[1416/1]*[print] [email] [cite] [preceding] [following]
Universis sancte matris ecclesie filiis ad quorum notitiam presentes littere pervenerint, Henricus miseratione divina episcopus Sancti Andree, salutem in Domino sempiternam. Noverit universitas vestra quod nuper coram nobis pro tribunali sedentibus in capella juxta magnum pontem burgi de Perth, nostre dioceseos, constitutus reverendus in Christo pater dominus Gilbertus Dei gratia episcopus Abirdonensis, cancellarius Scotie, nomine et ex parte trium statuum regni Scotie tunc congregatorum et concilium generale facientium in domo fratrum predicatorum dicti burgi, quasdam litteras recolende memorie domini Edwardi Dei gratia regis Anglie principis quondam inclytissimi produxit, nobisque exhibuit et ostendit quarum tenores de verbo ad verbum inferius describuntur. Quas quidem litteras idem dominus episcopus et cancellarius transcribi petiit et exemplari ac in publicam ac authenticam formam ad futuram rei memoriam redigi autoritate nostra [et] ordinatione cum interpositione decreti, ne propter defectum probationis eorum que in ipsis litteris continentur, dominus noster rex Scotie qui pro tempura fuerit ac regnum et regnicole quovis modo inquietari vel perturbari valerent ipsis litteris originalibus perditis vel destructis. Nos igitur volentes probationibus subvenire ne veritate occultata justitia deperiret, visis, lectis et diligenter inspectis litteris ipsis in nostra presentia de verbo ad verbum per notarios publicos infrascriptos, ipsis veris absque suspicione reputatis et cum originalibus examinatis et sigillis in iisdem appensis integris et ut bene apparuit veris, ipsius domini episcopi et cancellarii petitioni utpote rationabili annuentes prefatas litteras transcribi et exemplari mandavimus et fecimus per notarios publicos infrascriptos, tenore presentium decernentes quod transcripto huiusmodi sive exemplationi deinceps per omnia plena fides adhibeatur, tam in judiciis quam extra, sicut originalibus litteris prelibatis. Quibus omnibus et singulis nostram autoritatem interponimus et decretum. Tenures ipsarum litterarum tales sunt.
Universis presentes litteras inspecturis, Eduardus Dei gratia rex Anglie, dominus Hybernie et dux Aquitanie, salutem in Domino sempiternam. Cum nos nonnullique predecessores nostri reges Anglie jura regiminis dominii seu superioritatis regni Scotie conati fuerimus obtinere, ob hocque motarum dira guerrarum discrimina Anglie et Scotie regna diutius afflixissent, nos attendentes cedes, occisiones, scelera, ecclesiarum destructiones et mala innumerabilia que huiusmodi occasione guerrarum regnicolis utriusque regni multipliciter contingebant, bonaque quibus regnum utrumque mutuis compendiis abundaret perpetue pacis stabilitate connexum, ac per hoc contra conatus noxios rebellare vel impugnare, volentium interius vel exterius majori firmitate securum, volumus et concedimus per presentes pro nobis heredibus et successoribus nostris de communi consilio, assensu, et consensu prelatorum et procerum, comitum et baronum ac communitatum regni nostri in parliamento nostro, quod regnum Scotie per suas rectas marchias, prout temporibus bone memorie Alexandri regis Scotia ultimo defuncti fuerunt habite et servate, magnifico principi domino Roberto Dei gratia regi Scottorum illustri, confederato ac amico nostro carissimo, suisque heredibus et successoribus, divisum in omnibus a regno Anglie, integrum, liberum ac quietum remaneat in perpetuum, absque qualicumque subjectione, servitute, clameo vel demanda. Et si quid jus nos vel antecessores nostri in regno Scotia retroactis temporibus petierimus vel petierint quoquo modo, prefato regi Scotie, heredibus et successoribus suis, renunciamus et dimittimus per presentes omnes autem obligationes, conventiones et pacta initas et inita qualitercumque cum nostris predecessoribus quibuscumque temporibus super subjectione regni Scotia vel incolarum eiusdem per quoscumque reges vel incolas, clericos vel laicos, ipsius regni Scotie pro nobis, heredibus et successoribus nostris remittimus penitus et omnino. Et si qua littere, carte, munimenta vel instrumenta reperiantur de cetero ubicumque super huiusmodi obligationibus, convencionibus et pactis confecte vel confecta, pro cassis, irritis, inanibus et vacuis habeantur nulliusque valoris esse volumus vel momenti. Et ad premissa omnia plena et pacifice et fideliter observanda dilectis et fidelibus nostris Henrico de Percy, consanguineo nostro, et Willelmo Lazousch de Askeby et eorum alteri ad sacramentum in animam nostram inde prestandum per alias litteras nostras patentes plenam dedimus potestatem ac mandatum speciale. In cuius rei testimonium has litteras nostras fieri fecimus patentes. Datum apud Eborum jo die Martii anno regni nostri ijo per ipsum regem et consilium in parliamento.
