[1633/6/155]*[print] [email] [cite] [preceding] [following]
Oure soverane lord, with advyse and consent of the thrie estates of this present parliament, be thir presents ratifies and approves the chartor or letters patent maid and grantit be his majestie, of the dait at Whytehall, the tent day of Maii, the yeir of God jM vjC and tuentie aucht yeirs, quhairby, and for the causes onerous thairin contenit, his majestie seperated, dismembered and devydit in all tyme thaireftir the lands of Portrie and Kinhilt and tuentie merk land callit Sorbies Lands, lyand withine the shirefdome of Wigtoun, fra the kirk and parochine of Inche, within the quhilk the samyne did ly of befoir, and erectit the saidis lands and baronie of Portrie and Kinhilt with the said tuentie merk lands callit Sorbies Lands and haill bounds within the samyne in ane severall and distinct parochine, and ordanit the kirk then bigging within the burgh of Portpatrick, alias Portmongumrie, to be the paroche kirk thairof in all tyme thaireftir, and ordanit the said kirk to be plantit with ane sufficient pastor and minister to serve the cure thairat as ane severall paroche kirk, and ordanit the haill inhabitants of the said burgh of Portpatrick, alias Port Mongumerie, with all uther inhabitants within the saidis lands and baronie of Portrie and Kinhilt and tuentie merk land forsaid callit Sorbies Land, to repair to the said kirk of Portpatrick, alias Portmongumrie, to the pious uses thairin mentionat, and quhairby his majestie erectit the said kirk in ane severall title and rectorie to be callit the rectorie of Portpatrick and gave, grantit and disponit to Hew, vicount Montgumrie of Airds, his airs and successors, the advocatione, donatione and richt of patronage of the said rectorie, with the richt of presentatione and nomination of the ministers to serve at the said kirk in all tyme thaireftir, and unit and annexit the samyne advocatioun, donatione and richt of patronage of the said rectorie to the forsaid baronie of Portrie and Kinhilt perteining heretablie to the said Hew, vicount Montgomrie. And siclyk, be thir presents, ratifies and approves the chartor of mortificatione maid and grantit be his majestie wnder his hienes great seale, of the dait at Hamtoun Court, the tuentie fyft day of October, the yeir of God jM vjC and threttie yeirs, quhairby his majestie supprest and extinguischit the name and title of the abbacie of Salsett, to the effect that the haill teinds, fruites, rents and dewties perteining to the said abbacie micht be mortifiet, unit and annexit to the kirk of Portpatrick, wnder the reservationes mentionat in the said chartor of mortificatione, and quhairby his majestie mortifiet, unit and annexit to the said kirk of Portpatrick, and to the minister serving the cure thairat and his successors for ever, the haill teinds, personage and viccarage great and small, kirks, rents, proffeitts, dewties and emoluments perteining of befor to the said abbacie and spiritualitie thairof, reservand to his majestie and his successors the presentatione of the ministers of the kirkes of Salsett and Kirkmadin in the Rinnes, quhilkes war of befor the onlie tua kirkes of the said abbacie, togider with the haill locall stipends and teinds of the saidis kirkes payit to the ministers serving the cure at the samyne kirkes and thair successors alreadie modifiet to thame, and quhairof they war in possessione befor the dait forsaid of the said last chartor, and quhairby his majestie gave, grantit and disponit to the minister serving the cure at the said kirk of Portpatrick and his successors the haill rest and remanent teinds, personage and viccarage, fruites and rents of the saidis tua kirkes of Salsett and Kirkmadin (over and abone the locall stipends abonementionat) to remaine with the said kirk of Portpatrick as ane pairt of the patrimonie thairof for ever, and quhairby his majestie gave, mortifiet and assignit to the said minister of Portpatrick and his successors the haill fewfermes and fewmaills of the haill temporall lands of the said abbacie of Salsett of the crope and yeir of God, jM vjC and threttie yeirs, Whitsunday and Mertimes termes thairof, and of all yeirs and cropes thaireftir wnder the declaratione and provisione mentionat in the said last chartor in all and sundrie pointes, articles and clauses contenit in the saidis tua chartors, efter the formes and tennors thairof. And declairs and ordaines that this present ratificatioun of the saidis tua chartors, baith wnder the great seale, is and sall be als guid and sufficient in all respects as if the samyne tua chartors wer at lenth and word be word insert and ingrossit heirintill, dispensand heirby with the not inserting thairof in this present ratificatioun. Lykas his majestie, with advyse and consent forsaid, be thir presents statuites and ordaines that the forsaid first chartor or letters patent and this present ratificatioun thairof ar, and sall be, sufficient richts and secuirities to the minister of the said kirk of Portpatrick, alias Portmongumrie, and his successors for bruiking and joysing of the teinds thairof provydit to him and to the said Hew, vicount Montgumrie of Airds and his forsaidis, for the peacible bruiking and joysing of the said advocatioun, donatioun and richt of patronage of the said paroche kirk or rectorie, and of the richt of presentatione and nominatione of the ministers to serve the cure at the said kirk in all tyme coming. And lykwayes that the forsaid last chartor and this present ratificatioun thairof ar, and sall be, ane sufficient, valeid and lawfull richt and secuiritie to the said minister of Portpatrick and his successors for bruiking, joysing and possessing of the teinds, personage and viccarage, fruites, rents, emoluments, fewfermes, fewmaills and uthers abonementionat mortifiet to thame be the said last chartor perpetuallie in all tyme coming wnder the declaratione and provisione thairin mentionat, ordaining thir presents to be ane sufficient warrand to the clerk of register and his deputtes for extending of ane act of parliament heirupon in dew and competent forme, with provisione alwayes that this present ratificatioun sall nawayes be prejudiciall to the Laird of Kinhilt, his richts and infeftments, bot that the samyne sall remaine with him wnhurt as of befor.
