[1581/10/87]¹

The revocationis of the propertie casualitie, with exceptionis furth of the same and first revocatioun of the propertie

The quhilk day the kingis majestie, in presens of his thrie estaitis convenit in this present parliament, presentit his revocatioun underwrittin, subscriwit with his hand, disyring the same to be ratefiit and apprevit and the same to have the strenth and effect of ane act of parliament in tyme cuming, and his saidis estaitis to interpone thair aucthoritie to the same; the quhilk disyre the saidis estaitis thocht ressonabill, and hes ratefiit and apprevit and, be the tennour heirof, ratefiis, apprevis and confermis his hienes revocatioun foirsaid, and hes ordanit and ordanis the same revocationis to be insert and registrat in the buikis of parliament, and the same to be of als grite strenth, valour, force and effect in all tyme cuming as ony revocationis maid be his hienes predicessouris, kingis or quenis of this realme, in ony tyme bigane in thair less aige, befoir thair compleit and perfyte aige, and hes interponit and interponis thair aucthoritie to the same, conform to the said revocationis, of the quhilk the tennour followis:

We, James, be the grace of God, king of Scottis, havand now the full administratioun and rewling of oure realme in oure awin handis, and havand consideratioun that be the prevelege of the common law, as also that oure maist nobill progenitouris, kingis of Scotland of gude memorie, be thair actis and statutis maid in thair parliamentis, hes revokit, cassit and annullit all thingis done be thame in thair minoritie and less aige in hurt and detriment of thair conscience and croun, landis, rowmes, possionis or utherwayis pertening to the same, quhairby thai wer dannesit and skaythit be alienationis, donationis, presentationis, venditionis or be ony uther dispositioun quhatsumevir, thairfoir now, we, having compleitit the fourtene yeir of oure aige, revokis as efter followis. First, we revok, casis and annullis all maner of infeftmentis and dispositionis quhatsumevir we or oure regentis haif maid during the tyme that we or thay had regiment of oure realme in oure or thair handis, and all uther thingis that hes bene done in hurt and detriment of oure said croun, landis, rentis, rowmes, possionis, patronages of benefices and offices pertening to the same; and in speciall we revok, casis and annullis all infeftmentis, donatiounis, alienatiounis and uther dispositionis maid be us, with advise of oure saidis regentis, or be thame in oure name, or be us sen the acceptatioun of the regiment upoun oure selff ony maner of way, in fre ferme franktenement or lang takis of ony landis, lordschippis, rowmes, possionis, custumis, annuellis, fischeingis, burrow maillis, castell wairdis or uther thingis quhatsumevir annexit to oure croun or onie part of the samin, quhether the samin hes bene gevin be oure darrest moder or be us to ony persoun or personis contrair the actis maid thairupoun, to be reduced to us agane and to oure croun be vertew of the statutes maid thairupoun, annexationes and efter the form of the same. Item, we revoke all alienationis and dispositionis quhatsumevir of ony rentis, landis, rowmes, possessionis and heritages anext to the principalitie and to the prince, secund persoun of oure realme, maid be us in maner foirsaid. Item, we revok all donationis, alienatiounis, fewfermes, giftis and dispositionis quhatsumevir in lyfrent or utherwyis maid in oure nonaige, of quhatsumevir landis, rentis, annuelrentis or uther revenues that oure said darrest moder had in hir possessioun the tyme that scho dimittit the croun in oure favouris, be gift and utherwyis, and of all offices, lyk as chalmerlanis, bailliareis and custumaris maid for ma yeiris bot fra ane chekker, quhill the compt be maid in the nixt chekker efter following, and of all takis and assedationis maid for langer termes nor fyve yeiris. Item, we revoke all tailyeis maid fra the airis in generall to the airis maill of ony landis, rowmes and possessionis within oure realme aganis the law and gude conscience. Item, we revoke all new infeftmentis of landis, rowmes and possessionis gevin in blanche ferm that wer haldin of us of befoir be service of waird and releiff. Item, we revoke all regaliteis, confirmatiounis of regaliteis and of all offices gevin be us in heritage or be oure said darrest moder aganis the actis and statutes that na regaliteis suld be gevin in heritage without the advise of the haill parliament. Item, we revoke all maner of alienatiounis be infeftment and utherwyis