[A1625/10/4]*[print] [email] [cite] [preceding] [following]
The estaittis presentlie convenit, upoun goode and weightie considerationis moveing thame, haif freelie and voluntarlie offerit and grantit unto the kingis most excellent majestie, oure soverane lord, for suppleing of a pairt of the grite chargis and expenses whiche his hienes most be at for defraying of the chargis of his majesties repaireing to this kingdome to tak upoun him the imperiall crowne of the samyne and of his majesties otheris grite and weightie affaires, alsweele at home as abroade, a taxatioun to be payit, collectit and upliftit in manner and at the foure termes following, that is to say: for the barronis and frie haldaris pairtis of the same taxatioun threttie shillingis Scottis money to be upliftit of everie pund land of auld extent within this realme perteneing to earlis, lordis, barronis, friehalderis and fewaris of oure soverane lordis proper landis haldin be thame immediatlie of his majestie and payed by thame at everie ane of the foure severall termes following, that is to say: the sowme of threttie shillingis money at the feast and terme of Candlemes nixttocome in the yeir of God jM vjC tuentie sax yeiris; the sowme of other threttie shillingis money at the feast and terme of Martimes in the yeir of God jM vjC tuentie sax yeiris; the sowme of other threttie shillingis money at the feast and terme of Martimes jM vjC tuentie sevin yeiris; and the sowme of other threttie shillingis money at the feist and terme of Martimes in the yeir of God jM vjC tuentie eight yeiris. And the spirituall men and burrowis pairtis of the same taxatioun, that thair sall be upliftit of everie archibishoprik, bishoprik, abbacie, priorie and other inferiour benefice and of everie free burgh within this realme at everie ane of the saidis foure termes payment the just taxatioun thairof and as thay haif bene accustomed to be taxt unto in all tymes bigane whensoever the temporall landis within this realme wer stented to threttie shillingis money the pund land of auld extent, and the same taxatioun to be payit at everie ane of the foure severall termes abonewrittin. And for inbringing of the spirituall mens pairt of the same taxatioun, ordanis lettres to be direct chargeing all and sindrie archibishoppis, bishoppis, abbottis, prioris, as likewayes all noblemen and otheris in whois favour the erectioun of ony prelacie or other inferiour benefice or ony pairt or portioun thereof, be it landis, kirkis or teyndis, or in whose favour the patronage of ony benefice, kirkis or teyndis is past, and all other beneficed personis contenit in the taxt rollis, thair heretable bailleis, chalmerlanis, factouris and intromettouris with thair rentis and leving persounalie or at thair duelling places and be opin proclamatioun at the mercatt croceis of the heid burrowis of the schirefdomes, stewartries or bailleries whair the saidis prelacies, erectit lordshippis and small benefices lyis if they be within this kingdome; and if thay be without this kingdome, be opin proclamatioun at the mercatt croce of Edinburgh, peir and shoare of Leyth, upoun thriescore dayes wairneing, to mak payment of that sowme that thay and everie ane of thame ar taxt unto for everie one of the saidis foure termes to the collectour generall to be appoyntit be his majestie for ressaveing of the said haill taxatioun, or to his deputtis and officeris in his name haveand his power to ressave the same at the particular termes abonewrittin, under the pane of rebellioun and putting of thame to the horne; and if thay failyie thairin, at the bypassing of everie ane of the saidis termes, to denunce the dissobeyaris rebellis and putt thame to the horne, and to esheitt etc. And that the prelattis and beneficed personis and suche noblemen and otheris in whose favour the erectionis and patronages abonewrittin ar past, for thair releiff, haif lettres chargeing thair vassallis, subvassallis, ladies of terce, conjunctfearis and lyverentaris, fewaris, takismen and pensioniaris to mak payment of thair pairtis of the said taxatioun, eache one of thame pro rata according to the sowme thay salbe taxt unto, to the saidis prelattis and otheris beneficed personis and to the saidis noblemen and otheris haveing power to ressave the same within tuentie dayes nixt after the charge, under the pane of rebellioun etc.; and if thay failyie, to denunce and esheitt etc., and to poynd and distrenyie thairfore as thay sall think most expedient, provyding alwayes that the first termes payment of the said taxatioun be ever past befoir the nixt termes payment be chargit for. Alwayes declaring that the productioun of sufficient horningis aganis the saidis vassallis, fewaris, takismen and pensionaris salbe a releiff to the saidis