[A1641/8/135]*[print] [email] [cite] [preceding] [following]
Supplicatioune Johne Drummie for a commissioun†
Unto your majestie and estaittes of this present parliament, humblie meanis and schawis I, your servitour, Johne Drummie in Kirksyd, brother and narrest of kin to umquhile Issobell Drummie, spous to Robert Walcar in Charlitoun within the parochin of Montrose, that quhair the said Robert, having violat his oath and promeis maid to the said umquhile Issobell Drummie, his spous, the tyme of the solemnizatioun of thair mariage, and haveing fallin in adultrie with Margaret Grahame, sister to David Grahame in Charlitoun, for the quhilk they wer accuseit befoir the sessioun of Montrose and ordanit never to be sein againe in companie with utheris, and to mak satisfactioun for thair bygane misbeheaveours; and the said Robert Walcar, David Grahame and Margaret Grahame, his sister, conceaveing that the foirsaid sin of adultrie wes detectit be the said umquhile Issobell Drummie, spous to the said Robert, (howsoever it wes utherwayes notar and knawin to all thair nighbouris and parochinaris about), they, resolveing and taking advyse and counsall amonges thame selffis how to be red of the said umquhile Issobell Drummie, resolveit to put hir to death privatlie, quhilk the said Robert Walcar had often of befoir avowed. Quhilk malicious and cruell intentioun they upoun the [...] day of Maii last bypast, efter ten houris at night, that the poore woman had gone to bed, that in executioun by strangling hir with ane cord or curch and thairefter caried hir to the croce of Morphie and brak up ane daill of on of the Laird of Morphies croes maist euest the land, wherin at that tyme thair wes no watter, and schott her in thair. Quhilk murther is most appeirandlie done be the saids personeis and thair ar many evident and probable presumptionis againes thame, viz: that the said David Grahameis face was scartit, his nois on baith sydes bled, his thume bitten, quhilk wes knawin to be weill the night befoir. Lykeas the poore woman wes hard be nighboures crying for help. And thir personeis being tryed baith be the Laird of Morphie and proveist and bailyies of Montrois wer found to varie in thair declaratiounes, so that it is presumed and thought be the haill countrie that they ar guiltie of the said murther. Heirfoir we maist humblie beseik your sacred majestie and estaittes of this present parliament that ye wald grant ane commissioun for taking and apprehending of the said Robert Walcar, David Grahame and Margaret Grahame, his sister, and present thame to the proveist and bailyies of Montrois, to be tryed and examined anent the said murther and for torturing thame to mak thame confess; and being found guiltie, to put thame to death, that the land may be purgeit of sin. And your sacred majestie and estaittes answer.
16 Novembris 1641
The king's majestie and estaites of parliament grantis commissione to the provest and baillies of Montrose for trying the murther within writtin and apprehending the persones within contenit, to be examined be thame therupon and to report to the counsale.
Balmerino, I[n] p[raesentia] d[ominorum] parliamenti†