maid or grantit of onie heritage in oure nonage that become lawchfullie in oure handis be ressoun of foirfaltoure, bastardrie or any uther richt and all lyfrentis gevin thairof in oure minoritie. Item, we revoke all new creatiounis of landis in baronyis, annexationis and unionis of diverse landis in fie, in prejudice of oure dew service aucht to us and oure maist nobill progenitouris of befoir, and siclyk, we revoke all discharges of services of suittis of courtis aucht and ald to oure progenitouris foirsaidis. Item, we revoke all new infeftmentis gevin of creatioun of landis in baronyis and lordschippis annext to oure croun. Item, we revok all giftis and confirmatiounis past be us of quhatsumevir landis and heritageis be fals suggestioun, be expreming of fals caus, quhair gif thay had bene expremit ane trew caus and the veritie we had not gevin the samin and thairthrow we ar gretumlie and enormlie hurt. Item, we revoke all infeftmentis in fee or lyfrent, giftis and dispositiounnis quhatsumevir maid be oure darrest moder, be oure regentis or onie of thame, or be oure selff sen the acceptatioun of the regiment of oure realme in oure awin persoun, of all oure hospitallis and maisondewis, landis or rentis apertening thairto, in hurt or prejudice of us, oure conscience or croun, to the end the saidis hospitallis may be reducit to thair formar institutioun for the uphald of the pure; and generally we revok, casis and annullis all and quhatsumevir thingis done² us in oure minoritie and les aige in hurt and detriment of oure saull and conscience, hurting of the prevelege of oure croun, prejudiciall to the samin and to us and oure patrimonie thairof, and all and sindrie uther thingis that the law and consuetude of this oure realme leivis us to revoke; and als willis and declaris that this, oure revocatioun, extend to all thingis alsweill not specefiit as specefiit thairin quhilkis pertenit to us and oure said croun, by dimissioun of oure said darrest moder, and to be extendit fra hir dimissioun in all thingis foirsaidis to us and oure behuiff, als larglie as the revocatioun maid be oure said darrest moder micht be extendit to fra the deceis of oure maist nobill gudschir and grandschir, King James the Fyift and King James the Feird, to the tymes, dayis and dait of thair revocationis respective; and as the revocatioun maid in King James the Secundis tyme micht be extendit to fra the deceis of oure maist nobill progenitour King James the First to the making thairof, protesting that albeit we, of oure favour and benevolence, suffer ony persoun or personis to use, posseid or brouk ony prevelegis, possessionis of rowmes, landis, offices or of ony uther thing quhatsumevir falland under this oure revocatioun, it sall mak na richt to the usaris, haldaris and possessouris thairof, bot it salbe lefull to us to put oure handis thairto quhen we pleis, but ony contradictioun, and that be vertew of this oure revocatioun, actis and constitutionis of oure realme maid of befoir.

The revocatioun of the casualiteis

We, James, be the grace of God, king of Scottis, considdering the present estait of oure casualiteis daylie gevin and disponit throw inoportunitie of askarris, in sic excessive maner that difficill it is to intertene the daylie and ordinar expensis of oure estait and croun, howbeit the occasioun of charges heirwithall continewalie incresis, and we and oure estait, considdering that oure casualiteis aucht not to be sa inordinatlie and inconsideratlie disponit at the inoportune sute of all askarris, bot oure commoditie maid thairof, and sic discretioun had in the dispositioun of the same as we may convenientlie leif on oure awin, thairfoir we, be the advise of oure saidis estaitis and haill bodye of this present parliament, revokis, rescindis, casis, annullis and discharges all giftis of feis, pensiones, wageis, leverais and dispositionis out of oure casualiteis and cofferris gevin be us, with advise of oure regentis for the tyme, or be oure selff, sen the acceptatioun of the gubernament of oure realme in oure awin persoun, declarand the same to be null and of nane availl, force nor effect in tyme cuming, discharging oure thesawrer present and to cum of all payment making of the saids feis, pensionis, wageis, leverais and utheris thingis appointit to be payit furth of casualiteis of the terme of Mertimes lastbipast, or thairefter in tyme cuming, quhill thay haif oure new and speciall warrand and directioun to be grantit, with avise of oure counsell, upoun gude and necessar consdieratioun, efter the dait heiroff.

