[Supplication of the Earl of Glencairn regarding his precedency in parliament and deliverance thereupon]

Lord Glencairn, his supplicatioun and delyverance thairupon

Unto the honorable memberis and estaits of the soverane court of parliament of this kingdome now convenit, humblie menis and schawis Williame, erle of Glencairne etc., that quhan out of my affectioun to the advancement of the publict wark now in hand and out of my ernest desyre to contribute my best indevoris for setling of the happie peace long wissit for and now expectit in this kingdome, and in obedience of the lettres and ernest desyre of the comittie of the estaits of parliament requyring my presence at this present dyet of the said parliament, I am now cum heir to attend the parliament and to doe that dewtie and to witnes that affectioun to the advancement of all our viset ends as becumes a guid patriat and trew cuntrieman. Bot in the dischargeing and acting of my dewtie and place (as haveing the honour to be ane noble man and member of parliament) I doe forsie that I am to incounter with sum difficultie and scroppell anent my place and dignitie in parliament in sua far as be ane pretendit decreit gevin againes umquhile James, erle of Glencairne, my guidsir: in anno 1606, be warrand of ane commissioun from his majestie for ranking of the haill nobilitie of this kingdome, my said umquhile guidsir wes alledgit postponit in place of dignitie and voce of parliament the erles of Cathnes, Montrois, Eglingtoun and Cassels, quha, haveing taikin advantage be the absence of my said guidsir, did obtene preference as said is, howbeit I and my predicessours be indoutitlie prior to thame in richt and place of dignitie as I am liable presentlie to certifie. Lykas be the forsaid decreit it is expreslie provydit that gif any nobleman be thairby prejudgit and postponed in thair just place of dignitie, they salbe hard to seik redress and to be restorit againes the samyne decreit. And accordinglie my said umquhile guidsir, upoun prioritie of richt and tytle, did obtene reductioun of the said former decreit, quhilk decreit reductive wes thairefter reduceit at the instance of the Erle of Eglingtoun in anno 1617 ex hoc allanerlie, that the saidis Erles of Cathnes and Montrois wer not callit thairto, quhilk wes onlie ane meir defect of formalities without ony farder ground, so that undoutitlie the prioritie of place, voce and dignitie doeth justlie pertene to me. Nather can I guidlie without prejudice of my place and dignitie appeir, sit, voce or ryd in parliament unles your lordis tak the samyne to your consideratioune as the onlie proper and most competent judges thairto, and efter consideratioun of my richtis and tytle, to ordene me to be restoirit and reponit in integrum againes the saids decreits. And as it sall be one greit discontentment to me to be absente or deficient frome the present work in hand, so I can not guidlie in honour doe any voluntar act quhilk may wrong my place and dignitie forsaid, heirfoir I humblie desyre your lordis to tak the said mater togidder with my forsaids tytles to the forsaid dignitie to your serious consideratioune, and to appoynt and decerne to me my just and richt place, voce and dignitie in parliament according to my tytles, quhilk I sall presentlie instruct, or uthirwayis that your lordis will be pleisit to tak such uthir course in the said mater as the present greit effairs now depending be not interruptit, nor I wrongit nor prejudgit in my place and dignitie foirsaid, that I may saiflie joyne with the rest of the memberis of parliament without prejudice as said is. And your lordis answer.

Apud Edinburgh, 15 July 1641

In parliamento

The estaittis of parliament, haifing takin the desyre of this bill to thair consideratioune, findis and declairs that Williame, erle of Glencairne, his sitting and voyting in parliament at this tyme, shall nowayis be prejudiciall to him in the right of his place whensoever he shall intend persute for the same befoir any judge competent. And siclyke that this answer or reference shall not in any sort prejudge these other noblemen or any of thame in thair richtis or possession and just defensis of the same, as accordis of the law.

Red, voitted and passed in parliament.

Burghley, I[n] p[raesentia] d[ominorum] parliamenti

  1. NAS, PA6/3, 'July 15 1641'. Back
  2. This clause is written on the rear of the document. Back
  3. This clause is written on the rear of the document. Back