prelattis, lordis of erectionis and beneficed personis and sall exoner thame pro tanto from payment of the said taxatioun, provyding that the same horningis with thair taxt rollis autenticklie maid and subscryved by the saidis prelattis, lordis of erectionis and beneficed personis and by thair fewaris, vassallis, takismen and pensionaris in maner heirafter prescryved, conteneing the particular sowme whiche ilk ane of thame ar taxt unto, be delyvered to the collectour of the same taxatioun within the space of thriescore dayes after everie terme; otherwayes he sall be nowayes oblist to ressave the same, nather sall the prelatt, lord of erectioun or beneficed persone be exonered by productioun of the same at ony tyme thairafter. And forder, that the saidis prelattis and suche noblemen and otheris in whose favouris the erectionis and patronages abone writtin ar past and all other beneficed persones may haif thair releiff of thair saidis vassallis, subvassallis, ladies of terce, conjunctfearis, lyverentaris, fewaris, takismen and pensionaris to the gritter ease and lesse trouble to thair saidis vassallis and otheris foirsaidis. And to the effect that everie one proportionallie may pay his pairt of the said taxatioun according to the quantitie and availl of the frie rent whiche he hathe of his benefice, landis, pensioun, kirkis and teyndsheavis perteneing to him, alsweele the prelatt, lord of erectioun, patrone and otheris beneficed personis thameselffis as the fewar, takisman and pensioner, it is thoght expedient, statute and ordanit that the saidis prelattis and otheris abonerehearsit, everie ane of thame severallie, sall convene his haill fewaris, vassallis, takismen, and pensionaris at the particular placeis heirafter designit, thay ar to say: the Archibishop of Sanct Androis at the citie of Sanct Androis, the Archibishop of Glasgow at the citie of Glasgow, the Bishop of Orknay at the towne of Kirkwall, the Bishop of Caithnes at the towne of Durnoch, the Bishop of Ross at the towne of channorie of Ross, the bishop of Murray at the towne of Elgine, the Bishop of Abirdene at the burgh of Abirdene, the Bishop of Brechin at the burgh of Brechin, the Bishop of Dunkeld at the towne of Dunkeld, the Bishop of Dumblane at the towne of Dumblane, the Bishop of Galloway at the towne of Wigtoun, the Bishop of Argyle at the towne of Inveraray, the Bishop of the Iles at the burgh of Rothsay in Bute, the abbott of Icomkill at the burgh of Invernes, the pryour of Ardchattane at the burgh of Inveraray, the abbot of Ferne at the burgh of Tayne, the Lord of Bewlie at the burgh of Invernes, the Lord of Kinlose at the burgh of Forres, the prior of Pluscarden at the burgh of Elgine, the Lord of Deir at the towne of Peterhead, the prior of Fyvie at the towne of Turreff, the prior of Monymusk at the towne of Monymusk, the Lord of Arbrothe at the burgh of Arbrothe, the Lord of Scone at the burgh of Perth, the Lord of Couper at the towne of Coupar in Angus, the prior of Resteneth at the burgh of Forfar, the collectour of the same taxatioun in place of the prior of Charterhous, the sait now vacand, at the burgh of Perth, the prior of Elcho at the same burgh of Perth, the prior of Straphillaine at the kirk of Comrie, the Lord of Incheaffray at the burgh of Perth, the prior of Inchmahomo at the burgh of Striviling, the prior of Sanct Androis at the citie of Sanct Androis, the Baillie of the regalitie of Dumfermling at the burgh of Dumfermling, the Lord of Balmerinoch at the burgh of Coupar in Fyffe, the Lord of Lindoris at the burgh of Coupar in Fyffe, the maisters of Sanct Leonardis Colledge in Sanct Androis, for the prior of Portmook, at the burgh of Coupar in Fyffe, the prior of Pittinweyme at the burgh of Pittinweyne the Lord of Sanct Colmbe at the burgh of Inverkething, the Lord of Culrose at the burgh of Culrose, the abbot of Cambuskyneth at the burgh of Striviling, the Lord of Torphichen at the burgh of Linlithgow, the prior of Manuell at the burgh of Linlithgow, the Lord Halyrudhous at the burgh of Edinburgh, the Lord Newbattle at the burgh of Edinburgh, the priorese of Hadingtoun at the burgh of Hadingtoun, the lord of the temporall landis of the priorie of Northbervick at the burgh of Northbervick, the patrone and persone of the kirk of Kinneuchar, dissolved from the priorie of Northbervick, at the towne of Elie, the patrone and persone of the kirk of Largo, dissolved from Northbervick, at the towne of Largo, the patrone and persone of the kirk of Mayboll, dissolved from Northbervick, at the towne of Mayboll, the patrone and persone of the kirk of Logy, dissolved from Northbervick, at the burgh of Striviling, the Lord of Kelso at the towne of Kelso, the Lord of Cowdinghame at the towne of Eymouth, the Lord of Dryburgh