The revocatioun of the collectorie

We, James, be the grace of God, king of Scottis, understanding how the thriddis of benefices within oure realme wer first assumit and uptakin for sustentatioun of the ministerie and to support the prince, to interteny and set furthward the commoun effairis of the cuntrey, and how thairefter, be act of parliament, it wes providit that the haill thriddis of the haill beneices within oure realme suld be first pait to the ministeris of the evangell and thair successouris, providing alwayise that the collectouris of the saidis ministeris suld mak yeirlie compt in the chekker of thair intromissioun, sua that the ministeris, being first pait of thair stipendis apertening to everie ane of thame, the rest and superplus suld be employit to oure use; quhilk ordour continewit quhill certane abuses and corruptionis being considderit and espyed in the collectouris for the tyme, upoun the sute of the saidis ministeris, certane assinationis maid unto thame of thair levingis and stipendis in the places maist ewest and commodious to thair residence, it being alwyise meanit and intendit that quhen God suld raise up ma qualefiit personis and godlie ministeris, thay suld be plantit in the places found maist convenient for thame, and quhatevir suld be assignit in the saidis stipendis, that the collectour generall of the superplus suld alluterlie decist fra further craving intromissioun or uptaking of the samin of ony termes efter the said assinatioun; and albeit the superplus of the saidis thriddis, attour the ordiner assinationis of the stipendis of the ministerie, contenit in the yeirlie buke of modificatioun, aucht to serve for the stipendis of sic qualefiit personis as God sall rais up from tyme to tyme, worthie to be admitit in the functioun of the ministerie, and to support the prince, to interteny and set forthwart the publict effairis of the cuntrie, nevertheless, throw the inoportune sute of sindrie personis mair respecting thair awin particular proffite then ather the sustentatioun of the ministerie or oure honorabill estait and commoun weill of oure realme, we, be avise of oure regentis in oure minoritie, and pairtlie be our selff sen we acceptit the governament of oure realme in oure awin persoun, hes bene movit to mak dispositioun of the said superplus in pensioun or to discharge or gif the samin frie to sum personis, quhairthrow thair remanis litill or na thing to be disponit on, other to be modefiit, assignit and appointit in leveangis and stipendis to sic qualefiit personis as God sall rais up heirefter meit to enter in the functioun of the ministerie or to supplie the publict and neidfull effairis of oure estaite. Quhilk being diligentlie and with gude deliberatioun advysit upoun be us and oure thrie estaitis in parliament, it is found be thame that the saidis superplus of the saidis thriddis of benefices, being assumit and takin in oure handis for the causis and effairis befoir specefiit, aucht not, nor micht not, be disponit nor gevin utherwayis, bot applyit to the same use that thay wer ordanit and applyit unto at the beginning; and thairfoir we, with avise of oure thrie estaittis and haill bodie of this present parliament, revokis, rescindis, casis and annullis and discharges all the saidis giftis, feis or frie dispositionis out of the saidis thriddis of benefices and collectorie in pensioun or frilie dischargit or of the superplus and omittit of ony benefices or of ony commoun kirkis or landis within oure realme gevin be the quene, oure darrest moder, or be us, with avise of oure regentis for the tyme, or be oure selff sen the acceptatioun of the gubernament in oure awin persoun, togidder with all takis and assedationis sett be us, oure said darrest moder, or regentis of the said commoun kirkis, declarand and decernand the same to be null and of nane availl, force nor effect in tyme cuming; and ordanis the collectour generall of the said superplus, be him selff, his servandis and officiaris in his name, to ask, crave, ressave, intromett and uptak his haill superplus to the use and effect befoir specefiit of the crop and yeir of God j^M v^C lxxxj yeiris instant Witsonday and Martimes termes of the samin, and in tyme cuming, without respect of ony gift of pensioun set or frie discharge of ony pairt of the said collectour grant in onie tyme bigane preceding the dait heirof; and that lettres be direct to officiaris of armes, schirreffis in that pairt to mak publicatioun and intimatioun heirof be oppin proclamatioun at the mercat croces of the heid burrowis of oure realme and utheris places neidfull, that