] [preceding] [following]
[1535/9]*[print] [email] [cite] [preceding] [following]
In primis, it is statute and ordanit that the fredome of Halikirk, the immunyteis and privelegis of the samin, be observit and kepit and defendit be oure soverane lord, with all liberteis, in honour and worschip therof, siclike and als frelie as thai have bene in the tymes of his maist noble progenitoris, kingis of Scotland, and the brekaris and offendaris therof be punist with all rigour.
[1535/10]*[print] [email] [cite] [preceding] [following]
†Item, oure soverane lord ratifiis and apprevis the statute maid of before be his hienes in his parliament haldin at Edinburgh, the xvij day of Julii, the yere of God jM vC and xxv yeris, aganis thame that haldis, disputis or rehersis the dampnable opiniounis of the grete heretik Luthere, his discipulis and followaris, or of ony uther heresy, with new addicioune, off the quhilk acte and addicioune thairto the tennour followis; and oure said soverane lord, for the zeile and lufe his hienes beris to the Cristyne faith and the Halikirk, ordanis and statutis the said actis of new:
Item, it is statute and ordanit that, forsamekle as the dampnable opiniounis of heresy ar spred in diverse cuntreis be the heretik Luther and his dischiplis, and this realme and liegis therof hes fermlie persistit in the haly faith sene the samin wes first ressavit be thame and nevir, as yit, admittit ony opiniounis contrare the Cristine faith, bot evir hes bene clene of all sik filth and vice, tharefor, that na maner of persoune strangear that happynnis to arrive with thare schip within ony part of this realme bring with thaim ony bukis or werkis of the said Luthere, his disciplis or servandis, disput or rehersis his errasyis or opinionis, bot gif it be to the confusioune therof, and that be clerkis in the sculis alanerlie, under the pane of escheting of thare schippis and gudis and putting of thare personis in presoune; and that this acte be publist and proclamit out throwch this realme at all portis and burrowis of the samyn sua that thai may allege na ignorance therof; and that all uther the kingis liegis, assistaris to sik opiniounis, be punist in semblable wyse, and that nane of thame have, use, kepe or consele ony bukis of the saidis heretik or contenand thare doctrine and opinionis, bot that thai deliver the samin to thare ordineris within xl days under the panis forsadis;† and the effecte of the said acte be to stryke upoune thame, and lettres to be directed to mak publicatioune herof in forme as efferis.
[1535/11]*[print] [email] [cite] [preceding] [following]
†Item, because the dampnable persuasionis of heretikis and thaire perversit doctrine gevis occasioune to lychtly the process of cursing and utheris censuris of Halikirk, for the remeid herof, oure soverane lord in this present parliament hes ratifiit and apprevit and of the new makis, constitutis and ordanis the acte maid of before be his grace, with the avise of the thre estatis of his realme in his forsaid parliament, aganis thame that sustenis contempnandlie the process of cursing with new addicioune thairto, off the quhilk acte and addicioune the tennour followis:
†Item, it is statute and ordanit that, because mony and diverse the kingis liegis of this realme lyis under the horrible sentence of cursing, separate fra the suffrage and prayer of the kirk and merit of the blude of Crist, to the dampnatioune of thare saulis, evill exemple, perrell and danger of the uther gudis subditis of the realme, thairfore, quhene ony of oure soverane lordis liegis sustenis dampnablie the said horrible sentence of cursing for the space of xl dais, quhairupoune captioune aucht to be gevin be the law, the parti at quhais instance the personis ar curst sall have oure soverane lordis lettres to poynd, prise and distrenze thare gudis, movable and immovable, for payment of the soumes for quhilkis thai lay under the said sentence. And gif the saidis personis lyis under cursing be the said space for non doying or fulfilling of ony acte or deid, in that caise the personis, thare creditouris, sall have lettres in the first, secund, thrid and ferd formes according to the ordineris lettres of cursing. And this acte alwais to be na prejudice to thame that likis to tak captiounis. And albeit ane persoune may be under appellatioune that may stop the geving of sik lettres in maner aboune writtin, it is declarit and ordanit that nane appellataoune fra sentence of desertioune of appellationis befor interponit sall stop the geving of sick lettres.
[1535/12]*[print] [email] [cite] [preceding] [following]
Item, anentis the articule for ane generale provinciale counsale of Scotland to be haldin, it is thocht expedient be the lordis thre estatis of parliament that ane generale provinciale consale of this realme be sett and haldin in the Blak Freris of Edinburgh and to begyn the first day of Marche nixtocum, and that the Archibischop of Sanctandrois be requirit be the kingis grace to sett and haif the said counsale at the said day, the hale clergy beand lauchfullie warnit tharto as efferis; and gif my lord of Sanctandrois refusis to sett and hald the said counsale, or that uther impediment be that he may nocht do the samyn, that the kingis grace send to oure haly fader the paip for ane breve to ony twa bischopis of this realme that his grace thinkis convenient for setting and halding of the said counsale.