[1633/6/156]*[print] [email] [cite] [preceding] [following]
Oure soverane lord, with advyse and consent of the thrie estates of parliament presentlie convenit, ratifies, approves and confirmes ane contract and appointment, of the dait the tuentie fyft day of Maii, the yeir of God jM vjC threttie tua yeirs, registrat in the buikes of counsall and sessioune upon the tuentie aucht day of the said moneth of Maii and yeir of God forsaid, maid betuix Sir William Hamiltoun of Elistoun, knicht, sone and air servit and retourit to umquhile Sir Glaud Hamiltoun of Schawfield, knicht, his father, one the ane pairt, and Sir Arthur Dowglas of Quhittinghame, knicht, designit thairintill Arthur Dowglas of Quhittinghame, one the uther pairt, be vertew quhairof, and for the causes thairin contenit, the said Sir Williame Hamiltoun, sone and air forsaid, hes sauld, assignit, transferrit and disponit to and in favours of the said Sir Arthur Dowglas, his airs and assignais the assignatione and richt maid be Sir George Hamiltoun of Greinlaw, knicht, to and in favours of the said umquhile Sir Glaud Hamiltoun, father to the said Sir Williame, of the tak and assedatioun of the teinds, personage and viccarage, of Quittinghame, with the pairts, pendicles and pertinents thairof quhatsumever, and the said tak and assedatione assignit to the said umquhile Sir Glaud, be vertew thairof, of the daits, tennoris and contents specifiet in the said contract, togider with all uther richts, takes, assignationes, dispositiones and uthers quhatsumever maid and conceavit in favours of the said Sir Arthur Dowglas and his authors of and concerning the saidis teinds, personage and viccarage, of Quhittinghame, pairts, pendicles and pertinents thairof, in the haill heads, articles, clauses and conditiones of the samyne, willing and declaring that the generalitie heirof sall be nawayes prejudiciall to the said Sir Arthur and his forsaidis, bot the samyne to be als valeid and effectuall to him and his forsaidis as if the haill tenor and clauses thairof wer particularlie heirin ingrossit verbatim. And declairs the samyne richts to be guid, valeid and sufficient to the said Sir Arthur Dowglas and his airs, quhairby they may bruik the saidis teinds in all tyme coming during the tyme and yeirs contenit in the saidis takes and richtes of the saidis teinds.
[1633/6/157]*[print] [email] [cite] [preceding] [following]
Oure soverane lord, with advyse and consent of thrie estates of this present parliament, be thir presents ratifies and approves the chartor maid and grantit be his majestie wnder his hienes great seale to Maister William Drumond of Hathornden, his airs and assignais of all and haill that half of all and sundrie the lands of Newtoun of Rires and haill portioun thairof, with the maner place, houses, biggings, outsetts, orcheards, yeards, dowcatts, toftes, croftes, colls, coallheuches, mylnes, multurs, annexis, connexis, pairts, pendicles, priveledges, pastures and all thair pertinents quhatsumever, lyand within the lordschip and stewartrie of Fyffe, quhilkes pertenit of befor to umquhile Sir Williame Scott of Elie, knicht, ane of the ordinar clerks befor the lords of counsall and sessioun, or to some uthers, his pretendit mediat or immediat authors thairof, haldine be him or thame immediatlie of his majestie or his hienes predicessors, as being become in his majesties hands at his hienes gift and dispositione be diminutione of his hienes rentall thairof, and be omissioun be the said umquhile Sir Williame Scott and be some of his pretendit authors thairof, mediat or immediat, at the least be the said umquhile Sir Williame himselff in his or thair infeftments thairof grantit be his majestie or his predicessors of the claus anent the mariag of the fewars thairof contenit in the originall infeftment of fewferme of the samyne thairin specifiet in maner thairin mentionat. Quhilk chartor conteines ane new gift and few of the lands and uthers forsaidis maid, grantit and sett be his majestie to the said Maister Williame Drumond and his abonementionat of the lands and uthers abonespecifiet, cum supplemento omnium defectum in ample forme, and quhilk chartor is daitit at Denmarkhous, the tuentie day of July, jM vjC and tuentie nyne yeirs, with the precept and instrument of sasing following thairupon in all pointes, heads, articles and claus thairinmentionat, and decernes and ordaines this present ratificatioun thairof to be als sufficient in all respects as if the samyne war at lenth insert heirintill. And for the said Maister Williame Drumond and his forsaidis, thair better richt and secuiritie of the lands and uthers abonespecifiet, his majestie, with advyse and consent abonewrittine, be the tennor, heirof dissolves the lands and uthers abonewrittine fra his majesties crowne and patrimonie thairof, to the effect that his majestie may give, grant, dispone and sett in fewferme to the said Maister Williame Drumond and his abonespecifiet the lands and uthers abonementionat as being become in his majesties hands, at his hienes gift and dispositione in maner abone writtine, to be haldin of his majestie and his successors in fewferme for the yeirlie payment to his majestie and his successors, thair comptrollers, collectors, chamberlanes and factors present and that sall be