nane pretend ignorance of the samin, inhibiting all and sindrie oure liegeis that nane of thame tak upoun hand to answer, obey and mak payment of ony maner of pensioun gevin furth of the said collectorie or ony pairte thairof to ony persoun or personis clamand the samin be ony gift, fie or frelie dischargit as said is, bot to answer the said collectour or his deputtis thairof, notwithstanding ony giftis, decreittis or lettres obtenit thairupoun in tyme bigane. Exceptand and reservand alwayis furth of thir oure revocationis all infeftmentis, presentationis, giftis and dispositionis maid be us to oure darrest cousing, Esme, duke of Lennox, erll of Dernlie, lord of Obigny, Tarboltoun and Dalkeyth etc., and to James, erll of Arrane, lord Avane and Hammyltoun, and ather of thame, off quhatsumevir landis, lordschippis, offices, honouris, takis, possessionis, guidis, geir and utheris quhatsumevir in ony tyme bigane, preceding the dait heiroff, quhilkis we will not salbe comprehendit under oure said revocatioun, nor that the same revocatioun sall extend unto tham, nor to ony infeftmentis or presentationis of quhatsumevir landis and possesionis and infeftmentis following thairupoun grantit to oure familiar and domesticque servandis in rewaird of thair service as fallin in oure handis throw foirfaltouris led aganis quhatsumevir personis, heritouris thairof, for the crymes of tressoun and lesemajestie committit be thame sen oure coronatioun; nor to the infeftmentis maid be us to Maister James Creychtoun, sone to oure weilbelovit clerk and counsalour Maister Robert Creychtoun of Eliok, oure advocate, of the landis of Catslak, Eister and Wester Montbergier and Schuttingleis, liand in the lordschip of Ettrikforest within oure schirrefdome of Selkirk; nor to the infeftment grantit to Capitane James Fraser of the landis of Lugtoun; nor to the infeftment maid to Johnne, erll of Mar, and his spous of the landis of Elgeriggill and Welstoun; nor to the infeftment maid to oure right traist cousing and counsallour Williame, erll of Gowrie, lord Ruthven and Dirltoun, oure thesawrer, of the landis of the thrid of Boltoun; nor to the infeftment maid to Alexander Home of Manderstoun and Alexander Home of Snwke, knicht, his sone and apperand air, of the landis of Auldhamestokis and Quhitsum; nor to the gift and dispositioun maid be oure said darrest moder to oure richt traist cousing Robert, erll of Orknay and his airis, of the landis of the propertie of the lordschip of Orknay; nor to the gift and dispositioun maid be oure said darrest moder to Harie Stewart, sone and apperand air to the said Robert, erll of Orknay, Marie Stewart, Jane Stewart, sisteris lawchtfull to the said Harie, Robert Stewart, James Stewart, sonis naturall to the said erll, for all the dayis of thair lyftymis of the thriddis of benefice of the abbay of Halyrudhous; nor to the infeftment maid be us to oure richt traist cousing Johnne, erll of Mortoun, of the landis of the erledome of Mortoun and utheris landis contenit in the said infeftment; nor to the takis maid to oure trustie and weilbelovit counsallour Robert, commendatar of Dumfermling, oure secretar, off the wictuallis of the thrid of the abbay of Dumfermling, set to him for certane yeirlie dewtie in money, as the same at mair lenth proportis. As alsua we declair, with avise foirsaid, that oure said revocatioun sall not extend aganis Alexander, commendatar of Culross, tueching ony forder payment for the thrid of the abbay of Culross then fyve hundreth merkis yeirlie according to the act of secreit counsall past thairanent upoun the xx day of Januar 1573; nor to the gift of pensioun grantit be the quene, oure darrest moder, and confermit be oure selff to Robert Melvile of Murdocarny, of the sowme of fyve hundreth pundis of oure realme; nor to the gift of pensioun grantit be us to oure weilbelovit Maister Gilbert Skene, oure mediciner, of the sowme of twa hundreth pundis money of oure realme; nor to ony infeftmentis, presentationis, giftis or uther dispositionis maid and grantit be us or oure regentis in oure minoritie quhairupoun we, with avise of oure estaitis, hes grantit ratificatiounis and confirmationis in this oure present parliament; nor to sic thingis as salbe speciallie contenit in a warrand subscrivit with oure awin hand onlie and deliverit to oure clerk of register betuix and the first day of Januar, to be insert in the buikis of oure parliament with oure present revocationis, under the quhilkis we will not the same salbe comprehendit, bot to stand in force and effect as gif the said revocationis had not bene maid.