at the towne of Dryburgh, the prior of Ecclis at the towne of Dunse, the prior of Cauldstreame at the towne of Dunse, the Lord of Jedburgh at the burgh of Jedburgh, the Lord of Melros at the towne of Melros, the Lord Paislay at the towne of Paislay, the Lord Blantyre at the burgh of Glasgow, the lord and baillie of the temporall landis of Kilwynning and the patronis and personis of the kirkis of Kilwynning, dissolved from the abbacie of Kilwynning, at the burgh of Irwing, the abbott of Corsraguell at the towne of Mayboll, the prior of Whitehorne at the burgh of Whitehorne, the abbott of Saulsett at the burgh of Whithorne, the prior of Sanct Marie Yle at the burgh of Kirkcudbright, the Lord of Dundrenan at the burgh of Kirkcudbright, the Lord of Glenluce at the burgh of Wigtoun, the abbott of Tungland at the burgh of Wigtoun, the abbott of Newabay at the burgh of Drumfreis, the abbott of Holywood at the burgh of Drumfreis, the prior of Cannabie at the burgh of Annan, the barone and baillie of the baronie of Broghtoun, dissolved from the lordship of Halyrudhous, at the burgh of Edinburgh, the heretouris of the jC lib. land of the barronie of Monckland, dissolved from the lordship of Newbattle, at the citie of Glasgow, the ministeris of Felfurde at Air, Scotlandwell at Sanct Androis, Peiblis at Peiblis, the patrone and persone of the kirk of Dundie, dissolved from the abbacie of Lundoris, at the burgh of Dundie, and all others small beneficed personis at the paroche kirk of thair particular benefices; and that thay convene to the effect abonewrittin upoun the thrid day of Januar nixttocome in the yeir of God ane thowsand sex hundreth tuentie sax yeiris, whiche is declared to be the preceise day appoynted for all thair vassallis, fewaris, takismen and pensionaris to keip the said meetting, and that no forder sitatioun nor summonding salbe requisite than the proclamatioun and publicatioun of this present act at the mercatt croceis of the heid burrowis of this realme. And heirwith it is resolved by the saidis estaittis that if ony vassall, subvassall, fewar, takisman of teyndis, pensioner or ony other justlie bund to mak releiff to the prelatt, lord of erectioun, patron or other beneficed persone of anie pairt of the said taxatioun sall send ony procuratouris in his name sufficientlie authorized to the said meeting, the same sall not onlie excuse the absence of the principall pairtye, bot the procuratouris salbe admittit in all thingis and ressaved to do and performe in the distributioun of the said taxatioun what could or lauchfullie might haif bene done by him who sent him. It is in like maner declaired that the prelatt, lord of erectioun, patrone or other beneficed persone impedit by disease or distractit upoun some other necessarie occasioun from attending that meitting, haveing his absence supplied that day by ony sufficient worthie persone whome he sall appoynt and authorize to that effect, sall be als lauchfull as if he wer personallie present himself; and the pairty so authorised salbe admittit and ressaved in all thingis to do and performe in the distributioun of the same taxatioun what could or lauchfullie might haif bene done by him who sent him. It is forder statute and ordanit that at the said day of meitting the saidis prelattis, lordis of erectionis, patronis and otheris beneficed personis sall by thameselffis or by thair procuratouris lauchfullie authorised as said is, fense and hold a courte, call by name and surname upoun everie one of thair vassallis, subvassallis, fewaris, takismen of teyndis, pensioneris and otheris oblished to releave thame of ony pairt of the same taxatioun, and lauchfull tyme and day being biddin, sall shew to thair saidis vassallis, fewaris, takismen and pensioneris or thair procuratoris compeiring for thame the quantitie of the taxatioun imposit upoun thair prelacie, erectit lordship or other benefice autenticklie subscryvit be the clerk of the same taxatioun; and thay all, at the least so mony of thame as sall convene for this effect with one consent, sall distribute the same to be payit by everie man, alsweele by the prelatt, lord of erectioun and present possessor of small benefices for the frie rent that everie ane of thame hathe of thair prelacies, erectit lordshippis and small benefices as by the vassall, fewar, takisman and pensioner according to the grite or small quantitie of the frie rent whiche everie one of thame hathe ather of thair landis, teyndis or pensionis; with certificatioun to ony of the saidis personis, fewaris, vassallis, takisman or pensioner that compeireth not by thameselffis or thair procuratouris at the day and place abonespecifiet to the effect foirsaid, that suche as sall convene with the saidis prelattis, lordis of erectionis, patronis