[1535/13]*[print] [email] [cite] [preceding] [following]
My lord Archibischop of Glasgw, chancellar, askit instrumentis that, forsamekle as thare is ane article devisit and concludit that ane generale provinciale counsale be haldin in the Freris predicatouris of Edinburgh and to begyn the first day of Marche nixtocum, and that my lord of Sanctandrois be warnit and requirit be the kingis grace to haif the samyn, that my said lord chancellar, for the commoune wele of this realme, consentis that the said Archibischop of Sanctandrois hald the samyn without prejudice off his archibischopric of Glasgw, privelege and jurisdictioune grantit to him and his successouris. Hora xa ante meridiem.
[1535/14]*[print] [email] [cite] [preceding] [following]
Item, to the articule for support to be maid to the kingis grace for sik gret materis as occurris presentlie, becaus his grace hes grete materis now ado in sending of ambassatouris and for the expedicioune of his necessar erandis for the universale wele of this realme, and specialie for his mariage, tharefore the lordis of articulis, in name of the hale thre estatis, of thare awine fre will, has, with gude hart and mynde, grauntit to his grace for supportacioune of sik gret chargis the soume of sex thousand pundis to be tane up of the spirituale estait, baronis and burrowis of this realme, and the samin to be taxt, raisit, upliftit and inbrocht to his hienes after the auld use and consuetude. And the lordis spirituale for taxatioune of the spiritualite hes chosin the Bischop of Galloway, the Bischop of Ross, the Abbot of Halyrudhous, the Abbot of Kinloss, the Dene of Glasgw, the Persoune of Askirk, the Dene of Brechine and Provest of Corstorphene; and the lordis temporale hes chosin Sir Johnne Campble of Lundy, knycht, James Colvile of Estwemis, knycht, Nichol Craufurd of Oxingangis, justice clerk, Thomas Scott of Petgormo and Maister Francis Bothuel for the taxatioune of the barounes; and that the burrowis stent thare selfis efter the auld use and that thir personis convene incontinent for making of the said taxacioune, that the samin may be inbrocht with diligence.
[1535/15]*[print] [email] [cite] [preceding] [following]
†Item, for the inhalding of money in the realme, it is statute and ordanit that the actis maid tharupoune of befor in oure soverane lordis tyme that now is, and be his maist noble progenitouris of gude mynd, quham God assolye, be putt to executioune in all punctis and that sercheouris be maid tharto conforme to the tennour of the saidis actis. And quhare ony persoune beis apprehendit passand furth of the realme havand money with him incontrare the tennour of the saidis actis, of quhat estait or degre thair evir he be, the sercheouris sall have the thrid part therof for thare lauboris and the remanent to be inbrocht to the kingis use and compt to be maid therof yerely in the chekker. And presentlie the lordis of articulis makis and constitutis James Colvile of Estwemis, Maister Adam Ottirburne and Sir Johnne Campble of Lundy, knycht, all personaly present,†sercheouris universale our all the realme, with power to depute under thame utheris at all portis and havynnis, for quhais diligence and thair awine thai salbe haldin to ansuer to the kingis grace. And because the mater of cunye is subtile and can nocht wele be decydit bot be the avise of men of craft and that are expert tharintill, therefore, the lordis ordanis my lord thesaurare, the comptroller, the Provest of Edinburgh, Sir Johnne Campble of Lundy, the clerk of registri, Maister Francise Bothuell and the Dene of Abirdene to convene with sik uther craftismen and of experience as thai pleise to tak to thame to consult and devise in this mater, and as thai devise and thinkis to be done in the said mater conforme to the article, to referr agane to the lordis of articulis, and siclike anentis the myndis, and that Sir James Hammiltoune of Fynnert, knycht, be with thaim anentis the devising of the premissis.