Rex.

Clerk of our register: it is our will and we command yow that the pensionis and uther thingis following be reservit and exceptit furth of our revocationis and insert in the buikis of our parliament with the same revocationis, under the quhilk we will not that the same salbe comprehendit, bot to stand in force and effect as gif the same revocationis had not bene maid. Subscrivit with our hand at Halyruidhous, the penult day of November and of our regnne the xv yeir, 1581. Sic subscribitur, James R[ex].

Exceptand and reservand alwayis furth of thir our revocationis the gift and seall grantit be us till our weilbelovit servitour Gilbert Prymrois, burges of Edinburgh, our chirurgiane, for all the dayis of his lyf, of the soume of tua hundreth pundis money of our realme, to be pait to him yeirlie at tua termes in the yeir, Witsounday and Martimes in wynter, be equall portionis, furth of the reddiest of our customis of the trone of Edinburgh, be our comptrollair and customar thairoff present and to cum, as in our said gift of the dait the first day of Junii 1578 at mair lenthe is contenit; declarand, with avise foirsaid, that the said pensioun sall not be comprehendit under oure said revocatioun, nor that the said revocatioun sall extend unto the same, bot to stand in force and effect as gif the said revocatioun had not bene maid. Nor to the infeftment maid and gevin be the quene, our darrest mother, to umquhill Johne Semple of Bultreis and Marie Levingstoun, his spous, of all and haill the toun and landis of Auchtermuchtie, with mylne, multuris, fewfermes and pertinentis, lyand within our schirrefdome of Fyiff, and utheris specifeit in the said infeftment; and for the said Maries securitie thairof, during hir awin lyif onlie, as in the same at mair lenth is contenit; reservand alwayis to us, of the said Maries consent, sex chalderis aittis, with the haill pultrie, fowllis and geise, with all thair canis to be upliftit yeirlie be our comptrollair, his factouris and servitouris in his name, furthe of the saidis toun and landis of Auchtermuchtie, providing alwayis that efter the said Maries deceis thir presentis sall not prejudge us of our rycht and titill to the saidis toun and landis, with mylnis, multuris and pertinentis thairof. Nor to the gift grantit be the quene, our darrest mother, to our weilbelovit Maister Johnne Stewart, of the office of chalmerlanrie of the lordship of Dumbar, with ane yeirlie feall of fourtie bollis victuall, quheit and beir to be pait of the reddiest fermes of the said lordschip. Nor to the gift of pensioun of ane hundreth pundis money of our realme grantit be the quene, our darrest moder, at hir perfite age, and ratefeit and apprevit be our self sensyne, to our weilbelovit servitour James Melvill, sone to umquhill James Melvill of Raithe, knicht, for all the dayis of his lyf, to be pait to him at tua termes in the yeir, Witsounday and Martimes, be evin portionis, furthe of the reddiest of our propirtie or thriddis of benefices, as oure lettres of ratificatioun under our previe seall maid to him thairupoun of the dait at Edinburgh, the xxij day of Julii, the yeir of God j^M v^C [...] at mair lenthe beris. Nor to the pensioun of fyve hundreth merkis grantit be the quene, oure darrest moder, to the said James Melvill, for all the dayis of his lyftyme, to be pait to him of the reddiest of the customis of the trone of oure burgh of Edinburgh as oure³ said gift maid to him thairupoun, of the dait at Edinburgh Castell, the xvj day of Aprill, the yeir of God j^M v^C lxvj yeiris, at mair lenth proportis. Nor to the pensioun of ane chalder malt and tuentie bollis beir grantit be the quene, oure darrest moder, to umquhill James MacKisoun and Jonet MacGee, his spous, the langest