for the tyme of the soume of thretteine punds usuall money of this realme of Scotland at tua termes in the yeir, Whitsunday and Mertimes in winter be equall portiones, ten bolls quheitt, tuelf bolls and tua firlottes beir, tuentie four pultries and tuelf capones at the termes of payment usit and wont, in name of fewferme, and also the airs of the said Maister Williame Drumond doubland the said fewferme the first yeir of thair entrie to the saidis lands, with the pertinents, as use is of fewferme, and lykwayes biggand and uphalding a sufficient mansioun, with hall, chalmer, kitchein, barne, byre, dowcatt and uther place necessar upon the grund of the saidis lands corresponding thairto, togider with the mariage of the airs of the said Maister Williame Drumond and his forsaidis quhen it sall happin, and payand all uthers dewties and keipand and fullfilland all uther clauses and conditiones (gif any be) contenit in the auld infeftments, takes or rentalles of the saidis lands, quhilks ar haldin as expressit in the said chartor, ordaining thir presents to be ane sufficient warrant to the clerk of register and his deputtes for extending of ane act of parliament heirupon in dew forme.
[1633/6/158]*[print] [email] [cite] [preceding] [following]
Oure soverane lord and estates of this present parliament ordaines ane ratificatioun to be maid in favour of the deacone and remanent brithereine, burgeses and friemen of the skinner craft within the burgh of Edinburgh and thair successors, in dew forme, ratifiand, approvand and, for his hienes and his successors, perpetuallie confirmand the letters, act, decreit and ratificatioun thairin contenit, maid, givin and grantit upon the tuentie saxt day of November, jM vjC and threttie yeirs, be the than proveist, baillies, deane of gild, thesaurer and remanent counsall and deacones of crafts within the burgh of Edinburgh convenit to counsall, upon supplicatione maid to thame be the deacone of the said skinner craft for the tyme, for himselff and in name and behalffe of the remanent brithereine, burgeses and friemen of the said craft within the said burgh, to the samyne deacone and remanent brithereine, burgeses and friemen of the said skinner craft within the said burgh and thair successors and in thair favours, quhairby the saidis proveist, baillies, counsall and deacones of craftes of the said burgh hes ratifiet and approvine the particular articles speciallie and particularlie exprest in the saidis letters and act maid alsweill for observing of ordour and policie amongs the said deacone and remanent brithereine, burgeses and friemen of the said craft, as for thair liberatione frome the injuries frome uthers, and great damnage sustenit be thame be the great multitude of wnfriemen of the said craft within the said burgh and outwith the samyne in the suburbes thairof, to the effect that good order and policie may be observit among the brithereine of the said craft, and that they may be preserved frome the injurie and oppressione quhilk may befall to thame be wnfriemen and straingers quha, without any warrand, usurpes the libertie and priveledge of the said craft, as the saidis articles at lenth insert in the saidis letters and act beirs. And all the clauses and circumstances of the saidis articles, as being fund be the saidis proveist and baillies, counsall and deacones of craft of the said burgh, efter thair reiding, consideratione, lang conference and consultatione had thairupon, and thairwith being ryplie advysit, to be maist reassonable, lawfull, and proffitable for the honour, weill and policie of the said craft, and the saidis proveist, baillies, counsall and deacones of croftes hes interponit thair authoritie thairto, and decernit tham to be keipit and observit in all tyme coming, and hes commandit the officiars present and to come to putt the samyne to dew executioun in all pointes againes the contraveners and breakers thairof wnder the paines thairin contenit in maner thairin mentionat, as in the saidis letters, act, decreit and ratificatioun thairin contenit of the dait forsaid, wnder the signe and subscriptione manuall of the commoun clerk and seale of caus of the said burgh, at mair lenth is contenit; and the confirmatioun grantit thairupon be our said soverane lord the king's majestie, with advyse and consent of his hienes principall thesaurar, deputtie thesaurar, and remanent lords of his hienes exchecker of Scotland, his majesties commissioners, to and in favours of the said deacone and remanent brithereine, burgeses and friemen of the said skinner craft within the said burgh of Edinburgh, and thair successors, wnder his majesties great seale, of the dait at the palace of Quhytehall in Ingland, the tuentie fyft day of Marche, the yeir of God jM vjC threttie ane yeirs, as the samyne confirmatioun also beirs in all and sundrie the heads, pointes, clauses, articles and conditiones thairin contenit, and efter the formes and tennors thairof in all pointes. And oure said soverane lord and estates of this present parliament willes, grants, decernes and ordaines all the heads and articles contenit in the saidis letters, act, decreit and ratificatioun thairin contenit, confirmit as said is, maid and grantit in favours of the said deacone and remanent brithereine, burgeses and friemen