[A1641/8/40]*[print] [email] [cite] [preceding] [following]
Wnto his sacred majestie and honorable lordis and estaites of this present parliament, humblie meanis and schawis I, your servitor Maistir Williame Turnbull, minister at Makcairstoun, that quhair umquhill Johnne Turnbull of Mynto, my brother, contractit seiknes in the publict service in the army at Newcastell, quhair he remainit ane lang space and thairefter depairtit this lyfe, quhairby the gift of the waird of his lande and mariage of Johne Turnbull, his eldest sone, now fallis in your majesties hande, heirfoir I beseik your majestie and estaites foirsaidis to geve ordour to his hienes thesaurar depute and remanent lordis of exchekker to pas the signatour presentit to thame quhilk is signed by your majestie in my name of the said gift of waird and mariage of the said Johne Turnbull, my brother sone, quhilk is taikin to his behuif of consent of his speciall freindis. And that upoun sik reasonable compositioun as your majestie and estaites foirsaidis sall think expedient.
17 September 1641
His majestie, with advyse of the parliament, appointis the deputie thesaurar and lordis of exchekquhair to pass the gift within written gratis, and appointis the clerk to give the dowble of this delyverance under his hand for thair warrand.
Balmerino, I[n] p[raesentia] d[ominorum] parliamenti†
[A1641/8/41]*[print] [email] [cite] [preceding] [following]
Unto the kingis most excellent majestie and the honorabill hous of parliament, I, Alexander Ramsay, sone lawfull of umquhile Johne Ramsay off Balnabreiche, and brother to umquhile James Ramsay, sone naturall to the said umquhile Johne, my father, humblie scheweth that quhair I, as brother to the said umquhile James Ramsay, have obtynit the gift of his bastardrie under his majesties hand, quhilk gift the thesaurer depuit and remanent lordis off excheker will on nawayis pas, expeid and delyver to me without ane compositione be payit thairfoir, albeit it was intendit be the honorabill estaittis off parliament that the airis, executoris and narrest freindis off suche as sould happin to die in the publict service sould be usit with all kynd of favour and receave all suche courtesies as the king and estaittis might grant in thair behalff. And trew it is that the said umquhile James Ramsay, my brother, was killed in the conflict at Newburne, being ane trowper in the cumpanie under the commandement off Capitane Grahame, as is notour to the haill commanders wha war thane present. Thairfoir it is humblie desyrit be me that ane warrand may be grantit and direct in my favouris to the thesaurer depuit, lordis of excheker and utheris quhome it concernis to pas, expeid and delyver to me the foirsaid gift alreaddie grantit in my favouris, and that without payment of any compositioun. Thairfoir in respect foirsaid and I sall ever as bond in dewtie pray etc.
17 September 1641
Red in audience of his majestie and estaittis off parliament, who granted the desyre theroff.
Alexander Gibsone
[A1641/8/42]*[print] [email] [cite] [preceding] [following]
17 Septemb[er] 1641
At the meitting of the nobilitie in the efternoone
Gif his majestie shall be humblie intreated befoir the parliament tak the list of counsallouris to consideration to condiscend upone ane definite nomber of the counsale, yea or no.
Gif his majestie shalbe intreated that he may be pleased at the humble desyre of the estaittis to nominate the officiaris of estaite befoir the parliament tak the list of counsallouris to consideratione, yea or no.
Resolved upon the first questione affirmative. Lykewayis resolved affirmative upon the second questione.
1. That the definite nomber of counsallouris be knowin.
2. That such counsallouris be named as will undertake to attend.
[A1641/8/43]*[print] [email] [cite] [preceding] [following]
[A1641/8/44]*[print] [email] [cite] [preceding] [following]
Seing the wordis of the act ar that his majestie will nominat and mak choyse of such habill and qualifeit persones to fill the places as sall be fittest for his service and may give most contentment to the estaitis of parliament and that he will mak the said nominatioun and choyse with the advyce and approbatioun of the estaittis:
Queritur
Iff the parliament may give his majestie thair advyce befoir the nominatioun and iff, in thair advyce, they may condiscend upoun the persones names quhom they think fittest for his service and thair contentment.
Question
Iff thais quha hes bene forth of the countrie dureing the tyme of the troubles (giving that they wer weill affected) sall be paralelled be the king and parliament in the electioun to eminent places with thais quha hes gone alonges with the countrie in hir bygaine extremities, and iff the parliament can give thair advyce to the electioune of thame as being the fittest men considdering the present conditioun of tyme efter sic long troubles, yea or no.
Resolved be the barones upoun this questioun negative.