leivar off thame twa for all the dayis of thair lyftyme, to be pait to thame yeirlie as followis, viz., the said ane chalder malt furthe of the readiest fermes of the landis of Blairlogie and the saidis twentie bollis beir furthe of the readiest fermes of the Newtoun of the Kerse of Bothkennar, lyand within the lordship of Strivelingshire, as in the said gift of the dait at Halyruidhous, the xj day of December the yeir of God j^M v^C lxj yeiris, at mair lenthe is contenit. Nor to the gift and pensioun grantit be us, with avise of umquhill our darrest guidschir Matthew, erll of Lennox, lord Darnelie, regent to us, our realme and liegeis for the tyme, to our weilbelovit servitour Michaell Gardenar, maister cannonar in our castell of Striveling, for all the dayis of his lyif, of ane chalder quheit and ane chalder beir, with thrie pundis xvj s. money; and that of the reddiest maillis and fermis of our lordship of Strivelingschire, and speciallie assignand the same to be pait out of the reddiest maillis and fermes of the landis of the maner, as in oure said gift of the dait at Striveling, the xv day of Junii the yeir of God j^M v^C lxxj yeiris, at mair lenth is contenit. Nor to the gift of pensioun grantit be us to our richt traist cousigne Johne, erll of Mar, lord Erskyne, of our few maillis of our lordschippis of Brechein and Menteithe. Nor to the gift of pensioun grantit be us to our weilbelovit Anabell, countes of Mar, for all the dayis of hir lyftyme, and efter hir deceis to Johne, erll of Mar, hir sonne, for all the dayis of his lyftyme, of fyve hundreth pundis money of our realme to be tane up yeirlie of the readiest few maillis of our lordship of Stratherne, and the soume of sex hundreth pundis money of our realme to be tane up yeirlie of the first and reddiest of the thrid of the money of the bishoprik of Sanctandrois, togidder with sevin chalderis victuall, quheit, beir and malt, to be tane up yeirlie as followis, to witt, furth of Inneralloun ane chalder quheit, of Blairlogie ane chalder quheit, of Bothkennar awcht bollis quheitt, of Greinyairdis aucht bollis malt, of the manis of Bothkennar ane chalder, thrie bollis beir, and of the Grange of Bothkennar tua chalders, threttene bollis beir as at mair lenth is contenit in the said gift. Nor to the infeftment maid be us to our lovit William Boncle, burges of Dumbar, of the forthe of Dumbar as in the same at mair lenth is contenit. Nor to the gift of pensioun grantit be the quene, our darrest moder, at hir perfite aige, to Johnne Kempe during all the dayis of his lyftyme of iij chalders xij bollis quheit, iij chalders, xij bollis beir, ij chalders aittis and viij lib. xj s. viij d. money to be tane up yeirlie furth of the reddiest maillis and landis of Corntoun lyand within the lordship of Strivelingshire, as in the same gift at mair lenth is contenit. Nor to the gift and pensioun grantit be us to our weilbelovit Maister Johne Spottiswod, persoun of Calder, and failyeing of him be deceis, to James Spottiswod, his sonne, for the space of thrie yeiris nixt efter thair interie thairto, quhilk wes at the fest off Witsounday in the yeir of God j^M v^C lxxx yeiris, of sevin chalderis, fyve bollis, twa pectis, two parts pect maill, four bollis, tua part boll quheit, and fourtie fyve pundis, nyne schillingis vj d. money yeirlie, to be upliftit and tane of the reddiest of the fructis, rentis, proffitis and dewteis of the thrid of the abbay of Deir, as at mair lenth is contenit within the said gift. Nor to the lettre of tak, sett be us, with avise of the lordis of our secrete counsell and of our collectour generall, to oure weilbelovit George, bishop of Murray for all the dayis of his lyf, of all and haill the thrid of the proffitt, casualities and