of the said skinner craft within the said burgh of Edinburgh and thair successors, and for thair good ordour, pollicie and utilitie in maner thairin contenit, to be dewlie observit, keipit and obeyit in all tyme coming, and to be putt to dew executioun in all pointes againes the contraveiners and breakers thairof, wnder the paines thairin contenit in maner thairin mentionat in all pointes. As also oure said soverane lord and estates of parliament wills, grants, declairs and ordaines that this present ratificatioun of the saidis letters, act, decreit and ratificatioun and articles thairincontenit, and of his hienes said confirmatione thairof, is, and sall be, als valeid and sufficient and of als great force, strenth and effect to the said deacone and remanent brithereine, burgeses and friemen of the said skinner craft within the said burgh of Edinburgh and thair successors for bruiking and using of the liberties thairin contenit in all tyme coming, as if the samyne letters, act, decreit, ratificatioun and articles thairin contenit and his hienes said confirmatione thairof wer all at lenth de verbo in verbum insert and contenit in the said ratificatione, notwithstanding the samyne sall not be sua done; quhairanent, our said soverane lord and estates of parliament hes dispensit and, be thir presents, dispenses for ever, and that the said ratificatioun be farder extendit in dew forme with all clauses necessar.
[1633/6/159]*[print] [email] [cite] [preceding] [following]
Oure soverane lord, with advyse and consent of the thrie estates of this present parliament, be thir presents ratifies and approves the precept of sasing grantit be Williame, earle of Angus etc., commissioners for the tyme, for infefting of Maister James Nicolsone, now of Colbrandspeth, in all and haill the lands, lordschip and baronie of Colbrandspeth, with the tower, fortalice, houses, biggings, towne, maynes, schawes, wodes, mylnes, multors, fischings, coalles, coallheuches, salt pannes biggit and to be biggit thairupon, pairtes, pendicles and haill pertinents of the thmyne, togider with the lands of Bowscheill, Paddokcleuch, Rawchinsyde and Tourly, with all and sundrie outschottes, pairts, pendicles and haill pertinents of the samyne, annexis, connexis, tennents, tennandries, service of frie tennents thairof and all thair pertinents, lyand within the shirefdome of Bervick, as air to umquhile Maister Thomas Nicolsone of Colbrandspeth, comisir of Abirdeine, his father, of the dait the tuentie aucht and tuentie nyne dayes of October, jM vjC tuentie fyve yeirs, with the instrument of sasing following thairupon. And also the chartor of alienatioun of the lands and uthers forsaidis maid be Johne Arnot of Colbrandspeth and James Arnot, merchant burges of Edinburgh, his father, to the said umquhile Maister Thomas Nicolsone, his airs and assignais, of the lands and uthers abonespecifiet, to be haldine of the said Williame, earle of Angus, of the dait the penult day of August, jM vjC tuentie ane yeirs, and the precept of sasing thairin contenit and instrument of sasing following thairupon. And the chartor of confirmatioun maid be the said Williame, earle of Angus, of the dait the penult day of the said moneth of August, the said yeir of God jM vjC tuentie fyve yeirs, confirmand the chartor of alienatione abonespecifiet. As also the chartor of alienatione maid be umquhile Williame Arnot of Colbrandspeth to the said Johne Arnot, his sone, and Margaret Craig, his spous, of the lands and uthers abonespecifiet, wnder the reservationes and restrictiones thairin mentionat, to be haldine of the said Earle of Angus, daitit the tuentie sax day of May, jM vjC tuelff yeirs, the instrument of sasing following thairupon, of the dait forsaid of the samyne chartor, and the confirmatione of the chartor of alienatione immediatlie abonementionat maid be the said Earle of Angus, daitit the tuentie sax day of Marche, jM vjC and saxteine yeirs. And inlykmaner the chartor of alienatione of the lands and uthers forsaidis maid be James, lord Tarthorrald, and Elizabeth Gordoun, his spous, to the said umquhile Williame Arnot, to be haldine of the Earle of Angus for the tyme, daitit the auchteine day of Apryll, jM vjC nyne yeirs, and the precept of sasing thairincontenit, and instrument of sasing following thairupon, and the confirmatione of the chartor of alienatione immediatlie abonementionat maid be the Erle of Angus commissioners, daitit the thride day of Juni, in the said yeir of God jM vjC nyne yeirs. The chartor of alienation of the lands and uthers forsaidis maid be umquhile James Dowglas of Torthorrald to the said James, lord Torthorrald, then designit James Dowglas, his sone, and the said Elizabeth Gordoun, his spous, to be haldine of the Earle of Angus, daitit the auchteine day of July, jM vjC and four yeirs, and precept of sasing thairincontenit, and instrument of sasing following thairupon, and the confirmatione thairof grantit be the said William, now earle of Angus. As also the chartor grantit be Archibald, erle of Angus, to the said umquhile James Dowglas of Torthorrold of the lands and uthers forsaidis, to be haldine of the said Erle of Angus, of the dait the saxt day of Februar, jM vC fourscoor sevine yeirs, and the precept of sasing thairin contenit, and instrument