and other beneficed personis or thair procuratouris sall proceid in the equall distributioun of the same taxatioun alsweele amongis thame that ar absent as present, and sall mak and subscryve ane autentick taxt roll thairupoun. And incais that naine of the saidis vassallis, fewaris, takismen and pensioneris sall convene at the day and place abonespecifiet to this effect by thameselffis or thair procuratouris, bot sall wilfullie absent thameselffis from the said meitting, it sall be laughfull for the saidis prelattis, lordis of erectionis, patronis and other beneficed personis being present by thameselffis or thair procuratouris at the day and places abonespecifiet, to mak, sett downe and subscrvye the same taxt roll. And incais ony of the saidis prelattis, lordis of erectionis, patronis or other beneficed personis sall not convene by thameselffis or by thair procuratouris at the day and placeis abonespecifiet particularlie designit to everie one of thame, it sall be laughfull for the saidis vassallis, fewaris, takismen and pensioneris, at the least sa mony of thame as sall convene by thameselffis or thair procuratouris, to mak, sett downe and subscryve the said taxt roll, whiche taxt roll sall contene the particuler sowme that everie one salbe fund justlie to be addebtit to pay, the pairties name addebtit to pay the same and the cause whairfore the same aucht to be payed; and being so sett downe, ather by the prelatt, lord of erectioun, patron and other beneficed persone or thair lauchfull procuratouris, with so mony of thair vassallis, subvassallis, fewaris, takismen of teyndis, pensioneris and otheris oblist to releive thame of ony pairt of the same taxatioun as sall convene with thame to this effect; and incais that nane sall convene with thame, the said roll being than sett downe by the prelatt, lord of erectioun, patron or other beneficed persome or thair lauchfull procuratoris; or incais of thair absence being sett downe, maid and subscryved by the maist pairt of the saidis vassallis, fewaris, takismen and pensionaris as by thameselffis or thair procuratouris sall convene thameselffis for this effect, the saidis estaittis decernis to be als laughfull in all respectis as if the haill nomber of personis haveing entresse thairin had convenit, maid, sett downe and subscryvit the same; whiche taxt roll being so sett downe, maid and subscryvit in maner abonewrittin (and no otherwayes) and delyverit to the clerk of the taxatioun, the saidis estaittis ordanis him to gif warrand for giveing of lettres of releiff thairupoun, discharging him in ony caise to gif warrand for giving of lettres of releiff upoun ony roll presentit unto him not maid and autenticklie subscryvit in forme abonewrittin, as he will answeir to the contrarie upoun his perrill. It is lykewayes statute and ordanit that takismen of teyndis sall haif releiff upoun thair subtakismen pro tanto, respect being had to the gairsome payit be the saidis subtakismen. And for imbringing of the barronis and friehaldaris pairtis of the same taxatioun and of the fewaris and rentalleris of oure soverane lordis proper landis, thair pairtis thairof, ordanis lettres to be direct chargeing all and sindrie schireffis, stewartis, baillies, thair deputtis and clerkis, fewaris, chalmerlanis and ressavearis of oure soverane lordis proper landis that thay and everie one of thame within the boundis of thair offices raise and uplift the sowme of threttie shillingis money of this realme of everie pund land of auld extent lying within the boundis of thair jurisdictionis, for everie one of the foure termes abonespecifiet, and imbring and delyver the same to the collectour foirsaid or to his deputtis and officiaris in his name haveand his power to ressave the same at the particular termes abonespecifiit, under the pane of rebellioun etc.; and if thay failyie, at the bypassing of everie ane of the saidis termes, to denunce and esheatt etc.; and for thair releiff that lettres be direct chargeing all and sindrie earlis, lordis, barronis, friehalderis, fewaris and rentalleris of oure soverane lordis proper landis personnalie or at thair duelling placeis, and be opin proclamatioun at the mercat croce of the heid burgh of the shirefdome, stewartrie or baillerie whair thair landis lyis if thay be within this kingdome; and if thay be without this kingdome be oppin proclamatioun at the mercatt croce of Edinburgh, peir and shoir of Leyth, upoun thriescore dayes wairning, to mak payment to the saidis schireffis, stewartis and bailleis, thair deputtis and clerkis, chalmerlanes and ressavearis of oure soverane lordis proper landis, everie one of thame for thair awne pairtis respective, of the said sowme of threttie shillingis money foirsaid for everie pund land of auld