dewties quhatsumevir pertening and belanging to the said bishoprik of Murray, and patrimony thairof, quhairevir the samyn lyis not assignit to the ministerie, and that for the yeirlie pament of the soume of thrie hundrethe merkis money of our realme to us and to our said collectour generall in oure name, as in the said lettre of tak of the dait at our castell of Striveling, the vij day of Marche the yeir of God j^M v^C lxxix yeris, at mair lenth is contenit. Nor to the gift and pensioun of tua hundrethe merkis grantit be us to our lovit Patrik Fyldar, wreittar, assignit and pait to him furth of the thrid and superplus of the bishoprik off Aberdene, speciallie of the few maillis of the half nettis fishing upoun the watter of Done and Die, for all the dayis of his lyftyme, as in our said gift of the dait at Alloway, the threttene day of August the yeir of God j^M v^C lxxx yeris, at mair lenthe is contenit. Nor to the gift and pensioun grantit be us to our daylie servitour Johne Andro, clerk of our previe counsell, of the soume of tua hundreth merkis money of this realme, assignit to be pait to him yeirlie during all the dayis of his lyftyme out of the thrid of the abbay of Kinloss, as in the said gift at mair lenthe is contenit. Nor to the pensioun grantit be us to oure weilbelovit James Meldrum, fear of Segy, ane of the senatouris of oure college of justice, of thrie chalderis beir, vij chalderis quheitt, nyne bollis maill and ane chalder of aittis, furth of the superplus of the thrid of the victuall of our abbay of Hadingtoun, assumit upoun the teyndscheiffis of the kirk of Carraill, togidder with sex chalderis aittis furthe of the reddiest of the superplus of the thriddis of the bishoprik of Sanctandros attour the sustentatioun of the ministrie assumit upoun the teyndscheiffis of the landis of Byrhillis, and with four chalderis beir of the reddiest of the thrid of the bishoprik of Dunkeld, assumit upoun the kirk of Cargill pertening to the said bishoprik, begynnand the first termes pament thairof of the crop and yeir of God j^M v^C lxxxj yeiris, and siclike yeirlie and termelie in tyme cumming during his lyftyme, according to our gift maid to him thairupoun of the dait at Halyruidhous, the xxvj day of August the yeir of God j^M v^C lxxxj yeris instant. Nor to the gift of pensioun grantit be us to our richt traist cousigne and counsalour Johne, erll of Atholl, lord of Balvany, of aucht chalderis, sex bollis, thrie pectis, 2 part pect victuall, togidder with aucht chalderis, aucht bollis horsis corne restand unassignit or disponit to the ministrie, or utherwayis of the thrid of our abbay of Cowper, to be uptakin be him yeirlie of the samyn thrid, as in our said gift at mair lenthe is contenit. Nor to the gift of pensioun grantit be us to our lovit Maister Robert Lokhart, during all the dayis of his lyftyme, of the soume of ane hundreth pundis money of our realme, to be pait to him yeirlie furth of the superplus of the thrid of the money of our abbay of Pettinweme, as in our said gift of the dait at oure castell of Striveling, the xxiij day of Februar the yeir of God j^M v^C lxxviij yeiris, at mair lenthe is contenit. Nor to the gift of pensioun grantit to Beatrix Levingstoun, spous to the said Maister Robert Lokhart, for all the dayis of hir lyftyme, of the soume of fourtie merkis money foirsaid to be pait to hir yeirlie out of the reddiest of the said superplus of the thrid of the money of the abbay of Pettinweme. Nor to the gift of pensioun grantit be us to our weilbelovit servitour Alexander Young, ane of the yshear deputtis of our chalmer, for all the dayis of his lyftyme, of four chalderis, four bollis, thrie furlettis aittis, with four dusoun and aucht salmound to be pait to him furth of the