Item, Edwardus Dei gratia rex Anglie, dominus Hybernie et dux Aquitanie, dilectis ac fidelibus suis Henrico de Percy ac Willelmo de la Zousche de Askeby, salutem. Cum per cartam sive litteras nostras patentes concesserimus magnifico principi Roberto Dei gratia regi Scottorum quod habeat regnum Scotia per suas rectas marchias prout temporibus bone memorie Alexandri regis Scotia ultimo defuncti fuerunt habite et servate, et jus si quid nos vel antecessores nostri in Scotia regno retroactis temporibus petierimus vel petierint quoquo modo eidem domino regi Scotorum renunciaverimus, nos de fidelitate vestra et circumspectione provida plenius confidantes ad firmandum et vallandum omnia et singula in dictis carta sive litteris contenta per juramentum in animam nostram prestandum vobis et alteri vestrum tenore presentium committimus potestatem ac speciale mandatum. Et hoc omnibus et singulis quorum interest vel interesse poterit innotescimus per presentes litteras nostras patentes sigilli nostri munimine roboratas. Datum apud Eborum jmo die Martii anno regni nostri ijo per ipsum regem et consilium in parliamento.
Sigillabantur autem dicte littere sigillo magno et rotundo de cera alba in cuius una parte erat forma cathedre in qua erat imago regis sedentis induti quasi regalibus vestibus cum corona in capita et sceptro in manu dextra, et ex utraque parte cathedre flos lilii, et in circumferentia scriptum erat litteris legibilibus 'Edwardus Dei gratia rex Anglie, dominus Hybernie, dux Acquitanie'. Ex altera autem parte sigilli erat imago regis armati sedentis super equum gladium tenentis evaginatum elevatum in manu dextra et super humerum sinistrum erat scutum in quo erant tres imagines leopardi gradientis, et in circumferentia erat scriptum litteris legibilibus 'Edwardus Dei gratia rex Anglie, dominus Hybernie, dux Acquitanie'.
In quorum ominium et singulorum testimonium presentes litteras sive presens instrumentum per notarios publicos infra scriptos scribi et publicari mandavimus, nostrique sigilli fecimus appensione muniri. Datum et actum in capella supradicta sub anno Domini MCCCCxv mensis Martii die xvij, indictione nona, pontificates sanctissimi in Christo patris ac domini nostri Domini Benedicti divina providentia pape xiij anno xxij. Presentibus reverendis in Christo patribus et dominis Dominis Willelmo Glasguensi, Henrico Moraviensi, Waltero Brechinensi, Thoma Candide case, Finlao Dumblanensi, Alexandro Rossensi et Alexandro Cathinensi Dei gratia episcopis, Willelmo de Dunfermlyne, Waltero de Abirbrothok, Johanne de Balmurinach, Willelmo de Kinlosse, Johanne de Culros et Patricio de Cambuskyneth Dei gratis abbatibus, cum multis aliis testibus ad premissam publicationem videndam et audiendam vocatis specialiter et rogatis.
Et ego Ricardus de Crag presbyter Sancti Andree dioceseos publicus imperiali autoritate notarius de mandato dicti domini mei episcopi Sancti Andree et ipso autoritatem prestante, dictum instrumentum in publicam formam redegi, manu mea scripsi, nihil addito vel diminuto quod sensum mutet vel vitiet, intellectum et in presentia judicis et testium cum magistris Patricio de Huyston canonico Glasguensi, Ricardo Knyth rectore ecclesie de Conveth et domino Waltero Ra rectore ecclesie de Garualde, notariis publicis diligenter et fideliter cum ipso authentico auscultavi et ipsas originales litteras vidi et testibus ostendi et perlegi, non vitiatas, non cancellatas nec in aliqua sui parte abolitas seu suspectas neque in carte neque in scriptura neque in sigillo, premissisque omnibus aliis et singulis dum sic ut premittitur fierent et agerentur presens fui et ideo hic me subscripsi signumque meum solitum apposui, rogatus et requisitus in fidem et testimonium premissorum omnium.
Et ego Ricardus Militis clericus Sancti Andree dioceseos, publicus imperiali autoritate notarius, premissis omnibus et singulis dum sic ut premittitur coram prefato domino meo episcopo Sancti Andree fierent et agerentur una cum prenominatis testibus presens interfui eaque sic fieri vidi et audivi et cum subscriptis notariis in notam recepi et presens publicum instrumentum aliena manu scriptum de mandato dicti domini episcopi [...] publicavi illudque una cum appensione sigilli dicti reverendi patris signo et subscriptione meis solitis et consuetis signavi, in testimonium premissorum rogatus et requisitus.
Et ego Robertus de Cerny clericus Sancti Andree dioceseos, publicus autoritate apostolica et imperiali notarius, omnibus et singulis suprascriptis dum sic ut premittitur et coram prelibato domino episcopo Sancti Andree fierent et agerentur una cum subscriptis testibus presens interfui, eaque ut prefertur sic fieri vidi et audivi, una cum subscriptis notariis presens publicum instrumentum aliena manu supra scriptum de mandato prefati domini episcopi publicavi, ac signo meo solito et consueto una cum sigilli predicti reverendi in Christo patris munimine signavi ideo me hic manu propria subscripsi rogatus et requisitus coram testibus notariisque supradictis in testimonium veritatis omnium et singulorum premissorum.