extent perteneing to thame for everie ane of the saidis foure termes payment, within tuentie dayes nixt after thay be chargit thairto, under the pane of rebellioun etc.; and if thay failyie, to denunce and escheit etc., and if neid beis that the saidis schireffis, stewartis, bailleis, thair deputtis and clerkis, chalmerlanis and ressavearis of oure soverane lordis proper landis poynd and destrenyie the reddiest goodes and geir being upoun the saidis landis thairfore as thay sall think most expedient. And that the saidis earlis, lordis, barronis, friehalderis, fewaris and rentalleris of oure soverane lordis landis haif lettres for thair releiff to charge thair vassallis, subvassallis, ladies of terce, conjunctsearis and lyverentaris to mak payment of thair pairtis of the said taxatioun within tuentie dayes nixt after the charge, under the pane of rebellioun etc.; and if thay failyie, to denunce and esheatt etc. and if neid beis that thay poynd and distrenyie, provyding alwayes that the first termes payment of the said taxatioun be ever past before the nixt terme be chargit for. And for imbringing of the burrowis pairt of the same taxatioun, ordanis lettres to be direct chargeing the provests and baillies of ilk burgh to mak payment of the taxt and stent thairof to the collectour generall foirsaid, his deputtis and officiaris in his name haveing his power to ressave the same at the particuler termes abonespecifiet, under the pane of rebellioun etc.; and if thay failyie, to denunce and esheitt etc.; and for thair releiff, that lettres be direct chargeing the provestis, bailleis and counsell within ilk burgh to convene and elect certane personis to stent thair nighbouris, and the said electioun being maid to charge the personis elected to accept the charge upoun thame in setting of the said stent upoun the inhabitantis of everie burgh and to convene and sett the same and mak a stent roll thairupoun as affiris within tuentie foure houris nixt after the charge, under the pane of rebellioun etc.; and if thay failyie, to denunce and esheattt etc. And sicklike the said stent roll being maid and sett downe as said is, to charge the burgeses, induellaris and inhabitantis within ilk burgh to mak payment of thair pairtis of the said stent to the saidis provestis and bailleis conforme to the taxt roll to be gevin out thairupoun within thrie dayes nixt after the charge, under the pane of rebellioun etc.; and if thay failyie, to denunce and esheatt, and if neid beis that the saidis provest and bailleis poynd and distrenyie thairfore as thay sall think most expedient. It is alwayes provydit that no persone whatsoever be stented or taxt within burgh except according to the availl and quantitie of his rent, leiving, goodes and geir whiche he hathe within burgh, no wayes respecting his landis nor possessionis whiche he hathe to landwart, for the whiche he wilbe oblist to pay taxatioun to other officiaris; provyding alwayes that the first termes payment of the said taxatioun be ever past before the nixt be chargit for. Attour, the saidis estaittis decernis and declairis that the chargis to be gevin for payment of the said taxatioun salbe execute befoir the termes of payment abonespeciet for everie termes payment particularlie by it selff, and that the denunciatioun of horning following thairupoun sall not be execute untill the termes of payment be bypast and tuentie dayes thairafter; whiche denunciatioun so following upoun the chargis gevin befoir the saidis termes of payment, the saidis estaittis decernis and declairis to be valide and sufficient. Attour, the saidis estaittis, considering the grite abuse whiche hathe bene used in all tymes bigane by sindrie of the leigis of this realme, agains all goode conscience, in causing thair poore fermoraris, tennentis and labouraris of the ground being removeable who ar subject in payment of verie deir fermes and other dueties to releive thame of the whole burdene of the bygane taxatioun, whiche hathe bene the occasioun of impoverishing of a nomber of the saidis fermoraris, labouraris and tennentis and bringing of thame to utter wraik and ruine, whairas of reasone thay sould be altogither free from the payment of ony taxatioun and the same sould be payit by suche as haif frie rentis, landis and goodes of thair awne; for remeid whairof, it is statute and ordanit that no personis whatsoevir exact or compell his tennentis or fermoraris removeable who pay ferme and other deir dewties for the landis occupyed by thame to pay ony pairt of this present taxatioun or to sute releiff at thair handis of the same; and if the same be fund done by ony personis, that thay sall be callit and convenit thairfore befoir his hienes justice and his deputtis or befoir his majesties counsell as