of sasing following thairupon. And the chartor grantit be umquhile King James the Fyft to umquhile Archibald, earle of Angus, his airs and assignais thairinspecifiet, of the saidis lands, lordschipe and baronie of Colbrandspeth, to be haldine of his majestie, of the dait the [...] day of [...], the yeir of God jM vC and [...] yeirs, with the precept and instrument of sasing following thairupon. And inlykmaner the take and assedatioun sett be umquhile Dame Elizabeth Home, priores of the abbacie of Sanct Bothane, for hirselff and as commissionar for umquhile Adame, comendator of Bewlie, hir spous, and haiffand power of him to intromett with and uplift all and sundrie the fruites, rents, teinds and dewties of the said priores of Sanct Bothanes, and to sett takes long or schort thairof and dispone thairupon at hir pleasure, of the dait the tuentie sevint day of July, jM vjC and thretteine yeirs, quhairby schoe sett in tak and assedatioun to umquhile Alexander, earle of Home, his airs and assignais thairin mentionat, for the haill space of thrie lyftymes and thrie nynteine yeirs thairin exprest, all and haill the teindscheives of the townes, lands and maynes of Colbrandspeth and certane uthers lands thairin exprest, lyand within the parochine of Colbrandspeth and the said shirefdome of Bervick, for payment of the yeirlie dewtie thairin mentionat, in suafar as the samyne tak and richt thairof is assignit to the said Maister James Nicolsone in maner eftermentionat. Togider with the contract past betuix Marie, countes of Home, and umquhile James, earle of Home, hir sone, air maill of the said umquhile Alexander, earle of Home, takisman forsaid, baith with ane consent and assent, one the ane pairt, and the said Maister James Nicolsone of Colbrandspeth one the uther pairt, of the dait the tuentie fyft day of Junii, jM vjC threttie ane yeirs, quhairby the said countes and umquhile Earle of Hume maid and constituit the said Maistir James Nicolsone and his airs cessioners and assignais in and to the forsaidis teindscheaves of the saidis lands and maynes of Colbrandspeth, Chappelhill and Rawchinsyd, with all and sundrie thair outsetts, annexis, connexis, pairts, pendicles and pertinents thairof quhatsumever of the cropes and yeirs of God, jM vjC threttie and jM vjC threttie ane yeirs, and of all yeirs and cropes thaireftir during the lyftyme, yeirs and spaces contenit in the forsaid tak and assedatione to rinn, and in and to the samyne tak, clauses of warrandice thairin contenit and all uther conditiones, heads, articles and clauses thairinspecifiet conceavit and sett downe or that may be interprett in favours of the said umquhile James, earle of Home, and all actione, instance and executioun competent or that may be competent to the said umquhile James, earle of Home, his said mother or ather of thame, thair airs or assignais, be vertew thairof in all and sundrie pointes, articles and clauses thairin contenit, efter the formes and tennors thairof, and wills, declairs, statuites and ordaines that this present ratificatioun of the samyne is and sall be als valeid, effectuall and sufficient in all respects as if the samyne wer at lenth and word be word insert thairintill, dispensing heirby with the not inserting thairof. And farder his majestie, with advyse and consent forsaid, decernes, declairs and ordaines that the said Maister James Nicolsone and his forsaidis sall peaciblie bruik and joyse the lands and uthers abonespecifiet perteining to him heretablie as said is perpetuallie in all tyme coming, and the teinds forsaidis during the haill lyftymes, yeirs and spaces contenit in the said tak and assedatioun thairof abonespecifiet, conforme to the chartors, precepts, sasings, confirmationes, takes and assedationes thairto abonementionat; and that notwithstanding of any restitutione of any persones heirtofoir forfaltit or yett be the forfaltor led and deduicit againes any superiors of the saidis lands or be any uther lawes, constitutiones, revocationes, dissolutiones or actes of parliament quhatsumever quhairby the said Maister James or his authors richtes of the lands, teinds and uthers forsaidis may be quarrellit or callit in questioun, quhilkes his majestie, with advyse and consent forsaid, halds heir as exprest; and that this generalitie thairof sall be als sufficient as if everie act, constitutione, dissolutione, forfaltor, restitutione or revocatione wer heirine exprest, and ane speciall reservatione and exceptione of the said Johne Arnotes richts of the lands and uthers abonespecifiet exceptit and reserved thairintill, dischargeing his majesties thesaurar, comptroller, advocat or any uther having power or richt of his majestie to quarrell, trouble or molest the said maister James Nicolsone or his forsaidis in the peacible bruiking and joysing of the lands, teinds and uthers abonespecifiet and everie pairt thairof for any caus bygaine. Quhairof his hienes, with advyse forsaid, hes declarit and declares this present act to be a sufficient supplement of all faults, alsweill as if provisiones and remeids necessar wer speciallie mentionat and exprest heirine, ordaining thir presents to be a sufficient warrand to the clerk of register and his deputtes for extending of ane act of parliament heirupon in dew and competent forme.