[1535/16]*[print] [email] [cite] [preceding] [following]
†Item, for polecy to be had within the realme in planting of woddis, making of heggeis,† orchartis, yardis and sawing of browme, it is statute and ordanit be the kingis grace and his thre estatis of parliament that the actis maid tharupoune of befor be King James the Secund and utheris oure soverane lordis progenitouris be observit and kepit and putt to scharp executioune in all punctis, with this addicioune: that every man spirituale and temporale within this realme havand ane hundreth pund land of new extent be yeir, and may expend samekle, quhare thare is† na woddis nor forestis, plant wod and forest and mak hedgis and hanyng for him self, extending to thre aikir of land, and abone or under as his heretage is mair or less in placis maist convenient; and that thai cause every tennent of thair landis that hes the samen in tak and assedacioune to plant upoune thare onsett yerelie for every merk land ane tree, ilk lord of ane hundreth pund land under the pane of x lib. and less or mair efter the rait and quantite of thair landis;† and that inquisitioune be maid yerelie herupoune as the kingis grace sall think maid expedient; and that every man begyn and cause planting to be maid the nixt sesoune herefter following under the panis forsaidis, to be raisit and inbrocht to the kingis grace use be the schireff of the schire, or quham plesis his grace to directed his commissioune to in that part, and that cognitioune be tane yerlie of the brekaris of this statute be every schireff in his awne schyre† yerlie at his heid court efter Pasche.†
[1535/17]*[print] [email] [cite] [preceding] [following]
†Item, for the punissing of thame that distrois grenewod incontrar the tennour of the acte effor writing, it is statute and ordanit for keping of the samin that all distroyaris of grenewod be cutting, peling, byrnyng or felling, and siclike of all new hanyngis, salbe accusit therfore conforme to the actis and statutis maid tharupoune of befor, and the pane therof salbe in tymes cuming for the first tyme x lib., the secund tyme tuenti pundis and the thrid tyme deid. And siclike the unlaw of mureburne efter the monethe of Marche, incontrare the auld actis and statute, salbe in tymes cuming for the first tyme five pundis, the secund tyme ten pundis and the thrid tyme tuenti pundis, and swa furth at ilk tyme als oft as thai be fundin culpable tuenti pundis. And gif thai be nocht responsale in landis or gudis for the said unlaw, thair persounis to be putt in the kingis graces presoune to be punist for thair falt, indurand his graces will, and to be callit herfore at particular diettis or generale justice aris as the kingis grace sall think maist expedient. And it sall nocht be lesum to the thesaurar and compositouris in tymes cuming to compone or fyne with the brekaris of this act for less than the pane and unlaw contenit in the samin.†
[1535/18]*[print] [email] [cite] [preceding] [following]
†Item, for keping of all forestis, woddis and parkis within the realme for wild bestis and hunting, it is devisit, statute and ordanit that all maner of persounis clamand thame to have office of forestrie in heretage or takkis† of the kingis graces forestis salbe called at sik day and place as plesis the kingis grace, his comptrollar and advocate,† for productioune and schewing of thare rychtis and infeftmentis be the quhilkis tha clame the saidis offices to pertene to thame, to be sene and considerit be the lordis of counsale and quhat clausis thai contene, sua that gude reule and ordour may be putt to thaim for keping of the saidis forestis in tyme cuming, with certificatioune that quhether thai compere or nocht, the kingis grace, with avise of his lordis, will dispone upoune the saidis offices and mak sik constitutiounis as plesis his hienes for the gude keping of the samin, pasturing of wyld bestis and hunting tharintill in tymes cuming; and als ordanis lettres to be directed to command and charge all maner of persounis clamand the saidis offices to pertene to thame in heretage or takkis that tha lett na maner of gudis, nolt, schepe, horse, meris or uther cattell to be pasturit within the kingis grace forestis, under the pane of tynsale of thare offices and escheting of thare movable gudis; and gif ony maner of persoune be fundin putting thare gudis in pasturing in the saidis forestis, that thai be takin and brocht to the kingis grace presoune and thare gudis fundin in the saidis forestis to be eschetit be the keparis therof and inbrocht, the twa part to the kingis grace use and the thrid part to the keparis of the saidis forestis; and geif thai be negligent and fundin culpable, to be callit and punist therfor in thare persounes and gude and tinsale of thare offices.† And gif thare be ony baroune or uther landit man, owther spirituale or temporale, that hes hanyt, woddis or forestis of thar awin, it salbe lefull to thame and the keparis therof to eschete all sik gude that beis fundin in maner forsaid within thare forestis to thare use.
[1535/19]*[print] [email] [cite] [preceding] [following]
†Item, oure soverane lord, with avise of his thre estatis, ordanis the acte maid be King James the Thrid, of maist noble mynd, quham God assolye, aganis thame that slais days, rays, thare calfis or kyddis, to be putt to executioune in all punctis efter the tennour of the samin.
[1535/20]*[print] [email] [cite] [preceding] [following]
†Item, it is statute and ordanit that all thaim that brekis dukatis, cunygaris, parkis, stankis, takis or stelis hyvis and beis† furth of the samin dais, rays, cunyngis, dowis, pykis and fische,†without speciale licence of the awneris therof, salbe callit and punist therfore as for thift at particular diettis, and this acte to extend to thaim that ar art of or gevis assistence to sik misdoaris.
[1535/21]*[print] [email] [cite] [preceding] [following]
†Item, it is statute and ordanit that the actis maid of before aganis thame that brekis utheris men orchartis and yardis be putt to executioune in all punctis and to be callit tharefor at particular diettis.
[1535/22]*[print] [email] [cite] [preceding] [following]
†Item, it is ordanit that the acte maid of before for slaying of haris be observit and kepit in all punctis.