thrid and superplus of the bishoprik of Glasgow, as in our said gift maid to him thairupoun of the dait at Halieruidhous, the xxviij day of December the yeir of God j^M v^C lxxx yeiris, at mair lenthe is contenit. Nor to the gift of pensioun grantit be us, with avise of our regent for the tyme, to our weilbelovit counsalour Maister William Baillie, lord Provand, president of our college of justice, for all the dayis of his lyff, of the soume of ane hundreth pondis money of oure realme, to be pait to him yeirlie furth of the reddiest of the superplus of the thriddis of benefices within our realme not assignit to the sustentatioun of our ministrie, as in our said gift of the daitt at Halyruidhous, the xxvj day of Januar the yeir of God j^M v^C lxxvj yeris, at mair lenth is contenit. Nor to the gift of pensioun grantit be us, with avise of the lordis of our secrete counsell, to oure traist cousigne Henrie, lord Methven, sone and air of our rycht traist cousigne Henrie, lord Methven, quha decessit actuallie in our service, of the haill thrid, baithe of money and victuall, of the provestrie of Methven, extending to ten chalderis victuall, 2 part beir and 2 part maill, and xxxix lib. ij s. ij d. money, as in our said gift of the dait at Dalkeyth, the xvj day of Junii the yeir of God j^M v^C lxxxj yeris, at mair lenthe is contenit. Nor to the gift of pensioun grantit be us to Maister Johne Nicolsoun, collectour, clerk, out of the landis of Mideledrammis, as at mair lenthe is contenit in our said gift. Nor to the gift of pensioun grantit be us to our weilbelovit Capitane Thomas Crawfurd of Jordanehill, for all the dayis of his lyf, of the soume of ane hundreth pondis money of our realme to be pait to him furth of the reddiest and best pament of the superplus of thriddis of benefices within our realme not assignit to the sustentatioun of the ministrie, as in oure said gift of the dait at Halyruidhous, the xviij day of Februar, at mair lenth is contenit. Nor to the gift of pensioun grantit be us, with avise of umquhill Johne, erll of Mar, lord Erskyne, regent to us, oure realme and liegeis for the tyme, to Daniell Crawfurd, sone to the said Thomas Crawfurd, of the soume of fourtie merkis money of oure realme, to be uptane be him yeirlie of the channon landis of Glesgow, furthe of the parochinis of Largis and Dalry as our said gift of the dait at Leithe, the xj day of Januar the yeir off God j^M v^C lxxj yeris, at mair lenthe proportis. Nor to the gift of pensioun grantit be us to oure weilbelovit Capitane David Murray and Jonet Wemis, his spois, off the sowme of tua hundrethe pundis money of our realme, to be pait to thame yeirlie furth of the superplus of the thrid of our abbay of Lundoris, as in our said gift at mair lenthe is contenit. Nor to the gift of pensioun grantit be us to Jane Ruthven, relict of umquhill Adame Stewart, priour of the Charterhous, for all the dayis of hir lyftyme, of sex chalderis, fyve bollis, ane firlett aittis and ane hundrethe poundis of money, to be pait to hir as efter followis, viz., the saidis sex chalderis, fyve bollis and ane firlott aittis furthe of the thrid of the priorie of Charterhous and the said ane hundreth poundis furthe of the reddiest of the superplus of the thriddis of benefices, as in our said gift of the dait at Striveling Castell, the xj day of Aprill, the yeir of God j^M v^C fourscoir yeiris, at mair lenth is contenit. Nor to the infeftment grantit be us, with avise of our regent for the tyme, to James Hector, of all and haill the half landis of Garvat, with the pertinentis, quhilkis pertenit to umquhill Williame Maitland, sumtyme of Lethingtoun, youngar, and throw his foirfaltour become in our handis as in the said infeftment at mair lenthe is contenit.