[1633/6/160]*[print] [email] [cite] [preceding] [following]
Oure soverane lord and estates of this present parliament ratifies, approves and confirmes the contract maid at Sanct Jameses besyde Lundone, the aucht day of November and at Edinburgh, the tuentie fourt day of December respective, the yeir of God jM vjC threttie ane yeirs, betuixt his majestie, with consent of his hienes thesaurar principall, thesaurer deputt and remanent of his majesties exchecker of this kingdome, one the ane pairt, and his hienes richt traist cowsigne Charles, earle of Dumfermling, with consent of his curators James Richardsone of Smeton, Robert Dowglas, Robert Vernour, Williame Merstoun, Thomas Foirman, Robert Maissone, Williame Hendersone, Thomas Smith, James Robertsone, Robert Strachane, Johne Vernour, Richard Allane, Walter Smart, James Duncane, Archibald Hislope, George Andersone and Robert Penman and remanent the fewars of the lands of Invreask, lyand within the lordschip of Musselburgh, regalitie of Dumfermling and shirefdome of Edinburgh, speciallie designit and sett downe in the said contract, one the uther pairt, registrat in the buikes of exchecker of the said kingdome at Edinburgh, the saxt day of Januar, jM vjC threttie tua yeirs, quhairby his majestie, with consent forsaid, faithfullie promitted to mak and perfyt to the saidis heretors respective, thair airs and successors in the richt of thair saidis lands respective all lawfull and valeid secuirities for bruiking of the teindscheaves of thair saidis lands respective, perpetuallie and for ever in all tyme coming; and for that effect willit and declarit that the saidis teind scheaves sould be unit and incorporat to the saidis lands, ilkane of thame for thair awine pairts respective, conforme to the proportioun of the propertie thairof, and to grant pases and exped to the saidis heretors and thair forsaidis infeftments of thair saidis lands cum decimis inclusis to the effect the saidis lands may be bruikit conjunctlie in stock and teind be the heretors of the samyne for ever, to be haldine of his majestie and his hienes successors in fewferme and heretage for the yeirlie payment of the fewferme dewtie contenit in the severall infeftments of the saidis fewars, thair saidis lands, and als for payment of the rentall bolles, everie ane of thame for thair awine pairts, to be addit to the saidis fewmaills in maner particularlie sett downe in the said contract and with declaratione that the saidis rentall bolles sall not be doublit at the entrie of the airs, bot allanerlie the auld fewferme dewtie contenit in the saidis heretors thair infeftments of the saidis lands, and the uthers conditiones quhatsumever contenit in the said contract exprest, sett downe and conceavit in favours of the saidis heretors, thair airs and successors, with the infeftments quhatsumever following or to follow thairupon, and all that hes followit or may follow upon the samyne in all and sundrie the heads, pointes, clauses, articles, circumstances and conditiones thairof, and efter the formes and tennors of the samyne in all pointes, sua that it is and sall be leasome and lawfull to the saidis heretors, and ilkane of thame, to pas and exped infeftments be resignatione or utherwayes in favours of thameselffes, thair airs, assignais or successors, ilkane of thame of thair awine lands, cum decimis inclusis, for payment of the dewties contenit and mentionat in the said contract in all tyme coming, and to secure thameselffes thairin for thair bruiking of the saidis teinds with the stock heretablie and irredimablie for ever, but contradictioun.