[1535/23]*[print] [email] [cite] [preceding] [following]
†Item, because it is unproffittable and inutile to mak lawis and statutis for polecy to be had without the sammyn be kepit, and becaus sik ordoure and provisioune as is devisit for polecy may failye be falling of landis in to ward or geving of the samin in conjunct fee or lyfrent, tharefor the kingis grace, with avise of his thre estatis, ordanis the acte maid tharupoune be the maist excellent prince King James the Ferd, his fader, of maist noble mynd, to be observit and kepit in all punctis, ratifiis and apprevis the samin, and that all schireffis, stewartis, ballies and uther officiaris, baith in regalite and ryalte, and siclike spirituale men within thare landis and to burgh, putt the samin to executioune in all punctis. That is to say, all officiaris within the ryaltie†and lordis of regalites under the pane of refounding to the heretouris of sick landis fallin in ward at thare perfite aige of all dampnage and scaithe that thai sall happin to sustene throw thare negligence, thai being requirit tharto be the persoune that is in ward or his frenndis;† and gif the wardatouris, ladyis of conjunct fee or lyfrent† of sik landis refusis to find souirtie conforme to the said acte, thai beand requirit tharto be the schireff, stewart, ballie, provest or alderman in burgh, that the said schireff and officiaris, ilkman within his awine boundis, charge thame to find the said souirte conforme to the said acte personalie or be oppin proclamatioune at the heid burg of the schire quhare the saidis landis lyis within xxj dais nixt efter thai be chargit tharto, under the pane of wanting of the proffett of all sik ward landis, conjunctfee or lifrentis†to be inbrocht to the kingis use ay and quhill the said cautioune be sufficientlie findin; and that the lordis auditouris of chekker and thesaurar for the tyme inquire diligentlie in every chekker, at all schireffis and utheris officiaris forsaid at the making of thare comptis, gif the said cautioune be sufficientlie fundin and gett certificatioune therof.
[1535/24]*[print] [email] [cite] [preceding] [following]
Item, it is ordanit that albeit ane gratitude is grantit to the kingis grace be the thre estatis of his realme for supportatioune of sik necessar erandis as his grace hes ado, that na exactioune be maid upoune the tennentis, laubouraris of the ground,† for payment of the said contributioune or ony part therof under the pane to be callit therfor as commoune oppressouris of the kingis liegis at privat diettis and justice courtis or at generale justice aris as it plesis the kingis grace best; and that lettres be directed to mak intimatioune to all oure soverane lordis liegis at burrowis and schirefdomes at places convenient hereof, and that the justice clerk cause diligent inquisitioune to be maid and tak dittay herupoune.
[1535/25]*[print] [email] [cite] [preceding] [following]
†Item, oure soverane lord ordanis the actis maid upoune thai that slays red fische, smoltis and salmond in forbodin tyme and the panys contenit in the samin to be putt to scharp executioune with this additioune followand: that is to say, it sall nocht be lesum to the thesaurare and compositouris in tymes cuming to compone or fyne in jugement or out of jugement with the brekaris of the saidis actis for lesse than the pane and unlaw contenit in the samin, and that dittay be tane upoune all thaim that ar art and part, causaris or resettaris of the slaying off the said reid fische, smoltis and salmonde in forbodin tyme, siclike as upoune the principale slaaris therof. And because the lang delay of justice aris gevis gret occasioune of the breking of the saidis actis, tharefor, the kingis grace sal send ane commissioune generale with the justice clerk, and sik uther personis as plesis his grace to deput tharto, for halding of particular diettis yerelie in the places quhare the said fische ar slane; and ordanis all sik persounis to be arrestit to the first aire to compere under the pane of rebellioune and putting of thaim to the horne, and gif thai comper nocht, to put thaim to the horne and denunce thame oure soverane lordis rebellis, and that sik ordour of arresting of sik personis be kepit as and it war in ane generale justice air.
[1535/26]*[print] [email] [cite] [preceding] [following]
†Item, that the acte maid be oure soverane lordis fader, quham God assolye, and utheris his progenitouris anent the halding of cruvis and fische yaris be observit, kepit and putt to executioune in all punctis, with this additioune: that the ressettaris and assistaris to sik personis incurr siclike pane as the principalis and that siclik processes be had aganis thame as is devisit and statute aganis the slaaris of reid fische, salmond and smoltis.
[1535/27]*[print] [email] [cite] [preceding] [following]
†Item, oure soverane lord ordanis the acte and statute maid of before for making of buschis for fisching to be observit and kepit and to be putt to executioune in all punctis.