violent and maisterfull oppressouris of his hienes subjectis and punist thairfore according to justice. As also the saidis estaittis, considdering that besydes the ordinarie chargeis whiche his majestie doeth daylie undergo for the mantenance of the honnour, estate and dignitie of his hienes kingdomes, the extraordiner burdens whiche now lyeth upoun his majestie by the occasioun abonewrittin ar so grite and doeth so neir concerne everie loyall and true hartit subject of this kingdome as memberis of that bodie whairof his majestie is the head, that in duetie thay thinke thameselffis bound to beare a pairt of that burdene and to releive his majestie thairof; thairfore, besyde the ordinarie taxatioun abonewrittin, the saidis estaittis haif for the space of foure yeiris nixt and immediatlie following the terme of Witsonday nixttocome voluntarlie and freelie grantit unto his majestie a yeirlie extraordinar taxatioun of the tuentie penny of all annuelrentis whiche ony persone or personis within this kingdome hathe freelie due and payable unto thame yeirlie or termelie (thair awne annnuelrentis whairin thay ar addebtit to otheris being first deduced). The first termes payment thairof salbe and begin at the said feast and terme of Witsonday nixttocome, and so furth yeirlie and termelie at Martimes and Witsonday untill the saidis foure yeiris and the eight termes payment thairof be fullie and compleitlie outrun. And whairas the saidis estaittis haif by act of parliament authorised all and sindrie heretable schireffis, stewartis, bailleis and bailleis of regalityis and thair deputtis, and the provest and bailleis of burrowis who ar heretable schireffis within thameselffis within the boundis of thair jurisdictionis; as likewayes the clerkis within the jurisdictionis whair these offices ar not heretable, whiche clerkis haif thair offices ad vitam, to collect the said extraordiner taxatioun and mak payment thairof to the collectour generall to be appoyntit by his majestie for ressaveing of the same; thairfore, and for imbringing of the same extraordiner taxatioun, the saidis estaittis ordanis lettres to be direct chargeing all and sindrie the saidis heretable schireffis, stewartis, bailleis, bailleis of regalityis and thair deputtis and clerkis and the saidis provestis and bailleis who ar heretable schireffis within thameselffis and thair clerkis, as likewayes the clerkis within the jurisdictionis whair these offices ar not heretable, that thay and everie ane of thame be northe the river of Dee within the space of fiftene dayes after everie terme of Witsonday and Martimes, and that thay and everie ane of thame be southe the river of Dee within the space of ten dayes after everie terme of Witsonday and Martimes, deliver to his majesties said collector generall a true and just accompt and inventair of the whole sowmes of money due to be payit by ony persone within the boundis of thair jurisdictioun for his pairt of the said extraordiner taxatioun; and that thay gif up the same compt and inventair upoun thair oathe solempnedlie sworne that the same is just and trew, and to mak payment to his majesties said collectour generall or to his deputtis in his name haveing his power to ressave the same of the whole moneyis due to be payit to his majestie, conforme to the said compt and inventair, within tuentie dayes after ilk terme, under the pane of rebellioun. And incaise the saidis schireffis, stewartis, bailleis, bailleis of regalityis, thair deputtis and clerkis failyie, to denunce and esheitt etc., for whois releiff that lettres be direct chargeing all and sindrie the saidis annuelrentaris to mak payment to the saidis schireffis, stewartis, bailleis, bailleis of regalityis, thair deputtis and clerkis, provests and bailleis of burrowis of the said tuentie penny of all annuelrentis freelie due and payable to thame within tuentie dayes nixt after the charge, under the pane of rebellioun etc.; and if thay failyie etc., to denunce and esheitt, and if neid beis that the saidis schireffis, stewartis, bailleis of regalityis, clerkis, provests and bailleis of burrowis poynd and distrenyie thairfore as thay sall think most expedient. And the estaittis ordanis the lordis of sessioun to be onlie judgeis to all suspensionis to be craved and suted by ony of oure soverane lordis leiges touching the saidis taxationis, whiche suspensionis the saidis estaittis findis may be grannted upoun laughfull and equitable reasonis to be considderit by thame; and dischargis all other judges within the realme of granting of ony suspensionis thairanent. With power to the saidis lordis to diligate fyve at the least of thair ordinarie nomber as thay think expedient to sitt, cognosce and decide the saidis suspensionis in tyme of vacance, if neid beis.