[1633/6/161]*[print] [email] [cite] [preceding] [following]
Oure soverane lord and estates of this parliament ordaines ane ratificatione to be maid thairine ratifiand, approvand and, for his hienes and his successors, perpetuallie confirmand, lykas be the tennor heirof our said soverane lord and estates of parliament ratifies, approves and, for his hienes and his successors, perpetuallie confirmes, the chartor maid, givin and grantit be our said soverane lord, with advyse and consent of his principall thesaurar, deputtie thesaurar and remanent lordes of his hienes exchecker of Scotland, his hienes commissioners, to and in favours of his hienes lovitt James Scott, eldest lawfull sone to Hew Scott of Dewcher, procreat betuix him and Jeane Pringle, his spous, dochter to Sir James Pringle of Gallowscheills, knicht, his airs male and assignais quhatsumever heretablie, of all and haill the lands and baronie of Gallowscheills, comprehending the particular townes, lands, burgh of baronie, advocatioun, donatioune, richt of patronage and uthers wnderwrittine, viz: all and haill the lands and steidings of Gallowscheills and Mosilie, with the pendicles thairof callit Nether or Eister Maynes; of Boylesyd Stobrig, with the tower, fortalice, mansioun, maner place, houses, biggings, wodes, cornemylnes and walkmylnes thairof, and with the fischings of salmond and uthers fischings upon the water of Tueed one baith the sydes thairof betuix the bridge of Melros and lands of Southerlandhall, quhair the water of Atrick rines in the said river of Tueid, with all and sundrie the annexis, connexis, tennents, tennandries, service of frie tennents, pairts, pendicles and pertinents thairof quhatsumever, with the burgh of baronie of Gallowscheills, and with all and sundrie mercatts, fairs, liberties, priveledges, immwnities, profeitts, commodities, easments and richteous pertinents perteining and belonging thairto; togider with the advocatione, donatione and richt of patronage of the viccarage of the kirk of Lymdane, with all priveledges, benefeits, liberties and commodities thairof, lyand within the lordschip of Atrickforrest and shirefdome of Selkirk, upon the resignatioun of the said Sir James Pringle of Gallowscheills, knicht, maid be him, with consent of Johne and Maistir George Pringles, his sones, and of the said Hew Scott and Jeane Pringle, his spous; and als the new gift and dispositioun contenit in the said chartor maid be his majestie to the said James Scott, his airs male and assignais forsaidis heretablie, of all and haill the saidis lands and baronie of Gallowscheills, comprehending the particular townes, lands, fischings, mylnes, wodes, burgh of baronie, advocatioun, donatioun, richt of patronage and uthers abonewrittine, with thair pertinents, and of all richt, title, entreis, clame of richt, propertie and possessioun quhatsumever quhilks his hienes, his predicessors or successors had, hes or anywayes may clame, pretend or have thairto or any pairt thairof, with the unioun, annexatioun and incorporatioun of the samyne in ane haill and frie baronie, to be callit now and in all tyme coming, as of befor, the baronie of Gallowscheills, quhairof the tower, fortalice and maner place of Gallowscheills is ordanit to be principall messwage, and thair ane sasing to be takine in all tyme coming to stand and be sufficient for the haill in maner specifiet in the said chartor, as the samyne beirand the saidis lands and uthers forsaidis, to be haldine of our soverane lord and his hienes successors in fie heretage, frie baronie and burgh of baronie for ever in maner specifiet in the said chartor, quhilk is wnder his majesties great seale, of the dait at Halyrudhous, the nynt day of Junii, the yeir of God jM vjC threttie tua yeirs at mair lenth beirs, with the precept of sasing following thairupon wnder the testimonie of the said great seale of the samyne dait, and instrument of sasing following thairupon, of the dait the [...] day of [...], the yeir of God jM vjC threttie [...] yeirs, in all and sundrie the heads, pointes, pases, clauses, articles, circumstances and conditiones thairincontenit, and efter the formes and tennors thairof in all points. And oure said soverane lord and estates of parliament wills and grants and, for his hienes and his successors, decernes and ordaines that this present ratificatioun of the said infeftment, chartor, precept and sasing is and sall be of als great force, strenth and effect to the said James Scott and his forsaidis for bruiking and joysing of the saidis lands and baronie of Gallowscheills, burgh of baronie, advocatioun, donatioun, richt of patronage and uthers abonewrittine thairin contenit, with all thair priveledges, liberties and pertinents in all tyme coming, as if the samyne infeftment, chartor, precept and sasing wer all at lenth word be word insert and contenit in this present ratificatioun; quhairanent, with all uther defects and imperfections quhilk may be proponit or alledgit againes the said infeftment, chartor, precept and sasing or this present confirmatione thairof and validities of the samyne, oure said soverane lord and estates of parliament hes dispensit and, be thir presents, for his hienes and his successors, dispenses for ever; and that the said ratificatioun be farder extendit with all clauses necessar, with provisione alwayes that this present ratificatioun grantit in favours of the said James Scott of Gallowscheill nor na pairt of the same sould be hurtfull or prejudiciall to Robert, earle of Roxburgh, nor to the shireff of Forrest, thair airs nor successors, in thair richt and title of the teinds, personage and viccarage, of the kirk of Lymden as titulars of the same or utherwayes howsoever, bot that the same sould remaine to thame as of befor wnhurt or prejudgit heirby.