[1535/28]*[print] [email] [cite] [preceding] [following]
Item, oure soverane lord, for the strenthing and defense of the realme in tyme of were, sua that vysses of armys be nocht abusit nor foryett in tyme of pece, ratifyis and apprevis the acte maid be his hienes fader of maist noble mynd, quham God assolye, tharupoune, and ordanis the samin to be observit and kepit, and walpynschewing to be had twise in the yeir conforme to the said acte: that is to say, that the saidis walpynschewingis salbe yerelie maid in tymes cuming upoune the xx day of October and in somer upoune the xv day of Junii, off the quhilk actis the tennour followis with additioune: [...]†
[1535/29]*[print] [email] [cite] [preceding] [following]
†Item, becaus the schott of gunnys, hagbutis, hand bowis and uther small artalyerie now commounlie usit in all cuntreis, baith be say and land, in thare weris is sa felloune and uneschewable to the pithe and hie curage of noble and vailyeand men, quhais actis and deidis can nocht be schewin without contrar provisioune be had of instrumentis of were and battell, it is herefor statute and ordanit be the kingis hienes, with avise and consent of the thre estatis of the realme, that every landit man within this realme sall have ane hagbute of found, callit hagbute of crochert, with thair cawmys, bullettis and pellokis off leid or irne, with powder convenient tharto, for every hundreth pund of land that he hes of new extent, and he that hes bot ane hundreth merk land sall have twa culveringis, and ilk man havand xl lib. land sall have ane culveringe, with cawmys, leid and powder ganand tharto, with trestis, to be at all tymes reddy for schoting of the saidis hagbutis; and that every man of leving forsaid sall have ane man or ma as he may furness for schoting of the saidis hagbute and culveringis and to lere utheris to schute the samin; and that every man have the said artalyerie efferand to his leving, substantiouslie furnest as said is, reddy within xviij monethis nixt eftere the publicatioune of this acte, under the pane of dowbling of the price that will by ilk pece of the said artalyerie, to be applyit to the kingis grace use for bying off the samin to him self; and the said xviij monethe being passit, that every man mak his musteris with the said artalyerie, wele furnest as said is, at the nixt walpynschewing therefter to the takaris and ressavaris of the said walpynschawingis, the quhilk being done thai sall nocht be bundin to bring the said artalyery to ony walpynschewingis therefter, bot gif thai be specialie requirit tharto be the kingis graces writingis or be the schirref or uther juge ordinar under the kingis grace; and that this acte be extendit als wele to the lordis of regalite and thar tennentis as to thame of the ryaltie, and that every kirkman furness siclike artalyery in maner aboune writtin to be schewin at walpynschewingis as said is efter the avale and quantite of thare temporale landis, and that thare artalyerie remane at the castell, abbey or mansioune of the bischop, prelatis or kirkmen, to be kepit thair and left to his successoris quham salbe haldin to uphald the samin for the defence of the realme. And becaus it can nocht be now clerelie understandin of the avale and quantite of every burgh quhat artalyery and howmekle thai may furness, tharefore, it is ordanit that lettres be writtin to the provest, ballies, aldermen of every burgh of this realme, signyfying to thame this statute and ordinance of the maner of furnessing of artalyerie to be maid be the barounis and kirkmen, chargeing thame, therfore, to convene thare consale, avise and conclude quhat artalyerie and in quhat maner ilk burgh may perfurness, and refer agane to the kingis grace within xv dais nixt efter thai be chargit tharto, that his hienes may be avisit therwith; with certificatioune gif thai failye tharintill, his grace sall caus thame to be taxt efter the avale and quantite of thare commoune gude and substance for furnessing of the said artalyerie; and ordanis that ladyis of conjunctfee and lyfrent sall furness efferand to the quantite of thare leving for support of the baronis and utheris landit men in the perfurnessing of the said artalyerie.
[1535/30]*[print] [email] [cite] [preceding] [following]
†Item, becaus nowither artalyerie nor herness can be furnest nor maid reddy conforme to the actis maid tharupoune without the samin be brocht hame be merchandis, therefore, it is statut and ordanit that every merchand saland furth of this realme, or sending his gudis extending to ane last of gudis, sall bring hame als oft as he salis or sendis his gudis at every tyme twa hagbute or may as his pak may furness, with powder and cawmys for furnessing of the samin, or ellis alsmekle mettell as will mak the said hagbute, and siclike harnes for furnessing of oure soverane lordis liegis in maner forsaid.
[1535/31]*[print] [email] [cite] [preceding] [following]
†Item, it is statut and ordanit for saiffing of men, thare gudis and gere upoune the bordouris in tyme of were and all uther trublous tyme, that every landit man duelland in the inland or upoune the bordouris havand thare ane hundreth pund land of new extent sall big ane sufficient barmkyn apoune his heretage and landis in place maist convenient, of stane and lyme, contenand thre score futis of the square, ane eln thick and vj elnys heicht, for the resett and defense of him, his tennentis and thar gudis in trublous tyme, with ane toure in the samin for him self gif he thinkis it expedient; and that all uther landit men of smallar rent and revenew big pelis and gret strenthis as thai pleise for saifing of thare selfis, men, tennentis and gudis, and that all the saidis strenthis, barmkynnis and pelis be biggit and completit within twa yere under the pane.
[1535/32]*[print] [email] [cite] [preceding] [following]
†Item, it is statute and ordanit that the actis maid of before be King James the First and utheris oure soverane lordis predecessouris be observit and kepit and putt to executioune in all punctis; and for eschewing of exhorbitant prices tane of the kingis liegis travelland throw the realme and of the prices of vittalis, flesche and fische, it is ordanit that lettres be directed to command and charge all provestis, aldermen, ballies and officiaris of burrowis, baith to ryalte and regalite, and als lordis and uther baronis that hes burgh in barony and ostillaris on thare landis, that thai cause all ostillaris, baith to burgh and to land, ilkman within self and boundis of his office, to have honest chalmeris and bedding for resaving of all passingeris and strangearis passand and travelland throw the realme, wele and honestly acculterit with gude and sufficient stabillis with hek and mangere, corne, hay and stra for thar horses, flesche, fische, breid and aile with uther furnessing for travellaris, to be sauld apoune ane competent price and as siclike stuff is sauld commounlie in the cuntre abouut quhare sik ostillaris duellis; and that thai sett yerelie prices tharupoune as the said ostillaris may leif and sustene thir lugeingis, under the pane to be callit and punist therfor at the kingis grace will, and that dittay be tane herupoune apoune the brekkaris of this statute, to be callit at generale justice aris or uther particular diettis quhene the kingis grace plesis.
[1535/33]*[print] [email] [cite] [preceding] [following]
†Item, it is statute and ordanit for the commoune wele of the realme, because the bying and havying of Inglis horsis in daynte is the caus that the studis and stude placez of Scotland are lychtlit unplenist and the horsis growin small, that, therfor, na man of this realme by ony Inglis horsis furth of the realme of Ingland for money or be bartouring with uther stuff, sick as nolt, schepe, horsis, vittalis or uther cattell, under the pane of tynsale of the horsis to the kingis grace or the price of him gif he happynnis to be deid, sauld or utherwayis put away,† and that all maner of personis havand studis and stude placez within this realme mak the samin to be plenist with stude, stude meris and gret stallionis for furnessing of horsis to all maner of personis within the realme.
[1535/34]*[print] [email] [cite] [preceding] [following]
†Item, becaus ane grete part of the realme, and specialie nere the bordouris, hes bene thir mony yeris bigane in oure soverane lordis lesse age unplenissit, and ane gret part of the inland spulyeit of thare gudis and the samin had and sauld in Ingland be thevis and tratouris, quharethrow all maner of stuff hes growin to ane gret price and derthe, and now oure soverane lord putting ordour of justice, rest and tranquillite amangis his liegis and that playnte of gudis may grow amangis thame, hes ordanit and statute, with the avise of his thre estatis in parliament, that na maner of man in tymes cuming sell nolt, schepe or uther cattell, auld nor young, to ony Inglissmen be him self or ony mediat persoune, nor have or send the samin in Ingland to be sauld, and that na maner of man send in to Ingland vittalis, fische or salt under the pane of confiscatioune of all thare movable gudis, and that all wardanis, provestis, ballies of townys and keparis of portis and havynnis within the realme mak diligente serche and seke the brekaris herof, under the pane of tynsale of thair offices and presonyng of thare personis yere and day enduring the kingis graces will; and gif ony Inglissman will cum in to this realme with thair schippis to by vittalis, fische or salt, the kingis grace sall graunt to thaim his saif conducte to do the samin, geif his grace thinkis the samin expedient; and the said sauf conducte beand optenit,† it salbe lesum to all merchandis and utheris within the realme to sell sik merchandice to the saidis Inglissmen for gold and silvir, or to bartour for utheris gudis sufficient merchandice.
[1535/35]*[print] [email] [cite] [preceding] [following]
†Item, it is statute and ordanit that nane forstallaris be fundin byand vittalis, fische, flesche or uther stuff, or the samin be presentit to the mercat nor yit in to the mercat or the tyme of day statute and ordanit tharto, under the pane of presonyng of thare personis and escheting of all sik gudis cost or erlit be thame, that is to say, the twa part to the kingis grace, the thrid part to the schireff or officiar of the schire, provest, ballies and officiar of burrowis, or to ony uther that findis thame doing in the contrare herof.
[1535/36]*[print] [email] [cite] [preceding] [following]
†Item, for the inbringing of our soverane lordis propirtie and casualiteis yerelie to his chekker, sua that his thesaurar and comptrollar may be wele furnest far perfurnessing of all sik thingis quhilk pertenis thame to do, and that in tymes cuming thai sal have na caus to plenye bot in thair aune defalt and necgligence,† it is herfore statute and ordanit that all schireffis, stewartis, custumaris, chalmerlanis and utheris intromettouris with oure soverane lordis propirtie compere at every chekker quhare it salbe haldin for the tyme, and mak thaire comptis and full payment equal with the rollis befor thare departing, ilk ane for thare awine part safer as thai have intromettit with or mycht intromett be resoun of thair office, thai doand diligence tharto† under the pane of† warding of thair persounis, thare to reman during the kingis will; and as for the casualiteis, ordanis all schireffis, stewartis, ballies and utheris that aucht to mak compt, reknyng and payment of the samin to compere yerelie in the chekker be thame selfis, or thar sufficient deputis, at the day assignit to thame be the precepte, and thare mak compt, reknyng and payment of all sik casualiteis and do thair utir diligence tharto be the consideratioune of the lordis auditouris, and depart nocht forsaid quhill thai have done the samin under the pane forsaid.†
[1535/37]*[print] [email] [cite] [preceding] [following]
†Item, anentis the executioune of the actis of parliament maid of before be oure soverane lordis progenitouris upoune thame that committis slauchter, and for apprehensioune of oure soverane lordis rebellis and diligence to be maid therin be schireffis and uther officiaris of the realme, baith in regalite and ryaltie, it is statute and ordanit that the actis maid tharupoune of before be put to executioune in all punctis, and that all schireffis, stewartis, ballies and all uther officiaris, baith to burgh and to land, als wele in the regalite as in the ryaltie, do thare diligence to serche and seik all oure soverane lordis rebellis and being at his horne, quharevir thai may be apprehendit within thare ballieriis, tak and bring thame to oure soverane lordis justice to be justifiit for thar demerits, under the pane of tinsale of thare offices for thre yeris, geif thai have the samin in heretage, and geif thai have the samin for yeris, that thai sall tyne the samin for evir,† and to be accusit upoune thare diligence in that behalf in the justice are or at uther perticular diettis as sall plese the kingis grace; and that na maner of man within this realme wilfullie or wittandlie ressett, supple or manteyne or do favouris to ony of oure soverane lordis rebellis and being at his horne within thare housis, landis, boundis or ballieriis, under the pane of deid and confiscatioune of all thare movable gudis, and to be callit and accusit herupoune, owither at justice courtis or particular diettis as said is; and gif the officiaris of the regalite be fundin negligent, thai beand requirit hereto, it salbe lesum to the kingis schireffis to putt the saidis actis to executioune within the said regalite efter the forme and tennour of the samyn, and that the justice clerk inquire diligently herupoune and tak dittay as efferis.