[1633/6/162]*[print] [email] [cite] [preceding] [following]
Oure soverane lord, with advyse of the thrie estates of parliament, ratifies and approves the chartor grantit be his majestie, wnder his hienes great seale, for himselff and as father, tutor, guyder and lawfull administrator to his hienes darrest sone, the prince of Great Britane, France and Ireland, and prince and stewart of Scotland, to his hienes lovitts Johne Birsbane, elder, of Bischoptoun, in lyfrent, and to Johne Birsbane, younger, of Bischoptoun, his airs male and assignais heretablie, of all and haill the sax pund land lyand one the north syd of the water of Gogo, of the ten pund land of auld extent of Killingcraig and Gogosyd, with thair pertinents, and of all and haill uther four pund land of the said ten pund land of Killingcraig and Gogosyd, with mylnes, multors, wodes, fischings, pairts, pendicles and pertinents thairof, togider with the common pasture of goodes in the commountie commounlie callit the Comown Mwir of Largis; and als of all and haill that equall and just thride pairt of the said commowntie callit the Commoun Mwire of Largis, lyand neirrest and contigue to the saidis lands of Killincraige and Gogosyd, and of the greine quhair the commoun mercat now is haldine at the kirk of Largis, lyand betuix the water of Gogo and the mure callit Mureburne, with thair pertinents; and siclyk of all and haill the towne and burgh abone the saidis lands, callit the Newtoun of Gogo, with all priveledges and liberties of the said burgh of baronie, all erectit in ane frie baronie, callit the baronie of Gogosyde; and siclyk of all and haill the thretteine schilling, four pennie land of Hangandheuch, with tennents, tennandries and service of frie tennents thairof, with commoun pasture, commoun priveledge and libertie in the commountie and mure of Largis, annexis, connexis, pairts, pendicles and pertinents thairof, extending in the haill to saxteine merkland, all lyand in the bailliarie of Cwnighame and shirefdome of Air; and als of all and haill that pairt and portione of land callit the Largis and Largs Mure, with the towne of Largis, heaven place, lands, mures, coalles, hills, moses and commounties belonging thairto, or possest thairwith, or being propper pairts, pendicles, and pertinents thairof, alsweill abone the earth as wnder the earth, lyand in the saidis bailliarie of Cwnighame and shirefdome of Air, and that in sa far as answers to the proportioun of the propertie of the lands, baronie and uthers abonespecifiet contenit in the auld infeftments thairof of the said Johne Birsbane, elder, of Bischoptoun, extending to the said saxteine pund land lyand as said is, and to Jonat Chalmers, spous to the said Johne Birsbane, younger, of Bischoptoun, in conjunctfie, with the said Johne Birsbane, hir spous, of all and haill the said four pund land of Killingcraig, with the corne mylne, multors and sequells thairof, with maner place, houses, yeards, orcheards of the said four pund land, with all pairts, pendicles and pertinents thairof, proceiding upon the resignatioun of the said John Birsbane, elder, and Williame, vicount of Striveling, secretar to his majestie, conteining ane ratificatioun of all uthers infeftments grantit to the said Johne Birsbane and his predicessors of the lands, baronie, burgh of baronie and uthers abonespecifiet, and of new erecting the samyne in ane frie baronie, callit the said baronie of Gogosyde, to be haldine of his majesties deirrest sone, the prince, and his successors, princes and stewarts of Scotland, in fie heretage and frie baronie for ever, for yeirlie payment of service usit and wont, of the dait the elevint day of August, jM vjC threttie ane yeirs, togider with all and sundrie uthers chartors, infeftments, richtes and secuirities maid and grantit to the said Johne Birsbane, elder, and Johne Birsbane, younger, thair predicessors and authors of the lands, baronie and uthers respective abonewrittine in all and sundrie heades, clauses, articles and conditiones contenit thairintill efter the formes and tennors thairof. And farder his majestie, with advyse of the saidis estates of parliament, for the good, trew and thankfull service done to his hienes be the said Johne Birsbane, elder, and Johne Birsbane, younger, and for divers uthers good respects and considerationes moving his hienes, wills and grants, and for his hienes and his successors, decernes and declairs that the saidis chartors, infeftments and uthers richts and secuirities abonewrittine ar guid and valeid richts to the said Johne Birsbane, elder, and Johne Birsbane, younger, and thair forsaidis for bruiking and joysing of the lands, baronie, burgh of baronie and uthers respective abonespecifiet in all tyme coming. And farder his majestie, with consent forsaid, hes dissolved, and be thir presents dissolves, the lands, baronie and uthers respective abonespecifiet, with the pertinents, fra all actes of annexatione quhatsumever maid of the lands within this realme to his hienes crowne be any of his hienes predicessors and estates of parliament in any tyme bygane, to the effect his majestie, for himself and as father, tutor, guyder and lawfull administrator to his hienes said darrest sone, the prince, may grant and dispone heretablie to the said Johne Birsbane, elder, of Bischoptoun, in lyfrent, and the said Johne Birsbane, younger, of Bischoptoun, his airs male and assignais heretablie, the lands, baronie and uthers forsaidis to be haldine of his majesties said darrest sone, the prince, and his successors, princes and stewarts of Scotland, in fie heretage and frie baronie for yeirlie payment of the dewties contenit in the forsaid infeftments, and ordaines chartors to be past and exped heirupon wnder his majesties great seale in sick dew forme as effeirs.