[1535/38]*[print] [email] [cite] [preceding] [following]
†Item, for the refrenyng of the multitude of maisterfull and strang beggaris, it is ordanit that the acte maid tharupoune of befor be King James the First, apprevit and ratifiit be utheris oure soverane lordis predecessouris, be observit and kepit and put to scharp executioune in all punctis with this additioune: that na beggaris be tholit to beg in ane parochine that ar borne in ane uther, and that the hedissmen of ilk parochine mak taikynnis and geve to the beggaris therof, and that thai be sustenit within the boundis of that parochine and that nane uther be servit with almous within that parochine bot thai that beris that takin alanerlie, under the panis contenit in the said actis, and that the justice clerk mak inquisitioune and tak dittay herupoune at every justice air; and als ordanis lettres to be directed to command and charge the provest and ballies of Edinburgh and all utheris provestis, ballies of burrowis, schireffis and utheris officiaris of the kingis to putt this acte to executioune in all punctis, and that the samin be publist at all places neidfull sua that nane sall pretend ignorance or allege thai knaw nocht the samyn in tyme tocum.
[1535/39]*[print] [email] [cite] [preceding] [following]
†Item, for the mare haisty expeditioune and punyssing of thame that committis slauchter upoune forthocht fellouny and fleis to girth, conforme to the acte of parliament maid tharupoune of before, quhilk oftymes takis nane effecte throw pretense of excuse of the maisteris therof, spirituale men that will nocht deliver the saidis trespassouris to oure soverane lordis officiaris conforme to the tennor of the said acte, heirfore it is statute and ordanit be the kingis grace, with avise and consent of the thre estatis of parliament, that all maisteris of girthis within this realme sall mak sufficient responsale men ballies or masteris of girthis under thame duelland at the saidis girthis or nere therby, quham salbe haldin in all tymes cuming to deliverer all committeris of slauchter upoune forthocht fellouny that fleis to girth and utheris trespassouris that brekis the samin and may nocht bruke the privelege therof, conforme to the canone law and acte of parliament forsaid, to oure soverane lordis officiaris, askand and desirand thame to underly the law conforme to the said acte of parliament; and gif the saidis ballies failzeis tharintill, to be rigorusslie punist for thare contemptioune in thar bodeis and gudis at oure soverane lordis will, and that all maisteris off girthis, spirituale men, send to the justice clerk the names of thare ballies and maisteris of girthis depute and to be depute be thame, that quhene ony sik crymes are committit and done, that lettres may be directed to all schireffis, ballies or stewartis within quhais boundis the saidis girthis ar to charge the saidis ballies or maisteris to deliverer to thame the saidis trespassouris conforme to the said acte of parliament.
[1535/40]*[print] [email] [cite] [preceding] [following]
†Item, oure soverane lord, with avise and consent of his thre estatis in parliament, ratifiis and apprevis the actis maid of befor grauntit to merchandis within burgh.
[1535/41]*[print] [email] [cite] [preceding] [following]
†Item, it is statute and ordanit be the kingis grace and thre estatis of parliament that the acte and statute maid be umquhile oure soverane lord King James the Thrid, and als ratifiit and apprevit be umquhile oure soverane lord that last decessit, of gude mynd, quham God assolye, tuiching merchantis passand with thair merchandice furth of the realme to France, Flandris or ony uther partis, that na merchand sale without he have half ane last of gudis of his awine, or ellis in governance as factor to uther merchandis, be putt to executioune in all punctis in tyme tocum efter the forme and tennour of the samyn, and ratifiis and apprevis the said acte and statute now in this present parliament; and attoure ordanis the provest or ballies of burrowis situate at ilk port of the realme to serche and seik the personis, brekaris of the said statutis, and that thai distrenze ilk persoune, brekar therof, for the soume of xx lib., to be appliit on this wyse, that is to say, the tane haif to oure soverane lordis use and the tother haif to the provest or ballies for thaire laubouris, and that thai mak compt therof yerelie in the chekker; and gif the provest or ballies of the saidis burrowis be negligent in the exercyng of thair offices and power gevin to thaim, thai salbe oblist to pay the said pane of xx lib. for every man that passis and salis incontrare the said acte at that port quhair thai have jurisdictioune to the kingis grace; and als it is ordanit that na skippar, maisteris nor awneris of schippis ressave ony merchand to sale in thare schippis without thai have the names off thame in tikket, subscrivit be the saidis provest and ballies handis under the pane forsaid for ilk persoune that thai resave within thar schip, and that oure soverane lordis custumares, or ony utheris that plesis, accuse the saidis provest and ballies, gif thai be negligent in the premisse yerelie at the chekker; and lettres to be directed hereupoune in dew forme as efferis; and als that lettres be writtin to the conservatour of the natioune in Flandris contenand the effect of this acte, chargeing him to send hame the names of all merchandis resortand thare in every schip incontrare the tennor of the said acte to the thesaurare under the pane of tinsale of his office.
[1535/42]*[print] [email] [cite] [preceding] [following]
†Item, oure soverane lord ordanis the acte maid be Kingis James the Secund, be the quhilk it is ordanit that na schip be frauchtit out of the realme with ony staple gudis fra the Feist of Symonis Day and Jude unto the Feist of the Purificatioune of our Ladyis callit Candilmess, be observit and kepit and putt to executioune in all punctis with this additioune: that the pane of thaim that cummys in the contrare therof salbe in tymes cuming xx lib. to be raisit of ilk persoune, brekaris of the said acte, excepte it salbe lefull to send ony kynd of merchandice furth of the realme in the tyme forsaid in ony schippis that bringis in salt or wyne.
[1535/43]*[print] [email] [cite] [preceding] [following]
†Item, it is statute and ordanit for the honeste of the realme, wele and proffett of all oure soverane lordis liegis, specialie his burrowis and merchandis of his realme, that na schip be frauchtit nor merchandis sale therin with thare gudis and merchandice furth of the realme in Flandris bot twise in the yeir, that is to say, to the Pasche mercate and Rude mercate under the pane to ilk persoune cuming in the contrar hirof of xx lib. to be rasit and inbrocht to the kingis grace use.
[1535/44]*[print] [email] [cite] [preceding] [following]
†Item, becaus all oure soverane lordis burrowis are putt to povertie, waistit and distroyit in thair gudis and polecy and almaist ruynous throw falt of using of merchandice, and that throw being of outlandis men, provest, ballies and aldermen within burgh for thare awine particular wele in consumyng of the commoune gudis of burrowis grentit to thame be oure soverane lord and his predecessouris, kingis of Scotland, for the uphald of honeste and polecy within burgh, it is herefore statute and ordanit that na man in tyme cuming be chosin provest, ballies or aldermen in to burgh bot thai that ar honest and substantious burgesses, merchandis and induellaris of the said burgh, under the pane of tynsale of thare fredome quham dois in the contrare; and that na man duelland within burgh purchesse lordschip out of burgh in ony his actioune or querrell to molest, truble or gefe feir and dredour to his nychtbour and parti, under the pane contenit in the actis and statutis maid tharupoune of before; and that all provestis, ballies and aldermen of burrowis bring yerelie to the chekker, at the day sett for geving of thare comptis, thare compt bukis of thare commoune gudis, to be sene and considerit be the lordis auditouris gif the samin be spendit for the commoune wele of the burgh or nocht, under the panis forsaidis; and that the saidis provest, ballies and aldermen of every burgh warne yerelie xv dais befor thare cuming to the chekker all thai quham likis to cum, for examyng of the saidis comptis, that thai may argwne and impugne the samin as thai pleise sua that all murmour may ceise in that behalf.
[1535/45]*[print] [email] [cite] [preceding] [following]
†Item, it is statute and ordanit that na men, erle, lord, baroune or uther of quhatevir degre, about and adjacent nychtboris to burrowis, molest, truble nor inquiet the provest, aldermen, ballies and officiaris of burrowis and merchandis therof in using of thare franchis, liberteis and privelegis grauntit to thame be oure soverane lord and his predecessouris, kingis of Scotland, and in contrar the actis and statutis maid tharupoune, under the pane to be callit and accusit as commoune oppressouris of oure soverane lordis liegis at generale justice aris or private diettis and justice courtis, as salbe thocht expedient be the kingis grace, and that the justice clerk tak inquisicioune and dittay herof as efferis.
[1535/46]*[print] [email] [cite] [preceding] [following]
Item, it is thocht expedient be the lordis of articulis that my lord chancellar, with ane certane of lordis with him, sitt owklie for commonyng and treting of materis concernyng the commoune wele of the realme and advertising of the kingis grace therof.